1. Ino Jehova ulimvwa buti kujatikizya babelesi bakwe?

 JEHOVA ulazibikkila maano zintu zyoonse zibacitikila babelesi bakwe anyika. Ulabona ciindi notukkomene alimwi aciindi notuuside. (Int. 37:18) Ciindi nabona kuti tulasolekesya kucita zyoonse nzyotukonzya kumubelekela noliba leelyo notutyompedwe, ulakkomana kapati! Kuyungizya waawo, ulilibambilide kutuumbulizya alimwi akutugwasya.

2. Ncinzi Jehova ncabacitila aabo batyompedwe mumoyo? Mbuti mbotukonzya kugwasyigwa akulanganya kwakwe?

² Lugwalo lwa Intembauzyo 147:3 lwaamba Jehova kuti ‘ulaanga zilonda zyabaabo’ batyompedwe mumoyo. Lugwalo oolu lutondezya kuti Jehova ulabalanganya caluzyalo aabo batyompedwe mumoyo. Ncinzi ncotweelede kucita kutegwa tugwasyigwe akulanganya kwa Jehova? Amubone cikozyanyo eeci. Dokota uucibwene ulakonzya kusolekesya kumugwasya muntu walicisa kutegwa apone. Nokuba boobo, muntu walicisa weelede kwaatobela cakulomya malailile aadokota. Mucibalo eeci, tulabona ncaamba Jehova mu Jwi lyakwe kuli baabo ibatyompedwe mumoyo alimwi tulabona mbotukonzya kulutobela lulayo lwakwe lwaluyando.

JEHOVA UTUYEEZYA KUTI TULAYANDIKA KAPATI KULINGUWE

3. Nkaambo nzi bamwi ncobalimvwa kubula mpindu?

³ Cuusisya ncakuti, bantu banji munyika mazuba aano tababayandi bamwi. Akaambo kaceeci tababeendelezyi kabotu alimwi akubapa kulimvwa kubula mpindu. Mucizyi wazina lya Helen a wakaamba kuti: “Ndakakomenena mumukwasyi mobatatondezyi  luyando. Bataata bakali basilunya alimwi abuzuba bakali kundaambila kuti ndinyina mpindu.” Ambweni muntu umwi wakamweendelezya calunya kapati, kumutukila cakwiinduluka-induluka naa kumupa kulimvwa kubula mpindu. Kuti kacili boobu, inga camukatazya kusyoma kuti kuli muntu uumuyanda ncobeni.

4. Kweelana alugwalo lwa Intembauzyo 34:​18, ino ncinzi Jehova ncatusyomezya?

⁴ Nokuba kuti bantu bamwi bakamweendelezya calunya, mulakonzya kuba masimpe kuti Jehova ulamuyanda alimwi umubona kuti mulaampindu. “Ulaafwaafwi abaabo batyompedwe mumoyo.” (Amubale Intembauzyo 34:18.) Kuti naa mulimvwa kubula mpindu, amuyeeye kuti Jehova ulabubona bube bubotu mbomujisi alimwi wakamukwela kulinguwe. (Joh. 6:44) Lyoonse ulilibambilide kumugwasya nkaambo mulayandika kapati kulinguwe.

5. Ncinzi ncotukonzya kwiiya kuli Jesu mbwaakabeendelezya aabo ibakali kulimvwa kuti banyina mpindu?

⁵ Tulakonzya kwiiya mbwalimvwa Jehova kwiinda mukulanga-langa cikozyanyo ca Jesu. Ciindi Jesu naakali anyika, wakali kubeendelezya caluzyalo aabo ibakali kulimvwa kuti banyina mpindu akaambo kakuteendelezyegwa kabotu abamwi. (Mt. 9:​9-12) Ciindi mukaintu umwi iwakali kuciswa bulwazi bupati naakajata cisani ca Jesu kutegwa aponesyegwe, Jesu wakamuumbulizya alimwi akumulumbaizya akaambo kalusyomo lwakwe. (Mk. 5:​25-34) Akaambo kakuti Jesu ulabwiiya bube bwa Bausyi cakulondoka, mulakonzya kuba masimpe kuti Jehova uyoomweendelezya mbubwenya Jesu mbwaakamweendelezya mukaintu ooyu. (Joh. 14:9) Jehova ulabubona bube bubotu mbomujisi, mbuli lusyomo luyumu alimwi aluyando ndomujisi kulinguwe.

6. Ncinzi ncomukonzya kucita ikuti kamulimvwa kuti munyina mpindu?

⁶ Ncinzi ncomukonzya kucita kuti bunji bwaziindi kamulimvwa kuti munyina mpindu? Amubale tupango twamu Bbaibbele itukonzya kumugwasya kubona kuti mulayandika kapati kuli Jehova  alimwi akuzinzibala kuyeeya kujatikizya ntuto. b (Int. 94:19) Ikuti mwaalilwa kusika ambaakani imwi naa kutyompwa akaambo kakuti tamukonzyi kucita zinji, mutalyeezyanisyi abamwi naa kubikkila maano kuzintu nzyomutakonzyi kucita. Jehova kunyina nalangila kuti kamucita zintu nzyomutakonzyi. (Int. 103:​13, 14) Kuti naa mwakatundululwa kaindi, mutanoolipi mulandu akaambo kancaakacita sikumutundulula. Tiikwakali kuyanda kwanu kuti mutundululwe! Amuzyibe kuti Jehova uyoobabeteka aabo ibatundulula bamwi alimwi ulabagwasya aabo ibatundululwa. (1Pet. 3:12) Ba Sandra, balo ibakali kutundululwa nobakacili bana, bakaamba kuti, “Cakwiinduluka-induluka ndakali kumulomba Jehova kuti andigwasye kubona bube bubotu mbwabona mulindime.”

7. Ino zintu izyakatucitikila musyule inga twazibelesya buti mumulimo wa Jehova?

⁷ Mutadooneki kuti Jehova ulakonzya kumubelesya kugwasya bamwi. Wamupa coolwe cakubeleka anguwe mumulimo wakukambauka. (1Kor. 3:9) Akaambo kazintu zikatazya izyakamucitikila mubuumi, cilakonzya kumuubila kumvwisya mbobalimvwa aabo ibapenzyegwa. Mulakonzya kubagwasya munzila zinji. Mucizyi Helen iwaambidwe kale, wakatambula lugwasyo kuzwa kuli Jehova akubakwesu alimwi lino awalo ulakonzya kubagwasya bamwi. Wakaamba kuti: “Ndakali kulimvwa kubula mpindu. Pele Jehova wapa kuti kandilimvwa kuyandwa alimwi ulandibelesya kugwasya bamwi.” Mucizyi Helen ulikkomene kubeleka kali painiya waciindi coonse.

JEHOVA UYANDA KUTI TUKUZUMINE KULEKELELA KWAKWE

8. Ino ncinzi ncatusyomezya Jehova kulugwalo lwa Isaya 1:18?

⁸ Babelesi ba Jehova bamwi balakatazyigwa kapati azintu zibi nzyobakacita musyule, kabatanabbapatizyigwa naa nobakamana kubbapatizyigwa. Pele mutalubi kuti Jehova ulatuyanda kapati nkakaambo kaako wakapa cinunuzyo kutegwa tulekelelwe zibi zyesu. Tulakonzya kuba masimpe kuti uyanda kuti tucizumine cipego cakwe eeci. Jehova usyomezya kuti notwamana ‘kubamba twaambo’ anguwe c, uyootulekelela cakumaninina. (Amubale Isaya 1:18.) Eelo kaka tulalumba kapati kuti Taateesu siluyando Jehova, ulatulekelela zibi! Aciindi nciconya kunyina nailuba milimo mibotu njotwakamucitila.—Int. 103:​9, 12; Heb. 6:10.

9. Nkaambo nzi ncotuteelede kuzumanana kuyeeya zibi nzyotwakacita musyule?

⁹ Kuti naa mulakatazyigwa kapati akaambo kazintu zibi nzyomwakacita musyule, amusolekesye kucita kufwumbwa ncomukonzya kubikkila maano kuzintu zibotu nzyomucita lino alimwi anzyomuyoocita kumbele, muciindi cakubikkila maano kuzintu nzyomwakacita musyule. Amubone cikozyanyo camwaapostolo Paulo. Wakaliyeeya akaambo kakubapenzya calunya Banakristo, pele wakalizyi kuti Jehova wakamulekelela. (1Tim. 1:​12-15) Sena wakazumanana kuyeeya zintu zibi nzyaakacita musyule? Kunyina naakacita oobo, mbubwenya mbwaatakazumanana kubikkila maano kuzintu izyakapede kuti abe mu Farisi uulemekwa. (Flp. 3:​4-8, 13-15) Muciindi caboobo, Paulo wakazumanana kubeleka cabusungu mumulimo wakukambauka akubikkila maano kuzintu zyakumbele. Mbubwenya mbuli Paulo, andinywe tamukonzyi kucinca zintu zyakacitika, kayi kuti maanzi atika kale kunyina naakonzya kuyolwa. Pele mulakonzya kutembaula Jehova alimwi akumukkomanisya lino. Kunze lyaboobo, mulakonzya kuyeeya kujatikizya zisyomezyo nzyaakamusyomezya.

10. Ncinzi ncotukonzya kucita kuti zintu nzyotwakacita kaindi zyakabanyemya bamwi?

 ¹⁰ Mulakonzya kupenga mumoyo akaambo kazintu nzyomwakacita kaindi zyalo izyakabanyemya bamwi. Ncinzi ncomweelede kucita? Amucite kufwumbwa ncomukonzya ikubambulula cakalubila alimwi akulilekelela kuzwa aansi aamoyo. (2Kor. 7:11) Amumulombe Jehova kuti abagwasye aabo mbomwakanyemya. Ulakonzya kumugwasya nywebo abaabo mbomwakanyemya kuliyumya akuba aluumuno lwamumizeezo alimwi.

11. Ino ncinzi ncotukonzya kwiiya kucikozyanyo camusinsimi Jona? (Amubone icili acivwumbyo.)

¹¹ Amwiiye kukulubizya nkomwakacita musyule alimwi amulyaabe kubelesyegwa a Jehova munzila iili yoonse njaasala kumubelesya. Atulange-lange cikozyanyo camusinsimi Jona. Muciindi cakuunka kujwe kwa Nineve Leza nkwaakamwaambilide, walo wakaunka ku Tarisi nkoili kumbo. Jehova wakamusubula Jona alimwi wakaiya kuzwa kukulubizya kwakwe. (Jon. 1:​1-4, 15-17; 2:​7-10) Jehova kunyina naakaleka kumubelesya Jona kali musinsimi. Leza alimwi wakamwaambila kuti aunke ku Nineve, aboobo aciindi aawa wakamvwida cakufwambaana. Nokuba kuti wakausa kapati akaambo kacintu ncaakacita, Jona wakacita Jehova ncaakamwaambila kuti acite.—Jon. 3:​1-3.

JEHOVA ULATUUMBULIZYA KWIINDA MUKUBELESYA MUUYA UUSALALA

12. Mbuti Jehova mbwatupa luumuno ciindi notwacitikilwa cintu cimwi cikatazya? (Bafilipi 4:​6, 7)

¹² Jehova ulakonzya kubelesya muuya wakwe uusalala kutuumbulizya ciindi notwacitikilwa cintu cimwi cikatazya. Amubone cakuluula caba Ron aba Carol. Cakutayeeyela, mwanaabo musankwa wakalijaya. Bakaamba kuti: “Kuli masunko manji aakatazya aakatucitikilide kale, pele eeli lyakali kwiinda. Bunji bwaziindi tiitwakali koona, aboobo twakali kupaila kuli Jehova eelyo twakalumvwa luumuno lwaambidwe kulugwalo lwa Bafilipi 4:​6, 7.” (Amubale.) Ikuti naa mulapenga kapati mumoyo akaambo kacintu cimwi cibyaabi icakamucitikila, amumwaambile Jehova bwini mbomulimvwa. Mulakonzya kubandika anguwe kufwumbwa ciindi ncomuyanda. (Int. 86:3; 88:1) Cakwiinduluka-induluka amumulombe Jehova kuti amupe muuya wakwe uusalala. Alimwi amube masimpe kuti, unoomugwasya lyoonse.—Lk. 11:​9-13.

13. Mbuti muuya uusalala mboukonzya kutugwasya kuzumanana kukomba Jehova cakusyomeka? (Baefeso 3:16)

¹³ Sena kuli ciindi nomwakacitikilidwe kale sunko likatazya kapati cakuti mwakamaninwa nguzu zyakucita cintu cili coonse? Muuya uusalala ulakonzya kumupa nguzu zyakuti muzumanane kumukomba Jehova cakusyomeka. (Amubale Baefeso 3:16.) Amubone cakuluula camucizyi wazina lya Flora. Walo amulumaakwe bakali kubeleka kabali bamisyinali ciindi mulumaakwe naatakasyomeka, mpoonya bakalekana. Mucizyi Flora wakaamba kuti: “Lyakandileka akaambo kakutasyomeka nkobakandicitila. Ndakapaila kuli Jehova kulomba muuya wakwe uusalala kutegwa undigwasye kuliyumya. Jehova wakanduumbulizya nokuba kuti kumatalikilo cakali kulibonya mbuli kuti ncintu citakonzyeki, ndakaba anguzu alimwi ndakacikonzya kuliyumya akaambo kalugwasyo lwakwe.” Lino mucizyi ooyu ulimvwa kuti Leza wakamugwasya kumusyoma cakumaninina alimwi ulisinizyide kuti uyoomugwasya kumasunko aali oonse ngayoojana kumbele. Wakayungizya kuti: “Majwi aali kulugwalo lwa Intembauzyo 119:32 akabeleka kulindime alo aamba kuti: ‘Caluyandisisyo ndinootobela nzila yamilawo yako nkaambo yebo waibambila busena mumoyo wangu.’”

14. Mbuti mbotukonzya kulekela muuya wa Leza kubeleka mulindiswe?

¹⁴ Ncinzi ncomweelede kucita ciindi nomwamana kulomba Jehova kuti amupe muuya wakwe uusalala? Amucite zintu zikonzya kupa kuti muuya uusalala ubeleke mulindinywe. Zintu eezyi zibikkilizya kujanika kumiswaangano alimwi akukambaukila bamwi. Amubale Jwi lya Jehova  abuzuba. Kucita boobu kuyoomugwasya kuyeeya mizeezo yakwe. (Flp. 4:​8, 9) Ciindi nomubala, amubikkile maano kujatikizya bantu baambidwe mu Bbaibbele balo ibakajana masunko alimwi amuzinzibale kuyeeya Jehova mbwaakabagwasya kuliyumya. Ba Sandra, ibaambidwe kale, bakajana mapenzi manji mubuumi. Bakaamba kuti: “Cibalo caamba makani aajatikizya Josefa cakandikulwaizya kapati. Kunyina naakalekela masunko alimwi akutalulama kwakamucitikila kunyonganya cilongwe cakwe a Jehova.”—Matl. 39:​21-23.

JEHOVA ULATUUMBULIZYA KWIINDA MUBASYOMIMA

15. Mbaani bakonzya kutupa luumbulizyo? Ino inga batugwasya buti? (Amubone acifwanikiso.)

¹⁵ Ciindi notwajana mapenzi, basyomima balakonzya ‘kutuumbulizya kapati.’ (Kol. 4:11) Bakwesu alimwi abacizyi ncitondezyo caluyando lwa Jehova kulindiswe. Basyomima balakonzya kutuumbulizya ciindi nobaswiilila notwaamba kujatikizya mbotulimvwa. Balakonzya kutukulwaizya kwiinda mukutubalila kapango kamwi kamu Bbaibbele naa kupaila andiswe. d (Rom. 15:4) Zimwi ziindi, mukwesu naa mucizyi ulakonzya kutuyeezya mbwayeeya Jehova calo cikonzya kutugwasya kuzumanana kuliyumya. Kunze lyaboobo, Banakristoma balakonzya kutupa lugwasyo luyandika, mbuli cakulya ciindi notuli mumapenzi.

16. Ino ncinzi ncotweelede kucita kutegwa tutambule lugwasyo kuzwa kuli bamwi?

¹⁶ Kutegwa bamwi batugwasye, tweelede kubalomba  buya. Bakwesu abacizyi balatuyanda alimwi balayanda kutugwasya. (Tus. 17:17) Pele tabakonzyi kuzyiba mbotulimvwa alimwi ancotuyandika. (Tus. 14:10) Kuti naa mulityompedwe mumoyo, mulakonzya kubandika abalongwe banu bali kabotu alimwi akubaambila mbomulimvwa. Amubaambile icikonzya kumugwasya. Mulakonzya kubandika amwaalu omwe naa bobilo balo mbomwaangulukide limwi. Bacizyi bamwi bajana kuti cilaumbulizya kubandika amucizyi uusimide kumuuya.

17. Nzintu nzi zikonzya kupa kuti cibaalile bamwi kutukulwaizya? Ino mbuti mbotukonzya kuzyeeleba?

¹⁷ Amweelebe cilengwa cakulizandula. Akaambo kakucisa kwamoyo, ambweni inga tiimwayanda kuba abamwi. Zimwi ziindi bakwesu abacizyi inga tiibamumvwisya naa balakonzya kwaamba cintu cikonzya kumucisa. (Jak. 3:2) Nokuba boobo, mutalitantamuni kubakwesu alimwi abacizyi. Jehova ulakonzya kubelesya mbabo kumukulwaizya. Mwaalu wazina lya Gavin, walo uujisi penzi lyakutyompwa wakaamba kuti: “Bunji bwaziindi tandiyandi kujanika abalongwe naa kubandika ambabo.” Pele mukwesu Gavin ulasolekesya kuba abakwesu. Kucita boobo kwamugwasya kulimvwa kabotu. Mucizyi wazina lya Amy wakaamba kuti: “Akaambo kazintu izyakandicitikila mubuumi, cilandikatazya kubasyoma bantu. Pele ndiiya kubayanda bakwesu abacizyi alimwi akubasyoma mbubwenya mbwacita Jehova. Ndilizyi kuti kucita boobo kukkomanisya Jehova alimwi kundiletela lukkomano.”

ZISYOMEZYO ZYA JEHOVA ZYAKUMBELE ZILAKONZYA KUTUUMBULIZYA

18. Nzintu nzi nzyotulangila kumbele? Ncinzi ncotukonzya kucita lino?

¹⁸ Ino-ino Jehova uyoozigusya zintu zyoonse zitupa kutyompwa mumoyo alimwi akucisa kuli koonse nkotukonzya kumvwa. (Ciy. 21:​3, 4) Aciindi eeco, zintu zitucisizya moyo izyakatucitikila mubuumi kunyina ‘noziyakuyeeyegwa mumoyo.’ (Is. 65:17) Pele noliba lino, Jehova ulatulanganya ciindi notupenga. Jehova ulatupa zintu zinji izituumbulizya alimwi akutugwasya. Aboobo atube masimpe kuti twaluzumina lugwasyo lwakwe. Mutadooneki naaceya kuti “ulamubikkila maano.”—1Pet. 5:7.