“Ndakali amyaka iili 15 ciindi nondakabbapatizyigwa, mpoonya nokwakainda myezi iili cisambomwe ndakacita bupainiya bwakugwasyilizya. Nokwakainda mwaka omwe, ndakalembela mulimo wabupainiya bwaciindi coonse. Ciindi nondakamanizya cikolo, ndakalembela kuyoobelekela kubusena kubulide bakambausi ba Bwami. Ndakali kuyanda kuzwa mudolopo mondakali kukkala alimwi ndakali kuyanda kubasiya bakaapa mbondakali kukkala limwi ibatakali Bakamboni ba Jehova. Ndakausa kapati ciindi mulangizi wabbazu naakandaambila kuti cilawo mondakali kuyoobelekela mwakali mudolopo mumwenya mondakazyalilwa. Ndakasoleka kumusisa kutegwa atazyibi mbondakalimvwide. Kandityompedwe, ndakaunka kutegwa ndikaayeeyesye makani ngaakandaambila. Mpoonya ndakaambila mucizyi ngondakeelede kubeleka limwi kuti: “Ndiyeeya kuti ndatalika kucita zintu mbuli Jona. Pesi kumamanino wakaunka ku Nineve. Mbubwenya buyo, andime ndilabelekela buyo mubusena mbondaambilwa.”

Lino ndali kubeleka kandili mupainiya mudolopo mondakazyalilwa kwamyaka yone, alimwi ndabona kuti cakali camaano kutobela busolozi mbondakapegwa. Ikutazilanga kabotu zintu ndelyakali penzi lyangu. Lino ndilikkomene kapati. Mwezi umwi ndakacikonzya kusololela ziiyo zya Bbaibbele zili 24. Ndilamulumba kapati Jehova nkaambo ndakacikonzya kutalisya ciiyo ca Bbaibbele kuli bakaapa balo kaindi ibakali kukazya kapati.”

Sikwiiya Bbaibbele umwi ku Fiji wakeelede kusala akati kakuunka kumuswaangano wacooko alimwi akuunka antoomwe amulumaakwe kupobwe lyakusekelela buzuba bwakuzyalwa lyamubbululu wakwe. Mulumaakwe wakamuzumizya kuti aunke kumuswaangano. Mukaintu ooyu wakaambila mulumaakwe kuti inga wamusangana kupobwe wamana muswaangano. Nokuba boobo, naakapiluka kuŋanda kuzwa kumuswaangano, wakalimvwa kuti cakali kwiinda kubota kutalibikka mubukkale bukonzya kumunjizya muntenda kumuuya, aboobo taakwe naakaunka kupobwe.

Lino mulumaakwe naakaambila babbululu bakwe kuti mukaintu wakwe walomba kuti ulabasangana wamana “muswaangano wa Bakamboni,” bakavwiila kuti, “Takooboola pe; kayi Bakamboni ba Jehova tabasekeleli mapobwe aakusekelela buzuba bwakuzyalwa!” *

Akaambo kaceeco, mulumaakwe wakakkomana kapati kuti mukaintu wakwe taakwe naakaunka kupobwe akaambo kanzyasyoma alimwi amanjezyeezya aakwe. Alimwi akaambo kakusyomeka kwakwe, mukuya kwaciindi wakaba acoolwe cakumukambaukila mulumaakwe, alimwi akukambaukila bamwi. Ino ncinzi cakacitika? Mulumaakwe wakazumina kwiiya Bbaibbele alimwi wakatalika kuunka kumiswaangano antoomwe amukaintu wakwe.