MUNYIKA yoonse mbwiizulwa, baalu balaikkomanina mikuli njobajisi akati kabantu ba Leza. Eelo kaka baalu aaba ncilongezyo cipati kulindiswe! Nokuba boobo, caino-ino, kwakaba kucinca. Baalu bacembeede bakalombwa kuti bape baalu bacili bana-bana mikuli iimwi mipati. Munzila nzi?

Bubambe bupya mbwakuti balangizi bamabazu alimwi abamayi bazikolo ziindene-indene zyakumuuya, beelede kwiileka milimo eeyi bakkwanya myaka yakuzyalwa iili 70. Mpoonya abalo baalu ibajisi myaka yakuzyalwa iili 80 beelede kupa baalu bacili bana-bana mikuli iimwi, mbuli kuba sicuuno wa Kkomiti ya Mutabi naa kuba sicuuno wakabunga kabaalu mumbungano. Ino baalu bacembeede aaba balimvwa buti kujatikizya kucinca ooku? Batondezya kusyomeka kuli Jehova alimwi ambunga yakwe.

Mukwesu Ken, iwakabeleka kali sicuuno wa Kkomiti ya Mutabi kwamyaka iitandila ku 49 wakaamba kuti: “Ndakakukkomanina kapati kucinca ooku. Mubwini, mafwumofwumo ngoonya aayo nondakazyiba, ndakalipailide kuli Jehova, kumwaambila kuti kuyandika mukwesu uucili mwana-mwana kubeleka kali sicuuno.” Mbwaakalimvwa mukwesu Ken kulikozyenye amajwi ngobakaamba bacembeede basyomeka munyika yoonse. Nokuba boobo, akaambo kakuti bakali kukkomana kubelekela bakwesu, kumatalikilo bakalityompedwe.

 Mukwesu Esperandio, iwakali sicuuno wakabunga kabaalu mumbungano wakaamba kuti: “Ndakausa asyoonto.” Pele alimwi wakazumina kuti, “Ndakali kuyandika ciindi cinji cakubikkila maano kubuumi bwangu akaambo kakuti kuciswa-ciswa kwakali kuyaabwiindila.” Cakutadooneka, mukwesu Esperandio wazumanana kumubelekela Jehova cakusyomeka alimwi akuba cilongezyo kumbungano nkwazulilwa.

Mbuti kujatikizya balangizi beendeenda ibakabeleka kwaciindi cilamfwu balo ibakacinca akutalika kubeleka milimo iimbi yakumuuya? Mukwesu Allan, iwakabeleka kali mulangizi weendeenda kwamyaka iili 38 wakaamba kuti, “Ciindi nondakazyiba, ndakatyompwa.” Nokuba boobo, wakabona kuti cilagwasya kubayiisya milimo baalumi bacili bana-bana, alimwi wakazumanana kubeleka cakusyomeka.

Mukwesu Russell, iwakabeleka kali mulangizi weendeenda alimwi kali mwiiyi wazikolo ziindene-indene zyakumuuya kwamyaka iili 40, wakaamba kuti kumatalikilo walo abakaintu bakwe bakatyompwa. Wakaamba kuti: “Twakali kuukkomanina kapati mulimo wesu alimwi twakali kulimvwa kuti tucijisi nguzu zyakuzumanana.” Mukwesu Russell amukaintu wakwe balalubelesya lwiiyo alimwi aluzyibo lwabo mumbungano mobazulilwa, calo cibapa kukkomana basikumwaya mbobabeleka limwi.

Nokuba kuti nywebo lwanu kumugama tamunalimvwide mbobakalimvwa bakwesu abacizyi ibaambwa kale, cibalo cili kulugwalo lwa 2 Samuele cilakonzya kumugwasya kubamvwisya bakwesu abacizyi aaba.

Amuyeeye kujatikizya cakacitika ciindi Abisalomu mwana wa Mwami Davida naakazanga. Davida wakaccija kuzwa ku Jerusalemu kuya ku Mahanaimu, munzi uuli kujwe aa Mulonga wa Jordano. Ookuya Davida alimwi abaabo mbaakali limwi bakali kuyandika zintu zimwi ziyandika mubuumi. Sena mulaciyeeya icakacitika?

Baalumi botatwe bakubusena oobu cakulyaaba bakaleta malo, zyakulya zyamisyobo-misyobo, alimwi azibelesyo izyakali kuyandika. Barizilai ngumwi wabaalumi aaba. (2Sam. 17:27-29) Ciindi buzangi bwa Abisalomu nobwakalesyegwa, Davida wakajokela ku Jerusalemu, alimwi Barizilai wakamusindikila ku Jordano. Davida wakamulomba kuti aunke ku Jerusalemu. Awalo Mwami wakalyaaba kumupa zyakulya, nokuba kuti Barizilai “wakalivwubide kapati” alimwi tanaakali kuyandika kupegwa zyakulya. (2Sam. 19:31-33) Ambweni Davida wakali kuyanda kuti Barizilai akkale afwaafwi anguwe mu Jerusalemu kutegwa kagwasyigwa kululayo lwakwe lubotu akaambo kakuti Barizilai wakali aaluzyibo lunji. Eelo kaka nocakaba coolwe cipati kukkala alimwi akubeleka muŋanda yamwami!

Akaambo kakulibombya alimwi akuzilanga kabotu zintu, Barizilai wakaamba kuti wakajisi myaka yakuzyalwa iili 80. Alimwi wakayungizya kuti: “Sena ndicikonzya kuzyiba cibotu acibi?” Ino ncinzi ncaakali kupandulula? Kweelede kuti Barizilai wakaba abusongo akaambo kamyaka minji njaakapona. Alimwi wakali kukonzya kupa lulayo lubotu, mbubwenya mbuli “bapati” mbobakazoocita ku Mwami Rehoboamu. (1Bam. 12:6, 7; Int. 92:12-14; Tus. 16:31) Aboobo ncaakaamba Barizilai kujatikizya kuzyiba cibotu acibi ambweni cakali kwaamba nguzu  zyakwe izyakamanide akaambo kakuti wakalicembeede. Wakaamba kuti kucembaala kwakapa kuti katacimvwi zintu zinona alimwi akusinka matwi. (Muk. 12:4, 5) Aboobo Barizilai lwakwe mwini wakaambila Davida kuti aunke ku Jerusalemu kuyoobweza mwaalumi uucili mwana-mwana wazina lya Kimuhamu, ambweni mwana wa Barizilai.—2Sam. 19:35-40.

Ikucinca kwakacitwa akaambo kamyaka yakuzyalwa ikwaambwa kumatalikilo kulikozyenye ambwaakali kuzibona zintu Barizilai. Cilisalede kuti, kuciindi eecino ncotupona, kwakalangwa-langwa bukkale alimwi anguzu zyabantu banji, ikutali buyo muntu omwe mbuli mbocakabede kuli Barizilai. Kwakali kuyandika kwaalanga munzila yeelede makani aajatikizya zintu zikonzya kubagwasya baalu ibabeleka cakusyomeka nyika yoonse.

Banakristo bacembeede aaba ibalibombya, bakali kukonzya kubona kabotu-kabotu kuti mbunga ya Jehova iyooyumizyigwa kutegwa izumanane kuyaambele ikuti naa mikuli njobakali kulanganya kwamyaka minji yapegwa kubakwesu ibacili bana-bana. Kanji-kanji, bakwesu bacembeede aabo mbambabo ibakali kuyiisya bakwesu bana-bana, mbubwenya mbokulangilwa kuti Barizilai wakayiisya mwanaakwe alimwi akuti mwaapostolo Paulo wakayiisya Timoteyo. (1Kor. 4:17; Flp. 2:20-22) Bakwesu aaba ibacili bana-bana batondezya lino kuti ‘nzipego mubantu,’ ibakonzya kugwasya ‘kuyaka mubili wa Kristo.’—Ef. 4:8-12; amweezyanisye a Myeelwe 11:16, 17, 29.

Ibanji mumbungano yabantu ba Leza nyika yoonse aabo ibakaleka mikuli iimwi, bacikonzya kubeleka milimo mipya naa kuba azyoolwe zimbi mumulimo wa Jehova.

Mukwesu Marco iwakali kubeleka kali mulangizi weendeenda kwamyaka iili 19 wakaamba kuti: “Bukkale bwangu bupya bulandizumizya kugwasya baalumi batasyomi ibakwete bacizyi ibali mumbungano yesu.”

Mukwesu Geraldo, iwakali mumulimo wakweendeenda kwamyaka iili 28 wakaamba kuti: “Makanze eesu mapya abikkilizya kugwasya batacisungweede alimwi akusololela ziiyo zya Bbaibbele zinji.” Wakaamba kuti walo abakaintu bakwe lino basololela ziiyo zya Bbaibbele zili 15 alimwi akuti bunji bwabaabo ibatakacisungweede lino balajanika kumiswaangano.

Mukwesu Allan, iwaambwa kumatalikilo wakaamba kuti: “Lino tulijisi coolwe cakutola lubazu cakumaninina mumulimo wakukambauka. Tulakkomana kukambauka kubuleya, mumasena aacitilwa makwebo, alimwi akukambaukila basimukoboma, alimwi bobilo akati kabo balaboola ku Ŋanda ya Bwami.”

Ikuti naa muli mukwesu uucibwene alimwi uusyomeka iwakapegwa mukuli mupya akati kabantu ba Leza, kuli nzila aimbi yaalubazu momukonzya kutola lubazu. Mulakonzya kugwasyilizya mumulimo wa Jehova kwiinda mukubaambila zintu zibotu izyakamucitikila baalumi ibacili bana-bana mumbungano. Mukwesu Russell, iwaambwa kale wakaamba kuti: “Jehova ulabayiisya alimwi akubabelesya bana ibacita kabotu kapati. Cibeela cabunyina bwanyika yoonse cilagwasyigwa kukuyiisya kwabo kubotu alimwi abweembezi bwabo!”—Amubone kabbokesi kakuti “ Amubagwasye Baalumi Bacili Bana-bana Kuti Bacite Zyoonse Nzyobakonzya.”

Ikuti naa calino-lino mwakanjila cibeela camulimo wiindene, amuzumanane kuzilanga munzila mbotu zintu. Mwakagwasya kale bantu banji kwiinda mumulimo ngomwali kubeleka camoyo woonse, alimwi mulakonzya kuzumanana kucita boobo. Bantu bali kumuyanda alimwi cakutadooneka bayoozumanana kumuyanda.

Cipati kwiinda zyoonse ncakuti, Jehova unoomukkomanina lyoonse. Leza ‘takailubi milimo yanu alimwi aluyando ndomwakatondezya kuzina lyakwe kwiinda mukubabelekela alimwi akuzumanana kubabelekela basalali.’ (Heb. 6:10) Kapango aaka ikakasololelwa amuuya kakulwaizya bantu boonse kuti cisyomezyo cakwe eeci citupa bulangizi bwakumbele aakumana mapenzi  ngotujisi. Mulayandika kapati kuli Jehova cakuti takonzyi kumuluba akaambo kamilimo njomwakamubelekela alimwi njomwazumanana kumubelekela kutegwa mumukkomanisye!

Ino mbuti kuti nywebo lwanu kumugama tiimwakajatikizyigwa akucinca kwaambwa atala aawa? Makani aaya alakonzya kumujatikizya andinywe. Munzila nzi?

Ikuti naa lino mulayanzana amukwesu uucembeede alimwi uusyomeka iwakajatikizyigwa akucinca ooku, mulakonzya kugwasyigwa akaambo kakuti ulisimide alimwi ulaaluzyibo lunji. Amulombe lugwasyo kulinguwe. Amulombe mizeezo yakwe. Alimwi amubikkile maano kubona mbwaubeleka mulimo wakwe mupya cakusyomeka.

Tacikwe makani naa ndinywe yooyo uucembeede iwakapegwa mulimo mupya naa muli mukwesu naa mucizyi uuyanda kugwasyigwa kulimbabo, amuzyibe kuti Jehova ulakukkomanina kusyomeka kwabaabo ibamubelekela kwaciindi cilamfwu alimwi ibazumanana kucita oobo.