KUTI kamuyanda kuzyiba ciindi, ino inga mucita buti? Cakutadooneka mulanga ankoloko yanu. Kuti mweenzinyoko wamubuzya ciindi, ino inga mwamwiingula buti? Ciindi cilaambwa munzila zisiyene-siyene. Ninzila nzi eezyo?

Atwaambe kuti ndiwoola lyomwe amaminiti aali 30 masyikati. Mulakonzya kwaamba kuti ciindi ngu 1:30. Ciya buyo akubusena nkomukkala ambobacaamba ciindi kubusena oobo, mucimwi ciindi mulakonzya kwaamba kuti ngu 13:30. Kwaamba ciindi munzila eeyo kuyeeme ankoloko yamawoola aali 24. Kuli amasena aamwi ciindi ncoonya eeci nkobacaamba kuti “kwasyaala cisela cawoola kuti ikkwane 14 koloko,” kwaamba kuti kwasyaala maminiti aali 30 kaitanakkwana 14.

Mbomuli babali ba Bbaibbele, mulakonzya kweezyeezya mbobakali kucaamba ciindi bantu bakaindi. Bakali kucaamba munzila zinji. Cibeela camu Bbaibbele camabbuku aaci Hebrayo cilaamba kujatikizya “mafwumofwumo,” “masyikati,” alimwi ‘akumangolezya.’ (Mtl. 8:11; 19:27; 1Bam. 18:26) Nokuba boobo, zimwi ziindi, ciindi cini cilabelesyegwa.

Kaindi, cakali cilengwa kubelesya balindizi. Bakali kuyandika ikapati ciindi camasiku. Myaanda yamyaka Jesu katanazyalwa, bana Israyeli ciindi bakacaabanya muziindi zyotatwe ziitwa kuti ziindi zyakulinda. (Int. 63:6) Kusikila kuciindi ca Jesu, ba Juda bakasala kubelesya ziindi zyone zyakulinda masiku zyaba Giliki abana Roma.

Mabbuku aa Makani Mabotu alazyaamba ziindi eezyi, ziindi zili mbozibede. Mucikozyanyo, kwakali “kubucedo” ciindi Jesu naakeenda atala amaanzi kutozya kubwato nkobakabede basikwiiya bakwe. (Mt. 14:25) Kwiinda mucikozyanyo, Jesu wakaamba kuti: “Ikuti mwiniŋanda naakalizyi ciindi mubbi ncaakali kuboola, naatakoona akumulekela mubbi kuti anjile muŋanda yakwe.”—Mt. 24:43.

Jesu wakazyaamba ziindi zyakulinda zyoonse zyone ciindi naakaambila basikwiiya bakwe kuti: “Aboobo amulangile, nkaambo tamuzyi mukamwini ŋanda naboola, naa uyooboola kumangolezya naa akati kamasiku naa kubucedo naa mafwumofwumo.” (Mk. 13:35) Kulinda kwakusaanguna, “kumangolezya,” kwakali kutalika kumabbililo aazuba kusikila kuma 9 koloko yamasiku. Kulinda kwabili, “akati kamasiku,” kwakali kutalika kuma 9 koloko yamasiku kusikila akati kamasiku. Kulinda kwatatu, ikwakali kwaambwa kuti “kubucedo” naa “ciindi mukombwe nalila,” kwakali kuzwa akati kamasiku kusikila kuma 3 koloko mafwumofwumo. Aboobo kweelede kuti eeci ncecakali ciindi naakalila mukombwe mubusiku Jesu nakaangwa. (Mk. 14:72) Kulinda kwane, “mafwumofwumo,” kwakali kuzwa kuma 3 koloko mafwumofwumo kusikila kumapolelo aazuba.

Aboobo, nokuba kuti bantu bakaindi tiibakali kubalila ciindi mbuli mbotucibala mazuba aano, bakalijisi nzila mbobakali kucaamba ciindi camasyikati naa masiku.