1. Mbuti luyando mbolutondezyegwa akati kabantu ba Leza?

BANTU ba Leza mukwasyi wakumuuya, walo uujisi luyando. (1Joh. 4:16, 21) Luyando oolo talutondezyegwi buyo muzintu zipati-pati, pele lulatondezyegwa amutuntu tunji tusyoonto-syoonto, mbuli kwaamba majwi mabotu alimwi akucita zintu caluzyalo. Ciindi notubabikkila maano alimwi akubeendelezya caluzyalo bamwi, ‘twiiya Leza, mbotuli bana bayandwa.’—Ef. 5:1.

2. Mbuti Jesu mbwaakatondezya luyanda lwa Leza?

² Cakulondoka, Jesu wakabaiya bausyi. Wakaamba kuti: “Amuboole kulindime nyoonse nomukatede akulemenwa, eelyo ndilamukatalusya . . . , nkaambo ndili mubombe moyo.” (Mt. 11:28, 29) Ikuti twaiya cikozyanyo ca Kristo kwiinda “[mukubikkila] maano muntu uupengede,” tuyoomukkomanisya Taateesu wakujulu alimwi andiswe tuyookkomana. (Int. 41:1) Atubone mbotukonzya kubabikkila maano banamukwasyi, bakwesu abacizyi mumbungano, alimwi abaabo mbotujana mumulimo wamumuunda.

3. Caboola kubalumi, mbuti kumvwisya alimwi akubikkila maano mbokuswaangene? (Amubone cifwanikiso icili kumatalikilo aacibalo.)

³ Balumi beelede kuba cikozyanyo cibotu mukubabikkila maano boonse mumukwasyi. (Ef. 5:25; 6:4) Mucikozyanyo, baambilwa kuzumanana kukkala abakaintu babo “kweelana aluzyibo,” munzila imwi inga twaamba kuti kubabikkila maano; kubamvwisya.” (1Pet. 3:7; bupanduluzi buyungizidwe.) Kumvwisya alimwi akubikkila maano ziliswaangene. Mucikozyanyo, mulumi uumvwisya ulizyi kuti mukaintu wakwe, mbwali mweenzinyina uumweelede, uliindene anguwe mumbazu zinji, pele eeci tacaambi kuti ngwaansi kapati. (Matl. 2:18) Aboobo mulumi ulabikkila maano kujatikizya mbwalimvwa mukaintu wakwe, akumweendelezya cabulemu. Mukaintu umwi waku Canada wakaamba boobu kujatikizya balumi bakwe: “Tabaubyi-ubyi kujatikizya mbondilimvwa, naa kwaamba kuti, ‘Toyelede kulimvwa boobo.’ Alimwi mbaswiilizi babotu. Ciindi nobandigwasya kucinca mbondiyeeya mumakani aamwi, balacita oobo caluzyalo.”

4. Ciindi nayanzana abamakaintu bamwi, mbuti mulumi mbwayelede kutondezya kuti ulamubikkila maano mukaintu wakwe?

⁴ Mulumi uuli kabotu ulabikkila maano kujatikizya mbwalimvwa mukaintu wakwe ciindi nayanzana abamakaintu bambi. Taciindizyi kusobana ambabo naa kupa muzeezo wakuti ulabayanda; alimwi kunyina natondezya bukkale buli boobo ciindi nabelesya intaneti. (Job. 31:1) Kwiinda mukucita boobo, ulazumanana kusyomeka kumukaintu wakwe, ikutali buyo akaambo kaluyando ndwajisi kulinguwe, pele akaambo kaluyando ndwajisi kuli Leza alimwi akuti ulacisulaika cibi.—Amubale Intembauzyo 19:14; 97:10.

5. Mbuti mukaintu mbwayelede kutondezya kuti ulamubikkila maano mulumi wakwe?

⁵ Ciindi mulumi naiya cikozyanyo ca Jesu Kristo, uuli ngomutwe wakwe, upa kuti mukaintu wakwe ‘kamulemeka kapati.’ (Ef. 5:22-25, 33) Akaambo kakucita boobo, ciyoopa kuti kamubikkila maano mulumi wakwe, ikapati ciindi nayelede kwiibeleka canguzu milimo yakumuuya naa ciindi nayelede kulwana mapenzi aamwi. Mulumi umwi waku Britain wakaamba kuti: “Zimwi ziindi, mukaintu wangu ulazyiba kuti kuli cindikatazyide kwiinda mukubona mbondilibonya. Mpoonya ulabelesya njiisyo iili kulugwalo lwa Tusimpi 20:5, nokuba kuti eeci caamba kuti weelede kulindila ciindi ceelede kutegwa azyibe nzyondiyeeya kuti naa kandaangulukide kumwaambila.”

6. Mbuti toonse mbotukonzya kubakulwaizya bana kutegwa babe bantu babikkila maano kuli bamwi, alimwi ino mbubotu nzi mbobayoojana?

⁶ Ciindi bazyali nobabikkilana maano, bapa cikozyanyo cibotu kubana babo. Aboobo, bazyali bajisi mukuli mupati wakuyiisya bana babo kujatikizya mbobeelede kubabikkila maano bamwi. Mucikozyanyo, bazyali balakonzya kubayiisya bana kuti tabeelede kusobana a Ŋanda ya Bwami. Ciindi nobali kupobwe, bazyali beelede kubaambila bana babo kulekela bapati kusaanguna kubweza zyakulya. Nokuba boobo, boonse mumbungano balakonzya kubagwasyilizya bazyali. Mucikozyanyo, kuti mwana watucitila cintu cibotu, ambweni watujalwida mulyango, tweelede kumulumbaizya. Kucita boobo kulakonzya kumukulwaizya mwana, akumupa kulimvwa kuti “kupa kulakkomanisya kapati kwiinda kupegwa.”—Mil. 20:35.

7. Mbuti Jesu mbwaakamubikkila maano mwaalumi musinkematwi, alimwi nziiyo nzi nzyotukonzya kwiiya kucikozyanyo ca Jesu?

⁷ Aciindi cimwi Jesu naakali mucooko ca Dekapole, bantu “bakamuletela musinkematwi iwakali sikamaama.” (Mk. 7:31-35) Muciindi cakumuponya aabuleya, Jesu “wakamutola ambali” akumuponya. Nkaambo nzi ncaakacitila boobo? Ambweni bukkale mwaakabede muntu ooyu bwakamupa kutaanguluka aabuleya. Andiza  kwiinda mukubona boobo, Jesu wakamuponya kumbali. Masimpe, tatukonzyi kuponya bantu munzila yamaleele. Pele tulakonzya alimwi tweelede kutondezya kuti tulabikkila maano kuzintu nzyobayandika basyomima alimwi ambobalimvwa. Mwaapostolo Paulo wakalemba kuti: “Katubikkilana maano ikutegwa tukulwaizyanye kutondezya luyando akucita milimo mibotu.” (Heb. 10:24) Jesu wakazyiba mbwaakali kulimvwa musinkematwi alimwi wakamubikkila maano. Eelo kaka Jesu ncikozyanyo cibotu kulindiswe!

8, 9. Muunzila nzi motukonzya kubabikkila maano bacembeede abaciswa? (Amupe zikozyanyo.)

⁸ Amubabikkile maano bacembeede abaciswa. Mbungano ya Bunakristo ilazyibwa, ikutali buyo muzintu nzyoicita, pele kwiinda muluyando. (Joh. 13:34, 35) Luyando oolo lutupa kulyaaba kugwasya bacembeede alimwi abalema kujanika kumiswaangano ya Bunakristo alimwi akukambauka makani mabotu. Tulacita oobo nokuba kuti tabacikonzyi kucita zintu zinji. (Mt. 13:23) Ba Michael, ibeendela akacinga kabalema, balalumba kapati akaambo kakugwasyigwa abanamukwasyi alimwi abakwesu ibali mukabunga kamulimo wamumuunda mobazulilwa. Bakaamba kuti: “Akaambo kakuti balandigwasya, ndilacikonzya kujanika kumiswaangano alimwi akutola lubazu lyoonse mumulimo wamumuunda. Alimwi ndilabuyanda kapati bukambausi bwakubuleya.”

⁹ Muma Beteli manji kuli bacembeede alimwi abaciswa. Balangizi ibalanganya kabotu balababikkila maano babelesi basyomeka aaba kwiinda mukubabambila bubambe bwakukambauka kwiinda mukubelesya fooni alimwi akulemba magwalo. Ba Bill, ibajisi myaka yakuzyalwa iili 86 alimwi ibalemba magwalo kubantu bakkala mumasena aali kulamfwu bakaamba kuti: “Tulalumba kapati akaambo kacoolwe cakulemba magwalo.” Abalo ba Nancy, ibajisi myaka yakuzyalwa iitandila ku 90, bakaamba kuti: “Kulemba magwalo tandikuboni kuti nkwiile kujala buyo mvwulupu. Ooyu mulimo wakukambauka. Bantu beelede kukazyiba kasimpe!” Ba Ethel, ibakazyalwa mu 1921 bakaamba kuti: “Lyoonse mubili ulacisa. Mazuba amwi cilandikatazya nokuba kusama buya.” Nokuba kuti bali mubukkale buli boobo, balakkomana kukambauka kubelesya fooni alimwi balijisi nyendo zyakupilukila zikulwaizya. Ba Barbara, ibajisi myaka yakuzyalwa iili 85 bakaamba kuti: “Akaambo kakuciswa-ciswa, cilandikatazya kuunka mumulimo wakukambauka lyoonse. Pele bukambausi bwaafooni bulandipa coolwe cakwaambaula abamwi. Aalumbwe Jehova!” Kautanamana mwaka, nkamu yabacembeede bayandwa bakakambauka mawoola aali 1,228, bakalemba magwalo aali 6,265, bakatuma mafooni ziindi ziinda ku 2,000, alimwi bakamwaya mabbuku aali 6,315! Cakutadooneka, kusolekesya kuli boobu kwakamukkomanisya kapati Jehova!—Tus. 27:11.

10. Mbuti mbotukonzya kupa kuti bakwesu kabagwasyigwa kapati kumiswaangano ya Bunakristo?

¹⁰ Amubabikkile maano bamwi kumiswaangano ya Bunakristo. Tuyanda kuti bakwesu kabagwasyigwa kapati kumiswaangano. Kubabikkila maano inga kwabagwasya kucita boobo. Munzila nzi? Nzila imwi, nkwiinda mukufwambaana kusika kutegwa tutabanyonganyi. Nokuba boobo, zimwi ziindi kulakonzya kucitika zintu nzyotwatali kuyeeyela izikonzya kutumusya. Pele kuti katujisi cilengwa cakumuka, tweelede kuyeeya mbocibajatikizya bakwesu alimwi ancotweelede kucita kutegwa tutondezye kuti tulababikkila maano. Alimwi tweelede kuyeeya kuti Jehova alimwi a Mwanaakwe, mbobatutamba kumiswaangano. (Mt. 18:20) Mubwini tweelede kubalemeka kwiinda mukufwambaana kusika kumiswaangano.

11. Nkaambo nzi aabo bajisi zibeela lyamiswaangano ncobeelede kutobela malailile aapedwe kulugwalo lwa 1 Bakorinto 14:40?

¹¹ Alimwi kubabikkila maano bakwesu caamba kutobela malailile aaya: “Zintu zyoonse azicitwe kabotu-kabotu alimwi kweelana abubambe.” (1Kor. 14:40) Bakwesu ibajisi zibeela lyamiswaangano balaatobela malailile aaya kwiinda mukwaamba  makani aabo muciindi ncobapedwe. Ikucita boobo kutondezya kuti balamubikkila maano mwaambi uutobela alimwi ambungano. Bakwesu bamwi beenda misinzo milamfwu kutegwa bakasike kumaanda aabo. Ibamwi bayandika kukkwela myootokala buya. Mpoonya bamwi mbobakwetene limwi tabali basyomi pe, aboobo balakonzya kabalindila kuti bafwambaane kupiluka.

12. Nkaambo nzi baalu babeleka canguzu ncobeelela ‘kulemekwa kapati muluyando’? (Amubone kabbokesi kakuti “ Amubalemeke Aabo Basololela.”)

¹² Beembezi bakumuuya ibabeleka canguzu mumbungano alimwi ibakambauka cabusungu beelede kulemekwa kapati. (Amubale 1 Tesalonika 5:12, 13.) Cakutadooneka mulabalumba baalu akaambo kakusolekesya kwabo. Aboobo, amucite kufwumbwa ncomukonzya, kulitondezya kuti mulilibambilide kubeleka antoomwe ambabo akubagwasyilizya. Alimwi buya “balanganya ndinywe kabali baabo ibayoobuzyigwa makani.”—Heb. 13:7, 17.

13. Ncinzi ncotukonzya kwiiya kuli Jesu kujatikizya mbwaakali kubeendelezya bantu?

¹³ Kujatikizya Jesu, Isaya wakasinsima kuti: “Takatyoli tete lipwayikide, alimwi takakazimi katambo kalambe kasuka busi.” (Is. 42:3) Luyando ndwaakajisi Jesu kubantu lwakamupa kuba alweetelelo. Wakali kubamvwisya aabo ibakali mbuli tete lipwayikide naa mbuli katambo kalambe kasuka busi ikayanda kuzima. Akaambo kaceeci, wakali muntu uubikkila maano, siluzyalo, alimwi uukkazika moyo. Nobaba bana bakali kusika kulinguwe. (Mk. 10:14) Nokuba kuti swebo tatujisi busongo alimwi aluzyibo lwakuyiisya mbuli ndwaakajisi Jesu, tulakonzya alimwi tuleelede kubabikkila maano bantu  ibali mucilawo cesu. Eeci cilabikkilizya ambotwaambaula ambabo, ciindi ncotwaambaula ambabo, alimwi abulamfwu bwaciindi ncotwaambaula ambabo.

14. Nkaambo nzi ncotweelede kubikkila maano kapati kujatikizya mbotwaambaula abantu?

¹⁴ Mbuti mbotweelede kwaambaula abantu? Mazuba aano, mamiliyoni aabantu ‘balapenzyegwa alimwi balimwaikide’ akaambo kabasimakwebo basilunya alimwi ibadyaaminina, basimapolitikisi alimwi abasololi babukombi. (Mt. 9:36) Nkakaambo kaako, bantu banji balaliyanda alimwi tabajisi bulangizi. Aboobo cilayandika kapati kuti katutondezya luzyalo alimwi alubomba mumajwi ngotwaamba alimwi ambotwaamba majwi aayo. Masimpe, banji balakwelelezyegwa kumulumbe wesu ikutali buyo akaambo kaluzyibo lwamu Bbaibbele ndotujisi naa kupandulula kabotu twaambo, pele alimwi akaambo kaluyando akubikkila maano nkotutondezya kulimbabo.

15. Muunzila nzi motukonzya kutondezya kuti tulababikkila maano bantu mbotukambaukila?

¹⁵ Kuli nzila zinji motukonzya kutondezya kuti tulababikkila maano bantu mbotukambaukila. Mucikozyanyo, mibuzyo ilagwasya kapati mukuyiisya. Aboobo tweelede kubuzya mibuzyo munzila yaluzyalo alimwi yabulemu. Mupainiya umwi uujisi bantu balaansoni mucilawo cakwe wakaiya kuti tayelede kubuzya mibuzyo iikonzya kubapa nsoni. Eeyi ibikkilizya mibuzyo njatakonzyi kwiingula muntu naa njakonzya kwiingula munzila iitaluzi. Mucikozyanyo, wakacileka kubuzya mibuzyo mbuli yakuti, ‘Sena mulilizyi izina lya Leza?’ naa, ‘Sena mulibuzyi Bwami bwa Leza?’ Muciindi caboobo, wakali kutalika kwiinda mukwaamba kuti, “Ndakabala mu Bbaibbele kuti Leza ulijisi zina lyakwe limugeme. Sena inga ndamutondezya zina eelyo?” Mbwaanga zilengwa alimwi abantu baliindene, kunyina milawo iibikkidwe. Nokuba boobo, lyoonse tweelede kubikkila maano alimwi akutondezya bulemu, calo cibikkilizya akubazyiba kabotu bantu bali mucilawo cesu.

16, 17. Mbuti mbotukonzya kutondezya luzyalo ciindi notuyeeya kujatikizya (a) ciindi ncotweelede kubaswaya bantu? (b) bulamfwu bwaciindi ncotuyoobandika ambabo?

¹⁶ Ndilili notweelede kubaswaya basimukoboma? Ciindi notuunka mubukambausi bwakuŋanda aŋanda bantu inga tabalangili kuti tulabaswaya, nkaambo tiibakatutamba. Aboobo tweelede kuunka ciindi bantu ncobalangilwa kuti inga baanguluka kubandika andiswe. (Mt. 7:12) Mucikozyanyo, ambweni bantu mucilawo canu inga balamuka kubuka kumamanino aansondo. Kuti naa mbocibede oobo, mulakonzya kutalika mulimo wanu kwiinda mukucita bukambausi bwamumugwagwa, bwakubuleya, naa kucita nyendo zyakupilukila kubantu mbomuyeeya kuti inga cakonzyeka kubandika ambabo.

¹⁷ Ino tweelede kukkala ciindi cilamfwu buti? Bantu banji bajisi bubi, aboobo tatweelede kukkala ciindi cilamfwu, kwaambisya ciindi cakusaanguna. Inga cabota kufwiinsya mubandi muciindi cakukkala kwaciindi cilamfwu. (1Kor. 9:20-23) Kuti bantu babona kuti tulibuzyi bukkale bwabo naa tulizyi kuti bajisi zintu zinji zyakucita, balakonzya kutuzumizya kuyoobaswaya alimwi. Masimpe, tweelede kutondezya mucelo wamuuya wa Leza mumulimo wesu wakukambauka. Kuti naa twacita oobo, tuba “basimilimonyina a Leza,” naa Jehova ulakonzya kutubelesya kukwela muntu umwi kukasimpe.—1Kor. 3:6, 7, 9.

18. Ikuti katubabikkila maano bantu, nzilongezyo nzi nzyotukonzya kujana?

¹⁸ Aboobo atusolekesye kusikila mpotugolela kubabikkila maano bantu, nkokuti banamukwasyi, bakwesu abacizyi mumbungano alimwi abantu mbotujana mumulimo wamumuunda. Ikuti twacita oobo, tuyoolongezyegwa kapati lino alimwi akumbele. Lugwalo lwa Intembauzyo 41:1, 2 lwaamba kuti: “Ulikkomene ooyo uumubikkila maano muntu uupengede; Jehova uyoomuvwuna mubuzuba bwamapenzi. . . . Munyika uyakwaambwa kuti ulikkomene.”