1. Mbuti lukkomano lwesu mboluyeeme aakuzyiba kuti “tuyandika kusololelwa a Leza”?

 MASIMPE kuti lukkomano lwini-lwini takuli buyo kulimvwa kabotu ikuboola muziindi. Pele lulakonzya kuzumanana mubuumi bwamuntu boonse. Mubuti? Jesu wakaamba mu Mulumbe wakwe Waacilundu kuti: “Balikkomene aabo bazyi kuti bayandika kusololelwa a Leza.” (Mt. 5:3) Jesu wakalizyi kuti bantu bakalengwa kabajisi luyandisisyo lwakuzyiba Mulengi wabo, Jehova Leza alimwi akumukomba. Ooku ‘nkokuzyiba kuti tuyandika kusololelwa a Leza.’ Alimwi mbwaanga Jehova ‘ngu Leza uukkomene,’ aabo bamukomba abalo balakonzya kukkomana.—1Tim. 1:11.

2-3. (a) Kweelana ancaakaamba Jesu, mbaani bambi ibakonzya kukkomana? (b) Ncinzi ncotutiibandike mucibalo eeci, alimwi nkaambo nzi ncociyandika kuti tucite oobo?

² Sena inga katukkomene buyo ciindi notutajisi mapenzi? Peepe. Mumulumbe wakwe, Jesu wakaamba cintu cimwi cigambya. “Aabo balila” ambweni akaambo kakuusa kuzibi zyabo naa akaambo kabukkale bukatazya, balakonzya kukkomana. Jesu wakaamba mbubwenya oobo kujatikizya “aabo bapenzyegwa akaambo kabululami” naa aabo ‘basampaulwa’ akaambo kakuba basikutobela Kristo. (Mt. 5:4, 10, 11) Pele ino cikonzyeka buti kuba alukkomano lwini-lwini mubukkale buli boobu?

³ Jesu wakali kutuyiisya kuti tulakonzya kukkomana ikutali buyo ciindi zintu nozili kabotu, pele kwiinda mukucita zintu zyakumuuya alimwi akuba acilongwe a Leza. (Jak. 4:8) Mbuti mbotukonzya kucita boobo? Mucibalo eeci, tulabandika nzila  zyotatwe izikonzya kutupa kuba alukkomano lwini-lwini.

4. Ninzila nzi yakusaanguna njotweelede kubweza kutegwa tube alukkomano lwini-lwini? (Intembauzyo 1:1-3)

⁴ NZILA YAKUSAANGUNA: Kutegwa tube alukkomano lwini-lwini, tweelede kulya cakulya cakumuuya. Bantu alimwi abanyama bayandika cakulya cakumubili kutegwa bazumanane kupona. Pele balikke bantu mbabakonzya kulya cakulya cakumuuya. Alimwi cilayandika kulindiswe. Nkakaambo kaako Jesu wakaamba kuti: “Muntu teelede kuponena acinkwa cilikke pe, pele weelede kuponena amajwi oonse aazwa kumulomo wa Jehova.” (Mt. 4:4) Aboobo, tatweelede kwiinzya buzuba kakunyina kulya cakulya cizwa mu Jwi lya Leza liyandisi, Bbaibbele. Sintembauzyo wakati: ‘Ulikkomene muntu ukkomanina mulawo wa Jehova, alimwi ulaubala syikati amasiku.’—Amubale Intembauzyo 1:1-3.

5-6. (a) Ino ncinzi ncotukonzya kwiiya mu Bbaibbele? (b) Ino kubala Bbaibbele inga kwatugwasya buti?

⁵ Mu Bbaibbele, Jehova caluyando wakatupa malailile aayandika kapati kujatikizya mbotukonzya kupona buumi bukkomanisya. Tulaiya makanze ngajisi kujatikizya buumi bwesu. Tulaiya mbotukonzya kuba aacilongwe anguwe alimwi ancotweelede kucita kutegwa atulekelele zibi zyesu. Alimwi tulaiya kujatikizya bulangizi bubotu mbwatusyomezya. (Jer. 29:11) Kasimpe aaka nkotwiiya kuzwa mu Bbaibbele kalatupa kuba alukkomano lunji kapati!

⁶ Mbubwenya mbotuzyi, Bbaibbele lizwide lulayo lugwasya mubuumi bwabuzuba abuzuba. Ciindi notulutobela lulayo oolo, tulakonzya kujana lukkomano. Aboobo ciindi  nomutyompedwe akaambo kamapenzi, ciindi cinji amucibelesye kubala Jwi lya Jehova alimwi akuzinzibala kuyeeya nzyomubala. Jesu wakati: “Ibakkomene mbaabo baswiilila jwi lya Leza akucita ncolyaamba!”—Lk. 11:28.

7. Mbuti mbomukonzya kugwasyigwa kapati ciindi nomubala Jwi lya Leza?

⁷ Ciindi nomubala Jwi lya Leza, amuzinzibale kuyeeya nzyomubala. Mucikozyanyo, sena kuli nomwakacitikilwa kale cintu cili boobu? Muntu umwi wamujikila cakulya ncomukkomanina. Pele ambweni akaambo kakuti mulibindide naa kuti mulikopene mumizeezo, mwacilya cakufwambaana kakunyina akucimvwa kabotu mbocinona. Lino nomwamanizya kulya, mwayeeya mbomwali kulya cakufwambaana kumane mwalimvwa kuti ani nomwali kulya asyoonto-syoonto kutegwa mucikkomanine cakulya. Eeci cilakonzya kucitika ciindi notubala Bbaibbele. Zimwi ziindi tulakonzya kubala cakufwambaana cakuti twaalilwa kucikkomanina ncatuyiisya Jehova. Mutanikubali cakufwambaana kutegwa kamuzikkomanina nzyomubala mu Jwi lya Leza; amweezyeezye busena nkozyakali kucitikila, majwi aabantu alimwi akuyeeya ncomwabala. Kuti mwacita oobo, munookkomene.

8. Mbuti “muzike uusyomeka alimwi uucenjede” mbwazuzikizya mulimo wakwe? (Amubone bupanduluzi buyungizyidwe.)

⁸ Jesu wakasala “muzike uusyomeka alimwi uucenjede” kupa cakulya cakumuuya aciindi ceelede, alimwi tulasaninwa kabotu kumuuya. * (Mt. 24:45) Magwalo aakasololelwa amuuya nkakasensa kabusani mbotujana muzyakulya zyoonse nzyatubambila muzike uusyomeka. (1Tes. 2:13) Aboobo cakulya eeco cilatugwasya kuzyiba mbwayeeya Jehova kweelana ambokwaambwa mu Bbaibbele. Nkakaambo kaako tulabala zibalo zyamu Ngazi Yamulindizi alimwi a Sinsimuka! alimwi azibalo zyaa jw.org. Tulalibambila miswaangano yamukati kansondo alimwi ayakumamanino aansondo. Alimwi tuleebelela pulogilamu yamwezi amwezi ya JW Broadcasting^® kuti kailiko. Kulya cakulya cakumuuya cikkwene kuyootugwasya kubweza ntaamu yabili iisololela kukuba alukkomano lwini-lwini.

9. Ninzila nzi yabili iipa kuba alukkomano lwini-lwini?

⁹ NZILA YABILI: Kutegwa tube alukkomano lwini-lwini, tweelede kupona kweelana azyeelelo zya Jehova. Sintembauzyo wakalemba kuti: “Ulikkomene muntu woonse uuyoowa Jehova, ooyo weenda munzila zyakwe.” (Int. 128:1) Kuyoowa Jehova caamba kumulemeka kapati akutantamuka kucita cintu cili coonse icitamukkomanisyi. (Tus. 16:6) Aboobo, tulazumanana kusolekesya kutobela zyeelelo zya Leza zijatikizya ciluzi acitaluzi kweelana ambokwaambidwe mu Bbaibbele. (2Kor. 7:1) Tuyookkomana ikuti katucita zintu nzyayanda Jehova alimwi akukaka zintu nzyatayandi.—Int. 37:27; 97:10; Rom. 12:9.

10. Kweelana a Baroma 12:2, ino mukuli nzi ngotujisi?

¹⁰ Amubale Baroma 12:2. Muntu inga kazyi kuti Jehova ulijisi nguzu zyakwaamba ciluzi alimwi acitaluzi, pele muntu ooyo weelede kulisalila mwini kutobela zyeelelo zya Leza. Mucikozyanyo, muntu inga kazyi kuti mfwulumende ilijisi nguzu zyakubikka mulawo kujatikizya mpoyeelede kugolela kuzuza myootokala. Pele ambweni inga katalibambilide kuutobela mulawo ooyo. Akaambo kaceeci, inga keenzya mootokala cakufwambaana kwiinda mbwayelede kweenzya. Aboobo tulatondezya kwiinda muzintu nzyotucita kuti masimpe tulasyoma kuti kutobela zyeelelo zya Jehova ncecintu ciinda kubota. (Tus. 12:28) Davida  mbwaakalimvwa oobo ciindi naakaamba kujatikizya Jehova kuti: “Yebo ulandipa kuzyiba nzila yabuumi. Kumbele lyako kuli kukondwa kutaambiki; kujanza lyako lyalulyo kuli lukkomano mane kukabe kutamani.”—Int. 16:11.

11-12. (a) Ciindi notupengede naa notutyompedwe, ncinzi ncotweelede kucenjelela? (b) Mbuti majwi aali ku Bafilipi 4:8 mbwaakonzya kutugwasya ciindi notusala zyakulikondelezya?

¹¹ Ciindi notwapenga naa kutyompwa, inga twayanda kucita cintu cimwi icikonzya kutugwasya kuti tuleke kulimvwa boobo. Eeco cilalimvwisya, pele tweelede kucenjela kutacita cintu ncasulide Jehova.—Ef. 5:10-12, 15-17.

¹² Mulugwalo ndwaakalembela bana Bafilipi, mwaapostolo Paulo wakaambila Banakristo kuzumanana kubikkila maano kuzintu ‘ziluleme, zisalala, ziyandwa, alimwi azili kabotu.’ (Amubale Bafilipi 4:8.) Nokuba kuti Paulo tanaakalemba munzila yacigaminina makani aakulikondelezya, nzyaakalemba zyeelede kutugwasya caboola kuzyakulikondelezya nzyotusala. Amusole kucita boobu: Kufwumbwa aali bbala lyakuti “zintu” mukapango, amubikke bbala lyakuti “nyimbo,” “mafilimu,” “mabbuku,” naa “mavidiyo geemu.” Kucita boobu kulakonzya kumugwasya kubona cintu ncayanda Leza alimwi ancatayandi. Tuyanda kupona kweelana azyeelelo zya Jehova zisumpukide. (Int. 119:1-3) Aboobo kuti katujisi manjezyeezya aasalala, tulakonzya kubweza ntaamu iitobela iisololela kukuba alukkomano lwini-lwini.—Mil. 23:1.

13. Ninzila nzi yatatu iisololela kukuba alukkomano lwini-lwini? (Johane 4:23, 24)

¹³ NZILA YATATU: Amube masimpe kuti kukomba Jehova ncecintu cakusaanguna mubuumi bwanu. Mbwaanga ngo Mulengi, Jehova uleelela kukombwa. (Ciy. 4:11; 14:6, 7) Aboobo, tweelede kubikkila maano kutegwa katumukomba munzila njakkomanina, nkokuti kumukomba “mumuuya amukasimpe.” (Amubale Johane 4:23, 24.) Tuyanda kuti muuya wa Leza uusalala kautusololela mubukombi bwesu kutegwa kabweendelana akasimpe kajanika mu Jwi lyakwe. Nokuba kuti tukkala mucisi oomo mulimo wesu moulesyedwe, bukombi bwesu bweelede kubikkwa mubusena bwakusaanguna. Calino, bakwesu abacizyi ibainda ku 100 bali muntolongo akaambo buyo kakuba Bakamboni ba Jehova. * Nokuba boobo, calukkomano balacita kufwumbwa ncobakonzya kutegwa kabapaila, kwiiya alimwi akwaambila bamwi kujatikizya Leza wesu a Bwami bwakwe. Ciindi notufwubaazyigwa naa kupenzyegwa, tulakonzya kukkomana akaambo kakuzyiba kuti Jehova ulaandiswe alimwi akuti uyootulumbula.—Jak. 1:12; 1Pet. 4:14.

14. Ncinzi cakacitikila mukwesu uucili mwana-mwana ku Tajikistan, alimwi nkaambo nzi?

¹⁴ Bakwesu abacizyi bamwi bakalijisi buyumu-yumu, pele bakajana lukkomano lwini-lwini akaambo kakutobela nzila zyotatwe nzyotwabandika. Amubone cakacitika kuli Jovidon Bobojonov, uujisi myaka iili 19, uukkala ku Tajikistan, iwakakaka kunjila mulimo wabusikalumamba. Mu October 4, 2019, wakabwezyegwa kuŋanda yakwe akwaangwa kwamyezi iili mbwiibede alimwi akweendelezyegwa mbuli cigwebenga. Kucitilwa cakutalulama ooku kwakaambwa anyuuzi mumasi manji. Kwakaambwa kuti bakamuuma ikusola kumusinikizya kuti ape cikonke cabusikalumamba alimwi akusama yunifoomu yabusikalumamba. Kuzwa waawo, wakaangwa akutolwa kucilabba cakupenzyezya kusikila ciindi muleli wacisi naakamulekelela  alimwi akupa mulawo wakuti aangununwe. Muciindi coonse eeco, Jovidon wakazumanana kusyomeka alimwi akukkomana. Mubuti? Kwiinda mukuzyiba kuti uyandika kusololelwa aa Leza.

15. Mbuti mukwesu Jovidon mbwaakali kulya cakulya cakumuuya ciindi naakali muntolongo?

¹⁵ Naakali muntolongo, Jovidon wakali kulya cakulya cakumuuya, nociba ciindi naatakajisi Bbaibbele naa bbuku limbi lili lyoonse lyaamba zyamu Bbaibbele. Ino eeco cakali kukonzyeka buti? Bakwesu abacizyi bakubusena ooko bakali kumuletela cakulya cakumubili akulemba lugwalo lwabuzuba acibbeeke ncobakali kunyamwida cakulya. Aboobo, wakali kubala Bbaibbele akuzinzibala kuyeeya aali ndilyo buzuba abuzuba. Naakazwa muntolongo, wakakulwaizya baabo ibatanayaanya masunko mapati kuti: “Cilayandika kapati kulubelesya kusikila mpomugolela lwaanguluko ndomujisi kuyungizya luzyibo lwanu muli Jehova kwiinda mukubala Jwi lyakwe alimwi amabbuku eesu.”

16. Ino mukwesu Jovidon wakali kubikkila maano kunzi?

¹⁶ Mukwesu ooyu wakapona kweelana azyeelelo zya Jehova. Muciindi cakuyeeya zintu zibyaabi alimwi akulinjizya mumicito iitali kabotu, walo wakabikkila maano kuli Jehova alimwi anzyayanda. Jovidon wakali kulangilila bubotu bwazilenge zya Leza. Lyoonse mafwumofwumo wakali kumvwa tuyuni katulila akwiimba.  Masiku wakali kulanga mwezi anyenyeezi. Mpoonya wakaamba kuti: “Zipego eezyi zizwa kuli Jehova zyakali kundipa kukkomana alimwi akundiyumya.” Ciindi notumulumba Jehova akaambo kazintu zyakumuuya alimwi azyakumubili nzyatupa, tuyookkomana kapati, alimwi lukkomano oolo lulakonzya kutugwasya kuliyumya.

17. Mbuti majwi aali ku 1 Petro 1:6, 7 mbwaakonzya kubeleka kumuntu uukonzya kulijana mubukkale bukozyenye abwa Jovidon?

¹⁷ Kuyungizya waawo, mukwesu Jovidon wakabikka bukombi bwa Jehova mubusena bwakusaanguna. Wakalizyi mbociyandika kapati kuzumanana kusyomeka kuli Leza wakasimpe. Jesu wakaamba kuti: “Ngu Jehova Leza wako ngoelede kukomba, alimwi ngonguwe alikke ngoelede kubelekela mulimo uusetekene.” (Lk. 4:8) Basikalumamba abeendelezi babo bakali kuyanda kuti Jovidon abuleke bukombi bwakwe. Muciindi caboobo, Jovidon wakali kupaila cakutaleka abuzuba, kulomba Jehova kuti amugwasye kutatyompwa alimwi akutaluleka lusyomo lwakwe. Tacikwe makani akweendelezyegwa cakutalulama, Jovidon wakazumanana kusyomeka. Akaambo kaceeci, lino ulikkomene kapati akaambo kakuba acintu ncaatakajisi naatakalina kuumwa alimwi akubikkwa muntolongo, nkokuti kusunkwa kwalusyomo lwakwe.—Amubale 1 Petro 1:6, 7.

18. Mbuti mbotukonzya kuzumanana kuba alukkomano?

¹⁸ Jehova ulizyi ncotuyandika kutegwa katukkomene ncobeni. Ikuti twazitobela nzila eezyi zyotatwe izisololela kukuba alukkomano lwini-lwini, tuyoozumanana kukkomana nomuba mubukkale bukatazya. Mpoonya tuyoocikonzya kwaamba kuti: “Balikkomene bantu aabo bajisi Jehova kali Leza wabo!”—Int. 144:15.