1. Nkusala kuli buti ikwiinda kubota umwi aumwi nkwakonzya kucita?

KANJI-KANJI, kusala nkobacita bazyali kulabajatikizya bana babo kwaciindi cilamfwu. Kuti bazyali tiibasala kabotu, balakonzya kubaletela mapenzi bana babo. Pele kuti basala kabotu, bagwasya bana babo kuba abuumi bukkomanisya. Nokuba boobo, abalo bana beelede kusala kabotu. Kusala kwiinda kubota umwi aumwi nkwakonzya kucita nkubelekela Taateesu wakujulu, Jehova.—Int. 73:28.

2. Nkusala kuli buti Jesu alimwi abazyali bakwe nkobakacita?

² Josefa a Mariya bakaliyandide kugwasya bana babo kubelekela Jehova, alimwi kusala nkobakacita bazyali aaba kwakatondezya kuti kubelekela Jehova cakali cintu ciyandika kapati mubuumi bwabo. (Lk. 2:40, 41, 52) Awalo Jesu wakasala kabotu calo cakamugwasya kuzuzikizya mulimo wakwe mumakanze aa Jehova. (Mt. 4:1-10) Jesu naakakomena wakaba mwaalumi uuli aaluzyalo, uusyomeka alimwi sicamba. Bazyali boonse bamuyanda Jehova balakonzya kukkomana kuba amwana uuli mbuli Jesu.

3. Ino tulaingula mibuzyo nzi mucibalo eeci?

³ Mucibalo eeci, tulaingula mibuzyo eeyi iitobela: Ino nkusala kuli buti kubotu Jehova nkwaakacita kujatikizya Jesu? Ncinzi bazyali Banakristo ncobakonzya kwiiya kukusala nkobakacita bazyali ba Jesu bantunsi? Alimwi ino ncinzi bakubusi Banakristo ncobakonzya kwiiya kukusala nkwaakacita Jesu?

4. Nkusala kuli buti ikuyandika kapati nkwaakacita Jehova kujatikizya Mwanaakwe?

⁴ Jehova wakamusalila bazyali ibali kabotu Jesu. (Mt. 1:18-23; Lk. 1:26-38) Majwi ngaakaamba Mariya kuzwa ansi aamoyo aalembedwe  mu Bbaibbele atondezya luyando lupati ndwaakajisi kuli Jehova alimwi a Jwi lyakwe. (Lk. 1:46-55) Alimwi ncaakacita Josefa kumalailile ngaakamupa Jehova cakatondezya kuti wakali kumuyoowa Leza alimwi akuti wakali kuyanda kumukkomanisya.—Mt. 1:24.

5-6. Zintu zili buti Jehova nzyaakazumizya kuti zimucitikile Mwanaakwe?

⁵ Amubone kuti Jehova kunyina naakamusalila bazyali bavwubide Jesu. Zituuzyo Josefa a Mariya nzyobakapa naakamana kuzyalwa Jesu zitondezya kuti bakali bacete. (Lk. 2:24) Kulangilwa kuti Josefa wakalijisi busena aŋanda ku Nazareta mpaakali kucitila mulimo wakwe wakubeza. Kweelede kuti bakali kupona buumi buuba-uba nkaambo kumbele bakazooba abana bali ciloba naa kwiinda waawo.—Mt. 13:55, 56.

⁶ Jehova wakali kumukwabilila Jesu kuntenda zimwi, pele kunyina naakali kumukwabilila kumapenzi oonse. (Mt. 2:13-15) Mucikozyanyo, Jesu wakajisi banamukwasyi ibatakali kumusyoma. Amweezeezye mbwaakatyompedwe Jesu kuba abanamukwasyi kumatalikilo ibatakali kuzumina kuti ngu Mesiya. (Mk. 3:21; Joh. 7:5) Alimwi tacidoonekwi kuti Jesu wakali kuliyumya akaambo kakufwidwa bausyi, ba Josefa. Naakafwa Josefa cakali kupandulula kuti Jesu mbuli mwana mupati, wakeelede kubeleka mulimo ngobakali kucita bausyi. (Mk. 6:3) Ciindi Jesu naakakomena, wakaiya kulanganya zintu zyamukwasyi wakwe. Wakeelede kubeleka canguzu kutegwa kabalanganya. Aboobo wakalizyi mbocilimvwisya kukatala wamana kubeleka.

7. (a) Mibuzyo nzi iikonzya kugwasya banabukwetene ciindi nobakomezya bana babo? (b) Mbuti lugwalo lwa Tusimpi 2:1-6 mbolukonzya kubagwasya bazyali kuyiisya bana?

⁷ Ikuti naa muli banabukwetene ibayanda kuba abana, amulibuzye kuti: ‘Sena tuli bantu balicesya ibamuyanda Jehova alimwi a Jwi lyakwe? Sena Jehova inga watusala kulanganya mwana muvwanda?’ (Int. 127:3, 4) Ikuti naa muli bazyali, amulibuzye kuti: ‘Sena ndilabayiisya bana bangu mbociyandika kubeleka canguzu?’ (Muk. 3:12, 13) ‘Sena ndilacita kufwumbwa ncondikonzya kutegwa ndikwabilile bana bangu kuzintu zibyaabi izikonzya kubacitikila munyika ya Saatani?’ (Tus. 22:3) Mubwini, tamukonzyi kubakwabilila bana banu kumapenzi oonse ngobakonzya kujana. Eeci tacikonzyeki. Pele mulakonzya kubagwasya kulibambila mapenzi aamubuumi kwiinda mukuzumanana kubayiisya munzila yaluyando kujatikizya mbobakonzya kusyoma lulayo lwamu Bbaibbele. (Amubale Tusimpi 2:1-6.) Mucikozyanyo,  ikuti naa munamukwasyi wasala kuleka kubelekela Jehova, amubagwasye bana banu kwiiya kuzwa mu Jwi lya Leza kaambo ncociyandika kapati kuzumanana kusyomeka kuli Jehova. (Int. 31:23) Ikuti mwafwidwa muyandwa wanu, amubatondezye bana banu mbobakonzya kubelesya Jwi lya Leza kulwana penzi lyabuumba alimwi akujana luumbulizyo.—2Kor. 1:3, 4; 2Tim. 3:16.

8. Kweelana alugwalo lwa Deuteronomo 6:6, 7, ncinzi Josefa a Mariya ncobakatobela?

⁸ Josefa a Mariya bakamugwasya Jesu kutegwa akomene akuba muntu uuyandwa a Leza; bakaatobela malailile aa Jehova kubazyali. (Amubale Deuteronomo 6:6, 7.) Josefa a Mariya bakali kumuyanda kapati Jehova alimwi makanze aabo mapati akali aakugwasya bana babo kuba aluyando ndomunya.

9. Ino nkusala kuli buti nkobakacita ba Josefa a Mariya?

⁹ Josefa a Mariya bakasala kunookomba Jehova antoomwe abana babo lyoonse. Kakunyina kudooneka, bakali kuunka kumiswaangano nsondo ansondo kucikombelo ku Nazareta, alimwi mwaka amwaka bakali kuunka ku Pobwe Lyakwiindilila ku Jerusalemu. (Lk. 2:41; 4:16) Kulangilwa kuti ciindi nobakali kuunka ku Jerusalemu mbuli mukwasyi, bakali kucibelesya ciindi eeci kuyiisya Jesu abanabokwabo kujatikizya Jehova nzyaakabacitila bantu bakwe kaindi. Ambweni kabali munzila bakali kuyaabuswaya masena aambidwe mu Magwalo. Nowakali kuyaabukomena mukwasyi, tiicakali cuuba-uba kuli Josefa a Mariya kuzumanana kucita zintu zyakumuuya eezyi. Pele bakalongezyegwa kapati akaambo kakucita boobo. Akaambo kakuti bakabikka bukombi bwa Jehova mubusena bwakusaanguna, mukwasyi wabo wakali acilongwe a Jehova.

10. Nziiyo nzi bazyali Banakristo nzyobakonzya kwiiya kuli Josefa a Mariya?

¹⁰ Ino ncinzi bazyali bayoowa Leza ncobakonzya kwiiya kuli Josefa a Mariya? Kwiinda zyoonse, amubatondezye bana banu kuti mulamuyanda kapati Jehova kwiinda muzintu nzyomwaamba akucita. Amuzyibe kuti cipego cipati ncomukonzya kubapa nkubagwasya kumuyanda Jehova. Alimwi ciiyo cimwi ciyandika kapati ncomukonzya kuyiisya bana banu, nkubatondezya mbociyandika kuba abubambe bwakucita zintu zyakumuuya mbuli kuba aciiyo, kupaila, kuswaangana alimwi akukambauka. (1Tim. 6:6) Kuyungizya waawo, mweelede kubapa zintu zyakumubili  nzyobayandika. (1Tim. 5:8) Pele kamuyeeya kuti cilongwe bana banu ncobajisi a Jehova, ikutali mali naa lubono, nceciyoobapa kufwutuka lyamamanino aabweende bwazintu oobu alimwi akunjila munyika mpya ya Leza. *—Ezk. 7:19; 1Tim. 4:8.

11. (a) Mbuti lulayo iluli kulugwalo lwa 1 Timoteyo 6:17-19, mbolubagwasya bazyali kusala kabotu ciindi nobakomezya bana babo? (b) Nimbaakani nzi nzyomukonzya kulibikkila mbuli mukwasyi, alimwi nzilongezyo nzi nzyomuyoojana? (Amubone kabbokesi kakuti “ Nimbaakani Nzi Nzyomukonzya Kulibikkila?”)

¹¹ Eelo kaka cilakkomanisya kubona bazyali Banakristo banji ibasala kabotu kutegwa bagwasye bana babo kuba acilongwe a Jehova! Balamubelekela Jehova antoomwe. Balajanika kumiswaangano yambungano alimwi ayacooko. Alimwi balatola lubazu mumulimo wamumuunda. Mane buya, mikwasyi imwi ilacikonzya kukambauka mucilawo mutavwuli kukambaukilwa. Bamwi balaswaya kumutabi naa kugwasyilizya mumilimo yamayake aasumpula bukombi bwakasimpe. Mikwasyi iisala kucita zintu eezyi ilalisungula kubelesya mali, alimwi kweelede kuti ilajana buyumuyumu. Pele Jehova uyakwiilongezya kapati akaambo kakulisungula ooku. (Amubale 1 Timoteyo 6:17-19.) Bana ibakomezyegwa mumikwasyi iili boobu kanji-kanji balazumanana abukkale bubotu mbobakayiisyigwa, alimwi balakkomana akaambo kakuti bazyali babo bakabakomezya munzila eeyi! *—Tus. 10:22.

12. Ncinzi Jesu ncaakeelede kucita ciindi naakali kuyaabukomena?

¹² Bausyi Jesu bakujulu lyoonse basala kabotu, alimwi abalo bazyali bakwe baanyika bakali kusala cabusongo. Nokuba boobo, ciindi Jesu naakali kuyaabukomena, wakeelede kulisalila zintu zyakucita. (Gal. 6:5) Mbubwenya mbuli ndiswe, Jesu wakajisi nguzu zyakulisalila cakucita. Amana buya, naakali kuyanda naakasala kucita zintu nzyakkomanina, muciindi cakucita kuyanda kwa Leza. Nokuba boobo, wakasala kuba acilongwe cibotu a Jehova. (Joh. 8:29) Ino mbuti cikozyanyo ca Jesu mbocikonzya kubagwasya bakubusi mazuba aano?

13. Ino nkusala kuli buti Jesu nkwaakacita ciindi naakali mwana?

¹³ Kuzwa ciindi naakali mwana, Jesu wakasala kunoomvwida bazyali bakwe. Kunyina naakali kukaka malailile aabazyali, kayeeya kuti wakazyi zintu zinji kwiinda mbabo. Muciindi caboobo “wakazumanana kubamvwida.” (Lk. 2:51) Mbwaanga Jesu ngowakali mwana mupati, eeci cakali kwaamba kuti kuli mikuli njaakali kulanganya mumukwasyi. Alimwi wakeelede kubikkila maano kutegwa aizuzikizye. Wakabeleka canguzu kwiiya mulimo kuli bausyi bantunsi kutegwa kagwasyilizya mukwasyi wakwe.

14. Ino tuzyi buti kuti Jesu wakali sikwiiya wa Jwi lya Leza mubotu?

 ¹⁴ Kweelede kuti bazyali bakwe bakamwaambila Jesu kujatikizya kuzyalwa kakwe kwamaleele alimwi anzyobakaamba batumwa ba Leza kujatikizya nguwe. (Lk. 2:8-19, 25-38) Jesu kunyina naakakkutila buyo azintu nzyaakaambilwa; pele awalo wakaabala Magwalo. Ino tuzyi buti kuti Jesu wakali sikwiiya wa Jwi lya Leza mubotu? Tulizyi oobo akaambo kakuti kacili mulombe, bamayi ku Jerusalemu “bakali kwiile kulijata kumulomo akaambo kabusongo mbwaakajisi alimwi ambwaakali kwiingula.” (Lk. 2:46, 47) Alimwi ciindi naakajisi buyo myaka iili 12, Jesu wakalisinizyide kale kuti Jehova wakali Usyi.—Lk. 2:42, 43, 49.

15. Mbuti Jesu mbwaakatondezya kuti wakasala kucita kuyanda kwa Jehova?

¹⁵ Ciindi Jesu naakazyiba kujatikizya mulimo wakwe mumakanze aa Jehova, wakasala kuucita. (Joh. 6:38) Wakalizyi kuti bantu banji bakali kuyoomusulaika. Nokuba kuti tanaakali kuciyanda eeco, wakasala kumvwida Jehova. Ciindi naakabbapatizyigwa mu 29 C.E., ncaakali kubikkila maano kapati mubuumi nkucita kuyanda kwa Jehova. (Heb. 10:5-7) Nociba ciindi naakafwa acisamu cakupenzyenzya, Jesu wakalikanzide kuzumanana kucita kuyanda kwa Bausyi.—Joh. 19:30.

16. Nciiyo nzi cimwi bana ncobakonzya kwiiya kuli Jesu?

¹⁶ Amubamvwide bazyali banu. Mbubwenya mbuli Josefa a Mariya, bazyali banu tabalondokede. Nokuba boobo, Jehova wakabapa mukuli wakumukwabilila, kumuyiisya alimwi akumusololela. Ikuti mwaluswiilila lulayo lwabo alimwi akubulemeka bweendelezi bwabo, ‘zintu ziyakumweendela kabotu.’—Ef. 6:1-4.

17. Kweelana alugwalo lwa Joshua 24:15, ncinzi ncobeelede kulisalila bana?

¹⁷ Amusale ngomuyoobelekela. Mweelede kumuzyiba Jehova, makanze aakwe alimwi akuyanda kwakwe mbokubujatikizya buumi bwanu. (Rom. 12:2) Mpoonya muyoocikonzya kusala cintu ciyandika kapati mubuumi bwanu, nkokuti kusala kubelekela Jehova. (Amubale Joshua 24:15; Muk. 12:1) Ikuti kamujisi bubambe bwakwiiya alimwi akubala Bbaibbele buzuba abuzuba, muyoozumanana kumuyanda Jehova alimwi lusyomo lwanu luyooyuma.

18. Nkusala kuli buti nkobakonzya kucita bana, alimwi ino ncinzi ciyoozwa mpawo?

¹⁸ Amusale kubikka kuyanda kwa Jehova mubusena  bwakusaanguna mubuumi bwanu. Nyika ya Saatani ikulwaizya kuti ikuti wabelesya luzyibo lwako kutegwa uligwasye omwini, uyookkomana. Mubwini, tulizyi kuti aabo babikkila maano kuzintu zyakumubili balaliyasaula “koonse-koonse amacise manji.” (1Tim. 6:9, 10) Pele kuti mwamuswiilila Jehova alimwi akusala kubikka kuyanda kwakwe mubusena bwakusaanguna mubuumi bwanu, muyoozwidilila alimwi ‘munoocita zintu cabusongo.’—Jos. 1:8.

19. Ncinzi ncobeelede kuyeeya bazyali?

¹⁹ Nobazyali, amucite kufwumbwa ncomukonzya kutegwa mugwasye bana banu kubelekela Jehova. Amumusyome Jehova, mpoonya uyoomugwasya kusala cabusongo. (Tus. 3:5, 6) Amuyeeye kuti bana banu bayoogwasyigwa kapati azintu nzyomucita ikutali nzyomwaamba. Aboobo amusale zintu zikonzya kupa kuti bana banu bakkomaninwe a Jehova.

20. Nzilongezyo nzi nzyobayoojana bana ikuti basala kubelekela Jehova?

²⁰ Nobana, bazyali banu balakonzya kumugwasya kusala cabusongo. Pele andinywe mweelede kusala kabotu kutegwa mumukkomanisye Leza. Aboobo amwiiye Jesu alimwi akusala kubelekela Uso wakujulu siluyando. Ikuti mwacita oobo, munoopona buumi bukkomanisya lino. (1Tim. 4:16) Mpoonya kumbele, muyoopona buumi bukkomanisya kapati kwiinda!