CIBALO CAKWIIYA 43
LWIIMBO 90 Amukulwaizyanye
Mbotukonzya Kukuzunda Kudooneka
“Amusinizye zintu zyoonse.”—1TES. 5:21.
ZILAAYIIGWE
Mbotukonzya kuzunda kudooneka ikukonzya kunyonganya mulimo wesu kuli Jehova.
1-2. (a) Mibuzyo nzi njobakonzya kulibuzya babelesi ba Jehova? (b) Ino tulalanga-langa nzi mucibalo eeci?
TOONSE buyo tacikwe makani tuli bapati naa bana, zimwi ziindi tulakonzya kutalika tuladooneka naa mubwini tulayandika kuli Jehova alimwi akulipa mulandu akaambo kazyakusala zyesu zyamusyule. a Mucikozyanyo, amweezeezye Kamboni uucili mwana-mwana uudooneka naa mubwini Jehova ulamuyanda. Akaambo kaceeci, ulakonzya kulibuzya naa uleelela ncobeni kubbapatizyigwa. Cikozyanyo cimbi, cijatikizya mukwesu iwakasala kubikka Jehova mubusena bwakusaanguna mubuumi bwakwe naakacili mwana muciindi cakulijanina mali manji. Lino wakomena pele ujisi buyo mali masyoonto aakulanganya mukwasyi wakwe. Aboobo ulakonzya kutalika kulipa mulandu naa wakasala kabotu ciindi naakacili mwana. Amweezeezye alimwi kujatikizya mucizyi uucembeede alimwi uutacijisi nguzu. Ulakonzya kutyompwa akaambo kakuti tacicikonzyi kucita zinji mbuli mbwaakali kucita kaindi. Sena kuli nomwakalibuzyide kale mibuzyo mbuli yakuti: ‘Mwati mubwini Jehova ulindibwene? Sena kulyaaba kwangu kwakubelekela Jehova kulaampindu? Sena kuli zintu nzyondicikonzya kumucitila Jehova?’
2 Kuti naa tiitwasolekesya kujana bwiinguzi kumibuzyo eeyi, cilakonzya kupa kuti lusyomo lwesu muli Jehova lumane alimwi buya tulakonzya kuleka kumukomba. Aboobo mucibalo eeci, tulalanga-langa Bbaibbele mbolikonzya kutugwasya ikuti katuyeeya kuti (1) Jehova tatubikkili maano, (2) tiitwakasala kabotu, naa kuti (3) tatucikwe mulimo kuli Jehova.
CIKONZYA KUTUGWASYA CIINDI NOTWATALIKA KUDOONEKA
3. Ncinzi ncotukonzya kucita kuti katujisi mibuzyo iitupa kudooneka?
3 Ciindi notwatalika kudooneka, tulakonzya kuvwuntauzya mu Bbaibbele kutegwa tujane bwiinguzi bwamibuzyo yesu. Kuti twacita oobo, lusyomo lwesu muli Jehova alimwi acilongwe cesu anguwe zilakonzya kuyuma alimwi tulakonzya ‘kwiima nji mulusyomo.’—1Kor. 16:13.
4. Mbuti mbotukonzya ‘kusinizya zintu zyoonse’? (1 Batesalonika 5:21)
4 Amubale 1 Batesalonika 5:21. Amubone kuti Bbaibbele litukulwaizya ‘kusinizya zintu zyoonse.’ Mbuti mbotukonzya kucita oobo? Tulakonzya kusinizya kuti nzyotusyoma zyamasimpe, kwiinda mukweezyanisya ncolyaamba Bbaibbele. Mucikozyanyo, amubone bukkale bwamuntu uucili mwana uudooneka naa Jehova ulamubikkila maano. Sena akaambo buyo kakuti ulimvwa boobu caamba kuti Jehova tamubikkili maano? Peepe, weelede ‘kusinizya zintu zyoonse’ kwiinda mukwiiya Bbaibbele kutegwa abone Jehova ncayeeya kujatikizya nguwe.
5. Mbuti mbotukonzya kujana bwiinguzi bujatikizya zintu zitupa kudooneka?
5 Ciindi notubala Bbaibbele cili mbuli kuti Jehova ulaambaula andiswe. Pele kunze buyo lyakubala Bbaibbele, tweelede kucita zinji kutegwa tujane bwiinguzi bujatikizya zintu zitupa kudooneka. Notubala Bbaibbele, tweelede kubikkila maano kumakani aajatikizya zintu zitupa kudooneka. Tulakonzya kwaavwuntauzya makani aaya kwiinda mukubelesya zibelesyo mbunga ya Jehova nzyoipa. (Tus. 2:3-6) Tulakonzya kupaila kuli Jehova kutegwa atusololele ciindi notuvwuntauzya kutegwa tujane bwiinguzi kumakani aatupa kudooneka. Mpoonya tulakonzya kuyandaula njiisyo zyamu Bbaibbele zikonzya kubeleka mubukkale bwesu. Alimwi tulakonzya kugwasyigwa azibalo zyamu Bbaibbele izyaamba baabo ibakali mubukkale bukozyenye abwesu.
6. Mbuti miswaangano mboitugwasya kuleka kudooneka?
6 Tulamumvwa Jehova kabandika andiswe kumiswaangano. Ikuti lyoonse katujanika kumiswaangano, tulakonzya kumvwa cintu cimwi mumakani naa kumvwa umwi munkamu kapa bwiinguzi ibukonzya kupa kuti tuleke kudooneka. (Tus. 27:17) Lino atubone cikonzya kutugwasya kutegwa tuleke kudooneka.
CIINDI NOTUDOONEKA IKUTI NAA JEHOVA ULATUBIKKILA MAANO
7. Ino mubuzyo nzi bamwi ngobakonzya kulibuzya?
7 Sena kuli nomwakalibuzyide kale kuti, ‘Mwati mubwini Jehova ulandibikkila maano?’ Kuti kamulimvwa kuti tamuyandiki, mulakonzya kutalika kulimvwa kuti nciyumu kuba acilongwe a Mulengi wabubumbo boonse. Ambweni awalo Mwami Davida mbwaakalimvwa oobo. Aboobo wakagambwa kubona kuti Jehova ulababikkila maano bantu. Wakati: “O Jehova, ino muntu nguni wakuti komulanganya, imwana wamuntu ooyo ngobikkila maano?” (Int. 144:3) Ino nkookuli nkomukonzya kujana bwiinguzi bwamubuzyo ooyu?
8. Kweelana alugwalo lwa 1 Samuele 16:6, 7, 10-12, ncinzi Jehova ncabona mubantu?
8 Bbaibbele lituyiisya kuti Jehova ulababikkila maano aabo ibalibonya mbuli kuti tabayandiki kuli bamwi. Mucikozyanyo, Jehova wakatuma Samuele kuŋanda ya Jese kuyoonanika umwi wabana bakwe iwakali kuyooba mwami wa Israyeli. Jese wakaita bana bakwe bali 7 akati kabana bakwe bali 8, pele tanaakamubikkilizya Davida iwakali mwana. b Nokuba boobo, Jehova wakasala Davida. (Amubale 1 Samuele 16:6, 7, 10-12.) Jehova wakabona bwini mbwaakabede Davida mumoyo alimwi wakalizyi kuti wakali kumuyanda kapati.
9. Nkaambo nzi ncotukonzya kuba masimpe kuti Jehova ulatubikkila maano? (Amubone acifwanikiso.)
9 Amuyeeye buyo kujatikizya Jehova mbwaatondezya kale kuti ulamubikkila maano. Ulamupa lulayo lwiinda kubota mubukkale bugaminide momubede. (Int. 32:8) Kucita boobo kutondezya kuti ulimuzyi kabotu. (Int. 139:1) Ciindi nomubelesya lulayo lwa Jehova alimwi akubona mbolumugwasya, ciyoomupa kusinizya kuti ulamubikkila maano. (1Mak. 28:9; Mil. 17:26, 27) Jehova ulabikkila maano kukusolekesya nkomucita. Ulabubona bube bubotu mbomujisi alimwi uyanda kuba mulongwe wanu. (Jer. 17:10) Aboobo, uyookkomana kapati kuti andinywe kamuyanda kuba mulongwe wakwe.—1Joh. 4:19.
“Ikuti wamuyandaula [Jehova], uyookulekela kuti umujane.”—1 Mak. 28:9 (Amubone muncali 9) c
NCOMUKONZYA KUCITA KUTI KAMULIMVWA KUTI TIIMWAKASALA KABOTU
10. Ciindi notuyeeya kujatikizya zyakusala nzyotwakapanga musyule, mibuzyo nzi njotukonzya kulibuzya?
10 Zimwi ziindi, bamwi balakonzya kutalika kuyeeya kujatikizya zyakusala zyabo zyamusyule akubona kuti tiibakasala kabotu. Ambweni bakasiya mulimo wakali kuvwolwa mali manji naa kusala kutacita makwebo amwi kutegwa bajane ciindi cinji cakubelekela Jehova. Lino ambweni kwainda myaka minji kapati kuzwa nobakacita boobo. Balakonzya kuyeeya bantu mbobazyi ibakasala zintu ziindene azyabo, kumane bantu aabo balibonya kuti bajisi mali manji alimwi bapona buumi bubotu. Akaambo kaceeci, balakonzya kulibuzya kuti: ‘Mwati zyakusala zyangu zilayandika kuli Jehova? Naa sena zyakandipa kwiindwa zyoolwe zimbi?’
11. Ncinzi cakali kumupenzya mumizeezo mulembi wa Intembauzyo 73?
11 Kuti naa mwakalibuzya kale mibuzyo iili mbuli yeeyi, amubone ncolyaamba Bbaibbele kujatikizya mbwaakalimvwide mulembi wa Intembauzyo 73. Wakabona bantu ibatakali kubelekela Jehova kabajisi buumi bubotu, kabavwubide alimwi akulibonya kuti bakanyina mapenzi. (Int. 73:3-5, 12) Naakabona mbozyakali kubeendela kabotu zintu, wakabona kuti kubelekela Jehova nkwaakali kucita kwakanyina mpindu. ‘Buzuba boonse wakali kukatazyigwa’ akaambo kamizeezo iityompya njaakajisi. (Int. 73:13, 14) Ino wakaizunda buti mizeezo eeyi iyakali kumupenzya?
12. Kweelana alugwalo lwa Intembauzyo 73:16-18, ncinzi cakagwasya sintembauzyo kuzunda kuyeeya kutali kabotu?
12 Amubale Intembauzyo 73:16-18. Sintembauzyo wakaunka kucikombelo ca Jehova. Okuya, wakali kukonzya kuzinzibala kuyeeya. Wakamvwisya kuti nokuba kuti bamwi bakali kupona buumi bubotu, tiibakajisi bulangizi bwakumbele. Kumvwisya kuli boobu, kwakamugwasya kuba aluumuno lwamumizeezo akuzyiba kuti kubikka zintu zyakumuuya mubusena bwakusaanguna ncecakusala ciinda kubota. Akaambo kaceeci, wakakanza kuzumanana kubelekela Jehova.—Int. 73:23-28.
13. Ncinzi ncomukonzya kucita kuti kamulipa mulandu akaambo kazyakusala zyanu zyamusyule (Amubone acifwanikiso.)
13 Andinywe mulakonzya kuba aluumuno lwamumizeezo kwiinda mukugwasyigwa a Jwi lya Leza. Mubuti? Amuyeeye kujatikizya zintu zibotu nzyomujisi, kubikkilizya akukkomaninwa a Jehova alimwi amuyeeye kuti aabo ibatamubelekeli kunyina nabagwasya. Kubantu batabelekeli Jehova, kupona buumi bubotu ncecintu ciyandika kapati nkaambo tabajisi bulangizi bwakumbele. Pele nywebo, Jehova umusyomezya zilongezyo zinji kapati kwiinda mbomukonzya kweezeezya. (Int. 145:16) Alimwi amuyeeye buyo kujatikizya kaambo aaka: Tamukonzyi kuzyiba bwini buumi bwanu mbobwali kunoobede mazuba aano, ikuti nomwakasala munzila yiindene. Pele kaambo kamasimpe nkomweelede kuzyiba nkakuti: Ciindi nomusala cintu cimwi akaambo kaluyando ndomujisi kuli Leza alimwi akuli bamwi, lyoonse munoojisi zintu nzyomuyandika mubuumi izinoomupa kuti kamukkomene kapati.
Amubikkile maano kuzilongezyo nzyaakasyomezya Jehova (Amubone muncali 13)) d
CIINDI NOTUYEEYA KUTI TATUCIKWE MULIMO KULI JEHOVA
14. Ino bamwi bali mubukkale buli buti? Mubuzyo nzi ngobakonzya kulibuzya?
14 Bantu ba Jehova bamwi tabakonzyi kucita zinji akaambo kakucembaala, kuciswa-ciswa naa bulema. Aboobo balakonzya kulimvwa kuti tabayandiki kuli Jehova. Balakonzya kulibuzya kuti, ‘Mwati mebo ndiciyandika buya kuli Jehova?’
15. Ncinzi ncaakasinizyide mulembi wa Intembauzyo 71?
15 Mulembi wa Intembauzyo 71 awalo mbwaakali kulimvwa oobo. Wakapaila kuti: “Utandilekelezyi pe ciindi nozimana nguzu zyangu.” (Int. 71:9, 18) Nokuba boobo, sintembauzyo ooyu wakalisinizyide kuti, ikuti wazumanana kubelekela Jehova cakusyomeka, Leza wakwe ooyu wakali kuyoomusololela alimwi akumulanganya. Sintembauzyo wakazyiba kuti, Jehova ulabakkomanina aabo ibasolekesya kumubelekela tacikwe makani akulezya kwabo.—Int. 37:23-25.
16. Muunzila nzi Jehova mwakonzya kubabelesya bacembeede? (Intembauzyo 92:12-15)
16 Kuti naa mulicembeede, amuyeeye kujatikizya Jehova mbwamubona. Ulakonzya kumugwasya kumubelekela cakusyomeka nokuba kuti mulalezya. (Amubale Intembauzyo 92:12-15.) Muciindi cakubikkila maano kuzintu nzyomutakonzyi kucita lino, amubikkile maano kuzintu nzyomukonzya kucita. Mucikozyanyo, mulakonzya kubagwasya bamwi kwiinda mucikozyanyo canu cakusyomeka alimwi akubabikkila maano. Mulakonzya kubaambila bamwi kujatikizya Jehova mbwaali kumulanganya kwamyaka minji alimwi akubaambila zisyomezyo zyamu Bbaibbele nzyomulangila kumbele. Kunze lyaboobo, mutalubi kuti mipailo njomupailila bamwi ilagwasya kapati. (1Pet. 3:12) Kufwumbwa bukkale bwesu mbobubede, toonse tulakonzya kucitila Jehova alimwi abamwi cintu cimwi.
17. Nkaambo nzi ncotuteelede kulyeezyanisya abamwi?
17 Kuti kamulimvwa kuti tamukonzyi kucita zinji mumulimo wa Jehova, amube masimpe kuti kufwumbwa ncomucita cilayandika kapati kulinguwe. Zimwi ziindi, mulakonzya kutalika kusola kweezyanisya zintu nzyomucita kuli nzyobacita bamwi. Pele tamweelede kucita boobo. Nkaambo nzi? Akaambo kakuti Jehova kunyina namweezyanisya abamwi. (Gal. 6:4) Mucikozyanyo, Mariya wakapa Jesu mafwuta aakali kununkilila alimwi aakali kudula kapati. (Joh. 12:3-5) Mukwiimpana, mukamufwu mucete wakasanga tukkobili tobilo kutempele itwakajisi mpindu nsyoonto kapati. (Lk. 21:1-4) Nokuba boobo, Jesu wakabona kuti zipego zyoonse eezyi zyobilo yakali nzila yakutondezya lusyomo. Jesu wakabaiya bausyi cakulondoka. Aboobo, mulakonzya kuba masimpe kuti Jehova ulazibona zyoonse nzyomucita akaambo kakuti mulijisi lusyomo mulinguwe alimwi akuti mulamuyanda. Kunze lyaboobo, zintu zyoonse nzyomucita zilayandika kapati kulinguwe nokuba kuti nywebo inga kamuzibona kuti zisyoonto.
18. Ncinzi cikonzya kutugwasya kuzunda kudooneka? (Amubone akabbokesi kakuti “ Ijwi lya Jehova Lilakonzya Kumugwasya Kuzunda Kudooneka.”)
18 Toonse tulakonzya kudooneka zimwi ziindi. Mbubwenya mbotwaiya, Ijwi lya Leza lilakonzya kutugwasya kukuzunda. Aboobo amucite kufwumbwa ncomukonzya kutegwa muleke kudooneka. Kuti mwacita oobo, munooli basicamba muciindi cakudooneka. Jehova ulimuzyi nywebo lwanu kumugama. Ulalumba kapati akaambo kakulyaaba kwanu alimwi uliyandide kuyoomulumbula. Amusyome kuti Jehova ulabayanda alimwi akubalanganya babelesi bakwe basyomeka.
LWIIMBO 111 Twaambo Tutupa Kukkomana
a BUPANDULUZI BWAMABALA: Mucibalo eeci, tulabandika kudooneka ikutupa kulimvwa kuti tatuyandiki kuli Jehova naa kujatikizya zyakusala zyesu zyalo nzyotuyeeya kuti tazili kabotu. Ooku takuli kudooneka kwaambidwe mu Bbaibbele kwalo ikutondezya kubula lusyomo muli Jehova amuzisyomezyo zyakwe.
b Nokuba kuti Bbaibbele talyaambi myaka njaakajisi Davida ciindi Jehova naakamusala, pele kulangilwa kuti wakacili mukubusi.—Amubone Ngazi Yamulindizi ya October 1, 2011, peeji 21, muncali 2.
c BUPANDULUZI BWACIFWANIKISO : Kutegwa azyibe Jehova mbwalimvwa kujatikizya bukkale bwakwe, Kamboni mukubusi ulanga lulayo lwa Jehova mu Bbaibbele.
d BUPANDULUZI BWACIFWANIKISO: Mukwesu ubeleka mulimo wakusalazya mawindo kutegwa ajane nzyouyandika mukwasyi wakwe, pele kumwi uleezeezya kuti uli mu Paradaiso.
