1. Ncinzi ncakonzya kucita Jehova kutegwa azuzikizye makanze aakwe?

JEHOVA ulakonzya kuba kufwumbwa mbwayanda kutegwa azuzikizye makanze aakwe. Mucikozyanyo, Jehova Mwiiyi, Sikuumbulizya alimwi Mukambausi. Eeyi mikuli buyo misyoonto akati kamikuli minji njajisi. (Is. 48:17; 2Kor. 7:6; Gal. 3:8) Nokuba boobo, kanji-kanji ubelesya bantu kuzuzikizya makanze aakwe. (Mt. 24:14; 28:19, 20; 2Kor. 1:3, 4) Kuyungizya waawo, Jehova ulakonzya kupa uuli woonse akati kesu busongo alimwi anguzu nzyayandika kuti abe kufwumbwa mbwakonzya kutegwa acite kuyanda kwakwe. Eezyi zyoonse zilibikkilizyidwe mubupanduluzi bwazina lya Jehova, kweelana ambobaamba basyaazibwene ibali mbobabede.

2. (a) Nkaambo nzi zimwi ziindi ncotukonzya kuzumbauzya kuti Jehova ulatubelesya? (b) Ino ncinzi ncotutiilange-lange mucibalo eeci?

² Toonse tulayanda kubelesyegwa a Jehova, pele bamwi balakonzya kuzumbauzya naa Jehova ulababelesya. Ino nkaambo nzi? Nkaambo kakuti balimvwa kuti tabakonzyi kucita zyoonse nzyobayanda akaambo kaciimo, bukkale naa zintu nzyobakonzya kucita. Kulubazu lumwi, bamwi balakonzya kulimvwa kukkutila amilimo njobabeleka akuti tabayandiki kuyaambele. Mucibalo eeci, tulabandika kujatikizya Jehova mbwakonzya kugwasya umwi aumwi wandiswe kutegwa azuzikizye makanze aakwe. Mpoonya tulalanga-langa zibalo zyamu Bbaibbele izitondezya Jehova mbwaakabagwasya babelesi bakwe, nkokuti bamaalumi abamakaintu, kukanza alimwi akuba anguzu zyakuzuzikizya mulimo wakwe. Kuyungizya waawo, tulabona ncotweelede kucita kutegwa Jehova atubelesye.

3. Kweelana alugwalo lwa Bafilipi 2:13, mbuti Jehova mbwakonzya kutugwasya kukanza kucita zintu?

³ Amubale Bafilipi 2:13. * Jehova ulakonzya kupa kuti katukanza kucita zintu. Ino mbuti mbwakonzya kucita oobo? Mucikozyanyo, tulakonzya kumvwa kuti muntu umwi mumbungano yesu uyandika lugwasyo naa kuti kuli mulimo umwi uuyandika kucitwa mumbungano. Ambweni baalu balakonzya kubala lugwalo luzwa kuofesi yamutabi ilwaamba kuti kuli cilawo cimwi icibulide. Eeci cilakonzya kutupa kulibuzya kuti, ‘Ino ncinzi ncondikonzya kucita kutegwa ndikagwasyilizye’? Ambweni tulakonzya kupegwa mulimo uukatazya alimwi tatuzyi naa inga twaubeleka kabotu. Twamana kubala cibalo cimwi camu Bbaibbele, ambweni tulakonzya kulibuzya kuti, ‘Mbuti mbondikonzya kucibelesya cibalo eeci kugwasya bamwi?’ Jehova takatusungilizyi kucita cintu cili coonse. Pele ciindi nabona kuti tuleezyeezya kujatikizya ncotukonzya kucita, uyootugwasya kukanza kucita zintu.

4. Mbuti Jehova mbwakonzya kutupa nguzu zyakucita zintu?

⁴ Kuyungizya waawo, Jehova ulakonzya kutupa nguzu zyakucita zintu. (Is. 40:29) Munzila nzi? Ulakonzya kutupa muuya uusalala kutegwa utugwasye kuzicita kabotu zintu nzyotuzyi kale. (Kul. 35:30-35) Kwiinda mumbunga yakwe, Jehova ulakonzya kutuyiisya mbotukonzya kwiibeleka milimo imwi. Ikuti kamutazyi mbomukonzya kuubeleka mulimo umwi, amulombe lugwasyo. Kunze lyaboobo, amulimvwe kwaanguluka kumulomba Taateesu wakujulu imwaabi kuti amupe “nguzu zigambya iziinda zyabantu.” (2Kor. 4:7; Lk. 11:13) Ibbaibbele lilijisi zikozyanyo zinji izitondezya mbwaakabagwasya Jehova bamaalumi abamakaintu kwiinda mukubapa kuti kabakanza alimwi akubapa nguzu zyakucita zintu. Ciindi notulanga-langa zibalo zimwi akati kazyeezyi, amusoleke kuyeeya nzila Jehova mbwakonzya kumubelesya munzila iikozyenye.

5. Ino ncinzi ncotwiiya munzila Jehova mbwaakamubelesya Musa alimwi aciindi naakacita oobo kutegwa afwutule bantu bakwe?

⁵ Jehova wakapa Musa kuba mufwutuli wabana Israyeli. Pele ino ndiilili Jehova naakacita boobo? Sena ndileelyo Musa naakalimvwa kuti uleelela akaambo kakuti “wakayiisyigwa busongo boonse bwabana Egepita.”? (Mil. 7:22-25) Peepe, wakamubelesya ciindi naakamana kumuyiisya kuba muntu uulicesya alimwi mubombe moyo. (Mil. 7:30, 34-36) Jehova wakapa Musa busicamba bwakwaambaula kumbele lyamweendelezi mupati mu Egepita. (Kul. 9:13-19) Ino ncinzi ncotukonzya kwiiya munzila Jehova mbwaakamubelesya Musa alimwi aciindi naakacita boobo? Jehova ulababelesya aabo batondezya bube mbwajisi alimwi ibasyoma nguwe kuti abagwasye.—Flp. 4:13.

6. Ncinzi ncotwiiya munzila Jehova mbwaakabelesya Barizilai kugwasya Mwami Davida?

⁶ Nokwakainda myaka minji, Jehova wakabelesya Barizilai kugwasya Mwami Davida. Davida alimwi abantu bakwe ‘bakafwide nzala, bakalikatede alimwi bakafwide nyota’ ciindi nobakali kutija mwana wa Davida, Abisalomu. Antoomwe abamwi, Barizilai, iwakacembeede aciindi eeco, wakabikka buumi bwakwe muntenda kutegwa agwasye Davida alimwi abaabo mbaakali limwi. Barizilai kunyina naakayeeya kuti Jehova tacimubelesyi akaambo kakuti wakalicembeede. Muciindi caboobo, wakalyaaba kubelesya ncaakajisi kutegwa agwasye babelesi ba Leza ibakali kuyandika lugwasyo. (2Sam. 17:27-29) Ino ncinzi ncotwiiya kuliceeci? Tacikwe makani naa tulicembeede, Jehova ulakonzya  kutubelesya kugwasya bakwesu alimwi abacizyi bamucisi cesu naa aabo ibali muzisi zimbi ibabulide. (Tus. 3:27, 28; 19:17) Nokuba kuti tatukonzyi kubagwasya cacigaminina, tulakonzya kusanga mali kumulimo wesu wanyika yoonse kutegwa bakwesu alimwi abacizyi kabagwasyigwa, ciindi nokwayandika lugwasyo.—2Kor. 8:14, 15; 9:11.

7. Ino Jehova wakamubelesya buti Simeoni alimwi ino makani aaya atukulwaizya buti?

⁷ Jehova wakasyomezya Simeoni, imwaalumi uucembeede alimwi uusyomeka iwakali kukkala mu Jerusalemu, kuti tanaakali kuyoofwa katanamubona Mesiya. Kweelede kuti cisyomezyo eeco cakamukulwaizya kapati Simeoni, mbwaanga wakali kulindila Mesiya kwamyaka minji. Jehova wakamulumbula Simeoni akaambo kalusyomo lwakwe alimwi akuliyumya. Bumwi buzuba, “kasololelwa amuuya,” wakanjila mutempele. Omuya wakabona mwana muvwanda Jesu, alimwi Jehova wakamubelesya Simeoni kusinsima kujatikizya mwana ooyu iwakali kuyooba Kristo. (Lk. 2:25-35) Nokuba kuti Simeoni ulangilwa kuti wakafwa Jesu katanatalika mulimo wakwe, wakalumba kapati kuti Jehova wakamubelesya munzila eeyi. Alimwi uyookkomana azintu zinji zibotu kumbele. Munyika mpya, mwaalumi ooyu uusyomeka uyoolibonena zilongezyo nzyobuyooleta bulelo bwa Jesu kumikwasyi yoonse anyika. (Matl. 22:18) Andiswe tulakonzya kukkomana akaambo kacoolwe cili coonse ncatupede Jehova mumulimo wakwe.

8. Mbuti Jehova mbwakonzya kutubelesya mbubwenya mbwaakacita kuli Barnaba?

⁸ Mumwaanda wamyaka wakusanguna C.E., mwaalumi iwakali mwaabi Josefa wakalilyaabide kubelesyegwa a Jehova. (Mil. 4:36, 37) Kweelede kuti Josefa wakalicibwene kuumbulizya bamwi, nkakaambo kaako baapostolo bakamupa zina lyakuti Barnaba, ilyaamba kuti “Mwana Waluumbulizyo.” Mucikozyanyo, ciindi Saulo naakaba Munakristo, bakwesu banji bakali kumuyoowa akaambo kampuwo yakwe yakupenzya bakwesu mumbungano. Pele Barnaba wakamuumbulizya alimwi akumugwasya, aboobo kweelede kuti Saulo wakalumba kapati. (Mil. 9:21, 26-28) Kumbele, baalu bamu Jerusalemu bakeelede kubakulwaizya bakwesu ibakali kulamfwu kapati mbuli ku Antiokeya yaku Siriya. Ino nguni ngobakatuma? Ngu Barnaba! Bakasala kabotu. Mu Bbaibbele twaambilwa kuti Barnaba ‘wakatalika kubakulwaizya boonse kuti bazumanane kukakatila ku Mwami amoyo omwe.’ (Mil. 11:22-24) Mbubwenya buyo amazuba aano, Jehova ulakonzya kutugwasya kuba “mwana waluumbulizyo” ku Banakristoma. Mucikozyanyo, ulakonzya kutubelesya kuumbulizya baabo bakafwidwa bayandwa babo. Ambweni ulakonzya kutukulwaizya kuswaya naa kutuma fooni kumuntu uuciswa naa uutyompedwe kutegwa tumuumbulizye kwiinda mumajwi masyoonto aaluzyalo. Sena muyoolekela Jehova kuti amubelesye mbubwenya mbwaakabelesya Barnaba?—1Tes. 5:14.

9. Ncinzi ncotwiiya munzila Jehova mbwaakagwasya mukwesu Vasily kuba mweembezi wakumuuya uucibwene?

⁹ Jehova wakagwasya mukwesu wazina lyakuti Vasily kuba mweembezi wakumuuya uucibwene. Ciindi ba Vasily nobakaba baalu kabajisi myaka iili 26, bakali kulimvwa kuti tiibakajisi luzyibo lunji lwakucikonzya kugwasya bakwesu alimwi abacizyi, kwaambisya aabo ibakajisi buyumuyumu. Nokuba boobo, bakayiisyigwa kuzwa kubaalu basimide alimwi akwiinda mu Cikolo Camulimo wa Bwami. Ba Vasily bakabeleka canguzu kutegwa bayaambele. Mucikozyanyo, bakalemba mulongo wambaakani zisyoonto-syoonto. Ciindi nobakali kuzuzikizya mbaakani imwi aimwi, aasyoonto-syoonto buyoofwu bwabo bwakali kuyaabumana. Lino baamba kuti: “Izyakali kundiyoosya kuciindi eeco, lino zyenzindiletela lukkomano lunji kapati. Ciindi Jehova nandigwasya kujana lugwalo lweelela kuumbulizya  mukwesu naa mucizyi mumbungano, cindipa kukkutila kapati.” Bakwesu, ikuti mbubwenya mbuli ba Vasily mwalyaaba kuli Jehova kuti amubelesye, ulakonzya kumupa busongo bwakulanganya mikuli mipati mumbungano.

10. Ncinzi Abigayeli ncaakacita alimwi ino twiiya nzi kucikozyanyo cakwe?

¹⁰ Davida alimwi abaalumi bakwe ibakali kuyaabutandaanizyigwa a Mwami Saulo, bakali kuyandika lugwasyo. Bamaalumi aaba bakalomba mwaalumi wakavwubide kapati wazina lya Nabala kuti abape cakulya cisyoonto, nkokuti cili coonse ncaakajisi. Bakalimvwa kwaanguluka kumulomba akaambo kakuti bakali kukwabilila matanga aakwe aciindi cimwi munkanda. Pele mwaalumi ooyu uuliyanda wakakaka kubapa cintu cili coonse. Eeci cakamunyemya kapati Davida cakuti wakayanda kumujaya Nabala alimwi abaalumi bakwe boonse. (1Sam. 25:3-13, 22) Nokuba boobo, mukaintu wa Nabala, wazina lya Abigayeli wakali mubotu alimwi wakali musongo. Cabusicamba kapati, wakawida kumaulu aa Davida akumukombelezya kuti atamujayi Nabala antoomwe abaalumi bakwe. Cabupampu wakakulwaizya Davida kuti makani oonse aasiye mumaanza aa Jehova. Majwi aa Abigayeli aakulibombya alimwi antaamu yabupampu njaakabweza zyakamunjila kapati mumoyo Davida. Wakazyiba kuti Abigayeli wakatumidwe aa Jehova. (1Sam. 25:23-28, 32-34) Abigayeli wakajisi bube bubotu ibwakapa kuti Jehova amubelesye. Mbubwenya buyo, bacizyi Banakristo ibatondezya bupampu alimwi abusongo balakonzya kubelesyegwa a Jehova kuyumya-yumya mikwasyi yabo alimwi abamwi mumbungano.—Tus. 24:3; Tit. 2:3-5.

11. Ncinzi ncobakacita bana basimbi ba Salumu alimwi ino mbaani mazuba aano ibali mukubaiya?

¹¹ Nokwakainda myaka minji, bana basimbi ba Salumu bakali akati kabaabo Jehova mbaakabelesya kutola lubazu mukuyakulula bwaanda bwa Jerusalemu. (Neh. 2:20; 3:12) Nokuba kuti bausyi bakali basilutwe, bana basimbi ba Salumu bakalilibambilide kuubeleka mulimo ooyo iwakali kukatazya alimwi iwakali kubikka buumi muntenda. (Neh. 4:15-18) Eelo kaka bakaliindene kapati abasololi bana Tekowa, aabo “bakakaka kubeleka mulimo”! (Neh. 3:5) Alimwi amweezyeezye buyo mbobakakkomana bana basimbi ba Salumu ciindi mulimo ooyo nowakamana mumazuba buyo aali 52! (Neh. 6:15) Mbubwenya buyo amazuba aano, bacizyi ibalisungwide balakkomana kubeleka milimo yaalubazu iisetekene, mbuli kuyaka alimwi akubambulula mayake aabidwe kuli Jehova. Luzyibo lwabo, busungu alimwi akusyomeka zilayandika kapati kutegwa mulimo ooyu uzwidilile.

12. Mbuti Jehova mbwakonzya kutubelesya mbubwenya mbwaakacita kuli Tabita?

¹² Jehova wakapa Tabita “kucitila bamwi milimo mibotu minji alimwi akupa zipego zyaluse,” kwaambisya bamukabafwu. (Mil. 9:36) Akaambo kabwaabi bwakwe alimwi aluse, banji bakamulila naakafwa. Pele bakakkomana kapati ciindi mwaapostolo Petro naakamubusya. (Mil. 9:39-41) Ino ncinzi ncotwiiya kuli Tabita? Kufwumbwa naa tuli bana naa bapati, baalumi naa bakaintu, tulakonzya kubelesyegwa a Jehova kugwasya bakwesu abacizyi.—Heb. 13:16.

13. Mbuti mucizyi iwakali ansoni wazina lya Ruth mbwaakabelesyegwa a Jehova alimwi ino ncinzi ncaakaamba?

¹³ Mucizyi iwakali ansoni kapati wazina lya Ruth wakali kuyanda kuba misyinali. Ciindi naakacili mwana, wakali kuunka kuŋanda aŋanda, kayaabumwaya matulakiti cakufwambaana. Mucizyi ooyu wakati: “Ndakali kuukkomanina kapati mulimo ooyu.” Nokuba boobo, kubandika abantu cacigaminina kujatikizya Bwami bwa Leza cakali kumukatazya. Nokuba kuti wakali ansoni, mucizyi ooyu wakaba mupainiya  waciindi coonse ciindi naakakkwanya myaka iili 18. Mu 1946, wakanjila cikolo ca Watchtower Bible School of Gilead alimwi kumbele wakabeleka kucisi ca Hawaii aca Japan. Jehova wakamubelesya kapati kwaambilizya makani mabotu mumasi aaya. Nokwakainda myaka iitandila ku 80 kababeleka mumulimo ooyu, ba Ruth bakati: “Jehova wali kundiyumya lyoonse. Wandigwasya kuzunda penzi lyakufwa nsoni. Ndilisinizyide kuti Jehova ulakonzya kumubelesya muntu uuli woonse uusyoma mulinguwe.”

14. Kweelana alugwalo lwa Bakolose 1:29, ncinzi ncotweelede kucita kutegwa tubelesyegwe a Jehova?

¹⁴ Kuzwa kaindi, Jehova wali kupa babelesi bakwe kuti bazuzikizye milimo yiindene-indene. Ino Jehova uyoomupa kuti mube buti? Zyoonse ziyeeme aambomulyaabide kubeleka canguzu. (Amubale Bakolose 1:29.) Ikuti mwalyaaba kubelesyegwa, Jehova ulakonzya kumupa kuba mukambausi musungu, mwiiyi uucibwene, sikuumbulizya uucibwene, mubelesi uucibwene, mulongwe uugwasya naa kumupa kuba kufwumbwa mbwayanda kutegwa azuzikizye makanze aakwe.

15. Kweelana alugwalo lwa 1 Timoteyo 4:12, 15, ino ncinzi bakubusi mazuba aano ncobeelede kumulomba Jehova kuti abagwasye?

¹⁵ Mbuti kujatikizya bakwesu bakubusi ibayaabukomena? Kuyandika baalumi ibalaanguzu kapati kutegwa bapegwe mikuli iiyungizyidwe kabali bakutausi. Mumbungano zinji, baalu mbanji kwiinda bakutausi. Nobakubusi, sena inga tiimwabeleka canguzu kutegwa mupegwe mikuli iiyungizyidwe mumbungano? Zimwi ziindi bakwesu bamwi balakonzya kwaamba kuti, “Ndilikkomene kale kubeleka kandili buyo sikumwaya musungu.” Ikuti naa mbomulimvwa oobo, amumulombe Jehova kuti amugwasye kubeleka canguzu kutegwa mweelele kuba bakutausi alimwi akumupa nguzu zyakucita zyoonse nzyomukonzya mumulimo wakwe. (Muk. 12:1) Lugwasyo lwanu lulayandika!—Amubale 1 Timoteyo 4:12, 15.

16. Ncinzi ncotweelede kumulomba Jehova alimwi nkaambo nzi?

¹⁶ Jehova ulakonzya kumupa kuba kufwumbwa mbwayanda kutegwa azuzikizye makanze aakwe. Aboobo amumulombe kuti amupe kukanza kucita mulimo wakwe alimwi anguzu nzyomuyandika. Kufwumbwa naa mucili bakubusi naa bapati, amucibelesye ciindi ncomujisi, nguzu zyanu alimwi aluzyibo lwanu kutegwa mumulemeke Jehova lino. (Muk. 9:10) Mutalekeli kuyoowa naa kulitenga kuti zimupe kwiindwa zyoolwe zitaliboteli zyakucita zyoonse nzyomukonzya mumulimo wa Jehova. Eelo kaka ncoolwe citaliboteli kucita kufwumbwa ncotukonzya kutegwa tupe Taateesu siluyando bulemu bumweelede!