Kapango aaka ikapa kukkala ansi kuyeeya kaamba kuti: “Ikuti wabona muntu mucete kadyaamininwa akubona bantu babetekwa calunya akutacitilwa cabululami mucooko, utagambwi pe amakani aaya. Nkaambo muntu ooyo mupati ulangwa ayooyo mupati kwiinda nguwe, alimwi nkobali aabo bapati kapati kwiinda boonse aabo bapati.”—Muk. 5:8.

Kweelana akuyeeya kwabantu, majwi aaya apandulula beendelezi bamfwulumende bantunsi. Pele kuti twayeeyesya, majwi aaya alamujatikizya a Jehova, calo iceelede kutuumbulizya akutupa bulangizi.

Lugwalo lwa Mukambausi 5:8 lwaamba mweendelezi uudyaaminina bacete akutabacitila cabululami. Mweendelezi ooyo weelede kuyeeya kuti ulalangwa ayooyo mupati kwiinda nguwe naa ayooyo mupati kapati kwiinda nguwe mumfwulumende. Alimwi buya, inga kakuli bapati kapati kwiinda baabo bapati. Cuusisya ncakuti, mumfwulumende zyabantunsi, beendelezi boonse tabasyomeki, calo cipa kuti bantu kabapenga.

Pele nokuba kuti inga kwalibonya mbuli kuti kunyina bulangizi, tulakonzya kuumbulizyigwa kwiinda mukuzyiba kuti Jehova ‘ulabalangilila nobaba baabo bapati kapati kwiinda boonse aabo bapati’ mumfwulumende zyabantu. Tulakonzya kulomba lugwasyo kuli Leza kwiinda mukuwaala mikuli yesu iiminya kulinguwe. (Int. 55:22; Flp. 4:6, 7) Tulizyi kuti “meso aa Jehova alalanga-langa munyika yoonse kutegwa atondezye nguzu zyakwe ikugwasya baabo bamusyoma camoyo woonse.”—2Mak. 16:9.

Aboobo lugwalo lwa Mukambausi 5:8 lutondezya kuti, munyika lyoonse buyo inga kuli muntu uuli anguzu kapati kwiinda umwi. Kwiinda zyoonse, kapanga aaka katugwasya kubona kuti Jehova nguubainda boonse, inzya, Mweendelezi Mupati. Lino ulalela kwiinda mu Mwanaakwe, Jesu Kristo, Mwami wa Bwami. Singuzuzyoonse, ooyo uubalangilila boonse, uliluleme alimwi lyoonse ulacita cabululami, oobo mbwabede awalo Mwanaakwe.