1. Ino tuzyi buti kuti mulimo wakugwasya bantu kuba basikwiiya ufwutula bantu?

MULIMO wakugwasya bantu kuba basikwiiya ufwutula bantu. Ino tuzyi buti oobo? Ciindi Jesu naakapa malailile ngotubala kulugwalo lwa Matayo 28:19, 20, wakaamba kuti: “Kamuya mukayiisye bantu . . . kuti babe basikwiiya, . . . , akubabbapatizya.” Nkaambo nzi kubbapatizyigwa ncokuyandika? Nkaambo nceelelo cabaabo ibayanda kuyoofwutuka. Muntu uuyanda kubbapatizyigwa weelede kusyoma kuti lufwutuko lulakonzyeka akaambo kakuti Jesu wakatufwida alimwi wakabusyigwa. Nkakaambo kaako mwaapostolo Petro ncaakaambila Banakristonyina kuti: ‘Lubbapatizyo lulamufwutula lino kwiinda mububuke bwa Jesu Kristo.’ (1Pet. 3:21) Aboobo ciindi sikwiiya mupya nabbapatizyigwa, ulaba abulangizi bwakuyoofwutuka.

2. Ino lugwalo lwa 2 Timoteyo 4:1, 2 lwaamba kuti tweelede kuba bamayi bali buti?

² Kutegwa tugwasye bantu kuba basikwiiya, tweelede kuba “aluzyibo mukuyiisya.” (Amubale 2 Timoteyo 4:1, 2.) Nkaambo nzi? Nkaambo Jesu wakatulailila kuti: “Kamuya mukayiisye bantu . . . kuti babe basikwiiya.” Mwaapostolo Paulo wakaambila Timoteyo kuti: ‘Kobikkila maano kapati kukuyiisya kwako. Kakatila kuzintu eezyi, nkaambo kwiinda mukucita boobo uyoolifwutula omwini alimwi abaabo bakuswiilila.’ (1Tim. 4:16) Majwi aaya alabeleka akulindiswe mazuba aano. Mbwaanga kuyiisya kuliswaangene akugwasya bantu kuba basikwiiya, nkokuti tweelede kuyiisya munzila iiluzi.

3. Ncinzi ncotutiibandike mucibalo eeci kujatikizya kusololela ziiyo zya Bbaibbele?

 ³ Tulayiisya bantu banji kasimpe kajanika mu Bbaibbele. Pele mbubwenya mbotwakaiya mucibalo cainda, tuyanda kuzyiba mbotukonzya kugwasya bantu kuba basikwiiya ba Jesu Kristo babbapatizyidwe. Mucibalo eeci, tulabandika zintu zimbi zyosanwe nzyobakonzya kucita bamayi ba Bbaibbele kutegwa bagwasye basikwiiya kweelela kubbapatizyigwa.

4. Nkaambo nzi bamayi ncobeelede kulijata kwaambaula ciindi nobasololela ciiyo ca Bbaibbele? (Amubone abupanduluzi buyungizyidwe.)

⁴ Tulazikkomanina zintu nzyotuyiisya kuzwa mu Jwi lya Leza. Aboobo tulakonzya kusunkwa kwaamba makani manji kujatikizya zintu eezyo. Nokuba boobo, sikusololela Ciiyo ca Ngazi Yamulindizi, Ciiyo ca Bbaibbele Cambungano naa ciiyo ca Bbaibbele caaŋanda, teelede kwaamba zinji. Kutegwa alibelesye kabotu Bbaibbele ciindi nayiisya, mwiiyi weelede kulijata kwaambaula, kutasola kupandulula makani woonse ngazyi kujatikizya cibalo naa kaambo kamwi kamu Bbaibbele. * (Joh. 16:12) Amweezyanisye luzyibo lwamu Bbaibbele ndomwakajisi ciindi nomwakabbapatizyigwa alimwi aloolo ndomujisi lino. Ambweni kuciindi eeco mwakazyi buyo njiisyo zyantalisyo. (Heb. 6:1) Cakamutolela myaka minji kutegwa mube aluzyibo ndomujisi lino, aboobo mutasoli kumuyiisya zintu zyoonse nzyomuzyi sikwiiya mupya.

5. (a) Kweelana alugwalo lwa 1 Batesalonika 2:13, ncinzi ncotuyanda kuti sikwiiya amvwisye kuzwa kuciiyo cakwe? (b) Mbuti mbotukonzya kumukulwaizya sikwiiya kwaambila bamwi makani ngaiya?

⁵ Tuyanda kuti sikwiiya azyibe kuti zintu nzyaiya zizwa mu Bbaibbele. (Amubale 1 Batesalonika 2:13.) Ino mbuti mbotukonzya kucita boobo? Amumukulwaizye sikwiiya kwaambila bamwi zintu nzyaiya. Muciindi cakuti lyoonse ndinywe mupandulula magwalo, amumulombe kuti awalo kapandulula. Amumugwasye sikwiiya kubona kuti Jwi lya Leza lilakonzya kumugwasya cacigaminina. Amumubuzye mibuzyo iikonzya kumupa kwaamba mbwayeeya alimwi ambwalimvwa kujatikizya magwalo. (Lk. 10:25-28) Mucikozyanyo, amumubuzye kuti: “Mbuti lugwalo oolu mbolwamugwasya kubona bube bwa Jehova bumwi?” “Mbuti mbomukonzya kugwasyigwa akasimpe kamu Bbaibbele aaka?” “Ino mwalimvwa buti kujatikizya makani ngomwaiya?” (Tus. 20:5) Ciyandika kapati, takuli kuvwula kwamakani ngazyi sikwiiya, pele mbwaayanda alimwi ambwaabelesya makani aayo.

6. Nkaambo nzi ncociyandika kuunka asikumwaya uucibwene kuyoosololela ciiyo ca Bbaibbele?

⁶ Ciindi nomusololela ciiyo ca Bbaibbele, sena  kuli ziindi nomuunka abasikumwaya bacibwene kuyiisya? Kuti naa mulacita oobo, inga mwabalomba kuti bamwaambile nzyobabona ciindi nimwali kusololela ciiyo akubona naa mwali kulibelesya Bbaibbele. Kuti kamuyanda kuba mwiiyi uucibwene, mweelede kulicesya. (Amweezyanisye Milimo 18:24-26.) Mwamana, amumubuzye sikumwaya uucibwene kuti amwaambile naa sikwiiya ulazimvwa nzyaiya. Alimwi mulakonzya kumulomba sikumwaya ooyo kuti kasololela ciiyo eeco ciindi nomutako kwansondo yomwe naa kwiinda waawo. Eeco ciyoopa kuti ciiyo cizumanane alimwi ciyoomugwasya sikwiiya kubona mbociyandika ciiyo. Mutanooyeeyi kuti ciiyo “ncicanu” alimwi akuti kunyina uukonzya kucisololela. Amana buya, muyanda kuti sikwiiya ayaambele alimwi akuzumanana kwiiya zinji.

7. Ncinzi iciyoomugwasya sikwiiya kuzikkomanina nzyaiya?

⁷ Sikwiiya weelede kubona kuti mulaziyanda alimwi akuzisyoma nzyoliyiisya Bbaibbele. (1Tes. 1:5) Aboobo ulalangilwa kuti uyoozikkomanina kapati nzyaiya. Ikuti kacikonzyeka, amumwaambile mbomwagwasyigwa nywebo kumugama akaambo kakupona kweelana anjiisyo zyamu Bbaibbele. Mpoonya uyoobona kuti Bbaibbele lilijisi busolozi bubotu ibukonzya kumugwasya awalo.

8. Ncinzi cimbi ncomukonzya kucita kutegwa mugwasye sikwiiya Bbaibbele, alimwi nkaambo nzi ncomweelede kucita boobo?

⁸ Ciindi nomwiiya Bbaibbele, amumwaambile sikwiiya wanu zikozyanyo zyabantu ibakajisi buyumuyumu mbwajisi alimwi ambobakabuzunda. Mulakonzya kuunka amukwesu naa mucizyi wamumbungano uujisi cikozyanyo icikonzya kumugwasya sikwiiya. Kunze lyaboobo, mulakonzya kujana zyakuluula zikulwaizya aa jw.org mumulongo wazibalo zyakuti “Ibbaibbele Lilakonzya Kubacinca Bantu.” * Zibalo zili boobu alimwi amavidiyo ziyoomugwasya sikwiiya wanu kubona mbocigwasya kutobela njiisyo zyamu Bbaibbele mubuumi bwakwe.

9. Mbuti mbomukonzya kumukulwaizya sikwiiya wanu kwaambila banamukwasyi alimwi abalongwe zintu nzyaiya?

⁹ Ikuti sikwiiya wanu ulikwete naa kukwatwa, sena ooyo ngobakwetene limwi awalo ulaiya Bbaibbele? Ikuti naa taiyi, amumutambe kumusangana ciindi nomwiiya. Amumukulwaizye sikwiiya wanu kwaambila banamukwasyi naa balongwe zintu nzyaiya. (Joh. 1:40-45) Mbuti  mbomukonzya kucita oobo? Mulakonzya kumubuzya kuti: “Mbuti mbomukonzya kukapandulula kaambo aaka kubanamukwasyi?” Naa kuti, “Ndugwalo nzi ndomukonzya kubelesya kusinizya kaambo aaka kumulongwe wanu?” Kwiinda mucita boobu, mugwasya sikwiiya kuba mwiiyi. Ikuti naa wacikonzya, ulakonzya kutalika kuunka mumulimo wamumuunda kali sikumwaya uutanabbapatizyigwa. Mulakonzya kumubuzya naa kuli umwi ngwazyi uuyanda kwiiya Bbaibbele. Ikuti kaliko, cakufwambaana amumuswaye naa kumutumina fooni muntu ooyo akupanga bubambe bwakutalika kwiiya anguwe. Amumutondezye kavidiyo kakuti, Ino Ciiyo ca Bbaibbele Cicitwa Buti? *

10. Kweelana amajwi aali kulugwalo lwa 1 Batesalonika 2:7, 8, mbuti mwiyi mbwakonzya kwiiya cikozyanyo ca Paulo?

¹⁰ Bamayi beelede kubabikkila maano basikwiiya babo. Atubabone kuti bayooba bakwesu naa bacizyi kumbele. (Amubale 1 Batesalonika 2:7, 8.) Tacili cuuba-uba kucileka kumvwana abalongwe bamunyika alimwi akucinca bukkale bwabo kutegwa babelekele Jehova. Tweelede kubagwasya kujana balongwe beni-beni mumbungano. Amube balongwe babasikwiiya banu kwiinda mukujana ciindi cakuyanzana ambabo ikutali buyo ciindi nomwiiya Bbaibbele pele amuziindi zimwi buyo. Mulakonzya kubatumina fooni, kubalembela kagwalo, naa kubaswaya buya mazuba ngomutaiyi, eeci ciyootondezya kuti mulababikkila maano.

11. Ino ncinzi ncotuyanda kuti basikwiiya bajane mumbungano, alimwi nkaambo nzi?

¹¹ Basikale bakati: “Mulonga uvwula bunkumu-nkumu,” icaamba kuti “mbungano yoonse ilijatikizyidwe mukugwasya muntu kuba sikwiiya.” Nkakaambo kaako bamayi bacibwene balabazyibya basikwiiya babo kuli bamwi mumbungano kutegwa babagwasye kuyumya cilongwe cabo a Jehova. Basikwiiya Bbaibbele aaba balakonzya kukkomana kuyanzana abantu ba Leza, balo ibakonzya kubagwasya ciindi nobajana mapenzi. Tuyanda kuti sikwiiya umwi aumwi kalimvwa kuti uzulilwa mumbungano alimwi akuti ncibeela camukwasyi wesu wakumuuya. Tuyanda kuti sikwiiya aumwi akwelelezyegwe aluyando lwabunyina lwa Bunakristo. Eeci inga camugwasya sikwiiya kuleka kuyanzana abantu batakonzyi kumugwasya kuyanda Jehova. (Tus. 13:20) Ikuti bantu mbaakali kuyanzana limwi kaindi bacileka kumvwana anguwe, uyoozyiba kuti ulakonzya kujana balongwe beni-beni mumbunga ya Jehova.—Mk. 10:29, 30; 1Pet. 4:4.

12. Ino nkaambo nzi ncotweelede kunoobandika asikwiiya makani aakulyaaba kuli Jehova alimwi akubbapatizyigwa?

¹² Mweelede kunoobandika mbociyandika kuti muntu alyaabe kuli Jehova alimwi akubbapatizyigwa. Amana buya, makanze aakwiiya Bbaibbele amuntu ngakumugwasya kubelekela Jehova alimwi akubbapatizyigwa. Kwainda myezi misyoonto kuzwa nitwatalika kwiiya Bbaibbele alimwi akuti sikwiiya watalika kuswaangana, weelede kuzyiba kuti makanze aakumuyiisya Bbaibbele ngakumugwasya kuti abe umwi wa Bakamboni ba Jehova.

13. Nzintu nzi nzyayelede kucita sikwiiya Bbaibbele kutegwa ayelele kubbapatizyigwa?

¹³ Kuli zintu zinji nzyayelede kucita sikwiiya Bbaibbele uuyanda kubbapatizyigwa! Cakusaanguna, sikwiiya weelede kumuzyiba akumuyanda Jehova alimwi akuba alusyomo mulinguwe. (Joh. 3:16; 17:3) Mpoonya sikwiiya ulaba acilongwe a Jehova alimwi abakwesu abacizyi mumbungano. (Heb. 10:24, 25; Jak. 4:8) Mukuya kwaciindi, sikwiiya ulaileka micito mibyaabi alimwi akweempwa kuzibi zyakwe. (Mil. 3:19) Kumane, lusyomo lwakwe luyoomukulwaizya kwaambila bamwi nzyasyoma. (2Kor. 4:13) Mpoonya ulalyaaba kuli Jehova akutondezya kulyaaba kwakwe kwiinda mukubbapatizyigwa. (1Pet. 3:21; 4:2) Eelo kaka oobu mbuzuba bukkomanisya kubantu boonse! Ciindi sikwiiya naazwidilila kucita zintu nzyayelede kutegwa ayelele kubbapatizyigwa, amuzumanane kumulumbaizya alimwi akumukulwaizya kuti ataleki kuzicita zintu eezyo.

14. Mbuti mwiiyi mbwakonzya kuzyiba kuyaambele kwasikwiiya?

¹⁴ Tweelede kukkazika moyo ciindi notugwasya sikwiiya kutegwa alyaabe alimwi akubbapatizyigwa. Pele alimwi tweelede kuzyiba kuti naa ulayanda kubelekela Jehova Leza. Sena sikwiiya ulatondezya kuti ulasola kwaatobela malailile aa Jesu? Naa uyanda buyo kuba aluzyibo lwamu Bbaibbele?

15. Ncinzi ciyoogwasya mwiiyi kubona kuti sikwiiya inga weelela kubbapatizyigwa?

¹⁵ Ciindi aciindi amukulange-lange kuyaambele kwasikwiiya. Mucikozyanyo, sena ulatondezya kuti ulamuyanda Jehova? Sena ulapaila kuli Jehova? (Int. 116:1, 2) Sena ulakukkomanina kubala Bbaibbele? (Int. 119:97) Sena ulajanika kumiswaangano lyoonse? (Int. 22:22) Sena kuli kucinca kuli koonse nkwacitide mubukkale bwakwe? (Int. 119:112) Sena wakatalika kubaambila  banamukwasyi naa balongwe zintu nzyaiya? (Int. 9:1) Kwiinda zyoonse, sena ulayanda kuba Kamboni wa Jehova? (Int. 40:8) Ikuti sikwiiya katayaambele mumbazu eezyi, cabupampu amusoleke kuzyiba kaambo ncocili boobo, alimwi akubandika anguwe caluzyalo pele cakutamwiinda mumbali. *

16. Ndilili nomweelede kucileka kwiiya amuntu?

¹⁶ Ciindi aciindi amulange-lange naa inga mwazumanana kwiiya asikwiiya. Mulakonzya kulibuzya kuti: ‘Sena sikwiiya ulalibambila ciiyo? Sena ulaaluyandisisyo lwakuswaangana? Sena wakaileka micito mibyaabi? Sena ucizulilwa kucikombelo cakubeja?’ Ikuti naa bwiinguzi mbwakuti inzya, kuzumanana kwiiya amuntu ooyo cili buyo mbuli kuyiisya muntu kusaya, pele katayandi kuteta. Ikuti sikwiiya katabikkili maano kuzintu nzyaiya alimwi katalibambilide kucinca, tacigwasyi kuzumanana kwiiya anguwe.

17. Kweelana alugwalo lwa 1 Timoteyo 4:16, ncinzi bamayi ba Bbaibbele boonse ncobeelede kucita?

¹⁷ Cilayandika kapati kuuzuzikizya mukuli wesu wakugwasya bantu kuba basikwiiya, alimwi tulayanda kubagwasya kuyaambele akweelela kubbapatizyigwa. Nkakaambo kaako tubelesya Bbaibbele ciindi notubayiisya alimwi tulatondezya kuti tulaziyanda alimwi akuzisyoma nzyotubayiisya. Tulabakulwaizya kujana balongwe mumbungano. Alimwi tulakankaizya mbaakani yakulyaaba akubbapatizyigwa, ciindi aciindi tulakulanga-langa kuyaambele kwasikwiiya. (Amubone kabbokesi kakuti “ Ncobeelede Kucita Bamayi ba Bbaibbele Kugwasya Basikwiiya Kutegwa Beelele Kubbapatizyigwa.”) Eelo kaka cilatukkomanisya kutola lubazu mumulimo ooyu uufwutula bantu! Atube amakanze aakucita kufwumbwa ncotukonzya kutegwa tugwasye basikwiiya Bbaibbele kweelela kubbapatizyigwa.