1. Ino bukkale bwamwaapostolo Johane bwakali buti kumamanino aamwaanda wamyaka wakusaanguna C.E.?

KUMAMANINO aamwaanda wamyaka wakusaanguna C.E., mwaapostolo Johane wakali mubukkale bukatazya kapati. Wakalicembeede, wakalaangidwe munsumbu ya Patimo alimwi kulibonya kuti ngowakali mwaapostolo alikke iwakacili kupona. (Ciy. 1:9) Wakalizyi kuti basiluleyo bakali kuyiisya zyakubeja alimwi akupa kuti kube kwaandaana akati ka Banakristo. Cakali kulibonya mbuli kuti mukaindi buyo kasyoonto Banakristo bakasimpe boonse balamana.—Jud. 4; Ciy. 2:15, 20; 3:1, 17.

2. Kweelana alugwalo lwa Ciyubunuzyo 7:9-14, ncilengaano nzi icikkomanisya ncaakapegwa Johane? (Amubone cifwanikiso icili aacivwumbyo.)

² Kacili mubukkale oobu bukatazya, Johane wakapegwa cilengaano cabusinsimi icikkomanisya kapati. Mucilengaano eeci, mungelo umwi wakaambila bangelo bambi bone kujata myuuwo yalunyonyooko yamapenzi mapati kusikila mane nkamu yabazike bakabikkwe ciganto camamanino. (Ciy. 7:1-3) Munkamu eeyo muli bantu ibali 144,000 ibayoolela antoomwe a Jesu kujulu. (Lk. 12:32; Ciy. 7:4) Mpoonya Johane wakaamba kujatikizya nkamu iimbi, nkamu eeyo nimpati cakuti wakaamba kuti: “Ndakalanga, eelyo ndakabona nkamu mpati yabantu batakonzyi kubalwa amuntu uuli woonse, ibazwa muzisi zyoonse, mumisyobo yoonse, mumikowa yoonse alimwi amumilaka yoonse, kabaimvwi kumbele lyacuuno cabwami akumbele lya Mwanaambelele.” (Amubale Ciyubunuzyo 7:9-14.) Tacidoonekwi buya kuti Johane wakakkomana kapati kuzyiba kuti kumbele, kuyooba bantu banji ibanookomba Leza munzila iiluzi.

3. (a) Nkaambo nzi cilengaano ca Johane ncociyumya lusyomo lwesu? (b) Ino tulaiya nzi mucibalo eeci?

 ³ Cakutadooneka, cilengaano eeco cakayumya lusyomo lwa Johane. Cilengaano eeco ceelede kuluyumya kapati lusyomo lwesu akaambo kakuti caamba mazuba aamamanino, iciindi ncotupona. Twalibonena kuyobololwa kwamamiliyoni aabantu ibajisi bulangizi bwakuyoofwutuka kumapenzi mapati alimwi akuyoopona kukabe kutamani anyika. Mucibalo eeci, tulaiya nzila njaakabelesya Jehova kuyubununa nkamu mpati eeyo kubantu bakwe myaka iinda ku 80 yainda. Mpoonya tulabandika twaambo tobilo kujatikizya nkamu eeyo: (1) nimpati kapati alimwi (2) bantu ibali munkamu eeyo bazwa munyika yoonse mboizulwa. Twaambo ootu tweelede kuyumya lusyomo lwabaabo boonse ibajisi bulangizi bwakuba cibeela cankamu eeyo iilelekedwe.

4. Nkasimpe nzi kamu Magwalo ikatayiisyigwi a Bunakristo Bwanyika alimwi ino Basikwiiya Bbaibbele bakaindene buti kujatikizya kasimpe aaka?

⁴ Bunakristo Bwanyika tabuyiisyi kasimpe kamu Magwalo kakuti bumwi buzuba bantu batobela malailile aa Leza bayookkala anyika mane kukabe kutamani. (2Kor. 4:3, 4) Mazuba aano, zikombelo zinji zya Bunakristo Bwanyika ziyiisya kuti bantu boonse ibali kabotu baunka kujulu ciindi nobafwa. Pele kuli lwiindano ambokakali kuyiisya kabunga kasyoonto ka Basikwiiya Bbaibbele ikakali kumwaya Ngazi Yamulindizi kutalikila mu 1879. Bakalizyi kuti Leza wakali kuyoobambulula nyika kuti ibe Paradaiso alimwi akuti mamiliyoni aabantu ibatobela malailile aa Leza bakali kuyookkala aano anyika, ikutali kujulu. Nokuba boobo, cakabatolela ciindi kubazyiba kabotu bantu aabo ibatobela malailile aa Leza.—Mt. 6:10.

5. Ncinzi Basikwiiya Bbaibbele ncobakali kusyoma kujatikizya ibali 144,000?

⁵ Masimpe, abalo Basikwiiya Bbaibbele bakazyiba kuzwa mu Magwalo kuti bamwi bakali ‘kuyakuulwa munyika’ kutegwa bakalele antoomwe a Jesu kujulu. (Ciy. 14:3) Kakamu aako kakali kuyoobambwa a Banakristo basungu alimwi ibalyaabide ibali 144,000, aabo ibakabelekela Leza cakusyomeka nobakali anyika. Ino ncinzi ncobakali kusyoma kujatikizya nkamu mpati?

6. Ncinzi Basikwiiya Bbaibbele ncobakali kusyoma kujatikizya bankamu mpati yabantu?

⁶ Mucilengaano cakwe, Johane wakabona bankamu eeyo “kabaimvwi kumbele lyacuuno cabwami akumbele lya Mwanaambelele.” (Ciy. 7:9) Majwi aaya akapa kuti Basikwiiya Bbaibbele basyome kuti mbubwenya mbuli ba 144,000, bankamu mpati yabantu, bakali kuyookkala kujulu. Pele ikuti naa ba 144,000 alimwi ankamu mpati yabantu bakali kuyookkala kujulu, ino nkamu iimwi yakali kuyooyindana buti ankamu iimbi? Basikwiiya Bbaibbele bakali kuyeeya kuti bankamu mpati yabantu bakali Banakristo ibatakali kwaatobela cakumaninina malailile aa Leza nobakali anyika. Nokuba kuti bakali kuzitobela zyeelelo zyamu Bbaibbele zyakulilemeka, kweelede kuti bamwi bakazumanana kuzulilwa kuzikombelo zya Bunakristo Bwanyika. Basikwiiya Bbaibbele bakazyi kuti bantu ibali boobu tiibakali kumuyanda cakumaninina Leza, aboobo tiibakali kweelela kulela a Jesu. Akaambo kakuti tiibakali kumuyanda cakumaninina Leza, bankamu mpati yabantu bakali kuyooyelela kuunka kujulu kabali kumbele lyacuuno cabwami, pele ikutali kukkala muzyuuno zyabwami.

7. Kweelana ambobakali kusyoma Basikwiiya Bbaibbele, mbaani ibakali kuyookkala anyika mu Myaka Iili 1,000? Ncinzi Basikwiiya Bbaibbele ncobakali kusyoma kujatikizya baalumi basyomeka bakaindi?

⁷ Aboobo ino mbaani ibayookkala anyika? Basikwiiya Bbaibbele bakali kusyoma kuti ba 144,000 alimwi abankamu mpati yabantu baakubunganizyigwa kujulu, mamiliyoni aabantu bamwi bayoozumizyigwa kukkala anyika kutegwa bakkomane azilongezyo zya Bulelo bwa Kristo  Bwamyaka Iili 1,000. Basikwiiya Bbaibbele tiibakali kuyeeya kuti mamiliyoni aabantu aaba bakali kuyoomubelekela Jehova kabutanatalika Bulelo bwa Kristo. Muciindi caboobo, bakali kuyeeya kuti bantu aaba bakali kuyooyiya kujatikizya Jehova bwaakutalika Bulelo bwa Kristo. Mpoonya, aabo ibayoozitobela zyeelelo zya Jehova bakali kuyoopegwa buumi butamani anyika, pele aabo ibakali kuyoozanga bakali kuyoonyonyoonwa. Basikwiiya Bbaibbele alimwi bakali kuyeeya kuti ambweni bamwi ibakali kuyoobeleka kabali “basilutwe” baanyika kuciindi eeco, kubikkilizya abaabo ‘ibakali kusyomeka kaindi’ ibayoobusyigwa (baalumi basyomeka ibakafwa katanasika Kristo), bakali kuyoopegwa bulumbu bwakupona kujulu kumamanino aa Myaka Iili 1,000.—Int. 45:16.

8. Ino ninkamu nzi zyotatwe izilibonya kuti zyakajisi lubazu mumakanze aa Leza?

⁸ Aboobo Basikwiiya Bbaibbele bakali kusyoma kuti kwakali nkamu zyotatwe: (1) iba 144,000, ibakali kuyoolela antoomwe a Jesu kujulu; (2) nkamu mpati ya Banakristo ibatakasungweede kapati, aabo ibakali kuyooyima kumbele lyacuuno ca Jesu kujulu; alimwi (3) mamiliyoni aabantu ibakali kuyooyiisyigwa nzila zya Jehova anyika bwaakutalika Bulelo bwa Kristo Bwamyaka Iili 1,000. * Pele mukuya kwaciindi, Jehova wakabagwasya kukamvwisya kabotu kaambo aaka.—Tus. 4:18.

9. (a) Mbuti bankamu mpati yabantu mbobakonzya kwiima “kumbele lyacuuno cabwami akumbele lya Mwanaambelele”? (b) Nkaambo nzi kumvwisya ooku kwalugwalo lwa Ciyubunuzyo 7:9 ncokweelela?

⁹ Mu 1935, Bakamboni ba Jehova bakabazyiba kabotu bankamu mpati yabantu ibaambidwe mucilengaano ca Johane. Bakazyiba kuti nkamu mpati yabantu tayeelede kuba kujulu kwini buya kutegwa ikaime “kumbele lyacuuno cabwami akumbele lya Mwanaambelele.” Muciindi caboobo, balacita oobo munzila yacikozyanyo. Nokuba kuti bayookkala anyika, bankamu mpati balakonzya kwiima “kumbele lyacuuno” kwiinda mukuzumina kuti Jehova mweendelezi Wabubumbo alimwi akutondezya kuti balabutobela bweendelezi bwakwe kwiinda mukutobela malailile aakwe. (Is. 66:1) Balakonzya kwiima “kumbele lya Mwanaambelele” kwiinda mukusyoma mucinunuzyo cacipaizyo ca Jesu. Mbubwenya buyo, kulugwalo lwa Matayo 25:31, 32, “masi oonse,” kubikkilizya abasizibi, baambwa kuti ‘bayoobunganizyigwa kumbele’ lya Jesu acuuno cakwe cabwami cabulemu. Cilisalede kuti, masi oonse aaya, taali kujulu, pele ali anyika. Kucinca mukumvwisya ooku kuleelela. Kulapandulula kaambo Bbaibbele ncolitaambi kuti bankamu mpati bayootolwa kujulu. Nkamu yomwe buyo njiyakasyomezyegwa buumi butamani kujulu, nkokuti ba 144,000, ‘ibayooba bami ibayoolela nyika’ antoomwe a Jesu.—Ciy. 5:10.

10. Nkaambo nzi ncociyandika kuti bankamu mpati bakayiisyigwe nzila zya Jehova kabutanatalika Bulelo bwa Kristo Bwamyaka Iili 1,000?

¹⁰ Kuzwa mu 1935, Bakamboni ba Jehova bakazyiba kuti nkamu mpati yaambidwe mucilengaano ca Johane, ninkamu ya Banakristo basyomeka aabo ibajisi bulangizi bwakuyoopona kukabe kutamani anyika. Kutegwa bakafwutuke lyamapenzi mapati, bankamu mpati beelede kuyiisyigwa nzila zya Jehova kabutanatalika Bulelo bwa Kristo Bwamyaka Iili 1,000. Bayooyandika kutondezya lusyomo luyumu kutegwa ‘bakakonzye kufwutuka muzintu zyoonse eezyo zyeelede kucitika’ kabutanatalika Bulelo bwa Kristo Bwamyaka Iili 1,000.—Lk. 21:34-36.

11. Nkaambo nzi ncokweelede kuti Basikwiiya Bbaibbele bamwi bakali kuyeeya kuti bamwi bakali kuyootolwa kujulu bwaakumana Bulelo bwa Kristo Bwamyaka Iili 1,000?

¹¹ Ino mbuti kujatikizya kaambo kakuti bamwi ibatondezya cikozyanyo cibotu anyika bayootolwa kujulu bwaakumana Bulelo bwa Kristo Bwamyaka Iili 1,000? Muzeezo ooyu wakaambwa  kaindi mu Ngazi Yamulindizi yamu February 15, 1913. Umwi ambweni wakali kukonzya kulibuzya kuti, ‘Nkaambo nzi baalumi bamwi basyomeka bakaindi ncobakali kuyookona buyo nyika kakuli Banakristo ibakajisi lusyomo lusyoonto bakali kuyoopegwa bulumbu bwakupona kujulu?’ Masimpe, kuyeeya kuli boobu kwakayeeme amizeezo iitaluzi yobilo: (1) wakuti bankamu mpati yabantu bakali kuyookkala kujulu alimwi (2) awakuti bankamu mpati yabantu bakali Banakristo ibakajisi lusyomo lusyoonto.

12-13. Ncinzi ncobazyi bananike alimwi abankamu mpati kujatikizya bulumbu bwabo?

¹² Nokuba boobo, kweelana ambotwabona, kuzwa mu 1935, Bakamboni ba Jehova bakamvwisya kabotu kuti aabo ibayoofwutuka lya Amagedoni mbabaabo ibankamu mpati njaakabona Johane mucilengaano. Aaba ‘bayoozwa mumapenzi mapati’ mpoonya aano anyika alimwi bayoozumanana “koongolola ajwi pati, kuti: ‘Lufwutuko lwesu luzwa kuli Leza wesu, ooyo uukkede acuuno cabwami alimwi aku Mwanaambelele.’” (Ciy. 7:10, 14) Kuyungizya waawo, Magwalo ayiisya kuti aabo ibayoobusyigwa kubuumi bwakujulu bayootambula “cintu iciinda kubota” kwiinda ncobayootambula baalumi basyomeka ibakaindi. (Heb. 11:40) Aboobo cabusungu bakwesu bakatalika kutamba bantu kuti bamubelekele Jehova kabajisi bulangizi bwakuyoopona kukabe kutamani anyika.

¹³ Bankamu mpati balikkomene kapati abulangizi bwabo. Balizyi kuti Jehova ngonguwe uusala nkobayoomubelekela bakombi bakwe ibasyomeka, kufwumbwa naa nkuujulu naa mpaanyika. Bananike alimwi abankamu mpati balizyi kuti balapegwa bulumbu akaambo buyo kaluzyalo lwa Jehova lupati ilwakatondezyegwa kwiinda mucipaizyo cacinunuzyo ca Jesu Kristo.—Rom. 3:24.

14. Nowakainda mwaka wa 1935, nkaambo nzi bantu banji ncobakali kulibuzya mbobwakali kuyoozuzikizyigwa businsimi bujatikizya bankamu mpati?

¹⁴ Nokwakaba kucinca kujatikizya mbobakali kumvwisya bantu ba Jehova mu 1935, bamwi bakacili kulibuzya mbobakali kuyooba nkamu mpati bantu ibakali kuyoopona anyika. Mucikozyanyo, ba Ronald Parkin bakajisi myaka iili 12 ciindi nkamu mpati noyakazyibwa kabotu. Bakaamba kuti: “Aciindi eeco, kwakali buyo basikumwaya basika ku 56,000 nyika yoonse alimwi ambweni bunji bwabo bakali bananike. Aboobo bankamu mpati bakali kulibonya kuceya.”

15. Mbuti kubunganizyigwa kwankamu mpati mbokwazumanana kuyaambele?

¹⁵ Nokuba boobo, mumyaka yakatobela, bamisyinali bakatumwa muzisi zinji alimwi mweelwe wa Bakamboni ba Jehova wakazumanana kukomena. Mpoonya mu 1968, kwakabikkwa bubambe bwakwiiya Bbaibbele kubelesya bbuku  lyakuti The Truth That Leads to Eternal Life. Bbuku eeli lyakali kukapandulula kasimpe kamu Bbaibbele munzila ngubauba cakuti bantu banji bakaboola kuli Jehova. Mumyaka yone, basikwiiya bapya ibainda ku 500,000 bakabbapatizyigwa. Ciindi Cikombelo Cakatolika nocakali kuyaabumana nguzu mu Latin America amuzisi zimwi alimwi amulawo uukasya mulimo wesu nowakamana ku Eastern Europe alimwi amumasena aamwi aamu Africa, bantu banji kapati bakabbapatizyigwa. (Is. 60:22) Mumyaka yaino-ino, mbunga ya Jehova yapanga zibelesyo zimbi zinji izibeleka kabotu kugwasya bantu kwiiya Bbaibbele. Tacidoonekwi buya kuti bankamu mpati, lino ibainda ku 8 miliyoni, babunganizyigwa.

16. Ino bankamu mpati ibali mukubunganizyigwa bazwa kuli?

¹⁶ Ciindi naakali kulemba cilengaano cakwe, Johane wakaamba kuti bankamu mpati bakali kuyoozwa “muzisi zyoonse, mumisyobo yoonse, mumikowa yoonse alimwi amumilaka yoonse.” Musinsimi Zekariya wakalaambide kale businsimi bukozyenye aboobu. Wakalemba kuti: “Kumazuba aayo bantu bali kkumi bazwa mumyaambo yoonse yamasi bayoojata, inzya, bayoojatisya cikobela camu Juda, akwaamba kuti: ‘Tuyanda kuunka andinywe, nkaambo twamvwa kuti Leza ulaandinywe.’”—Zek. 8:23.

17. Ino ncinzi icili mukucitwa kutegwa bantu bazisi zyoonse alimwi amilaka yoonse bagwasyigwe?

 ¹⁷ Bakamboni ba Jehova balizyi kuti kutegwa bantu bamyaambo yoonse babunganizyigwe, makani mabotu ayelede kukambaukwa mumyaambo minji. Twali kusandulula zibelesyo izibelesyegwa kuyiisya Bbaibbele kwamyaka iinda ku 130, pele lino tulacita mulimo wakusandulula uutanacitidwe kuzwa kaindi mumyaambo minji kapati. Cakutadooneka, Jehova uli mukucita maleele aamazuba aano, ikubunganya nkamu mpati kuzwa muzisi zyoonse. Tulikkomene akaambo kakuba acakulya cakumuuya cinji alimwi icili mumyaambo minji. Bakamboni bazwa munyika yoonse mboizulwa balikamantene mubukombi alimwi balizyibidwe kabotu akaambo kabusungu bwabo mukukambauka aluyando lwabo lwabunyina. Eelo kaka eeci cilayumya lusyomo!—Mt. 24:14; Joh. 13:35.

18. (a) Kweelana alugwalo lwa Isaya 46:10, 11, nkaambo nzi ncotutagambwi kuti Jehova wabuzuzikizya businsimi bujatikizya nkamu mpati? (b) Nkaambo nzi aabo ibajisi bulangizi bwakuyoopona anyika ncobatalimvwi kuti kuli ncobabulide?

¹⁸ Eelo kaka tulijisi twaambo tunji itweelede kutukkomanisya kujatikizya businsimi ibwaamba nkamu mpati! Tacigambyi kuti Jehova wabuzuzikizya businsimi oobo munzila mbotu kapati. (Amubale Isaya 46:10, 11.) Bankamu mpati balalumba kapati kubulangizi Jehova mbwaakabapa. Tabalimvwi kuti kuli ncobabulide akaambo kakuti tiibakananikwa amuuya uusalala wa Leza kutegwa bakabeleke antoomwe a Jesu kujulu. Mu Magwalo, tulabala kujatikizya baalumi abamakaintu ibasyomeka ibakali kusololelwa amuuya uusalala; nokuba boobo tabali cibeela caba 144,000. Johane Mubbapatizi ngumwi wambabo. (Mt. 11:11) Uumbi ngu Davida. (Mil. 2:34) Aaba alimwi abambi ibatabaliki bayoobusyigwa kutegwa bakapone muparadaiso anyika. Boonse buyo antoomwe abankamu mpati, bayooba acoolwe cakutondezya kuti balasyomeka kuli Jehova akubweendelezi bwakwe.

19. Mbuti kuzuzikizyigwa kwacilengaano ca Johane cankamu mpati mbokutondezya kuti ciindi ncotupona cilibindide?

¹⁹ Eeci nciindi cakusaanguna kuli Leza kubunganya mamiliyoni aabantu kuzwa kuzisi zyoonse kutegwa bamukombe antoomwe. Kufwumbwa naa tujisi bulangizi bwakuyoopona kujulu naa anyika, tweelede kugwasya bantu banji kusikila mpotugolela kutegwa babe cibeela cankamu mpati ‘cambelele zimbi.’ (Joh. 10:16) Ino-ino, Jehova uyooleta mapenzi mapati aakasinsimwa kutegwa akanyonyoone mfwulumende alimwi abukombi zyalo izyapa kuti bantu bapenge kapati. Bankamu mpati boonse balijisi coolwe citaliboteli. Bayoomubelekela Jehova anyika mane kukabe kutamani.—Ciy. 7:14.