1. Nkaambo nzi ncotweelede kukomba buyo Jehova alikke?

TWEELEDE kukomba buyo Jehova alikke nkaambo ngowakatulenga alimwi akutupa buumi. (Ciy. 4:11) Pele tacili cuuba-uba kucita boobo. Nokuba kuti tulamuyanda alimwi akumulemeka Jehova, zintu zimwi zilakonzya kutulesya kukomba buyo nguwe alikke. Tweelede kumvwisya cikonzya kupa kuti cibe boobo. Pele cakusaanguna, atubone twaambo tubikkilizyidwe mukukomba buyo Jehova alikke.

2. Kweelana alugwalo lwa Kulonga 34:14, ncinzi ncotuyoocita ikuti katulyaabide cakumaninina kuli Jehova?

² Mu Bbaibbele, kulyaaba kuli Leza caamba kumuyanda kapati. Ikuti katulyaabide cakumaninina kuli Jehova, tunookomba buyo nguwe alikke. Tatukazumizyi muntu uuli woonse naa cintu cili coonse kutulesya kukomba buyo nguwe alikke.—Amubale Kulonga 34:14.

3. Nkaambo nzi kulyaaba kwesu kuli Jehova ncocitacili cintu ncotucita buyo cakwiinzya mulawo?

³ Kulyaaba kwesu kuli Jehova tacili cintu ncotucita buyo cakwiinzya mulawo. Nkaambo nzi? Nkaambo kakuti kuyeeme atwaambo twamasimpe ntotwakaiya kujatikizya nguwe. Twakabukkomanina kapati bube bwakwe butaliboteli. Tulizyizyi zintu nzyayanda Jehova anzyasulide alimwi tuzibona mbubonya mbwazibona. Tulaazyi makanze aakwe alimwi tulacita kweelana amakanze ngajisi kulindiswe. Tulakkomana kapati kuti watupa coolwe cakuba balongwe bakwe. (Int. 25:14) Zyoonse nzyotwiiya kujatikizya Mulengi wesu zitupa kuswena kulinguwe.—Jak. 4:8.

4. (a) Ino ncinzi Diabolosi ncabelesya kutegwa anyonganye kulyaaba kwesu kuli Jehova? (b) Ncinzi ncotutiilange-lange mucibalo eeci?

⁴ Diabolosi ngomweendelezi wabweende bwazintu oobu. Ulabubelesya kutegwa atupe kubona zintu nzyobayandisya bantu  kuti nzeziyandika kapati mubuumi bwesu alimwi upa kuti kacitukatazya kuzunda kulombozya zintu eezyi. (Ef. 2:1-3; 1Joh. 5:19) Makanze aakwe ngakunyonganya luyando ndotujisi kuli Jehova kutegwa tutalyaabi cakumaninina kulinguwe. Mucibalo eeci tulabandika nzila zyobilo Diabolosi mwakonzya kucita boobo. Yakusaanguna, ulatusunka kuyandisya mali. Yabili, ulasola kutuyunga kutegwa katusala zyakulikondelezya zibyaabi.

5. Nkaambo nzi ncotweelede kukacenjelela kakole kakuyandisya mali?

⁵ Toonse tulayanda kujana cakulya cikkwene, zisani zyakusama iziyandika alimwi amaanda mabotu mwakukkala. Nokuba boobo, tweelede kukatantamuka kakole kakuyandisya mali. Bantu banji mazuba aano “bayandisya mali” alimwi azintu izikonzya kuulwa amali. (2Tim. 3:2) Jesu wakalizyi kuti basikumutobela balakonzya kusunkwa kuyandisya mali. Aboobo wakaamba kuti: “Taakwe uukonzya kubelekela basimalelo bobilo, nkaambo uyoosula umwi akuyanda umbi, naa uyoosyomeka kuli umwi akusampula umbi. Tamukonzyi kubelekela Leza alimwi a Lubono.” (Mt. 6:24) Muntu uukomba Jehova kumwi kabelesya ciindi alimwi anguzu zinji kusola kuba alubono, munzila imwi, inga waambwa kuti usola kubelekela basimalelo bobilo. Muntu ooyo talyaabide cakumaninina kuli Jehova.

6. Ncinzi ncotukonzya kwiiya kumajwi Jesu ngaakaambila mbungano yaku Laodikeya?

⁶ Kumamanino aamwaanda wamyaka wakusaanguna C.E., bantu bamumbungano iyakali mudolopo lya Laodikeya bakali kulisumpula kabati: “Ndilivwubide alimwi ndalijanina lubono lunji alimwi kunyina cintu ncondibulide.” Pele mumeso aa Jehova alimwi a Jesu, ‘bakalipengede, bakali kweetezya, bakali bacete, boofwu alimwi bakali mantanda.’ Jesu wakabapa lulayo, ikutali akaambo kakuba bavwubi, pele akaambo kakuti kuyandisya lubono kwakali kunyonganya cilongwe cabo a Jehova. (Ciy. 3:14-17) Ikuti  naa twabona kuti muuya wakuyandisya lubono watalika kukomena mumoyo wesu, tweelede kubweza ntaamu cakufwambaana akubambulula mizeezo yesu. (1Tim. 6:7, 8) Ikuti naa tiitwacita oobo, inga twaba amyoyo yobilo aboobo Jehova takabutambuli bukombi bwesu. ‘Uuyanda kuti kakombwa buyo nguwe alikke.’ (Dt. 4:24) Ino mbuti mali mbwaakonzya kuba cintu ciyandika kapati mubuumi bwesu?

7-9. Ncinzi ncomwaiya kucikozyanyo camwaalu wazina lya David?

⁷ Amubone cikozyanyo caba David, imwaalu uubeleka canguzu, uukkala ku United States. Baamba kuti bakali kubeleka canguzu kumulimo. Bakasumpulwa akkampani mpobakali kubeleka cakuti bakalizyibidwe mucisi coonse akaambo kaluzyibo lunji ndobakajisi mumulimo ngobakali kubeleka. Bakati: “Zimwi ziindi ndakali kuyeeya kuti eezyi zyali zilongezyo kuzwa kuli Jehova.” Pele sena masimpe zyakali zilongezyo?

⁸ Asyoonto-syoonto ba David bakazyiba kuti mulimo wabo wakali kunyonganya cilongwe cabo a Jehova. Bakaamba kuti: “Lyamiswaangano alimwi buya amumulimo wamumuunda, ndakali kuyeeya buyo mapenzi aakumulimo. Ndakali kujana mali manji, pele ndakali kutyompwa kapati alimwi twakatalika kuba amapenzi mulukwatano lwesu.”

⁹ Ba David bakabona kuti bakeelede kusala ncobakeelede kubikka mubusena bwakusaanguna. Bakati: “Ndakabikkila maano kutegwa ndibambulule bukkale bwangu.” Ba David bakali kuyanda kucinca kujatikizya mbobakeelede kunoobeleka, aboobo bakaambila basikubalemba mulimo kujatikizya makanze ngobakajisi. Ino ncinzi cakacitika? Bakatandwa mulimo! Ino bakacita buti? Bakati: “Buzuba bwakatobela, ndakalembela mulimo wabupainiya bwakugwasyilizya kwaciindi cilamfwu.” Kutegwa kabacikonzya kujana zintu nzyobayandika, ba David abakaintu babo bakatalika kubeleka mulimo wakusalazya.  Nokwakainda ciindi, bakatalika mulimo wabupainiya bwaciindi coonse mpoonya kumbele abalo bakaintu babo bakabasangana. Banabukwetene aaba bakasala kubeleka mulimo wakumubili bantu banji ngobabona kuti ngwaansi kapati, pele kunyina nobabikkila maano kumusyobo wamulimo ngobabeleka, ncobayanda buyo nkujana mali aakuligwasya. Nokuba kuti lino bajana mali masyoonto kapati baayezyanisya amali ngobakali kujana amwezi balajana mali aakuula buyo zintu nzyobayandika. Bayanda kubikka Jehova mubusena bwakusaanguna, alimwi balibonena Jehova mbwabagwasya aabo babikka ziyandika zya Bwami mubusena bwakusaanguna.—Mt. 6:31-33.

10. Mbuti mbotukonzya kuukwabilila moyo wesu?

¹⁰ Kufwumbwa naa tulijisi zintu zinji zyakumubili naa pe, tweelede kuukwabilila moyo wesu. Mbuti mbotukonzya kucita oobo? Mutabi aamuuya wakuyandisisya mali. Kuyungizya waawo, mutalekeli mulimo wanu wakumubili kuba mubusena bwakusaanguna muciindi camulimo wanu kuli Jehova. Mbuti mbomukonzya kuzyiba kuti naa muli mubukkale buli boobu? Njeeyi mibuzyo imwi njomukonzya kulibuzya: ‘Sena kanji-kanji ndiyeeya buyo mulimo wangu wakumubili ciindi nondili kumiswaangano naa mumulimo wamumuunda? Sena lyoonse ndilalibilika ikuti naa ndilijisi mali manji aayoondigwasya kumbele? Sena makani aamali alimwi alubono zileta mapenzi mulukwatano lwesu? Sena inga ndabeleka mulimo wakumubili ooyo bamwi ngobabona kuti ngwaansi kapati kufwumbwa buyo kuti kaundipa ciindi cinji cakubelekela Jehova?’ (1Tim. 6:9-12) Ciindi notulanga-langa mibuzyo eeyi, atuyeeye kuti Jehova ulatuyanda alimwi upa cisyomezyo eeci kuli baabo ibalyaabide kulinguwe: “Ziyume zitete, tandikakusiyi pe alimwi tandikakulekelezyi pe.” Nkakaambo kaako mwaapostolo Paulo ncaakalembela kuti: “Ibukkale bwanu butabi bwakuyandisya mali pe.”—Heb. 13:5, 6.

11. Ncinzi cikonzya kucitika kumuntu kweelana azyakulikondelezya nzyasala?

¹¹ Jehova uyanda kuti katukkomana mubuumi, aboobo kulikondelezya kulakonzya kupa kuti katukkomana. Alimwi buya, Ijwi lya Leza lyaamba kuti “kumuntu, kunyina cintu cibotu kwiinda kulya, kunywa alimwi akukkomana mumilimo njabeleka canguzu.” (Muk. 2:24) Nokuba boobo, zyakulikondelezya zinji munyika zilakonzya kutunyonganya. Zyuubya-ubya zyeelelo zyabantu zyakulilemeka, zilakonzya kupa bantu banji kuzumina naa kuyanda zintu nzyolikasya Jwi lya Leza.

12. Kweelana alugwalo lwa 1 Bakorinto 10:21, 22, nkaambo nzi ncotweelede kusala kabotu zyakulikondelezya?

¹² Tuyanda kukomba buyo Jehova alikke,  aboobo tatukonzyi kunoolida “atebulu lya Jehova” alimwi “aatebulu lyamadaimona.” (Amubale 1 Bakorinto 10:21, 22.) Kanji-kanji, ikulya cakulya amuntu umwi ncitondezyo cabulongwe. Ikuti naa twasala zyakulikondelezya izisumpula nkondo, kusyoma mizimo, kutalilemeka mumakani aakoonana, naa zisusi zyanyama alimwi abube bumwi bubyaabi, nkokuti munzila imwi, tulya cakulya cakabambwa abasinkondonyina Leza. Aboobo tulakonzya kulinyonganya lwesu alimwi akunyonganya cilongwe cesu a Jehova.

13-14. Kweelana alugwalo lwa Jakobo 1:14, 15, nkaambo nzi ncotweelede kucenjela kujatikizya zyakulikondelezya nzyotusala? Amupe cikozyanyo.

¹³ Muunzila nzi motukonzya kukozyanisya zyakulikondelezya kucakulya? Ciindi notulya, tulakonzya kusala cakulya iceelede kunjila mukanwa lyesu. Pele kuti twacimena kale, cilatalika kubeleka mumubili wesu, mpoonya mukuya kwaciindi busani bulaba cibeela camubili wesu. Cakulya cili kabotu cilakonzya kuyaka mubili wesu; pele cakulya citali kabotu cilakonzya kunyonganya mubili wesu. Kubeleka kwacakulya mumubili takukonzyi kulibonya mpoonya-mpoonya, pele kulakonzya kulibonya mukuya kwaciindi.

¹⁴ Mbubwenya buyo, ciindi notusala zyakulikondelezya, tulijisi nguzu zyakusala zintu nzyotubikka mumizeezo yesu. Kuzwa waawo, zyakulikondelezya nzyotusala zilakonzya kwiijatikizya mizeezo yesu alimwi amoyo wesu. Zyakulikondelezya izili kabotu zilakonzya kutukatalusya, pele zyakulikondelezya zitali kabotu zilakonzya kutunyonganya. (Amubale Jakobo 1:14, 15.) Kunyonganizyigwa azyakulikondelezya zitali kabotu takukonzyi kulibonya mpoonya-mpoonya, pele kulakonzya kuyoolibonya kumbele. Nkakaambo kaako Bbaibbele litucenjezya kuti: “Mutalyeeni pe: Leza takonzyi kufwubaazyigwa. Nkaambo kufwumbwa cintu muntu ncasyanga, ncencico eeco ncayootebula; nkaambo ooyo uusyanga kweelana azisusi zyamubili wakwe uyootebula kubola kuzwa kumubili wakwe.” (Gal. 6:7, 8) Eelo kaka cilayandika kapati kulindiswe kukaka zyakulikondelezya zili zyoonse izisumpula zintu Jehova nzyasulide!—Int. 97:10.

15. Ncipego nzi cikkomanisya ncaakatupa Jehova?

¹⁵ Bantu ba Jehova banji balakkomana kweebelela JW Broadcasting^®, pulogilamu yesu yasikapepele yaa Intaneti. Mucizyi wazina lya Marilyn wakaamba kuti: “JW Broadcasting yandigwasya kuba muntu uukkomene kapati, alimwi ndilakonzya kwaayeebelela mapulogilamu woonse aajanika alinjiyo nkaambo mabotu. Ikuti ndalendelelwa naa kutyompwa, ndileebelela makani aakulwaizya naa kweebelela cibeela cimwi ca Kukomba Kwamafwumofwumo. Kucita boobo kuyumya cilongwe cangu a Jehova alimwi akuswena aafwaafwi ambunga yakwe. JW Broadcasting yabucinca kapati buumi bwangu.” Sena mulagwasyigwa acipego cizwa kuli Jehova? A JW Broadcasting kulaba mapulogilamu mapya mwezi amwezi, mpoonya alimwi kuli amapulogilamu aazyakuswiilila izyakalekkoodwa alimwi amavidiyo kubikkilizya anyimbo zikulwaizya nzyomukonzya kweebelela akuswiilila kufwumbwa ciindi.

16-17. Nkaambo nzi ncotweelede kulyeendelezya caboola kubulamfwu bwaciindi ncotubelesya muzyakulikondelezya alimwi mbuti mbotukonzya kucita boobo?

¹⁶ Tweelede kubikkila maano ikutali buyo kumusyobo wazyakulikondelezya nzyotukkomanina, pele alimwi abulamfwu bwaciindi ncotubelesya muzyakulikondelezya eezyo. Ikuti naa katutaciti oobo, tulakonzya kubelesya ciindi cinji mukulikondelezya lwesu tobeni ikwiinda ciindi ncotubelesya mukubelekela Jehova. Ibanji cilabayumina kulyeendelezya caboola kubulamfwu bwaciindi ncobabelesya kuzyakulikondelezya. Mucizyi uujisi myaka iili 18 wazina lya Abigail wakaamba kuti: “Kweebelela TV kumangolezya kulandikatalusya ciindi nondamana  kubeleka. Pele ikuti naa tiindabikkila maano, ndilakonzya kutola mawoola manji kandeebelela TV.” Mukwesu uucili mwana-mwana wazina lya Samuel wakati: “Zimwi ziindi ndilatola ciindi cilamfwu kandeebelela tuvidiyo tufwaafwi-fwaafwi tunji aa Intaneti. Ndilatalika kwiinda mukweebelela buyo komwe, pele kakunyina kubikkila maano cilanditolela mawoola otatwe naa one kandeebelela.”

¹⁷ Mbuti mbomukonzya kulyeendelezya caboola kubulamfwu bwaciindi ncomubelesya muzyakulikondelezya? Cakusaanguna mweelede kuzyiba bulamfwu bwaciindi cini ncomubelesya muzyakulikondelezya. Mbuti kuti mwalemba bulamfwu bwaciindi ncomubelesya muzyakulikondelezya munsondo yoonse? Amulembe aakkalenda bulamfwu bwaciindi ncomubelesya kweebelela TV, kulanga zintu aa Intaneti alimwi akuuma mavidiyo geemu afooni. Ikuti naa mwabona kuti mubelesya ciindi cinji kapati, amusole kubamba mulongo. Amulibikkile ciindi cinji cakusaanguna kucita zintu ziyandika kapati, mpoonya akubikka ambali ciindi cakulikondelezya. Kuzwa waawo, amumulombe Jehova kuti amugwasye kuutobela mulongo wanu. Kuti mwacita oobo, munoojisi ciindi alimwi anguzu zyakucita ciiyo canu ca Bbaibbele, kukomba mumukwasyi, kujanika kumiswaangano yambungano alimwi akubelekela Jehova mumulimo wakukambauka akuyiisya. Alimwi buya tamunoolipi mulandu kujatikizya ciindi cinji ncomwakali kubelesya mukulikondelezya.

18-19. Mbuti mbotukonzya kutondezya kuti tulilyaabide kuli Jehova cakumaninina?

¹⁸ Naakamana kulemba kujatikizya mamanino aanyika ya Saatani alimwi anyika mpya iiboola, mwaapostolo Petro wakati: “Nobayandwa, mbwaanga nywebo mulindila zintu eezyi, amusoleke kusikila mpomugolela kuti kumamanino akamujane kamutajisi kabala nokaba kampenda alimwi kamuli muluumuno.” (2Pet. 3:14) Ikuti twalutobela lulayo oolu alimwi akusolekesya kusikila mpotugolela kuzumanana kusalala mukulilemeka alimwi akumuuya, nkokuti tutondezya kuti tulilyaabide cakumaninina kuli Jehova.

¹⁹ Saatani alimwi anyika yakwe bayoosola kutupa kubikka zintu zimbi mubusena bwakusaanguna muciindi cakubikka Jehova mubusena bwakusaanguna. (Lk. 4:13) Pele tacikwe makani abuyumu-yumu mbotukonzya kujana, tatukazumizyi muntu uuli woonse naa cintu cili coonse kutulesya kukomba buyo Jehova alikke. Tulikanzide kupa Jehova cintu iceelela buyo nguwe alikke, nkokuti kukomba buyo nguwe alikke!