MWAKA amwaka, mbelele ziyandisi zinji zilapilusyigwa mumbungano ya Bunakristo. Amweezeezye buyo ‘kukondwa kupati ikucitika kujulu’ ciindi umwi wambelele eezyi naapiluka! (Lk. 15:7, 10) Kuti naa mwakapilusyigwa mumbungano, amusyome kuti Jesu, bangelo alimwi a Jehova lwakwe kumugama, balikkomene kapati kuti lino muli cibeela cambungano alimwi. Pele nomububambulula cilongwe canu a Jehova, mulakonzya kujana buyumuyumu. Ino mbuyumuyumu nzi oobo, alimwi ncinzi cikonzya kumugwasya kubuzunda?

Bakwesu abacizyi banji inga bacityompedwe nokuba kuti bakapilusyigwa mumbungao. Ambweni mulamvwisya mbwaakalimvwide Mwami Davida. Nociba ciindi naakalekelelwa zibi zyakwe, wakaamba kuti: ‘Milandu yangu yandikopa.’ (Int. 40:12; 65:3) Nociba ciindi naamana kupiluka kuli Jehova, muntu ulakozya kuzumanana kulipa mulandu naa kuusa kwamyaka minji. Ba Isabelle, ibakagusyidwe mumbungano myaka iinda ku 20, * bakaamba kuti, “Cakali kundiyumina kusyoma kuti Jehova wakandilekelela.” Kuti mwatyompwa, cilongwe canu a Jehova inga canyongana alimwi. (Tus. 24:10) Aboobo amubeleke canguzu kutegwa eeci citamucitikili naaceya.

Bamwi balalibilika kuti inga tiibacikonzya kucita zintu zyoonse ziyandika kutegwa babambulule cilongwe cabo a Jehova. Nobakamana kupilusyigwa mumbungano ba Antoine bakaamba kuti: “Ndakali kulimvwa kuti ndakaziluba zintu zyoonse nzyondakaiya naa nzyondakali kucita nindakali Kamboni.” Akaambo kakulimvwa boobu, bamwi balawayawaya kutola lubazu kusikila mpobagolela mumilimo yakumuuya.

Mucikozyanyo, kuti ŋanda yanyonyooka kapati aguwo, mulaayo inga watyompwa kapati ayeeya zijatikizyidwe kutegwa iyakululwe. Mbubwenya buyo, kuti cilongwe canu a Jehova cakanyongana akaambo kacibi cipati, mulakonzya kulimvwa kuti kuyandika  kubeleka canguzu kapati kutegwa mucibambulule. Pele lugwasyo nkoluli.

Jehova ututamba kuti: “Amuboole lino tubambe twaambo akati kesu.” (Is. 1:18) Mwabeleka kale canguzu ‘kubamba twaambo.’ Jehova ulamuyanda akaambo kakucita boobu. Amuyeeye kuti: Mbwaanga mwakapiluka kuli Jehova, nkokuti ulakonzya kubelesya cikozyanyo canu kusinizya kuti Diabolosi mubeji.—Tus. 27:11.

Kwiinda mukupiluka kuli Jehova, mwakatalika kale kuba acilongwe anguwe, alimwi awalo umusyomezya kuti ulaba mulongwe wanu. (Jak. 4:8) Nokuba boobo, nzinji zijatikizyidwe kunze buyo lyakubonwa abamwi kuti mwakapiluka mumbungano. Mweelede kuzumanana kuyumya cilongwe canu a Uso alimwi imulongwe wanu, Jehova. Ino inga mwacita buti oobo?

Amusole kulibikkila mbaakani nzyomukonzya kuzuzikizya. Ambweni muciziyeeyede njiisyo zyantalisyo nzyomwakaiya kujatikizya Jehova alimwi acisyomezyo cakwe ca Paradaiso. Pele lino mweelede kuba amulongo mubotu wakucita zintu zyakumuuya, mbuli kukambauka, kujanika kumiswaangano, akuyanzana abakwesu abacizyi. Amubone mbaakani eezyi zitobela.

Kamubandika a Jehova lyoonse. Mbwali Taateesu, ulamvwisya kuti kuzumanana kulipa mulandu kulakonzya kupa kuti kacimuyumina kupaila kulinguwe. (Rom. 8:26) Nokuba boobo, “amujatisye kupaila,” ikumwaambila mbomuciyanda kapati cilongwe canu anguwe. (Rom. 12:12) Ba Andrej bakaamba kuti: “Ndakali kulipa mulandu kapati alimwi akuusa. Pele kufwumbwa ciindi ndamana kupaila, ndakali kwaanguluka. Alimwi ndakali kuba aluumuno lwamumizeezo.” Kuti kamutacizyi cakupailila, amulange-lange mipailo ya Mwami Davida iwakeempwa iilembedwe ku Intembauzyo 51 alimwi a 65.

Amwiiye Bbaibbele lyoonse. Kucita boobu kuyoomupa kuba alusyomo luyumu akukomezya luyando lwanu kuli Jehova. (Int. 19:7-11) Ba Felipe bakaamba kuti: “Akaambo kakuti tiindakajisi pulogilamu yakubala Bbaibbele akwiiya, ndakatalika kuyaansi kumuuya akumutyompya Jehova. Tandiyandi kumutyompya alimwi Jehova, aboobo ndakabikka bubambe bwakucita ciiyo cangu.” Andinywe mulakonzya kucita oobo. Kuti kamuyanda lugwasyo lwakusala zibalo nzyomukonzya kubelesya lyaciiyo canu nobeni, inga mwamulomba mulongwe uusimide kutegwa amugwasye.

Amubambulule cilongwe canu abakwesu abacizyi. Bamwi ibakapiluka mumbunga inga balalibilika kuti ambweni bamwi mumbungano bacityompedwe kujatikizya ncobakacita. Ba Larissa bakaamba kuti: “Ndakali kufwa nsoni kapati. Ndakali kulimvwa kuti ndakabatyompya bakwesu abacizyi. Ndakazumanana kulimvwa boobu kwaciindi cilamfwu.” Amusyome kuti baalu alimwi abamwi balayanda kumugwasya kubambulula cilongwe canu a Jehova. (Amubone kabbokesi kakuti “ Ncinzi Baalu Ncobakonzya Kucita?”) Balikkomene kuti mwakapiluka kumbungano, alimwi bayanda kuti muzwidilile.—Tus. 17:17.

Ncinzi cikonzya kumugwasya kuyumya cilongwe canu abasimbungano? Kamujanika kumiswaangano lyoonse alimwi akubeleka abakwesu abacizyi mubukambausi. Ino kucita boobu inga kwamugwasya buti? Ba Felix bakaamba kuti: “Basimbungano bakali kulangila ciindi nondakali kuyoopilusyigwa. Eelo kaka ndakalimvwa kuyandwa! Boonse bakandigwasya kulimvwa kuzulilwa mumbungano alimwi, kuti Jehova wakandilekelela, akuti ndilakonzya kuzumanana kubelekela Jehova.”—Amubone kabbokesi kakuti “ Ncinzi Ncomukonzya Kucita?”

Saatani uyoozumanana kumuletela mapenzi kutegwa mutyompwe nomubambulula cilongwe canu a Jehova. (Lk. 4:13) Amulibambile kwiinda mukuyumya cilongwe canu a Jehova.

Kujatikizya mbelele zyakwe, Jehova uzisyomezya kuti: “Eeyo iisweekede ndiyakwiiyandaula, eeyo yiingaila ndiyakwiijola, eeyo iiliciside ndiyooyaanga, alimwi eeyo iitajisi nguzu ndiyakwiiyumya.” (Ezk. 34:16) Jehova wagwasya bantu banji kapati kubambulula cilongwe cabo anguwe. Amusyome kuti uyanda kumugwasya kuti muzumanane kubamba cilongwe ciyumu anguwe.