Akkoce mpaakali kwiindwa kuunka ku Busena Busalala bwatempele. Kweelana ama Bbaibbele aa Busanduluzi Bwanyika Mpya aakamwaigwa kautanasika mwaka wa 2023, “kkoce ilyakali kumbele lyatempele lyakali kulampa tukokola tuli 20 mubulamfwu, kweelana abwamba bwaŋanda, eelyo kuya mujulu lyakali kulampa tukokola tuli 120.” (2Mak. 3:4) Busanduluzi bumbi abwalo bwaamba kuti kkoce lyakali kulampa “tukokola tuli 120” kuya mujulu, icaamba kuti lyakali kulampa mamita aali 53!

Nokuba boobo, Bbaibbele lya Busanduluzi Bwanyika Mpya ilyakasimbwa mu 2023 lyaamba boobu kujatikizya kkoce lyatempele lya Solomoni: “Kuya mujulu lyakali kulampa tukokola tuli 20,” naa mamita aali 9. a Amubone twaambo tusyoonto itwakapa kuti kube kucinca ooku.

Bulamfwu bwakuya mujulu kwakkoce takwaambidwe kulugwalo lwa 1 Bami 6:3. Mukapango aaka, mulembi Jeremiya wakaamba ibulamfwu, abwamba bwakkoce ikutali bulamfwu bwakuya mujulu. Mpoonya mucaandaano citobela wakaamba zibeela zimbi ziyandika kapati zyatempele mbuli, zyiba lyamukuba, tuŋola twamukuba tuli 10 alimwi amisemu yamukuba yobilo iyakaimvwi aanze aakkoce. (1Bam. 7:​15-37) Kuti naa mubwini kkoce lyakali kulampa mamita aali 50 kuya mujulu akwiindilila tempele, nkaambo nzi Jeremiya ncaatakaamba kujatikizya bulamfwu bwakuya mujulu kwandilyo? Nociba ciindi nokwakainda myaka minji kapati, basyaazibwene mumakani aakaindi bakalemba kuti kkoce eelyo tiilyakali lilamfwu kwiindilila tempele lya Solomoni.

Basyaabusongo baladooneka kuti naa kkoce ililampa tukokola tuli 120 lyakali kukonzya kukkala abwaanda bwatempele. Mayake aakaindi akali kuyakwa kubelesya mabwe alimwi azitina, mbuli milyango yatempele ku Egepita, yalo yakakwazeme mpoili aansi mpoonya kuya mujulu yakali misyoonto. Pele tempele lya Solomoni tiilyakali boobu. Basyaabusongo basyoma kuti bupati bwabwaanda bwatempele tiibwakali kusika kutukokola tuli 6 naa mamita aali 2.7. Syaazibwene mumakani aakaindi aajatikizya mulimo wakuyaka wazina lya Theodor Busink wakaamba kuti: “Kweelana ambobwakali bupati bwaanda [kumanjililo aatempele], kkoce tiilyakali kukonzya kulampa tukokola tuli 120.”

Lugwalo lwa 2 Makani 3:4 kweelede kuti tiilwakakkopololwa kabotu. Nokuba kuti mumalembe aakaindi kulembedwe “tukokola tuli 120” mukapango aaka, malembe aambi aasyomwa mbuli Codex Alexandrinus aakalembwa myaka yiinda ku 1,500 alimwi a Codex Ambrosianus aakalembwa myaka yiinda ku 1,400, moonse mulembedwe “tukokola tuli 20.” Nkaambo nzi sikukkopolola ncaakalubizya kwiinda mukulemba “120”? Bbala lyakuti “mwaanda” alimwi alyakuti “tukokola” lilibonya kukonzyanya muci Hebrayo. Aboobo sikukkopolola kweelede kuti wakalemba bbala lyakuti “mwaanda” muciindi cakuti “tukokola.”

Nokuba kuti tulasolekesya kumvwisya makani aajatikizya tempele lya Solomoni, tubikkila kapati maano kuzyiba ncolyakali kwiiminina, nkokuti tempele lipati lyakumuuya ilyakali kuyooboola kumbele. Eelo kaka tulamulumba kapati Jehova akaambo kakuti ulabatamba babelesi bakwe boonse kutegwa kabamukomba mutempele eeli!—Heb. 9:​11-14; Ciy. 3:12; 7:​9-17.