SIKULANGA mbobuca wapima akubona guwo liyoosya kapati kaliboola kubusena ikuli bantu banji. Akaambo kakuti ulabikkila maano kujatikizya bukwabilizi bwabantu, wasolekesya kucita kufwumbwa ncakonzya kubacenjezya kalitanasika guwo.

Mbubwenya buyo, Jehova lino uli mukucenjezya bantu boonse munyika kujatikizya “guwo” liyoosya kapati kwiinda cintu cili coonse ncobakonzya kumvwa bantu kuli basikulanga mbobuca. Ino mbuti Jehova mbwacita oobo? Alimwi nkaambo nzi ncotukonzya kwaamba kuti ulabapa ciindi cinji bantu cakuti babweze ntaamu kujatikizya kucenjezya ooko? Kutegwa tujane bwiinguzi kumibuzyo eeyi, atusaangune kulanga-langa kucenjezya kumwi Jehova nkwaakapa kaindi.

Kaindi Jehova wakacenjezya kujatikizya “maguwo” aaindene-indene, naa lubeta, oolo ndwaakali kuyooletela baabo ibakali kutyola milawo yakwe acaali. (Tus. 10:25; Jer. 30:23) Mubukkale bumwi abumwi, wakabacenjezya kakucili ciindi bantu aabo bazangi, akubaambila ncobakeelede kucita kutegwa kabamumvwida. (2Bam. 17:12-15; Neh. 9:29, 30) Kutegwa abagwasye bantu kucinca, kanji-kanji Jehova wakali kubelesya babelesi bakwe basyomeka baanyika, kwaambilizya mbeta zyakwe alimwi akugwasya bantu kuzyiba kuti bakeelede kubweza ntaamu cakufwambaana.—Am. 3:7.

Nowa ncikozyanyo camuntu umwi ngwaakabelesya Leza kwaambilizya lubeta lwakwe. Kwamyaka minji, cabusicamba Nowa wakacenjezya bantu ibatakali kulilemeka alimwi ibakali basinkondo mumazuba aakwe kujatikizya Zambangulwe lyanyika yoonse ilyakali kuboola. (Matl. 6:9-13, 17) Kuyungizya waawo, wakabaambila kujatikizya ncobakeelede kucita kutegwa bakafwutuke ku Zambangulwe. Nowa wakakambauka cabusungu cakuti kumbele wakazyikwiitwa kuti “mukambausi wabululami.”—2Pet. 2:5.

Nokuba kuti Nowa wakabeleka canguzu kucenjezya bantu kalitanasika Zambangulwe, tiibakaubikkila maano mulumbe wakwe ngwaakapegwa a Leza. Bakatondezya kuti tiibakajisi lusyomo naaceya. Akaambo kaceeci, bakafwa ciindi Zambangulwe ‘nolyakaboola akubatola boonse.’ (Mt. 24:39; Heb. 11:7) Mamanino aabo naakasika, tiibakapa cilitamizyo cakuti Leza kunyina naakabacenjezya.

Ziindi zimwi, Jehova wakali kucenjezya bantu kakuceede buyo ciindi cisyoonto kuti “guwo” naa lubeta lwakwe lutalike. Nokuba boobo, wakali kubikkila maano kubona kuti aabo ibakajatikizyidwe bapegwa ciindi cakubweza ntaamu. Mucikozyanyo, wakabacenjezya kakucili ciindi bantu bamu Egepita yansiku kujatikizya Zipenzyo Zili 10 izyakabasikila. Aciindi cimwi, Jehova wakatuma Musa a Aroni kuti bacenjezye Farao alimwi ababelesi bakwe kujatikizya cipenzyo caciloba, nkokuti civwulamabwe icakanyonyoona kapati. Mbwaanga civwulamabwe cakali kuyootalika mubuzuba butobela, sena Leza wakabapa ciindi cinji kutegwa bajane kwakuccijila? Bbaibbele lyaamba kuti “Muntu uuli woonse iwakayoowa jwi lya Jehova akati kababelesi ba Farao wakafwambaana kuyobolola babelesi bakwe azivwubwa zyakwe akuzinjizya mumaanda, pele muntu uuli woonse iwatakayoowa jwi lya Jehova wakalekela babelesi bakwe azivwubwa zyakwe musyokwe.” (Kul. 9:18-21) Cilasalala kuti Jehova wakacenjezya kakucili ciindi, cakuti aabo ibakabweza ntaamu cakufwambaana tiibakajatikizyigwa acivwulamabwe eeco.

Mbubwenya buyo, Farao alimwi ababelesi bakwe bakacenjezyegwa kacitanatalika cipenzyo canamba 10. Nokuba boobo, akaambo kabufwuba-fwuba tiibakakubikkila maano kucenjezya ooko. (Kul. 4:22, 23) Akaambo kaceeci, bana babo bataanzi bakafwa. Eelo kaka eeci cakali kuusisya kapati! (Kul. 11:4-10; 12:29) Sena cakali kukonzyeka kuli mbabo ikukubikkila maano kucenjezya ooku kakucili ciindi? Inzya cakali kukonzyeka! Cakufwambaana Musa wakabacenjezya bana Israyeli kujatikizya cipenzyo canamba  10 icakali kuboola alimwi wakabaambila ancobakeelede kucita kutegwa bafwutule mikwasyi yabo. (Kul. 12:21-28) Ino bakali bongaye bantu ibakakubikkila maano kucenjezya ooko? Kuyeeyelwa kuti bantu ibasika ku 3 miliyoni, kubikkilizya abana Israyeli alimwi ‘ankamu mpati yabantu bamisyobo-misyobo’ batali bana Israyeli alimwi abana Egepita, bakafwutuka akuzwa mu Egepita.—Kul. 12:38; bupanduluzi buyungizyidwe.

Kweelana ambozitondezya zikozyanyo eezyi, Jehova lyoonse ulabikkila maano kubona kuti bantu bacenjezyegwa kakucili ciindi kutegwa babweze ntaamu. (Dt. 32:4) Nkaambo nzi Leza ncaakali kucitila boobo? Mwaapostolo Petro wakaamba kuti Jehova “tayandi kuti muntu uuli woonse anyonyoonwe, pele uyanda kuti boonse bakonzye kweempwa.” (2Pet. 3:9) Masimpe Leza wakali kubabikkila maano bantu. Wakali kuyanda kuti beempwe alimwi akucinca kalutanasika lubeta lwakwe.—Is. 48:17, 18; Rom. 2:4.

Mbubwenya buyo amazuba aano, bantu boonse beelede kubweza ntaamu kukucenjezya ikuyandika kapati ikuli mukupegwa munyika yoonse. Ciindi naakali anyika, Jesu wakacenjezya kuti bweende bwazintu oobu buyoonyonyoonwa ciindi ‘camapenzi mapati.’ (Mt. 24:21) Kujatikizya lubeta oolo iluli kumbele, Jesu wakapa businsimi ibwakatondezya kabotu-kabotu nzyobakeelede kulangila kubona alimwi azintu izyakali kuyoobacitikila basikumutobela mbocakali kuyaabuswena ciindi eeco. Aboobo Jesu wakapandulula zintu zipati-pati izicitika munyika eezyo nzyotulibonena mazuba aano.—Mt. 24:3-12; Lk. 21:10-13.

Kweelana abusinsimi oobo, Jehova uli mukukulwaizya bantu boonse kuti balibombye kubweendelezi bwakwe ibwaluyando. Ncayanda ncakuti bantu ibamumvwida kabakkomene abuumi bubotu lino alimwi azilongezyo zyakumbele munyika yakwe mpya yabululami. (2Pet. 3:13) Kutegwa abakulwaizye bantu kuba alusyomo muzisyomezyo zyakwe, Jehova wakapa mulumbe uufwutula bantu, nkokuti “makani mabotu aa Bwami,” aayo Jesu ngaakasinsima kuti “ayookambaukwa munyika yoonse kuti bukabe bumboni kumasi oonse.” (Mt. 24:14) Leza wabakamantanya bakombi bakwe bakasimpe kutegwa bape “bumboni” oobu, naa kukambauka mulumbe wa Leza ooyu mumasi aasika ku 240. Jehova uyanda kuti bantu banji babweze ntaamu kujatikizya kucenjezya ooku kutegwa bakafwutuke ‘kuguwo’ lyalubeta lwakwe lululeme.—Zef. 1:14, 15; 2:2, 3.

Aboobo tacidoonekwi buya kuti Jehova ulapa ciindi bantu cakuti babweze ntaamu kujatikizya kucenjezya kwakwe. Bumboni butondezya kuti ulacita oobo lyoonse. Pele mubuzyo uuyandika kapati ngwakuti: Sena bantu bayoobweza ntaamu kukucenjezya kwa Leza nokucili ciindi? Mbotuli batumwa ba Leza, atuzumanane kugwasya bantu banji kusikila mpotugolela kutegwa bakafwutuke mamanino aabweende bwazintu oobu.