1. Mbuti lugwalo lwa 2 Bakorinto 3:1-3 mbolutondezya kuti ncoolwe kugwasya muntu kubbapatizyigwa? (Amubone cifwanikiso icili aacivwumbyo.)

INO MULIMVWA buti ciindi nomubona sikwiiya Bbaibbele uuzwa mucilawo cambungano yanu kabbapatizyigwa? Kwaamba masimpe, mulakkomana kapati. (Mt. 28:19) Alimwi ikuti naa ndinywe mwakali kumuyiisya sikwiiya ooyo mupya, mulakkomana kapati ciindi naabbapatizyigwa! (1Tes. 2:19, 20) Basikwiiya bapya ‘magwalo mabotu aalumbaizya’ mbungano yoonse, kutali buyo baabo ibakali kwiiya ambabo.—Amubale 2 Bakorinto 3:1-3.

2. (a) Mubuzyo nzi uuyandika kapati ngotweelede kulanga-langa, alimwi nkaambo nzi? (b) Ino ciiyo ca Bbaibbele ninzi? (Amubone bupanduluzi buyungizyidwe.)

² Cilakkomanisya kubona kuti myaka yone yainda, mwezi amwezi nyika yoonse, kwali kulipootwa basikwiiya Bbaibbele ibatandila ku 10,000,000 *. Mumyaka njoonya eeyo, basikwiiya Bbaibbele ibainda 280,000 bakali kubbapatizyigwa mwaka amwaka kuba Bakamboni ba Jehova alimwi akuba basikwiiya ba Jesu Kristo bapya. Mbuti mbotukonzya kugwasya mamiliyoni aa Basikwiiya Bbaibbele aaba kutegwa babbapatizyigwe? Kufwumbwa buyo kuti Jehova kacibakkazikila moyo alimwi akubapa coolwe cakuba basikwiiya ba Kristo, tuyanda kucita kufwumbwa  ncotukonzya kutegwa tubagwasye kuyaambele akubbapatizyigwa cakufwambaana. Ciindi cilimanide!—1Kor. 7:29a; 1Pet. 4:7.

3. Ncinzi ncotutiibandike mucibalo eeci kujatikizya kusololela ziiyo zya Bbaibbele?

³ Akaambo kakuti cilayandika kapati kugwasya bantu kuba basikwiiya lino, bamu Kabunga Keendelezya bakabuzya bamumaofesi aamitabi kujatikizya ceelede kucitwa kutegwa basikwiiya Bbaibbele banji bagwasyigwe akweelela kubbapatizyigwa. Mucibalo eeci alimwi acitobela, tulabona ncotukonzya kwiiya kuzwa kubapainiya, bamisyinali alimwi abalangizi bamabazu. * (Tus. 11:14; 15:22) Balapandulula ncobakonzya kucita bamayi ba Bbaibbele alimwi abasikwiiya kutegwa ciiyo ca Bbaibbele cizwidilile. Mucibalo eeci, tulabandika zintu zyosanwe sikwiiya umwi aumwi nzyeelede kucita kutegwa ayelele kubbapatizyigwa. Mbutuli bamayi ba Bbaibbele, tweelede kubagwasya kuzicita zintu eezyi.

4. Ncinzi ncotweelede kuyeeya kujatikizya ciiyo Bbaibbele cicitilwa anze kumwi kamwiimvwi?

⁴ Bunji bwabakwesu alimwi abacizyi balasololela ziiyo zya Bbaibbele anze kumwi kabaimvwi. Nokuba kuti aaya matalikilo mabotu aakupa sikwiiya kuba aluyandisisyo lwakwiiya Bbaibbele, mibandi iili boobu kanji-kanji inga mifwaafwi alimwi buya ambweni taicitwi nsondo ansondo. Kutegwa bayungizye luyandisisyo muli sikwiiya, bakwesu abacizyi bamwi balalomba namba yafooni yasikwiiya ooyo, akumutumina fooni naa kumulembela kagwalo kajisi makani aamu Bbaibbele kabutanasika buzuba mbobakapangana. Balakonzya kuba amibandi eeyi mifwaafwi kwamyezi iili mbwiibede kakunyina kuba aciiyo ca Bbaibbele cisitikide. Sena sikwiiya ulakonzya kuyaambele akubbapatizyigwa ikuti katajani ciindi cinji cakwiiya alimwi katabikkili maano? Peepe.

5. Kweelana alugwalo lwa Luka 14:27-33, ncinzi Jesu ncaakakankaizya icikonzya kutugwasya mumulimo wakugwasya bantu kuba basikwiiya?

⁵ Aciindi cimwi, Jesu wakabelesya cikozyanyo kupandulula zijatikizyidwe mukuba sikwiiya. Wakaamba kujatikizya muntu uuyanda kuyaka ngazi alimwi amwami uuyanda kuunka kunkondo. Jesu wakaamba kuti muntu uuyanda kuyaka weelede ‘kusaanguna kukkala ansi akubona mali aayandika’ kumanizya ngazi eeyo, mpoonya mwami weelede ‘kusaanguna kukkala ansi kuyeeya akulomba lulayo kuli bamwi’ kutegwa abone naa basikalumamba bakwe inga bacikonzya kuzwidilila munkondo eeyo. (Amubale Luka 14:27-33.) Mbubwenya buyo, Jesu wakalizyi kuti muntu uuyanda kuba sikwiiya weelede kuyeeyesya kapati kujatikizya ncocaamba kuba sikumutobela. Akaambo kaceeci,  tweelede kubakulwaizya basikwiiya Bbaibbele kuti katwiiya nsondo ansondo. Mbuti mbotukonzya kucita oobo?

6. Ncinzi ncotukonzya kucita kutegwa tube aziiyo ziyaambele?

⁶ Amutalike kwiinda mukulansya mibandi iicitilwa anze kumwi kamwiimvwi. Ambweni inga mwabandika tupango twamu Bbaibbele ituli mbotubede lyoonse nomwaswaya. Ciindi mukamwiniŋanda naazyibila kuba amibandi milamfwu, inga mwamubuzya naa kuli mpomukonzya kukkala kutegwa muzumanane amibandi yanu. Bwiinguzi mbwakonzya kumupa bulakonzya kutondezya naa ulaaluyandisisyo lwakwiiya Bbaibbele. Kutegwa afwambaane kuyaambele, kwainda ciindi, inga mwamulomba sikwiiya naa inga wayanda kuti kamwiiya ziindi zyobilo ansondo. Nokuba boobo, nzinji zyeelede kucitwa muciindi buyo cakwiiya ciindi comwe naa zyobilo ansondo.

7. Mbuti mwiiyi mbwakonzya kulibambila cakulomya ciiyo cimwi acimwi?

⁷ Mbomuli mwiiyi, mweelede kulibambila cakulomya ciiyo cimwi acimwi kamutanaunka kuyoosololela ciiyo ca Bbaibbele. Inga mwatalika kwiinda mukubala cibalo ncomuyakwiiya alimwi akulanga-langa magwalo. Amutumvwisye twaambo tuli mucibalo. Amulange-lange mutwe wacibalo, tutwe twamakani, mibuzyo, magwalo aalembedwe kuti amubale, zifwanikiso alimwi akulanga-langa mavidiyo apandulula makani ngomubandika. Kamumubikkide mumizeezo sikwiiya, amuyeeye mbomuyoomupandulwida makani munzila ngubauba kutegwa aamvwisye akwaabelesya.—Neh. 8:8; Tus. 15:28a.

8. Ino majwi aamwaapostolo Paulo aali kulugwalo lwa Bakolose 1:9, 10, atuyiisya nzi kujatikizya kupailila basikwiiya Bbaibbele?

⁸ Ciindi nomulibambila, amupaile kuli Jehova kujatikizya nzyayandika sikwiiya. Amumulombe Jehova kuti amugwasye kuyiisya Bbaibbele munzila iiyoomusika amoyo sikwiiya. (Amubale Bakolose 1:9, 10.) Amubone naa kuli makani aali woonse aakonzya kumukatazya kumvwisya sikwiiya naa aayo ngomutazuminani anguwe. Kamuyeeyede kuti makanze aanu ngakumugwasya kutegwa ayelele kubbapatizyigwa.

9. Mbuti mwiiyi mbwakonzya kumugwasya sikwiiya kulibambila ciiyo? Amupandulule.

⁹ Tulijisi lusyomo lwakuti ciiyo ca Bbaibbele icicitwa lyoonse ciyoogwasya sikwiiya kulumba zintu zyoonse Jehova alimwi a Jesu nzyobakamucitila, alimwi uyooba aluyandisisyo lwakwiiya zinji. (Mt. 5:3, 6) Kutegwa ciiyo cimugwasye kapati, sikwiiya weelede kubikkila maano  kumakani ngaiya. Kutegwa mumugwasye kucita boobo, amumupandulwide mbociyandika kulibambila ciiyo cimwi acimwi alimwi akubona mbwakonzya kuzibelesya nzyaiya. Ino inga mwamugwasya buti kulibambila? Inga mwacita oobo kwiinda mukulibambila ciiyo antoomwe anguwe akumutondezya mbokulibambilwa. * Amumutondezye mbokujanwa bwiinguzi bugaminide, alimwi akumugwasya kubona kuti kweenga buyo moomo imuli twaambo tupati-pati naa mizila inga kwamugwasya kufwambaana kububona bwiinguzi. Mpoonya amumwaambile kwiingula mumajwi aakwe. Ikuti naa wacita oobo, mulakonzya kuzyiba naa waamvwisya makani aali muciiyo. Pele kuli acimbi ncomukonzya kumukulwaizya kucita sikwiiya wanu.

10. Nkaambo nzi ncociyandika kubala Bbaibbele abuzuba, alimwi ino ncinzi nceelede kucita sikwiiya kutegwa agwasyigwe ciindi nabala Bbaibbele?

¹⁰ Kunze buyo lyakwiiya nsondo ansondo amwiiyi wakwe, sikwiiya ulakonzya kugwasyigwa kwiinda mukulicitila zintu zimwi abuzuba. Weelede kunoobandika a Jehova. Mbuti mbwakonzya kucita oobo? Kwiinda mukuswiilila alimwi akubandika a Jehova. Ulakonzya kumuswiilila Leza kwiinda mukubala Bbaibbele abuzuba. (Jos. 1:8; Int. 1:1-3) Amumutondezye mbwakonzya kubelesya “Mulongo Wakubala Bbaibbele” uukonzya kusimbwa, uuli aa jw.org. * Kutegwa agwasyigwe kapati ciindi nabala Bbaibbele, amumukulwaizye kuzinzibala kuyeeya nzyolimuyiisya Bbaibbele kujatikizya Jehova alimwi ambwakonzya kuzibelesya nzyabala.—Mil. 17:11; Jak. 1:25.

11. Mbuti sikwiiya mbwakonzya kwiiya kupaila munzila iiluzi, alimwi nkaambo nzi ncayelede kupaila kuli Jehova ciindi aciindi?

¹¹ Amumukulwaizye sikwiiya wanu kubandika a Jehova kwiinda mukupaila abuzuba. Kamupaila mipailo iizwa ansi aamoyo kumatalikilo alimwi akumamanino aaciiyo cimwi acimwi, amumwaambe zina sikwiiya mumipailo eeyo. Ciindi naswiilila mipailo yanu, uyooiya mbwakonzya kupaila kuzwa ansi aamoyo alimwi akuti weelede kupaila kuli Jehova Leza muzina lya Jesu Kristo. (Mt. 6:9; Joh. 15:16) Amweezeezye buyo kubala Bbaibbele abuzuba (kumuswiilila Jehova) alimwi akupaila (kubandika a Jehova) mbokukonzya kumugwasya sikwiiya wanu kuba acilongwe a Leza! (Jak. 4:8) Kuti kacita boobo abuzuba, ciyoomugwasya kuyaambele kumuuya, calo ciyoomupa kulyaaba akubbapatizyigwa.

12. Mbuti mwiiyi mbwakonzya kumugwasya sikwiiya kuba acilongwe a Jehova?

¹² Tuyanda kuti sikwiiya wesu amuzyibe Jehova. Aboobo nzyaiya zyeelede kumusika amoyo kutegwa kazibelesya. Jesu wakali kuyiisya bantu zintu zinji alimwi nzyaakali kubayiisya bakali kuzikkomanina. Pele bantu bakamutobela akaambo kakuti nzyaakabayiisya zyakabasika amoyo. (Lk. 24:15, 27, 32) Sikwiiya weelede kubona Jehova kuti muntu mwini-mwini, ooyo ngwakonzya kuba acilongwe anguwe, alimwi weelede kumubona kuba Usyi, Leza wakwe alimwi mulongwe wakwe. (Int. 25:4, 5) Nomwiiya, amumugwasye sikwiiya kubikkila maano kubube bubotu mbwajisi Leza wesu. (Kul. 34:5, 6; 1Pet. 5:6, 7) Tacikwe makani amubandi ngomubandika, amubikkile maano kubandika kujatikizya mbwabede Jehova. Amumugwasye sikwiiya kulumba bube bubotu mbwajisi Jehova, nkokuti luyando, luzyalo alimwi alweetelelo. Jesu wakaamba kuti ‘mulawo mupati alimwi wakusaanguna’ ngwakuti “weelede kuyanda Jehova Leza wako.” (Mt. 22:37, 38) Amumugwasye sikwiiya wanu kuyanda Jehova.

13. Amupe cikozyanyo cijatikizya mbotukonzya kugwasya sikwiiya ikubona bube bubotu mbwajisi Jehova?

¹³ Mumibandi yanu asikwiiya, amumupandulwide twaambo itupa kuti nywebo kamumuyanda Jehova. Eeci cilakonzya kumugwasya sikwiiya kubona kuti uyandika kumuyanda Jehova alimwi akuba acilongwe anguwe. (Int. 73:28) Mucikozyanyo, sena kuli kaambo mubbuku ndyomwiiya naa mulugwalo ikaamba bube bwa Jehova, nkokuti luyando, busongo, bululami naa nguzu ikamusika amoyo nywebo? Amumwaambile sikwiiya wanu, alimwi azyibe kuti kaambo aako kali akati katwaambo itupa kuti nywebo kamumuyanda Taateesu wakujulu. Kuli acimbi ncayelede kucita sikwiiya Bbaibbele umwi aumwi kutegwa ayelele kubbapatizyigwa.

14. Ino lugwalo lwa Bahebrayo 10:24, 25 lutwaambila nzi kujatikizya miswaangano yambungano? Mbuti miswaangano eeyi mboikonzya kumugwasya sikwiiya Bbaibbele kuyaambele?

¹⁴ Toonse tulayanda kuti basikwiiya besu bayaambele kutegwa beelele kubbapatizyigwa. Nzila iiyandika kapati motukonzya kubagwasya, nkwiinda mukubakulwaizya kujanika kumiswaangano yambungano. Bamayi bacibwene baamba kuti basikwiiya ibafwambaana kutalika kujanika kumiswaangano, balafwambaana kuyaambele. (Int. 111:1) Bamayi bamwi balabaambila basikwiiya babo kuti kutegwa mwiiye zinji kujatikizya Bbaibbele, mweelede kunoojanika kumiswaangano. Amubale Bahebrayo 10:24, 25 antoomwe asikwiiya wanu, alimwi akumupandulwida bubotu mbwayoojana ikuti  kajanika kumiswaangano. Amumutondezye kavidiyo kakuti Ino Ncinzi Cicitika ku Ŋanda ya Bwami? * Amumugwasye kuba amakanze aakutalovwa kumiswaangano.

15. Ncinzi ncotukonzya kucita kutegwa tugwasye sikwiiya kunoojanika kumiswaangano lyoonse?

¹⁵ Ncinzi ncomukonzya kucita ikuti sikwiiya wanu tanabuzuba wajanika kumuswaangano naa kuti tajaniki lyoonse? Calukkomano, amumwaambile ncomwakaiya lyamuswaangano wainda. Eeci inga camukulwaizya muciindi cakwiile kumutamba buyo kumuswaangano. Amumupe Ngazi Yamulindizi naa Kabbuku Kamuswaangano Wabuumi Amulimo Wesu wa Bunakristo, nzyomubelesya kumuswaangano aciindi eeco. Amumutondezye nzyomuyakwiiya nsondo iitobela, alimwi akumubuzya cibeela icamukkomanisya kapati. Ncayoobona alimwi akumvwa kumuswaangano ciindi cakusaanguna ciyoomubotela kapati kwiinda cintu cili coonse ncaakabona akumvwa kumuswaangano wacikombelo cimbi. (1Kor. 14:24, 25) Uyoozyibana abamwi ibajisi cikozyanyo cibotu ncakonzya kwiiya alimwi ibakonzya kumugwasya kuyaambele akweelela kubbapatizyigwa.

16. Ncinzi ciyandika mukusololela basikwiya Bbaibbele kutegwa beelele kubbapatizyigwa?

¹⁶ Mbuti mbotukonzya kusololela ziiyo zya Bbaibbele kutegwa zyeelele kubbapatizyigwa? Tulakonzya kumugwasya sikwiiya umwi aumwi kucibikkila maano ciiyo kwiinda mukumukulwaizya kwiiya nsondo ansondo alimwi akuti kalibambila ciiyo cimwi acimwi. Tuyandika kumukulwaizya kubandika a Jehova abuzuba alimwi akuba acilongwe anguwe. Kuyungizya waawo, tweelede kumukulwaizya kujanika kumiswaangano yambungano. (Amubone kabbokesi kali apeeji 12 kakuti, “ Ncobeelede Kucita Basikwiiya Kutegwa Beelele Kubbapatizyigwa.”) Nokuba boobo, kweelana acibalo citobela mbociyootondezya, kuli zintu zimbi zyosanwe nzyobakonzya kucita bamayi ba Bbaibbele kuti bagwasye basikwiiya kutegwa beelela kubbapatizyigwa.