1922 Myaka Iili 100 Yainda
‘LEZA ulatupa luzundo kwiinda muli Jesu Kristo.’ (1Kor. 15:57) Majwi aayo, aakasalwa kuba Lugwalo Lwamwaka wa 1922, akayeezya Basikwiiya Bbaibbele kuti kusyomeka kwabo kwakali kuyoolumbulwa. Mumwaka ooyo, Jehova wakabalumbula bakambausi aaba basungu. Wakabalongezya ciindi nobakatalika kupulinta, kulipangila mabbuku alimwi akubelesya wailesi kumwaya kasimpe ka Bwami. Mpoonya kumbele mu 1922, cakalibonya alimwi kuti Jehova wakali kubalongezya bantu bakwe. Basikwiiya Bbaibbele bakacikonzya kubungana amuswaangano wacooko uutalubiki mu Cedar Point, Ohio, U.S.A. Icakacitika amuswaangano ooyo cakaujatikizya mulimo wambunga ya Jehova kuzwa ciindi eeco mane kusikila sunu.
“MUZEEZO UUKOMANISYA KAPATI”
Ciindi mulimo wakukambauka nowakakomena, kwakali kuyandika mabbuku manji. Bakwesu ku Beteli yaku Brooklyn bakali kupanga mamagazini, pele bakacili kubelesya makkampani aapulinta kuti abapulintile mabbuku aajisi civwumbyo ciyumu. Mpoonya kwamyezi minji, kkampani tiiyakali kupulinta mabbuku manji aakubelesya mumulimo wakukambauka. Aboobo Mukwesu Rutherford wakalomba ba Robert Martin, mukwesu iwakali mweendelezi wafakitoli, kubona naa inga bacikonzya kulipulintila mabbuku.
Fakitoli ya Concord Street mu Brooklyn, New York
Mukwesu Martin wakaamba kuti, “Ooyu wakali muzeezo mubotu kapati, nkaambo eeci cakali kwaamba kuti twakeelede kujalula fakitoli iikonzya kupulinta mabbuku.” Kumane bakwesu bakatalika kucita leenti a 18 Concord Street mu Brooklyn alimwi akuula zibelesyo izyakali kuyandika.
Pele tabali boonse ibakakkomana akuyaambele ooko kupya. Mupati-pati wakkampani iyakali kupulinta mabbuku eesu wakaswaya busena bwesu bupya. Mpoonya wakaamba kuti: “Mulijisi zibelesyo zibotu kapati zyakupulinta mabbuku, pele kunyina naba omwe wanu uuzyi mbozibelesyegwa. Mumyezi buyo iili cisambomwe, zibelesyo zyanu eezyi zyoonse zinoofwide.”
Mukwesu Martin wakati, “Aayo masimpe, pele twakalizyi kuti Jehova ulatugwasya, alimwi wakatugwasya ncobeni.” Mukwesu Martin wakaliluzi. Nokwakainda buyo ciindi cisyoonto, abuzuba kwakali kupangwa mabbuku aali 2,000.
Basikubelesya muncini wiitwa kuti linotype baliimvwi mufakitoli
KUSIKILA BANTU BANJI KUBELESYA WAILESI
Kunze buyo lyakupulinta mabbuku aabo, bantu ba Jehova bakatalika kubelesya nzila mpya yakumwaya makani mabotu, nkokuti kwaambilizya kubelesya wailesi. Mu Nsondo kumazuba, February 26, 1922, Mukwesu Rutherford wakaambaula awailesi ciindi cakusaanguna. Wakapa makani aakuti, “Mamiliyoni Aabaabo Bapona Lino Tabakafwi” (Millions Now Living Will Never Die) muŋanda yasikapepele KOG mu Los Angeles, California, U.S.A.
Kuyeeyelwa kuti bantu basika ku 25,000 bakaamvwa makani aaya. Bamwi bakatuma magwalo aakulumba ku Mukwesu Rutherford. Lugwalo lumwi lwakazwa kuli Willard Ashford, uukkala ku Santa Ana, California. Wakamulumbaizya Mukwesu Rutherford akaambo kakwaambaula munzila “iisangalizya alimwi iikkomanisya.” Mane wakayungizya kuti: “Muŋanda yangu, muli balwazi botatwe ibatacikonzyi kweenda. Aboobo notwatacikonzya kuboola kuzooswiilila, nokuba kuti makani aanu akali kupegwa muŋanda iili munsi-munsi.”
Kwakali kuyoopegwa makani manji awailesi nsondo izyakali kutobela. Kuzikusika kumamanino aamwaka, ba Watch Tower bakayeeyela kuti “bantu basika ku 300,000 bakaswiilila mulumbe awailesi.”
Kwiinda mukukulwaizyigwa ambobakautambula mulumbe bantu, Basikwiiya Bbaibbele bakaba amakanze aakuyaka ŋanda yasikapepele mu Staten Island, kufwaafwi aku Beteli yaku Brooklyn. Mumyaka yakatobela, Basikwiiya Bbaibbele bakatalika kwiibelesya ŋanda eeyo, nkokuti WBBR, kumwaya mulumbe wa Bwami koonse-koonse.
“ADV”
Ngazi Yamulindizi yamu June 15, 1922, yakaambilizya kuti muswaangano wacooko wakali kuyoocitwa mu Cedar Point, Ohio, kuzwa mu September 5 kusikila mu 13, 1922. Basikwiiya Bbaibbele bakalikkomene kapati ciindi nobakali kusika mu Cedar Point.
Mumakani aakwe aakusaanguna, Mukwesu Rutherford wakaambila baswiilizi kuti: “Ndilisinizyide kuti Mwami . . . ulaulongezya muswaangano ooyu alimwi akuti kulapegwa bumboni bunji ibutanacitikide aano anyika.” Baambi bamakani amuswaangano ooyu cakwiinduluka-induluka bakali kukulwaizya mulimo wakukambauka.
Nkamu yabantu ibakajanika kumuswaangano wacooko mu 1922 mu Cedar Point, Ohio
Mpoonya muli Bwasanu, September 8, bantu ibali 8,000 bakanjila mubusena ibwakali kucitilwa muswaangano, kabakkomene kuswiilila makani aa Mukwesu Rutherford. Bakali kulangila kuti ulapandulula ncaamba mabala aakuti “ADV,” alo aakali atupepa twabo twakutamba bantu. Nobakakkede, bunji bwabo bakabona cikwankwani cipati camulembo kucibumbili. Ba Arthur Claus, ibakazwa ku Tulsa, Oklahoma, U.S.A., bakajana aakukkala alo mpobakali kukonzya kwaamvwa kabotu makani. Eeci cakali kukatazya nkaambo aciindi eeco kwakanyina mamaikkulofooni naa masipika aakuyungizya volyumu.
“Tiitwakaindwa noliba bbala lyomwe”
Kutegwa kutabi uunyonganya pulogilamu, sicuuno wakaambilizya kuti kunyina wamuka kuboola uutiizumizyigwe kunjila ciindi Mukwesu Rutherford napa makani. Aciindi ca 9:30 mafwumofwumo, Mukwesu Rutherford wakatalika makani kwiinda mukuzubulula majwi aa Jesu aali ku Matayo 4:17 aakuti: “Bwami bwakujulu bwaswena afwaafwi.” Ciindi naakali kwaamba kujatikizya bantu mbobakali kuyakubumvwa Bwami, wakaamba kuti: “Jesu lwakwe kumugama wakaamba kuti muciindi cakubako kwakwe, wakali kuyoolingula bantu bakwe akubungika baabo basyomeka.”
Mukwesu Claus, iwakaliko amuswaangano wakaamba kuti: “Tiitwakaindwa noliba bbala lyomwe.” Pele cakutayeeyela, wakaciswa aboobo wakeelede kuzwa. Mukwesu Arthur wakaile kuzwa cakuwaya-waya, kumwi kazyi kuti takoozumizyigwa kunjila alimwi.
Nokwakainda maminiti masyoonto, mukwesu Arthur wakalimvwa kabotu. Wakaamba kuti ciindi naakali kweenda kujokela mukati, wakamvwa bantu kabakambilila citaambiki. Eeci cakamukkomanisya kapati! Wakayeeya kuti wakali kukonzya kwaaswiilila makani aaya mabotu kapati nokuba kuti wakeelede kutanta aciluli. Mukwesu Claus, iwakajisi myaka iili 23 aciindi eeco, wakacikonzya kutanta abwaanda. Mbwaanga mawindo akalibukwazi, wakaamba kuti, “ciindi naakasika munsi-munsi, wakatalika kwaamvwa makani kabotu-kabotu.”
Mukwesu Arthur tanaakali alikke pe. Balongwe bakwe bamwi abalo bakalitantide kale aciluli. Umwi wabo, mukwesu Frank Johnson, wakamuzuzila akumubuzya kuti, “Sena ulijisi kanaifi kamunkomo?”
Ba Arthur bakati, “Inzya ndilijisi.”
Ba Frank bakaingula kuti, “Uli bwiinguzi bwamipailo yesu. Sena wacibona cikwankwani camulembo cipati eeci caangidwe kumpikili eezyi? Swiililisya ku Mubetesi. * Ciindi naamba kuti, ‘alimwi mweelede kwaambilizya, kwaambilizya,’ tenda ntambo eezyi zyone.”
Aboobo ba Arthur, kabajisi kanaifi, bakalindila kumvwa majwi aayo antoomwe abamwi. Kalitanalampa, Mukwesu Rutherford wakasika acibeela mpaakali kuyandika kapati makani aakwe. Wakalikkomene kapati alimwi cabusungu wakali kuyanda koompolola ciindi naakaamba kuti: “Amube bakamboni basyomeka alimwi beni-beni ba Mwami. Kamuyaambele munkondo eeyi, kusikila zibeela zyoonse zya Babuloni zikasyaale matongo. Amoongolole mulumbe ooyu usike kule. Inyika yeelede kuzyiba kuti Jehova ngu Leza akuti Jesu Kristo Mwami wabami alimwi Muleli wabaleli. Oobu mbobuzuba bupati kwiinda mazuba oonse. Ngooyo Mwami ulalela! Nywebo ndinywe baambilizi bakwe. Aboobo mwaambilizye, mwaambilizye, mwaambilizye Mwami abwami bwakwe!”
Ba Arthur bakaamba kuti balo alimwi abakwesu bambi bakazitenda ntambo alimwi akucivwungulula kabotu-kabotu cikwankwani. Kweelana amabala aakuti “ADV,” cikwankwani cakalembedwe kuti: “Amwaambilizye Mwami alimwi a Bwami.”
MULIMO UUYANDIKA KAPATI
Muswaangano iwakacitwa mu Cedar Point wakabagwasya bakwesu kubikkila maano kumulimo uuyandika kapati iwakukambauka Bwami, mpoonya aabo ibakajisi muuya wakulyaaba bakakkomana kutola lubazu mumulimo ooyu. Mupainiya uuzwa ku Oklahoma, U.S.A., wakalemba kuti, “Kubusena nkotwakali kukambaukila, bantu banji bakali kubeleka mumakkampani aamigoti yakusya malasya alimwi bakali bacete citaambiki.” Wakaamba kuti, kanji-kanji ciindi bantu nobakali kumvwa mulumbe uuli mumagazini ya Golden Age, “bakali kulila.” Wakayungizya kuti, “Masimpe ncilongezyo kuumbulizya bantu bali boobu.”
Basikwiiya Bbaibbele aaba bakazyiba mbwaakali kuyandika kapati majwi aa Jesu aali ku Luka 10:2 aakuti: “Mulimo wakutebula mupati, pele babelesi mbasyoonto.” Kumamanino aamwaka, bakalikanzide kwiinda kaindi kwaambilizya mulumbe wa Bwami koonse-koonse.
^ Mukwesu Rutherford zimwi ziindi wakali kwiitwa kuti “Mubetesi” nkaambo zimwi ziindi wakali kubeleka kali mubetesi mu Missouri, U.S.A.
