1. Nkaambo nzi ncotweelede kulibombya kuli Jehova?

TWEELEDE kulibombya * kuli Jehova nkaambo ngowakatulenga. Aboobo ulijisi nguzu zyakutwaambila ncotweelede kucita. (Ciy. 4:11) Kaambo kamwi ncotweelede kumumvwida Jehova nkakuti bweendelezi bwakwe mbobwiinda kubota. Kuzwa kaindi, bantu banji balijisi nguzu zyakweendelezya bamwi. Pele twamweezyanisya ambabo, Jehova Mweendelezi wiinda kuba abusongo, luyando, luse alimwi alweetelelo.—Kul. 34:6; Rom. 16:27; 1Joh. 4:8.

2. Kweelana alugwalo lwa Bahebrayo 12:9-11, ntwaambo nzi itweelede kutupa kulibombya kuli Jehova?

² Jehova uyanda kuti katumumvwida, ikutali akaambo kakuti tulamuyoowa, pele akaambo kakuti tulamuyanda alimwi tumubona kuti ngu Taateesu siluyando. Mulugwalo ndwaakalembela bana Hebrayo, Paulo wakaamba kuti tweelede “kulibombya kwiinda waawo kuli Taata” nkaambo ulatuyiisya “kuti tugwasyigwe.”—Amubale Bahebrayo 12:9-11.

3. (a) Mbuti mbotukonzya kutondezya kuti tulalibombya kuli Jehova? (b) Mibuzyo nzi njotutiingule?

³ Tulalibombya kuli Jehova kwiinda mukucita kufwumbwa ncotukonzya kutegwa tumumvwide muzintu zyoonse alimwi akwiinda mukweeleba kusyoma maano eesu tobeni. (Tus. 3:5) Cilatuubila kulibombya kuli Jehova ikuti twabuzyiba bube bwakwe bubotu. Nkaambo nzi? Nkaambo kakuti bube oobu bulalibonya muzintu zyoonse nzyacita. (Int. 145:9) Notuzumanana  kumwiiya Jehova, tuyoomuyanda kapati. Ciindi notumuyanda Jehova, tatuyandiki milawo minji iitwaambila ncotweelede kucita alimwi akutacita. Tulasoleka kukkomanina zintu zibotu alimwi akusulaika zintu zibi mbubwenya mbwacita Jehova. Nokuba boobo, zimwi ziindi cilakonzya kutuyumina kumumvwida Jehova. Nkaambo nzi? Ncinzi baalu ncobakonzya kwiiya kucikozyanyo ca Mweendelezi Nehemiya? Ncinzi bamausyi ncobakonzya kwiiya kucikozyanyo ca Mwami Davida? Alimwi ino ncinzi bamatumbu ncobakonzya kwiiya kucikozyanyo ca Mariya, banyina Jesu? Tulayiingula mibuzyo eeyi mucibalo eeci.

4-5. Kweelana alugwalo lwa Baroma 7:21-23, nkaambo nzi ncocikonzya kukatazya kulibombya kuli Jehova?

⁴ Kaambo kamwi ncocikonzya kutukatazya kulibombya kuli Jehova nkakuti toonse twakakona cibi alimwi tatulondokede. Aboobo tujisi tumpenda twabuzangi. Ciindi ba Adamu a Eva nobatakamumvwida Leza kwiinda mukulya mucelo, bakalisalila beni cibotu alimwi acibi. (Matl. 3:22) Mazuba aano, bantu banji basala kutamvwida Jehova alimwi akulisalila cibotu acibi.

⁵ Nobaba baabo ibamuzyi Jehova alimwi ibamuyanda cilakonzya kubakatazya kulibombya cakumaninina kulinguwe. Mwaapostolo Paulo wakajana buyumuyumu mbubwenya oobu. (Amubale Baroma 7:21-23.) Mbubwenya mbuli Paulo, tuyanda kucita zintu ziluzi mumeso aa Jehova. Pele lyoonse tweelede kulwana kampenda kakuyanda kucita zintu zibyaabi.

6-7. Nkaambo nzi akamwi ncocikonzya kukatazya kulibombya kuli Jehova? Amupe cikozyanyo.

⁶ Kaambo akamwi ncocikonzya kukatazya kulibombya kuli Jehova nkakuti tulayungwa azilengwa alimwi amizeezo yabantu bakubusena nkotwakakomenena. Bantu banji balakonzya kutwaambila zintu ziindene anzyayanda Jehova. Aboobo tweelede kusolekesya kutaba aamizeezo njobajisi bantu aaba. Atubone cikozyanyo comwe buyo.

⁷ Mumasena amwi, bakubusi balasinikizyigwa kujana mali manji. Mucizyi wazina lyakuti Mary * wakalijana mubuyumuyumu buli boobu. Katanaiya kujatikizya Jehova, wakaunka kucikolo cimwi icili aampuwo kapati mucisi mwakkala. Banamukwasyi bakasoleka kumusinikizya kuti anjile mulimo uuvwolwa mali manji alimwi akuba ampuwo. Awalo wakali kuyanda kucita oobo. Nokuba boobo, naakaiya kujatikizya Jehova alimwi akutalika kumuyanda, wakacinca mbaakani zyakwe. Pele tiicakali cuuba-uba kulinguwe kucita boobo. Wakaamba kuti: “Zimwi ziindi ndilajana zyoolwe zinji zikonzya kundipa kuba amali manji, pele ndilizyi kuti kucita boobo kulakonzya kundilesya kubelekela Jehova mbuli mbondicita lino. Kweelana ambondakakomezyegwa, cicindikatazya kukaka. Inga ndilomba Jehova buya kuti andigwasye kukaka sunko lyakuzumina mulimo uukonzya kupa kuti ndicileke kumubelekela.”—Mt. 6:24.

8. Ncinzi ncotutiibandike lino?

⁸ Kulibombya kuli Jehova kulatugwasya kapati. Pele ciindi aabo ibajisi nguzu zyabweendelezi, nkokuti baalu, bamausyi alimwi abamatumbu nobalibombya kuli Leza, balabagwasya bamwi. Lino atubandike zikozyanyo zimwi zyamu Bbaibbele izituyiisya mbotukonzya kuzibelesya nguzu zyesu zyabweendelezi munzila iimukkomanisya Jehova.

9. Ino Nehemiya wakabeendelezya buti bantu ba Jehova?

⁹ Jehova wakapa baalu mukuli mupati wakulanganya bantu bakwe. (1Pet. 5:2) Baalu  balakonzya kwiiya zinji kwiinda mukulanga-langa cikozyanyo ca Nehemiya icijatikizya mbwaakali kubeendelezya bantu ba Jehova. Naakali mweendelezi wa Juda, Nehemiya wakalijisi nguzu zyabweendelezi zinji. (Neh. 1:11; 2:7, 8; 5:14) Amweezeezye kujatikizya buyumuyumu bumwi mbwaakajana Nehemiya. Wakamvwa kuti ba Juda bakali kubelesya tempele kucita zintu izyatakali kutondezya bulemu kubukombi bwa Jehova. Alimwi tiibakali kupa zyakusanga kutegwa bagwasyilizye ba Levi kweelana a Mulawo wa Jehova mbowakabalailila kuti kabacita. Tiibakali kuutobela mulawo wa Jehova uujatikizya Sabata, alimwi bamaalumi bamwi bakakwata bamakaintu beenzu ibatakali kukomba Jehova. Ino Mweendelezi Nehemiya wakacita buti kujatikizya bukkale oobu ibwakali kukatazya?—Neh. 13:4-30.

10. Ino Nehemiya wakacita buti kubuyumuyumu mbwaakajana?

¹⁰ Nehemiya kunyina naakabelesya nguzu zyakwe zyabweendelezi kusinikizya bantu ba Leza kuti batobele mizeezo yakwe. Muciindi caboobo, wakapaila kuli Jehova kuzwa ansi aamoyo kulomba lugwasyo alimwi wakabayiisya bantu Mulawo wa Jehova. (Neh. 1:4-10; 13:1-3) Alimwi cakulicesya Nehemiya wakabeleka antoomwe abakwesu, nokuba kubagwasya kuyakulula bwaanda bwa Jerusalemu.—Neh. 4:15.

11. Kweelana alugwalo lwa 1 Batesalonika 2:7, 8, ino baalu beelede kubeendelezya buti aabo ibali mumbungano?

¹¹ Baalu ambweni inga tiibajana buyumuyumu bukozyenye ambwaakajana Nehemiya, pele balakonzya kumwiiya munzila zinji. Mucikozyanyo, balabeleka canguzu kugwasya bakwesu alimwi abacizyi. Alimwi tabaliboni kuti balisumpukide kwiinda bamwi akaambo kanguzu zyabweendelezi nzyobajisi. Muciindi caboobo, balabalanganya kabotu bakwesu alimwi abacizyi mumbungano. (Amubale 1 Batesalonika 2:7, 8.) Akaambo kakuti balalicesya alimwi balabayanda kapati bamwi, balabandika ambabo calubomba. Mukwesu Andrew, mwaalu iwabeleka kwaciindi cilamfwu, wakaamba kuti: “Ndakabona kuti ciindi mwaalu natondezya lubomba alimwi abulongwe, cilabakkomanisya  kapati bakwesu alimwi abacizyi. Bube oobu bulabakulwaizya basimbungano kubelekela antoomwe abaalu.” Aumwi mwaalu iwabeleka kwaciindi cilamfwu, wazina lyakuti Tony, wakaamba kuti: “Ndilasola kulubelesya lulayo iluli kulugwalo lwa Bafilipi 2:3 alimwi akubona bamwi kuti balandiinda. Eeci cilandigwasya kutabasinikizya bamwi kutobela nzyondiyanda.”

12. Nkaambo nzi baalu ncobeelede kulicesya?

¹² Mbubwenya mbuli Jehova, baalu abalo beelede kulicesya. Nokuba kuti Jehova Mweendelezi wabubumbo boonse, “ulooka” kutegwa abusye “muntu uupengede kuzwa mulusuko.” (Int. 18:35; 113:6, 7) Alimwi buya Bbaibbele litwaambila kuti bantu balisumpula, ncisesemyo kuli Jehova.—Tus. 16:5.

13. Nkaambo nzi mwaalu ncayelede ‘kuujata mulaka wakwe’?

¹³ Mwaalu uulibombya kuli Jehova weelede ‘kuujata mulaka wakwe.’ Ikuti naa kataciti oobo, ulakonzya kwaambaula munzila iitali kabotu ikuti umwi tanaamulemeka. (Jak. 1:26; Gal. 5:14, 15) Ba Andrew, ibaambwa kale, bakati: “Zimwi ziindi, ndilaakuyanda kwaambaula munzila iitali kabotu kumukwesu naa mucizyi ngondabona mbuli kuti tanaandilemeka. Nokuba boobo, ndilazinzibala kuyeeya zikozyanyo zyabaalumi basyomeka ibaambidwe mu Bbaibbele. Eeci candigwasya kubona mbociyandika kuba muntu uulicesya alimwi mubombe.” Baalu balatondezya kulibombya kuli Jehova kwiinda mukwaambaula caluyando alimwi acabubombe kubakwesu abacizyi naa kubaalunyina.—Kol. 4:6.

14. Mukuli nzi Jehova ngwaakapa bamausyi alimwi ino uyanda kuti kabacita buti?

¹⁴ Jehova wakapa usyi umwi aumwi mukuli wakuba mutwe wamukwasyi alimwi uyanda kuti usyi kabayiisya, kabasololela alimwi akubalaya bana bakwe. (1Kor. 11:3; Ef. 6:4) Pele nguzu zyakwe zyabweendelezi kuli mpozigolela, uyoolyaambilila kuli Jehova, ooyo mukwasyi uuli woonse nkowakatambula zina lyanguwo. (Ef. 3:14, 15) Bamausyi balatondezya kulibombya kuli Jehova kwiinda mukubelesya nguzu zyabo zyabweendelezi munzila njakkomanina Leza. Aboobo balakonzya kwiiya zinji kwiinda mukulanga-langa cikozyanyo ca Mwami Davida.

15. Nkaambo nzi bamausyi ncobeelede kwiiya cikozyanyo ca Mwami Davida?

¹⁵ Jehova wakabikka Davida kuba silutwe wamukwasyi wakwe alimwi awamusyobo woonse wa Israyeli. Naakali mwami, Davida wakalijisi nguzu zinji zyabweendelezi. Zimwi ziindi, nguzu zyakwe zyabweendelezi wakali kuzibelesya munzila iitali kabotu alimwi wakacita zibi zipati. (2Sam. 11:14, 15) Pele wakatondezya kulibombya kuli Jehova kwiinda mukutambula lulayo.  Wakapaila kuli Jehova camoyo woonse alimwi wakasola kusikila mpagolela kutobela lulayo lwa Jehova. (Int. 51:1-4) Kuyungizya waawo, wakalicesya kwiinda mukutambula lulayo lubotu, ikutali buyo kuzwa kuli bamaalumi, pele alimwi akuli bamakaintu. (1Sam. 19:11, 12; 25:32, 33) Davida wakaiya kuzwa kukulubizya kwakwe alimwi wakabikkila maano kapati kubelekela Jehova.

16. Nziiyo nzi nzyobakonzya kwiiya bamausyi kucikozyanyo ca Davida?

¹⁶ Amubone ziiyo zimwi nzyobakonzya kwiiya bamausyi kuzwa kuli Davida: Mutazibelesyi munzila iitali kabotu nguzu zyabweendelezi nzyaakamupa Jehova. Amukuzumine kulubizya kwanu alimwi amulutambule lulayo lwamu Bbaibbele kuzwa kuli bamwi. Ikuti naa mwacita oobo, mukwasyi wanu uyoomulemeka akaambo kakulicesya kwanu. Ciindi nomupaila antoomwe amukwasyi wanu, amumwaambile Jehova izili mumoyo wanu, bamukwasyi wanu abazyibe kujatikizya lusyomo ndomujisi muli Jehova. Kwiinda zyoonse, kubelekela Jehova amukubone kuba cintu ciyandika kapati mubuumi bwanu. (Dt. 6:6-9) Cikozyanyo canu cibotu ncimwi cazipego ziyandika kapati ncomukonzya kupa mukwasyi wanu.

17. Mukuli nzi Jehova ngwaakabapa bamatumbu?

¹⁷ Jehova wakapa mutumbu umwi aumwi mukuli uuyandika kapati mumukwasyi alimwi wakamupa anguzu zimwi zyabweendelezi kubana bakwe. (Tus. 6:20) Nzyacita alimwi anzyaamba mutumbu zilakonzya kubajatikizya bana bakwe mubuumi bwabo boonse. (Tus. 22:6) Atubone ncobakonzya kwiiya bamatumbu kucikozyanyo ca Mariya, banyina Jesu.

18-19. Ncinzi ncobakonzya kwiiya bamatumbu kucikozyanyo ca Mariya?

¹⁸ Mariya wakalaazyi kabotu Magwalo. Wakali kumulemeka kapati Jehova alimwi wakali acilongwe ciyumu anguwe. Wakalilibambilide kulibombya kubusolozi bwa Jehova, nokuba kuti kucita boobo kwakacinca buumi bwakwe boonse.—Lk. 1:35-38, 46-55.

¹⁹ Nobamatumbu, mulakonzya kumwiiya Mariya munzila zinji. Ino ncinzi ncomukonzya kucita? Cakusaanguna, mweelede kuzumanana kuyumya cilongwe canu a Jehova kwiinda mukuba aciiyo canu ca Bbaibbele alimwi akupaila lyoonse. Cabili, mweelede kuti kamulibambilide kucinca mubuumi bwanu kutegwa mukkomanisye Jehova. Mucikozyanyo, ambweni mwakakomezyegwa abazyali ibafwambaana kunyema alimwi ibaambaula cabukali kubana babo. Aboobo mulakonzya kuyeeya kuti cili buyo kabotu kweendelezya bana banu munzila iili boobu. Noliba leelyo nomwamana kwiiya zyeelelo zya Jehova, inga kamucijisi buyumuyumu bwakubakkazikila moyo bana banu, kwaambisya  kuti kabatalilemeki ciindi nomukatede. (Ef. 4:31) Ikuti caba boobo, cilayandika kapati kumulomba Jehova kutegwa amugwasye. Mutumbu umwi wazina lya Lydia wakaamba kuti: “Zimwi ziindi, ndilapaila kuzwa ansi aamoyo kutegwa nditaambauli cabukali ciindi mwanaangu natandimvwidi. Mane buya inga ndilaumuna kanditanamanizya kwaambaula akutalika kupaila mumoyo ikulomba Jehova kuti andigwasye. Mupailo ulandigwasya kukkazika moyo.”—Int. 37:5.

20. Mbuyumuyumu nzi mbobajana bamatumbu bamwi alimwi ino inga babuzunda buti?

²⁰ Buyumuyumu mbobakonzya kujana bamatumbu bamwi, nkwaalilwa kutondezya luyando kubana babo. (Tit. 2:3, 4) Bamatumbu bamwi bakakomezyegwa abazyali ibatakali kutondezya luyando kubana babo. Ikuti naa mbomwakakomezyegwa oobo, tamweelede kwiiya cikozyanyo cabazyali banu icitali kabotu. Mutumbu uulibombya kubusolozi bwa Jehova weelede kwiiya mbwayelede kutondezya luyando kubana bakwe. Cilakonzya kumuyumina kucinca mbwayeeya, mbwalimvwa alimwi ambwacita zintu. Pele ulakonzya kucinca, kucita boobo inga kwamugwasya walo alimwi abamukwasyi wakwe.

21-22. Kweelana alugwalo lwa Isaya 65:13, 14, mbubotu nzi mbotujana kwiinda mukulibombya kuli Jehova?

²¹ Mwami Davida wakalibuzyi bubotu bwakulibombya kuli Jehova. Wakalemba kuti: “Malailile aa Jehova aliluleme, apa kuti moyo ukkomane; mulawo wa Jehova ulasalala, upa kuti meso ajaluke. Mubelesi wako wacenjezyegwa anzizyo; ikuzibamba kuletela bulumbu bupati.” (Int. 19:8, 11) Mazuba aano, tulakonzya kulubona lwiindano luliko akati kabaabo ibalibombya kuli Jehova alimwi abaabo ibalukaka lulayo lwakwe lwaluyando. Aabo ibalibombya kuli Jehova ‘baloongolola cakukondwa akaambo kakukkomana kwamyoyo yabo.’—Amubale Isaya 65:13, 14.

²² Ciindi baalu, bamausyi alimwi abamatumbu nobalibombya kuli Jehova cakuliyandila, buumi bwabo bulabota, mikwasyi yabo ilakkomana alimwi bakwesu abacizyi boonse mumbungano balakamantana. Kwiinda zyoonse, bakkomanisya moyo wa Jehova. (Tus. 27:11) Eelo kaka oobu mbulumbu bwiinda kubota!