1. Ndugwasyo nzi bacizyi ndobapa kumbunga, alimwi ino mbuyumuyumu nzi banji mbobajana? (Amubone cifwanikiso icili aacivwumbyo.)

EELO kaka tulikkomene kuba abacizyi banji ibabeleka canguzu mumbungano! Mucikozyanyo, balatola lubazu lyamiswaangano alimwi amumulimo wamumuunda. Bamwi balagwasyilizya mukubambulula Maanda aa Bwami alimwi balababikkila maano bakombinyina. Nokuba boobo, balajana buyumuyumu. Bamwi balanganya bazyali babo bacembeede. Ibamwi balakazyigwa abanamukwasyi. Mpoonya bamwi mbazyali ibali balikke ibabeleka canguzu kutegwa babajanine nzyobayandika bana babo.

2. Nkaambo nzi ncotweelede kubagwasya bacizyi?

² Nkaambo nzi ncotweelede kubagwasya bacizyi? Nkaambo kakuti kanji-kanji bantu munyika tababapi bulemu ibubeelede bamakaintu. Kuyungizya waawo, Bbaibbele litukulwaizya kubagwasya bacizyi. Mucikozyanyo, mwaapostolo Paulo wakaambila mbungano yaku Roma kuti imutambule Febi alimwi ‘akumugwasya mumakani aali woonse mwanga wayandika lugwasyo.’ (Rom. 16:1, 2) Ciindi Paulo naakali mu Farisi, wakali cibeela cakabunga kabantu ibakali kusyoma kuti bamakaintu tabayandiki kapati alimwi buya oobo mbwaakali kubabona. Pele naakaba Munakristo, wakaiya cikozyanyo ca Jesu akutalika kubeendelezya cabulemu alimwi acalubomba bamakaintu.—1Kor. 11:1.

3. Ino Jesu wakali kubeendelezya buti bamakaintu alimwi mbuti mbwaakali kubabona bamakaintu ibakali kucita kuyanda kwa Leza?

³ Jesu wakali kubeendelezya cabulemu bamakaintu boonse. (Joh. 4:27) Alimwi kunyina naakali kubabona mbuli mbobakali kubabona basololi bacikombelo caba Juda bamumazuba aakwe. Mane buya, bbuku limwi ilyaamba zyamu Bbaibbele lyaamba kuti: “Jesu kunyina naakaamba cintu cili coonse icatakali kutondezya bulemu kuli bamakaintu.” Pele Jesu wakali kubalemeka kapati bamakaintu ibakali kucita kuyanda kwa Bausyi. Wakali kubabona kuti  mbacizyi bakwe alimwi wakababikkilizya ciindi naakaamba bamaalumi aabo mbaakali kubona kuti ncibeela camukwasyi wakwe wakumuuya.—Mt. 12:50.

4. Ino ncinzi ncotutiibandike mucibalo eeci?

⁴ Jesu lyoonse wakalilibambilide kugwasya bamakaintu aabo ibakali kubelekela Leza. Wakali kubalumba alimwi akubaiminina. Atubandike mbotukonzya kumwiiya Jesu caboola kukubabikkila maano bacizyi.

5. Nkaambo nzi bacizyi bamwi ncocikonzya kubayumina kujana ciindi cakuyanzana abamwi?

⁵ Toonse buyo tulayanda kuba aciindi cakuyanzana abakwesu alimwi abacizyi. Nokuba boobo, zimwi ziindi bacizyi cilakonzya kubayumina kuba aciindi cili boobu. Nkaambo nzi? Amumvwe nzyobakaamba bacizyi bamwi. Mucizyi Jordan * wakaamba kuti, “Akaambo kakuti tandikwetwe, kanji-kanji ndilimvwa kuti tandijisi busena mumbungano, calo cindipa kulimvwa kuti tandili cibeela cambungano.” Mucizyi Kristen, mupainiya iwakaunka kubusena kubulide basikumwaya wakaamba kuti, “Ciindi noli mupya mumbungano, ulakonzya kulimvwa kulendelelwa.” Abalo bakwesu balakonzya kulimvwa mbubwenya oobo. Aabo ibakkala abanamukwasyi ibatali Bakamboni ba Jehova cilakonzya kubayumina kumvwana abanamukwasyi alimwi balakonzya kulimvwa kwaandaanizyigwa kumukwasyi wabo wakumuuya. Aabo ibatacikonzyi kuzwa aŋanda akaambo kakuciswa balakonzya kulendelelwa, mbubwenya mbuli baabo ibalanganya banamukwasyi ibaciswa. Mucizyi Annette wakati, “Tiindakali kucikonzya kuzumina kutambwa kutegwa tukayanzane abakwesu alimwi abacizyi akaambo kakuti ndime ndakali kulanganya bamaama.”

6. Kweelana alugwalo lwa Luka 10:38-42, mbuti Jesu mbwaakagwasya Marta alimwi a Mariya?

⁶ Jesu wakali kujana ciindi cakuyanzana abacizyi bakumuuya, alimwi wakali mulongwe mwini-mwini kulimbabo. Amubone cilongwe ncaakajisi kuli Marta alimwi a Mariya, boonse ibatakakwetwe. (Amubale Luka 10:38-42.) Kwiinda mumajwi aakwe alimwi anzyaakali kucita, Jesu wakabapa kwaanguluka bamakaintu aaba. Mucikozyanyo, Mariya wakaanguluka kukkala kumaulu aa Jesu kali sikwiiya. * Alimwi ciindi Marta naakanyema akaambo kakuti Mariya tanaakamugwasya kubamba cakulya, Marta wakaanguluka kwaambila Jesu izyakali kumoyo. Kupobwe ndilyonya eelyo, Jesu wakabagwasya bamakaintu aaba kwiiya ziiyo iziyandika kapati. Alimwi wakatondezya kuti wakali kubabikkila maano bamakaintu aaba alimwi amwanookwabo, Lazaro, kwiinda mukubaswaya aziindi zimbi. (Joh. 12:1-3) Nkakaambo kaako ciindi Lazaro naakaciswa kapati, Mariya alimwi a Marta bakalizyi kuti bakali kukonzya kumulomba Jesu kuti abagwasye.—Joh. 11:3, 5.

7. Ninzila nzi imwi motukonzya kubakulwaizya bacizyi?

⁷ Kubacizyi bamwi, miswaangano ncecoolwe cipati ncobajana cakuba abakombinyina. Aboobo tweelede kubona kuti twabatambula, kubandika ambabo alimwi akubaambila kuti tulakkomana kapati kuba ambabo kumiswaangano. Mucizyi Jordan, iwaambwa kumatalikilo wakati, “Cilandikulwaizya kapati ciindi bamwi nobandilumbaizya akaambo kabwiinguzi mbondipa kumiswaangano, nobandilomba kubeleka ambabo mubukambausi, naa nobatondezya munzila ziindene-indene kuti balandibikkila maano.” Tweelede kubatondezya bacizyi kuti balayandika kapati kulindiswe. Mucizyi Kia wakati, “Ikuti naa tiindaunka kumiswaangano, inga ndilizyi kuti bakwesu abacizyi bamwi balandilembela mameseji naa kunditumina fooni kutegwa bamvwe naa ndili kabotu. Eeci cindipa  kubona kuti bakwesu abacizyi balandibikkila maano.”

8. Muunzila nzi zimbi motukonzya kumwiiya Jesu?

⁸ Mbubwenya mbuli Jesu, tweelede kujana ciindi cakuyanzana abacizyi. Ambweni tulakonzya kubatamba kucakulya naa kukulikondelezya. Kuti naa twacita oobo, tweelede kuba masimpe kuti nzyotwaamba zilakulwaizya. (Rom. 1:11, 12) Baalu beelede kuba abube mbwaakajisi Jesu. Wakalizyi kuti kuli bamwi, kutakwata naa kutakwatwa inga cabayumina, pele wakacisalazya kuti kukwata naa kukwatwa naa kuba abana tatuli ntotwaambo ituletela lukkomano lutamani. (Lk. 11:27, 28) Muciindi caboobo, lukkomano lutamani lulaboola kwiinda mukubikka mulimo wa Jehova mubusena bwakusaanguna.—Mt. 19:12.

9. Ncinzi ncobakonzya kucita baalu kutegwa bagwasye bacizyi?

⁹ Ikapati baalu beelede kubona bamakaintu mumbungano mbuli bacizyi babo naa banyina. (1Tim. 5:1, 2) Baalu beelede kujana ciindi cakubandika abacizyi kaitanatalika miswaangano alimwi anoyamana. Mucizyi Kristen, iwaambwa kumatalikilo wakati, “Mwaalu umwi wakabona kuti ndakajisi bubi kapati, aboobo wakali kuyanda kuzyiba mbowakabede mulongo wangu. Ndakalumba kapati akaambo kakundibikkila maano.” Ciindi baalu nobajana ciindi lyoonse cakubandika abacizyi  babo bakumuuya, batondezya kuti balababikkila maano. * Mucizyi Annette, iwaambwa kumatalikilo, wakaamba kaambo komwe ncociyandika kubandika abaalu ciindi aciindi. Wakati: “Cindipa kubazyiba kabotu, abalo balandizyiba kabotu. Aboobo ciindi nondijisi penzi, cilanduubaubila kulomba lugwasyo.”

10. Ncinzi cikonzya kugwasya bacizyi kuyaambele?

¹⁰ Toonse buyo tulaunka ambele ciindi bamwi nobabikkila maano kuzintu nzyotukonzya kucita alimwi akutwaambila kuti balalumba kumulimo ngotucita. Nokuba boobo, ikuti naa kunyina batulumba akaambo kazintu nzyotukonzya kucita naa mulimo ngotwacita, tulatyompwa. Abigail, mupainiya uutakwetwe wakaamba kuti zimwi ziindi ulimvwa kutabikkilwa maano. Wakati: “Ndizyibidwe buyo kuti ndili mucizyi waccite accite naa kuti mwana wabaccite abaccite. Zimwi ziindi ndilimvwa kuti kunyina uundibikkila maano.” Nokuba boobo, amubone nzyaakaamba mucizyi Pam. Wakabeleka kali misyinali kwamyaka minji katakwetwe. Nokwakainda ciindi, wakajokela kuŋanda kuyoolanganya bazyali bakwe. Lino ujisi myaka yakuma 70, pele ucili mupainiya. Wakaamba kuti, “Ciindi bamwi nobandaambila kuti balalumba kapati kumulimo ngondicita, cilandigwasya kapati.”

11. Mbuti Jesu mbwaakatondezya kulumba kapati kumulimo ngobakamukutaukila bamakaintu?

¹¹ Jesu wakalumba kapati kulugwasyo ndwaakatambula kuzwa kuli bamakaintu bayoowa Leza ibakali kumukutaukila “kwiinda mukubelesya lubono lwabo.” (Lk. 8:1-3) Kunze buyo lyakubapa coolwe cakumukutaukila, wakabayiisya kasimpe ikayandika kapati kujatikizya kuyanda kwa Leza. Mucikozyanyo, wakabaambila kuti wakali kuyoofwa alimwi akubusyigwa. (Lk. 24:5-8) Wakabaambila bamakaintu aaba kujatikizya masunko ngobakali kuyoojana kumbele, mbubwenya mbwaakacita kubaapostolo. (Mk. 9:30-32; 10:32-34) Nokuba kuti baapostolo bakatija ciindi Jesu naakajatwa, bamakaintu bamwi ibakali kumukutaukila bakali kulangilila alaale ciindi naakafwa acisamu cakupenzyenzya.—Mt. 26:56; Mk. 15:40, 41.

12. Mulimo nzi Jesu ngwaakapa bamakaintu?

¹² Jesu wakabapa mulimo uuyandika kapati bamakaintu. Mucikozyanyo, bamakaintu ibayoowa Leza mbobakasaanguna kumubona naakabusyigwa. Mpoonya Jesu wakabalomba bamakaintu aabo kuti bakaambile baapostolo kuti wabusyigwa. (Mt. 28:5, 9, 10) Kweelede kuti kwakali abamakaintu mubuzuba bwa Pentekoste 33 C.E., ciindi baapostolo nobakali kunanikwa amuuya uusalala. Ikuti naa bakaliko, nkokuti abalo bakatambula cipego cakwaambaula mumyaambo alimwi akwaambila bamwi “milimo mipati ya Leza.”—Mil. 1:14; 2:2-4, 11.

13. Ncinzi ncobacita bamakaintu Banakristo mazuba aano, alimwi ino mbuti mbotukonzya kutondezya kulumba kumilimo njobacita?

¹³ Bacizyi baleelede kulumbwa kuzintu zyoonse nzyobacita mumulimo wa Jehova. Zintu eezyo zibikkilizya kuyaka alimwi akubambulula mayake, kugwasyilizya tubunga tubelesya myaambo yakunze aacisi alimwi akubelekela ku Beteli. Balagwasyilizya ciindi nokwacitika ntenda zilicitikila, kusandulula mabbuku eesu, kubeleka kabali bapainiya alimwi abamisyinali. Mbubwenya mbuli bakwesu, bacizyi balanjila cikolo cabapainiya, Cikolo Cabakambausi ba Bwami alimwi a Cikolo ca Gileadi. Kuyungizya waawo, bamakaintu balabagwasyilizya bamaalumi babo kutegwa bacikonzye kuzuzikizya mikuli yabo mumbungano alimwi amumbunga. Bakwesu aaba nobatacikonzyi kubeleka kabotu kabali “zipego mubantu” ikuti nobatali kugwasyilizyigwa abamakaintu babo. (Ef. 4:8) Sena inga mwayeeya nzila nzyomukonzya kubagwasyilizya bacizyi aaba kumulimo ngobacita?

14. Kweelana alugwalo lwa Intembauzyo 68:11, ncinzi baalu basongo ncobeelede kucita?

 ¹⁴ Baalu basongo balizyi kuti bacizyi “ninkamu mpati” yababelesi balisungwide alimwi kanji-kanji bacita kabotu mumulimo wakukambauka makani mabotu. (Amubale Intembauzyo 68:11.) Aboobo baalu balasoleka kwiiya kubacizyi aaba. Mucizyi Abigail, iwaambwa kumatalikilo, ulakulwaizyigwa kapati ciindi bakwesu nobamubuzya kujatikizya nzila nzyabona kuti zibeleka kabotu kutalisya mibandi mucilawo. Wakaamba kuti, “Eeci cilandigwasya kubona kuti Jehova ulindipede mulimo uuyandika kapati ngondeelede kucita mumbunga yakwe.” Kuyungizya waawo, baalu balizyi kuti bacizyi basyomeka alimwi basimide balacita kabotu kugwasyilizya bacizyi bacili bana-bana ciindi nobajisi buyumuyumu. (Tit. 2:3-5) Masimpe, tuleelede kubalumba bacizyi aaba!

15. Ndilili bacizyi nobanga bayandika muntu wakubaiminina?

¹⁵ Zimwi ziindi, bacizyi inga bayandika muntu wakubaiminina ciindi nobajana buyumuyumu bumwi. (Is. 1:17) Mucikozyanyo, mucizyi mukamufwu naa iwakalekwa inga wayandika muntu wakumwiiminina alimwi akumugwasya milimo imwi njaakali kucita mulumi wakwe. Mucizyi uucembeede inga wayandika muntu wakumugwasya kubandika abamadokota. Mucizyi mupainiya uubeleka milimo iimbi mumbunga ya Jehova inga wayandika muntu wakumwiiminina, ikuti naa bamwi balamutongooka akaambo kakuti ziindi zinji taunki mumulimo wamumuunda mbuli bapainiya bambi. Muunzila nzi zimbi motukonzya kubagwasyilizya bacizyi? Atucilange-lange alimwi cikozyanyo ca Jesu.

16. Kweelana alugwalo lwa Marko 14:3-9, mbuti Jesu mbwaakamwiiminina Mariya?

¹⁶ Jesu kunyina naakali kuwayawaya kubaiminina bacizyi ciindi bamwi nobakali kubatongooka. Mucikozyanyo, wakamwiiminina Mariya ciindi Marta naakamutongooka. (Lk. 10:38-42) Alimwi wakamwiiminina Mariya ciindi cabili, eliya bamwi nobakamutongooka akaambo kakuyeeya kuti ncaakacita tiicakali kabotu. (Amubale Marko 14:3-9.) Jesu wakalaazyi makanze ngaakajisi Mariya alimwi wakamulumbaizya kwiinda mukwaamba kuti: “Wandicitila cintu cibotu. . . . Wacita mbwakonzya.” Mane wakasinsima kuti ncaakacita mukaintu ooyu ciyakwaambwa “kufwumbwa makani mabotu aaya nkwaayookambaukwa munyika yoonse,” mbubwenya cibalo eeci mbocaamba lino. Eelo kaka cilakkomanisya kuti Jesu wakaamba kuti makani mabotu ayookambaukwa munyika yoonse ciindi naakamulumbaizya Mariya akaambo kaceeco ncaakacita! Majwi aa Jesu ayelede kuti akamukulwaizya Mariya ciindi bamwi nobakaadooneka makanze aakwe.

17. Amupe cikozyanyo icitondezya ciindi notweelede kumwiiminina mucizyi.

¹⁷ Sena mulabaiminina bacizyi ciindi nobayandika lugwasyo? Mucikozyanyo, amubone bukkale oobu. Basikumwaya bamwi babona kuti mucizyi uuzwa mumukwasyi bamwi mobatali Bakamboni ziindi zinji ulamuka kusika kumiswaangano alimwi akufwambaana kuunka mboyamanina buyo. Kunze lyaboobo, balabona kuti bunji bwaziindi tabaleti kumiswaangano bana bakwe. Aboobo balamutongooka nkaambo bayeeya kuti weelede kumusinikizya mulumaakwe kutegwa kamuzumizya kunoobatolelezya bana kumiswaangano. Pele ncobatazyi ncakuti, mucizyi ooyu ulasolekesya kucita kweelana ambwakonzya. Kunyina mbwakonzya kucita mbwaanga weendelezyegwa buya amulumaakwe alimwi kujatikizya bana talinguwe alikke uusala. Ino inga mwacita buti ikuti mwamvwa bamwi kabamutongooka mucizyi ooyu? Ikuti naa mwamulumbaizya mucizyi ooyu akwaamba zintu nzyacita kabotu, inga mwapa kuti bacileke kumutongooka.

18. Muunzila nzi zimbi motukonzya kubagwasyilizya bacizyi?

¹⁸ Tulakonzya kutondezya kuti tulababikkila maano bacizyi kwiinda mukubagwasya. (1Joh. 3:18) Mucizyi Annette, iwakali kulanganya banyina  ibakali kuciswa wakaamba kuti: “Bakwesu abacizyi bakali kuboola kuleta zyakulya naa kundigwasya kulanganya bamaama kutegwa ndicikonzye kucita zintu zimbi. Eeci cakandipa kulimvwa kuba cibeela cambungano alimwi akuyandwa.” Awalo mucizyi Jordan wakagwasyigwa. Mukwesu wakamuyiisya kubamba moota wakwe. Jordan wakaamba kuti: “Cilakkomanisya kuzyiba kuti bakwesu balandibikkila maano alimwi akuti bayanda kuti kandeenzya moota uuli kabotu kutegwa nditaciti ntenda.”

19. Muunzila nzi zimbi baalu mobakonzya kubagwasyilizya bacizyi?

¹⁹ Baalu abalo balasoleka kubikkila maano kuzintu nzyobayandika bacizyi. Balizyi kuti Jehova uyanda kuti bacizyi kabeendelezyegwa kabotu. (Jak. 1:27) Aboobo baalu baiya Jesu kwiinda mukuba bantu banyoneka. Balakonzya kucita oobo kwiinda mukutabikka milawo ciindi nokuyandika kutondezya lubomba alimwi akumvwisya. (Mt. 15:22-28) Ciindi baalu nobasolekesya kugwasya, cipa bacizyi kulimvwa kubikkilwa maano a Jehova alimwi ambunga yakwe. Ciindi mulangizi wakabunga mwazulilwa Kia naakamvwa kuti ulalonga, cakufwambaana wakapanga bubambe bwakuti mucizyi ooyu agwasyigwe. Mucizyi Kia wakati: “Eeci cakandipa kukkalwa moyo. Akaambo kakuti bakandikulwaizya akundipa lugwasyo ndondakali kuyandika, baalu bakanditondezya caantangalala kuti ndili cibeela cambungano iciyandika kapati alimwi akuti balilibambilide kundigwasya ciindi nondili mubukkale bukatazya.”

20-21. Mbuti mbotukonzya kutondezya kuti tulabayanda bacizyi Banakristo boonse?

²⁰ Mumbungano zyesu zyoonse mazuba aano, kuli zikozyanyo zinji zyabamakaintu Banakristo ibabeleka canguzu ibayandika lugwasyo lwesu. Kweelana ambotwaiya kucikozyanyo ca Jesu, tulakonzya kubagwasya kwiinda mukujana ciindi cakuba ambabo alimwi akubazyiba kabotu. Tulakonzya kutondezya kulumba kuzintu nzyobacita mumulimo wa Leza. Alimwi tulakonzya kubaiminina ciindi nokwayandika kucita boobo.

²¹ Kumamanino aalugwalo ndwaakalembela bana Roma, mwaapostolo Paulo cacigaminina wakaamba mazina aabamakaintu Banakristo ibali fwuka. (Rom. 16:1, 3, 6, 12, 13, 15) Kweelede kuti bamakaintu aaba bakakulwaizyigwa kapati kwiinda mukumvwa mooni wa Paulo alimwi amajwi aakubalumbaizya. Mbubwenya buyo, andiswe tweelede kubagwasyilizya bacizyi boonse mumbungano yesu. Kwiinda mukucita boobo, tutondezya kuti tulabayanda mbwaanga ncibeela camukwasyi wesu wakumuuya.