1, 2. Ino mbuyumuyumu nzi babelesi ba Jehova mbobayaanya?

KUZWA kumuntu wakusaanguna iwakali kusyomeka, Abelo, kusikila kuciindi cino ncotupona, bakombi basyomeka bali kujana buyumuyumu. Mwaapostolo Paulo wakalembela Banakristo ba Hebrayo kuti ‘bakaliyumya munkondo mpati alimwi amumapenzi,’ ciindi nobakali kuyanda kuti Jehova abakkomanine akubalongezya. (Heb. 10:32-34) Paulo wakatondezya kuti buyumuyumu mbobakajisi Banakristo bwakalikozyenye akulyaaba nkobakali kucita bantu ibakali kutola lubazu mumizundano yaba Giriki, mbuli muzundano wakubalika, kamando alimwi awakulwana mfwaindi. (Heb. 12:1, 4) Mazuba aano, tuli mumuzundano wakubalika kutegwa tukatambule buumi, pele kuli basikukazya ibayanda kutunyonganya, kutuleba, kutuwisyila ansi, alimwi akutunyanga lukkomano lwesu alimwi azilongezyo zyakumbele.

² Kusaanguna, tulijisi nkondo mpati yakutingana a Saatani alimwi anyika yakwe mbyaabi. (Ef. 6:12) Cilayandika kapati kuti katweeleba kujatikizyigwa ‘azintu zyoonse ziyumu nta’ zyamunyika eeyi. Eezyi zibikkilizya njiisyo zyanjiyo zyakubeja, busongo bujanika mumo alimwi azintu zibi nzyobacita bantu mbuli kucita bwaamu, kufweba tombwe, kuciindizya kunywa bukoko alimwi akubelesya misamu iikola. Alimwi  tweelede kuzumanana kulwana kutalondoka kwesu alimwi akutyompezyegwa.—2Kor. 10:3-6; Kol. 3:5-9.

3. Muunzila nzi Leza mbwatuyiisya kulwana basinkondoma?

³ Sena ncobeni cilakonzyeka kubazunda basinkondo bajisi nguzu ibali boobu? Inzya, pele tacili cuuba-uba. Kaamba kujatikizya cikozyanyo cabasikulwana mfwaindi bakaindi, Paulo wakalyaamba kuti: “Tandifwusi mfwaindi zyangu ikuuma buyo muwo pe.” (1Kor. 9:26) Mbubwenya mbuli sikulwana mfwaindi mbwalikwabilila kuli sinkondonyina, andiswe tweelede kulikwabilila kuli basinkondoma. Jehova ulatuyiisya akutugwasya munkondo yesu. Ulatupa malailile aakonzya kutupa buumi mu Jwi lyakwe. Alimwi ulatugwasya kwiinda mumabbuku aapandulula zyamu Bbaibbele, miswaangano ya Bunakristo, yabbazu alimwi ayacooko. Sena mulazibelesya nzyomwiiya? Kuti kamutazibelesyi, inga caba mbuli kuti ‘muuma buyo muwo,’ kutali kumukazya cakumaninina sinkondonyoko.

4. Mbuti mbotukonzya kweeleba kuzundwa abubi?

⁴ Basinkondoma balakonzya kutulwana ciindi notutalangili alimwi aciindi notutyompedwe kapati, aboobo tweelede kupakamana lyoonse. Bbaibbele litucenjezya kuti: “Utalilekeli kuzundwa abubi pe, pele kozumanana kuzunda bubi kwiinda mukucita zibotu.” (Rom. 12:21) Majwi aakulwaizya aakuti tutalilekeli “kuzundwa abubi” atondezya kuti tulakonzya kubuzunda bubi. Tulakonzya kuzunda kuti twazumanana kubulwana bubi. Ikuti tiitwacenjela, tulakonzya kuzundwa a Saatani, nyika yakwe mbyaabi alimwi akutalondoka kwesu kuti twaleka kupakamana akuleka kulwana nkondo. Mutalekeli Saatani kumukonga akulekela maanza aanu kulebuka akuzundwa!—1Pet. 5:9.

5. (a) Ncinzi cikonzya kutugwasya kutegwa tuzumanane munkondo yesu yakulwanina kulongezyegwa a Leza? (b) Mbantu bali ibaambwa mu Bbaibbele mbotutiilange-lange?

⁵ Kutegwa bazwidilile, aabo ibalwana nkondo tabeelede kuluba kaambo ncobalwanina. Kutegwa bakkomaninwe akulongezyegwa a Leza, beelede kuzumanana kukabikkila maano kaambo nkotubala kulugwalo lwa Bahebrayo 11:6 kakuti: “Kufwumbwa ooyo uuswena afwaafwi kulinguwe weelede kusyoma kuti nkwali ncobeni akuti uba sikupa bulumbu kuli baabo bamuyandaula cabusungu.” Bbala lya Chigiriki ilyakasandululwa kuti “bamuyandaula cabusungu” lyaamba kubeleka canguzu akusolekesya. (Mil. 15:17) Mu Magwalo tujana zikozyanyo zibotu zyabaalumi abamakaintu ibakabeleka canguzu kutegwa Jehova abalongezye. Jakobo, Rakele, Josefa alimwi a Paulo bakayaanya bukkale ibwakabapa kuti bapenge mumizeezo alimwi akumubili, nokuba boobo bakatondezya kuti kukakatila kusololela kuzilongezyo zinji. Mbuti mbotukonzya kwiiya zikozyanyo zibotu zyabantu aaba bone ibakalwana nkondo?

6. Ncinzi cakamugwasya Jakobo kukakatila alimwi ino wakagwasyigwa buti? (Amubone cifwanikiso icili kumatalikilo aacibalo.)

⁶ Sikale Jakobo wakalwana nkondo akuzumanana akaambo kakuti wakali kumuyanda Jehova, wakali kubikkila maano kuzintu zyakumuuya, alimwi wakali kucisyoma cakumaninina cisyomezyo ca Jehova cakuti uyoolongezya lunyungu lwakwe. (Matl. 28:3, 4) Eeci cilatugwasya kumvwisya kaambo Jakobo ncaakasolekesya canguzu kutegwa Leza amulongezye ciindi naakali amyaka yakuzyalwa iitandila ku 100; ciindi cimwi wakatingana amungelo iwakasamide mubili wanyama. (Amubale Matalikilo 32:24-28.) Sena Jakobo wakalijisi nguzu zimugeme izyakukonzya kutingana amungelo iwakajisi nguzu kapati? Bwini mbwakuti peepe! Pele wakali kanzide kulwana nkondo, alimwi wakalilibambilide kulangana apenzi lili lyoonse ilyakali kukonzya kumusikila! Masimpe, wakalongezyegwa kapati akaambo kakukakatila kwakwe. Wakatambula zina ilyakali kumweelela ilyakuti Israyeli, (ilipandulula kuti “Uuzundana [Uukakatila] a Leza”). Jakobo  wakatambula cileleko cibotu kapati ncotulombozya andiswe—nkokuti kukkomaninwa a Jehova akulongezyegwa anguwe.

7. (a) Mbukkale buli buti bukatazya kapati mbwaakajisi Rakele? (b) Mbuti mbwaakazumanana kubulwana bukkale oobo alimwi ambwaakalongezyegwa mukuya kwaciindi?

⁷ Mukaintu wa Jakobo ngwaakali kuyandisya, Rakele, wakali kuyandisisya kubona Jehova mbwaakali kuyoozuzikizya cisyomezyo ncaakasyomezya mulumaakwe. Pele kwakali penzi limwi ilyakali kulibonya mbuli kuti talikonzyi kumana. Rakele wakanyina bana. Mumazuba aayo, kutaba amwana lyakali penzi lipati. Ino Rakele wakazijana kuli nguzu izyakamuyumya-yumya mumizeezo akumubili kutegwa azumanane kulwana abukkale ibwakali kumutyompya alimwi mbwaatakali kukonzya kucinca? Taakwe naakacileka kulangila pe. Muciindi caboobo, wakazumanana kubulwana bukkale oobo kwiinda mukupaila cabusungu. Jehova wakamvwa kukombelezya kwa Rakele ikwakali kuzwa ansi amoyo, eelyo mukuya kwaciindi wakalongezyegwa kwiinda mukuba abana. Tacigambyi kuti cimwi ciindi Rakele wakoompolola kwaamba kuti: “Ndalwana canguzu . . . Alimwi ndazunda!”—Matl. 30:8, 20-24.

8. Ino mbuyumuyumu nzi bwakatola ciindi cilamfwu mbwaakajana Josefa, alimwi ino mbwaakacita ncikozyanyo cibotu buti kulindiswe?

⁸ Cikozyanyo cakukakatila cakutazungaana ncaakasiya Jakobo a Rakele cakutadooneka cakamujatikizya kapati mwanaabo Josefa mbwaakali kuyoocita naa lusyomo lwakwe lwasunkwa. Ciindi Josefa naakali aamyaka yakuzyalwa iili 17, zintu zyakamubijila kapati. Akaambo kamunyono banabokwabo bakamusambala mubuzike. Mukuya kwaciindi wakaliyumya kwamyaka minji mu Egepita oomo mwaakaangidwe akaambo kamulandu ngwaatakacita. (Matl. 37:23-28; 39:7-9, 20-21) Josefa tanaakatyompwa pe; nokuba kunyema akuyanda kupilusya cibi. Muciindi caboobo, wakabikkila maano kucilongwe cakwe a Jehova. (Lev. 19:18; Rom. 12:17-21) Cikozyanyo ca Josefa ceelede kutugwasya. Mucikozyanyo, nokuba kuti twakapenga kubwana naa bukale bwesu lino mbwamapenzi, tweelede kuzumanana kulwana nkondo alimwi akukakatila cakuliyumya. Tweelede kusyoma kuti, ikuti naa twacita boobo, Jehova uyootugwasya.—Amubale Matalikilo 39:21-23.

9. Notwiiya cikozyanyo ca Jakobo, Rakele alimwi a Josefa, ino nkusolekesya kuli buti nkotweelede kucita kutegwa tulongezyegwe a Jehova?

⁹ Amuyeeye buyo bukkale mbomujisi alimwi ibukonzya kumubeda sunko. Ambweni bujatikizya cintu ncomucitilwa munzila iitaluleme, kusalululwa naa kusekwa. Ambweni sunko njomujisi inga kalijatikizya muntu uumubejekezya, andiza akaambo kakuti umumvwida munyono. Muciindi cakulekela maanza aanu kulebuka, amuyeeye cakagwasya Jakobo, Rakele alimwi a Josefa kuti bazumanane kubelekela Jehova calukkomano. Leza wakabayumya-yumya akubalongezya akaambo kakuti bakazumanana kulumba zintu zyakumuuya. Bakazumanana kulwana nkondo akucita kweelana anzyobakali kupailila. Tupona kumamanino eeni aabweende bwazintu oobu bubyaabi; aboobo tulijisi kaambo kalimvwisya ncotweelede kukakatila kubulangizi mbotubikkilidwe kumbele lyesu! Sena mulayanda kulwana nkondo, nkokuti kubeleka canguzu kutegwa mukkomaninwe a Jehova?

10, 11. (a) Muunzila nzi motukonzya kulwanina kuti tulongezyegwe a Leza? (b) Ncinzi ciyootugwasya kusala kabotu alimwi akuzunda kutyompezyegwa azintu zitunyonganya?

¹⁰ Ino mbukkale buli buti bumwi ibukonzya kupa kuti tuyandike kulwanina kulongezyegwa a Leza? Bukkale bumwi mbobayaanya banji ninkondo yakulwana tumpenda twakutalondoka. Bamwi bakabeleka canguzu kutegwa mulimo wakukambauka kabaubona munzila yeelede. Ambweni kulubazu lwanu inga mwayandika kuzumanana kuliyumya, nokuba kuti mulaciswa-ciswa  naa mulalendelelwa. Alimwi tatweelede kuluba nkondo njobajisi bamwi iijatikizya buyumuyumu bwakulekelela muntu umwi wakabalubizyila. Tacikwe makani naa twali kubelekela Jehova kwaciindi cilamfwu buti, toonse tweelede kulwanina kuti tuzunde zintu zikonzya kutulesya kubelekela Leza, ooyo uupa bulumbu kubantu basyomeka.

¹¹ Kwaamba masimpe, inga caba ciyumu kapati kusala munzila iiluzi akupona buumi bwa Bunakristo. Cilakonzya kuba boobo kwaambisya kuti moyo wesu weena noutupa kuti tucite cintu cibi. (Jer. 17:9) Ikuti mwabona kuti mulijatikizyidwe munzila imwi iitali kabotu, amusolekesye kupaila kutegwa mutambule muuya uusalala. Mupailo amuuya uusalala zilakonzya kumupa nguzu zyakucita cintu ncomuzyi kuti cililuleme alimwi cintu Jehova ncakonzya kulongezya. Amucite kweelana anzyomwaamba mumipailo. Amusole kubala cibeela camu Bbaibbele buzuba abuzuba, alimwi amujane ciindi cakucita ciiyo canu nobeni kubikkilizya aziindi zya Kukomba Mumukwasyi.—Amubale Intembauzyo 119:32.

12, 13. Mbuti Banakristo bobilo mbobakagwasyigwa kulwana mizeezo mibyaabi?

¹² Kuli zikozyanyo zinji izitondezya kuti Jwi lya Leza, muuya wakwe, alimwi amabbuku aa Bunakristo zyabagwasya Banakristo kuzunda kulombozya zintu zibi. Mukubusi umwi wakabala cibalo cakamwaigwa mu Sinsimuka! yamu Chingisi yamu December 8, 2003 cakuti: “How Can You Resist Wrong Desires?” Ino wakagwasyigwa buti? Wakati: “Ndilwana nkondo yakuleka kuyeeya zintu zibyaabi. Nindakabala mucibalo ikuti ‘kubantu banji kuzunda mizeezo mibyaabi nciyumu,’ cakandipa kulimvwa kuba mulubazu lwababunyina.  Ndakalimvwa kuti tandili ndilikke.” Mukubusi ooyu alimwi wakagwasyigwa kubala cibalo camu Sinsimuka! yamu Chingisi yamu October 8, 2003 cakuti: “Alternative Life-Styles—Does God Approve?” Wakaamba kuti cibalo eeci cakaamba kuti, kuli bamwi ninkondo iili mbuli “mumvwa mumubili.” (2Kor. 12:7) Nobalwana nkondo yakuti bazumanane kulilemeka munzila iiluleme, inga balanga kumbele kabajisi bulangizi. Wakati: “Akaambo kaceeci, ndiyeeya kuti buzuba bumwi abumwi, ndilakonzya kuzumanana kusyomeka. Ndilamulumba kapati Jehova akaambo kakubelesya mbunga yakwe kutugwasya kupona buzuba bumwi abumwi mubweende oobu bubyaabi.”

¹³ Amulange-lange acimbi cikozyanyo camucizyi umwi waku United States. Wakalemba kuti: “Ndiyanda kumulumba akaambo kakuti lyoonse mulatupa cakulya cakumuuya ncotuyandika aciindi ceelede. Bunji bwaziindi ndilimvwa kuti zibalo eezyi zyakalembelwa ndime buya. Kwamyaka minji ndali kulwana nkondo yakuleka kulombozya cintu cimwi Jehova ncasulide. Zimwi ziindi, inga ndilimvwa kulebuka akucileka kulwana nkondo. Ndilizyi kuti Jehova ngusiluse alimwi ulalekelela, pele akaambo kakuti ndijisi muzeezo mubyaabi alimwi mukati kamoyo wangu tandiusulide pe, ndilimvwa kuti inga tiindacikonzya kujana lugwasyo. Kulwana ooku ikuzumanana kwajatikizya mbazu zyoonse zyabuumi bwangu. . . . Nondakabala cibalo cili mu Ngazi Yamulindizi yamu Chingisi yamu March 15, 2013 caamba kuti: ‘Do You Have “a Heart to Know” Jehovah?’ ndakalimvwa kuti ncobeni Jehova ulayanda kundigwasya.”

14. (a) Ino Paulo wakalimvwa buti kujatikizya nkondo njaakali kulwana? (b) Ino mbuti mbotukonzya kuzwidilila munkondo yakulwana kulezya kwesu?

¹⁴ Amubale Baroma 7:21-25. Paulo wakazyiba mbocili ciyumu kulwana mizeezo alimwi akulezya kwamibili iitalondokede. Nokuba boobo, wakajisi lusyomo lwakuti inga wazunda nkondo yamukati kwiinda mukupaila calusyomo kuli Jehova akuba aalusyomo mucinunuzyo ca Jesu. Ino mbuti swebo? Mbotuzumanana kulwana nkondo yakutajoka musyule kujatikizya kulezya kwesu tobeni, inga twazwidilila. Mubuti? Kwiinda mukumwiiya Paulo, kusyoma muli Jehova cakumaninina akutasyoma munguzu zyesu, alimwi akuba aalusyomo mucinunuzyo.

15. Nkaambo nzi mupailo ncoukonzya kutugwasya kuzumanana kusyomeka alimwi akuliyumya mumasukusyo?

¹⁵ Kuli ziindi Leza nakonzya kutulekela kuti tutondezye mbotulibilikide kapati kujatikizya makani aamwi. Mucikozyanyo, ino mbuti kuti swebo (naa umwi mumukwasyi wesu) tuciswa bulwazi bupati naa twakacitilwa cakutalulama? Tulakonzya kutondezya kuti tulamusyoma cakumaninina Jehova kwiinda mukupailila kuti atupe nguzu zyakuzumanana kusyomeka akuti tuzumanane kuba alukkomano alimwi akuyuma kumuuya. (Flp. 4:13) Zyakuluula zyabantu banji kumazuba aa Paulo alimwi amumazuba eesu, zitondezya kuti mupailo ulakonzya kubukulusya nguzu zyesu akutupa kuba alusyomo lwakuzumanana kuliyumya.

16, 17. Ino mukanzide kucita nzi munkondo njotulwana?

¹⁶ Diabolosi uyanda kuti muzundwe akuleka kusyomeka alimwi akulekela maanza aanu kulebuka. Amukanze ‘kukakatila kucintu cibotu.’ (1Tes. 5:21) Amuzyibe kuti mulakonzya kuzunda munkondo yakulwana Saatani, nyika yakwe mbyaabi alimwi azisusi zibi. Mulakonzya kucita oobo kwiinda mukusyoma Leza cakumaninina kuti ulakonzya kumuyumya-yumya.—2Kor. 4:7-9; Gal. 6:9.

¹⁷ Aboobo ziyume zitete, amuzumanane kulwana kusikila mpomugolela. Amuzumanane kusolekesya. Amuzumanane kuliyumya. Amuzumanane kukakatila. Amube alusyomo luyumu lwakuti Jehova ‘uyoomujalwida milyango yakujulu akumupoomweda zileleko zinji kapati cakuti tamukabulizyi cintu cili coonse.’—Malk. 3:10.