MUMYAKA yakuma 1935, bataata abamaama, nkokuti ba James aba Jessie Sinclair, bakalongela ku Bronx, dolopo lisyoonto ilili mudolopo pati lya New York City. Umwi wabantu ngobakatalika kumvwana limwi bakali ba Willie Sneddon, ibakazwa kucisi ca Scotland, ooko bazyali bangu abalo nkobakazwa. Mumaminiti buyo masyoonto nobakaswaangana ciindi cakusaanguna, aaba bantu botatwe bakatalika kubandika kujatikizya mikwasyi yabo. Nokwakainda myaka misyoonto kuzwa ciindi eeco, ndakazyalwa.

Bamaama bakaambila ba Willie kuti kakusyeede ciindi cisyoonto kuti Nkondo Mpati italike, bausyi bakanyikila antoomwe amupati wabamaama musankwa ciindi bwato bwabo nobwakauma kadandamiti mu North Sea. Ba Willie bakaingula kuti, “Bauso bali muhelo!” Ba Willie bakali umwi wa Bakamboni ba Jehova, alimwi aaya akali makani aagambya alo aakasololela kukasimpe kamu Bbaibbele.

Ncobakaamba ba Willie cakabanyemya bamaama nkaambo bakalizyi kuti bausyi bakali bantu babotu. Pele ba Willie bakayungizya kuti, “Sena kuli mbocikonzya kumugwasya ikuti naa ndamwaambila kuti Jesu wakaunka kuhelo?” Bamaama bakayeeya mupailo umwi ngobakaiya kucikombelo, iwakali kwaamba kuti Jesu wakaunka muhelo alimwi akuti wakabusyigwa mubuzuba bwatatu. Aboobo bakalibuzya kuti, ‘Ikuti helo mbusena kuyaka mulilo kwalo ooko nkobapenzyegwa bantu babi, nkaambo nzi Jesu ncaakaunkila nkuko?’ Makani aaya akapa kuti bamaama batalike kuba aluyandisisyo lwakuzyiba kasimpe. Bakatalika kujanika kumiswaangano mu Mbungano yaku Bronx alimwi bakabbapatizyigwa mu 1940.

Aciindi eeco, bazyali Banakristo tiibakali kukulwaizyigwa kapati kwiiya Bbaibbele antoomwe abana babo. Nondakali muvwanda, bataata bakali kundilela ciindi bamaama nobakali kuunka kumiswaangano alimwi akutola lubazu mumulimo wakukambauka kumamanino aansondo. Nokwakainda myaka misyoonto, mebo abataata twakatalika kujanika kumiswaangano antoomwe abamaama. Bamaama bakali basungu kapati mumulimo wakukambauka makani mabotu alimwi bakali kusololela ziiyo zya Bbaibbele zinji abantu bajisi luyandisisyo. Mane buya kuli ciindi nobakali kusololela ziiyo mukakamu akaambo kakuti ziiyo zyabo zyakakkalene afwaafwi. Ndakali kubasangana mumulimo wamumuunda twajala zikolo. Munzila eeyi, ndakaiya zinji kujatikizya Bbaibbele alimwi ambondeelede kubayiisya bantu ncolyaamba.

 Ndilimvwa bubi ikwaamba kuti ciindi nondakali muniini, tiindakali kutondezya kulumba kapati akaambo kakasimpe. Tiindakali kukabikkila maano. Nokuba boobo, nondakajisi myaka iibalilwa ku 12, ndakaba sikumwaya wa Bwami alimwi kuzwa waawo ndakali kutola lubazu mumulimo wamumuunda lyoonse. Nondakakkwanya myaka iili 16, ndakalyaaba kuli Jehova, akubbapatizyigwa mu July 24, 1954, amuswaangano wacooko mu Toronto, ku Canada.

Bakwesu bamwi mumbungano mondakabede aciindi cimwi bakali bamukwasyi wa Beteli kaindi mpoonya bambi bakacili bamukwasyi wa Beteli. Bakwesu aaba bakandikulwaizya kapati. Mbobakali kupa makani alimwi akupandulula kasimpe kamu Bbaibbele kwakali kundikkomanisya kapati. Nokuba kuti bamayi bangu bakali kuyanda kuti nduunke kuyunivesiti, mbaakani yangu yakali yakuunka ku Beteli. Aboobo, kandili kumuswaangano wacooko ku Toronto ndakatola pepa lyakulembela mulimo waku Beteli. Alimwi ndakacita oobo mu 1955 kandili kumuswaangano wacooko wakacitilwa mu Yankee Stadium, mudolopo lya New York. Tiikwakainda ciindi cilamfwu, nondakajisi myaka iili 17, ndakatambulwa kuyoobelekela ku Beteli yaku Brooklyn mu September 19, 1955. Buzuba bwabili bwakubeleka ku Beteli, ndakatalika kubelekela mupangilwa mabbuku ku 117 Adams Street. Kalitanalampa ndakatalika kubelekela amuncini iwakali kubikka mapepa antoomwe muzibeela zijisi mapeeji aali 32 kutegwa muncini iwakali kusuma mabbuku waasume.

Nokwakainda mazuba aatandila kumwezi omwe kandibeleka mubusena bupangilwa mabbuku, ndakatumwa ku Dipatimenti Iilanganya ma Magazini akaambo kakuti ndakalizyi mbokutaipwa. Kuciindi eeco, bakwesu abacizyi bakali kutaipa makkeyala aabantu bapya ibakalilembya kunootambula mamagazini aa Ngazi Yamulindizi a Sinsimuka! Nokwakainda myezi misyoonto, ndakatalika kubelekela kudipatimenti iituma zintu (Shipping Department.) Ba Klaus Jensen, mulangizi wadipatimenti eeyi bakandilomba ikuti naa inga ndayanda kunoosindikila namutekenya watilaki iwakali kutola mabbokesi aamabbuku kunkomwe kutegwa atumwe kumasena  aayindene-indene munyika. Alimwi kwakali zibbudu zyamamagazini izyakeelede kutolwa kupositi ofesi kutegwa zitumwe kumbungano izili mu United States. Mukwesu Jensen wakaamba kuti wakali kuyeeya kuti mulimo uuyandika kunyanyaasya mubili wakali kuyoondigwasya kapati. Ndakali kulema makkilogilamu aali 57 buyo aboobo ndakalikotede mbuli kakole. Nyendo eezyo zyakuunka kunkomwe alimwi akupositi ofesi zyakandiyumya kumubili. Kulibonya kuti mukwesu Jensen wakalicizyi ncondakali kuyandika!

Kuyungizya waawo, Dipatimenti Iilanganya ma Magazini yakali kulanganya mamagazini aakali koodwa mumbungano. Aboobo, ndakaiya kujatikizya myaambo mamagazini eesu mwaakali kusimbwa ku Brooklyn akutumwa kumasena aambi aamunyika. Tiindakaningaimvwa myaambo minji pele ndakakkomana kuzyiba kuti zyuulu-zyuulu zyamamagazini zyakali kutumwa kumasena aakulamfwu. Nokuba kuti aciindi eeco tiindakaazyi masena aayo, ndakali kuyooba acoolwe cakuswaya masena aayo mumyaka yakumbele.

Mu 1961, ndakaambilwa kutalika kubelekela kudipatimenti iilanganya mali (Treasurer’s Office) mpoonya ba Grant Suiter ngowakali mulangizi wadipatimenti eeyi. Nokwakainda myaka yobilo kandibelekela ookuya, ba Nathan Knorr, balo aciindi eeco ibakali kulanganya mulimo wesu wanyika yoonse bakandiita kuofesi yabo. Bakandipandulwida kuti umwi wabakwesu iwakali kubelekela mudipatimenti yabo wakeelede kunjila Cikolo Camulimo wa Bwami kwamwezi omwe, mpoonya kuzwa waawo wakali kuyootalika kubelekela ku Dipatimenti ya Mulimo. Ndakaambilwa kutalika kubeleka abusena bwakwe antoomwe aba Don Adams. Ba Don ngomukwesu iwakatambula mapepa aangu ngondakalembela mulimo waku Beteli kumuswaangano wacooko mu 1955. Bakwesu bobilo ibakali kubeleka kale mudipatimenti eeyi bakali ba Robert Wallen alimwi aba Charles Molohan. Swebo tone twakabeleka antoomwe kwamyaka iinda ku 50. Eelo kaka cali kukkomanisya  kubeleka antoomwe abaalumi basyomeka ibasimide kumuuya bali boobu!—Int. 133:1.

Kutalikila mu 1970, ndakapegwa mulimo wakweendeenda kwansondo zisyoonto mwaka amwaka naa kwainda myaka yobilo kuyooswaya maofesi aamitabi iili mbwiibede ya Watch Tower Society, ikuswaya aciindi eeco ikwakali kwiitwa kuti kuswaya kwamulangizi uulanganya mitabi. Eeci cakali kubikkilizya akuswaya bamukwasyi wa Beteli abamisyinali nyika yoonse mbwiizulwa, kubakulwaizya kumuuya alimwi akulanga-langa malipooti aajatikizya maofesi aamitabi. Eelo kaka cakali kukkomanisya kuswaangana abaabo ibakamanizya Cikolo ca Gileadi mumakkilasi aakumatalikilo alimwi ibakacili kubeleka cakusyomeka kumasi nkobakatumwa! Cali coolwe alimwi cali cintu cikkomanisya kuswaya masi aayinda ku 90 mumulimo ooyu.

Bamukwasyi wa Beteli boonse ku Brooklyn bakalipedwe mbungano kwakuswaanganina mu New York City. Mbungano njondakapedwe yakali mudolopo lya Bronx. Mbungano yakusaanguna mudolopo lipati yakakomena akwaandaanizyigwa. Mbungano yakusaanguna yakali kwiitwa kuti Upper Bronx, kwalo nkondakali kuswaanganina.

Mumyaka yakuma 1965, mukwasyi wa Bakamboni waku Latvia iwakaiya kasimpe ku Bronx nkoili kumusanza wakalongela mucilawo cambungano eeyo. Mwanaabo mupati wazina lya Livija, wakaba mupainiya waciindi coonse mbwaakamanina buyo cikolo. Nokwakainda myezi misyoonto, ba Livija bakalongela kudolopo lya Massachusetts kutegwa bakabelekele kubusena kubulide bakambausi ba Bwami. Ndakatalika kubalembela magwalo kujatikizya kuyaambele kwambungano yaku Bronx mpoonya abalo bakali kundilembela ikundaambila mbobazwidilila mumulimo wabukambausi kudolopo lya Boston.

Nokwakainda myaka misyoonto, ba Livija bakasalwa kuba mupainiya waalubazu. Ba Livija bakali kuyanda kubeleka kusikila mpobagolela mumulimo wa Jehova, aboobo bakalembela kuyoobelekela ku Beteli alimwi bakabaita mu 1971. Eeci cakalibonya mbuli citondezyo kuzwa kuli Jehova! Mu October 27, 1973, twakakwatana alimwi twakaba acoolwe cakuba a Mukwesu Knorr walo iwakapa makani aacikwati cesu. Lugwalo lwa Tusimpi 18:22 lwaamba kuti: “Ooyo wajana mukaintu mubotu wajana cintu cibotu, alimwi ulakkomaninwa kuli Jehova.” Mebo aba Livija twalongezyegwa kwiinda mukubelekela antoomwe mumulimo wa Beteli kwamyaka iinda ku 40. Alimwi twazumanana kugwasyilizya mbungano iimbi mubusena mbubwenya bwa Bronx.

Cakali kukkomanisya kapati kubeleka a Mukwesu Knorr. Wakali kubeleka canguzu kapati akaambo kakasimpe alimwi wakali kubalumba kapati bamisyinali munyika yoonse. Bunji bwabo mbebakali Bakamboni bakusaanguna muzisi mobakatumwa kuyoobelekela. Cakali kuusisya kapati kubona Mukwesu Knorr kaciswa bulwazi bwakkansa mu 1976. Ciindi cimwi naatakali kubukila bulo, wakandilomba kuti ndimubalile zintu zimwi izyakeelede kutumwa kutegwa zikasimbwe. Wakandituma kuti ndiite aba Frederick Franz kutegwa abalo baboole kuzooswiilila nokubalwa. Mukuyakwaciindi ndakazoozyiba kuti akaambo kapenzi lyameso ndyaakajisi Mukwesu Franz, cakali cilengwa ca Mukwesu Knorr kumubalila zintu izili boobo.

 Mukwesu Knorr wakafwa mu 1977, pele aabo ibakamuzyi alimwi akumuyanda bakaumbulizyigwa akaambo kakuti mukwesu ooyu wakabumanizya buumi bwakwe bwaanyika cakusyomeka. (Ciy. 2:10) Aboobo, Mukwesu Franz ngowakatalika kusololela mulimo wesu.

Aciindi eeco, ndakali mulembi wa Mukwesu Henschel, walo iwakabeleka antoomwe a Mukwesu Knorr kwamyaka minji kapati. Mukwesu Henschel wakandaambila kuti mulimo wangu mupati ku Beteli lino wakali wakugwasyilizya Mukwesu Franz munzila iili yoonse. Lyoonse ndakali kumubalila zintu kazitanasimbwa. Mukwesu Franz tanaakajisi penzi lyakuluba-luba alimwi wakali kubikkila maano cakumaninina kuzintu izyakali kubalwa. Eelo kaka cakali kukkomanisya kumugwasya munzila eeyo kusikila mane naakamanizya buumi bwakwe bwaanyika mu December 1992!

Myaka iili 61 njondakabeleka ku Beteli yakeenda cakufwambaana. Bazyali bangu boonse bobilo bakafwa kabasyomeka kuli Jehova, aboobo ndilangila kumbele kuciindi nondiyoobatambula munyika mbotu. (Joh. 5:28, 29) Kunyina cintu cijanika mubweende bwazintu oobu bwakaindi icikonzya kweelana acoolwe cibotu kapati cakubeleka antoomwe abaalumi alimwi abamakaintu basyomeka ikubelekela bantu ba Leza munyika yoonse. Mebo aba Livija tulakonzya kwaamba cakusinizya kuti mumyaka yoonse njotwabeleka mumulimo waciindi coonse, ‘lukkomano lwa Jehova ndolwali kutuyumya.’—Neh. 8:10.

Taakwe cikonzya kusinkila mulimo wakumwaya kasimpe ka Bwami kuti uzumanane alimwi mulimo ooyu tauyeeme amuntu omwe mumbunga ya Jehova. Cali kukkomanisya alimwi ncoolwe kubeleka abakwesu alimwi abacizyi ibasyomeka kwamyaka minji. Bunji bwabananike mbondakabeleka limwi tabaciko aanyika. Pele ndilalumba kapati kubelekela antoomwe abantu basyomeka ibasimide kumuuya ibali boobo mumulimo wa Jehova.