1-2. Ino lugwalo lwa Mukambausi 11:6 luswaangene buti amulimo wakukambauka makani mabotu aa Bwami?

MUMASI aamwi, bantu balaba aluyandisisyo lwakwiiya ciindi nobamvwa makani mabotu. Amana buya inga ncecintu ncobalangila! Pele mumasi aambi, bantu tabayandi kumvwa makani aa Leza alimwi a Bbaibbele. Ino bantu kubusena nkomukkala baabona buti makani mabotu? Kufwumbwa mbocibede, Jehova uyanda kuti tukambauke kusikila mane akaambe kuti kwamana.

² Aciindi ncabikkide Jehova, mulimo wakukambauka uyoomana, “mpoonya mamanino ayoosika.” (Mt. 24:14, 36) Kacitanacitika eeci, mbuti mbotukonzya kutobela malailile aakuti “utalekeli maanza aako kulyookezya”? *—Amubale Mukambausi 11:6.

3. Ino tulabandika nzi mucibalo eeci?

³ Mucibalo cainda twakabandika zintu zyone nzyotweelede kucita kutegwa tube “bazubi babantu” bacibwene. (Mt. 4:19) Mucibalo eeci tulabandika nzila zyotatwe motukonzya kuyumya makanze eesu aakukambauka, kufwumbwa bukkale motubede. Tulaiya kaambo ncociyandika (1) kubikkila maano, (2) kukkazyika moyo alimwi (3) kuba alusyomo luyumu.

4. Nkaambo nzi ncotweelede kubikkila maano kumulimo ngwaakatupa kucita Jehova?

⁴ Jesu wakaambila basikwiiya bakwe kujatikizya mbobanoobede bantu alimwi azintu ziyoocitika kumazuba aamamanino. Wakalizyi kuti zintu eezyi ziyoopa kuti basikumutobela bacileke  kubikkila maano kumulimo wakukambauka. Nkakaambo kaako Jesu wakaambila basikwiiya bakwe kuti “amulangile.” (Mt. 24:42) Mbubwenya buyo amazuba aano, tulalijana mubukkale bukozyene aboobo bwakapa kuti bantu bakuciindi ca Nowa batabikkili maano kukucenjezya kwa Nowa. (Mt. 24:37-39; 2Pet. 2:5) Aboobo tuyanda kubikkila maano kumulimo ngwaakatupa kucita Jehova.

5. Mbuti lugwalo lwa Milimo 1:6-8 mbolupandulula mbouyookomena mulimo wakukambauka?

⁵ Mazuba aano, tweelede kuubikkila maano kapati mulimo wakukambauka makani mabotu aa Bwami. Jesu wakasinsima kuti mulimo ooyu uyookomena kapati alimwi uyoozumanana aakufwa. (Joh. 14:12) Naakafwa Jesu, basikwiiya bakwe bamwi bakapiluka kumulimo wabo wakuzuba nswi. Naakabusyigwa, wakacita maleele akugwasya basikwiiya bakwe bamwi kuti bajaye nswi zinji. Naakamana kucita maleele aaya, wakakankaizya kuti mulimo wakukambauka alimwi akugwasya bantu kuba basikwiiya ulayandika kapati kwiinda mulimo uuli woonse. (Joh. 21:15-17) Kali afwaafwi kuunka kujulu, wakaambila basikwiiya bakwe kuti mulimo wakukambauka ngwaakatalisya uyookomena kapati cakuti uyakwiindilila aminyinza ya Israyeli. (Amubale Milimo 1:6-8.) Nokwakainda myaka, Jesu wakapa mwaapostolo Johane cilengaano kutegwa amutondezye icakali kuyoocitika “mubuzuba bwa Mwami.” * Cintu cimwi ncaakabona Johane, ncilengaano cigambya camungelo “wakajisi makani mabotu aatamani aakwaambilizya . . . kumasi oonse, kumisyobo yoonse, kumilaka yoonse alimwi akubantu bamisyobo yoonse.” (Ciy. 1:10; 14:6) Cilisalede kuti, makanze aa Jehova kulindiswe mazuba aano ngakuti, tutole lubazu mumulimo mupati wakukambauka kusikila mane ukamane.

6. Mbuti mbotukonzya kuzumanana kubikkila maano kumulimo wakukambauka?

⁶ Tulakonzya kuzumanana kubikkila maano  kumulimo wakukambauka kuti naa twayeeya kujatikizya Jehova mbwatugwasya. Mucikozyanyo, ulatupa zyakulya zyakumuuya zinji kapati, mbuli mabbuku aasimbidwe, aa intaneti, zyakuswiilila zyakalekkoodwa, mavidiyo alimwi a JW Broadcasting. Amuyeeye buyo kujatikizya webbusaiti yesu ya jw.org, kuli makani manji aali mumyaambo iinda ku 1,000! (Mt. 24:45-47) Bantu munyika tabakamantene nkaambo kakuti bazulilwa kuzipani zyatwaambo twacisi ziindene, kuzikombelo ziindene, alimwi bamwi mbavwubi mpoonya bamwi mbacete. Pele babelesi ba Leza munyika yoonse ibainda ku 8 miliyoni balikamantene ncobeni. Mucikozyanyo, Bwasanu mu April 19, 2019, Bakamboni ba Jehova munyika yoonse calukamantano bakacikonzya kweebelela vidiyo yamubandi wakulingaula lugwalo lwabuzuba. Mangolezya buzuba oobo, bantu basika ku 20,919,041 bakabungana kucita Ciibalusyo calufwu lwa Jesu. Aboobo ciindi notuyeeya kujatikizya coolwe ncotujisi cakulibonena zintu eezyi zikkomanisya alimwi akutola lubazu, cilatukulwaizya kuzumanana kubikkila maano kumulimo wakukambauka makani mabotu aa Bwami.

7. Mbuti cikozyanyo ca Jesu mbocitugwasya kubikkila maano?

⁷ Nzila imwi motukonzya kubikkila maano kumulimo wakukambauka nkwiinda mukutobela cikozyanyo ca Jesu. Kunyina naakazumizya cintu cili coonse kuti cimunyonganye kucita mulimo wakwe wakupa bumboni kujatikizya kasimpe. (Joh. 18:37) Kunyina naakoongelezyegwa ciindi Saatani naakamutondezya “mami oonse aamunyika abulemu bwangawo”; naa kusunkwa ciindi bamwi nobakali kuyanda kumubikka kuba mwami. (Mt. 4:8, 9; Joh. 6:15) Kunyina naakoongelezyegwa amuuya wakuyandisya zintu zyakumubili; naa kukongwa abasikumukazya. (Lk. 9:58; Joh. 8:59) Ciindi lusyomo lwesu nolwasunkwa, tulakonzya kubikkila maano ikuti twayeeya lulayo lwamwaapostolo Paulo. Wakakulwaizya Banakristo kutobela cikozyanyo ca Jesu kutegwa ‘batakatali pe akucileka’!—Heb. 12:3.

8. Ino kukkazika moyo caamba nzi, alimwi nkaambo nzi ncokuyandika kapati lino?

⁸ Kukkazika moyo nkucikonzya kulindila cakubatama kuti bukkale bucince. Tacikwe makani naa tulindila kuti bukkale bumwi ibutali kabotu bucince, naa kuti tulindila kuzuzikizyigwa kwacintu cimwi ncotwali kulindila kwaciindi cilamfwu, tweelede kukkazika moyo. Musinsimi Habakuku wakali kulangila kuti bukkale bwalunya bumane mu Juda. (Hab. 1:2) Basikwiiya ba Jesu bakali kulangila kuti Bwami bwakali “kuyoolibonya ndilyonya” alimwi akubaangununa kukudyaamininwa abana Roma. (Lk. 19:11) Tulangila buzuba ciindi Bwami bwa Leza nobuyoogusya bubi alimwi akuleta nyika mpya yabululami. (2Pet. 3:13) Nokuba boobo, tweelede kukkazika moyo akulindila ciindi ncabikkide Jehova. Lino atulange-lange nzila mwatuyiisya kukkazika moyo Jehova.

9. Ino nzikozyanyo nzi izitondezya kukkazika moyo kwa Jehova?

⁹ Jehova ncikozyanyo cibotu cakukkazika moyo. Wakamupa ciindi cinji Nowa cakuyaka bwato alimwi akubeleka kali “mukambausi wabululami.” (2Pet. 2:5; 1Pet. 3:20) Jehova wakamuswiilila cakukkazika moyo Abrahamu ciindi naakazumanana kubuzya makanze aakunyonyoona bantu babyaabi bamu Sodoma a Gomora. (Matl. 18:20-33) Kwamyaka minji, Jehova wakabakkazikila moyo bana Israyeli ibatakasyomeka. (Neh. 9:30, 31) Tulakubona kukkazika moyo kwa Jehova ciindi nazumizya bantu mbakwela kulinguwe kuti “bakonzye kweempwa.” (2Pet. 3:9; Joh. 6:44; 1Tim. 2:3, 4) Cikozyanyo cibotu ca Jehova cakukkazika moyo ceelede kutukulwaizya kukkazika moyo ciindi notuzumanana kukambauka akuyiisya. Alimwi  ulatuyiisya kukkazika moyo kwiinda mucikozyanyo icijanika mu Jwi lyakwe.

10. Ino twiiya nzi kucikozyanyo camulimi icili kulugwalo lwa Jakobo 5:7, 8?

¹⁰ Amubale Jakobo 5:7, 8. Cikozyanyo camulimi cituyiisya mbotukonzya kuba bantu bakkazika moyo. Masimpe kuti zisyango zimwi zilafwambaana kukomena. Nokuba boobo, bunji bwazisyango, kwaambisya eezyo izizyala micelo, zilamuka kubizwa. Mu Israyeli, ciindi cakulima cakali kutola myezi iili cisambomwe. Mulimi wakali kusyanga mbuto zyakwe ciindi mvwula yakusaanguna noyakali kuwa lyacilimo mpoonya akutebula ciindi mvwula yamamanino noyakali kuwa kumatalikilo aamupeyo. (Mk. 4:28) Inga twacita cabusongo ikuti twaiya cikozyanyo camulimi cakukkazika moyo. Nokuba boobo, kucita boobu tacili cuubauba.

11. Ino kukkazika moyo kuyootugwasya buti mumulimo wamumuunda?

¹¹ Kanji-kanji bantu batalondokede inga bayanda kutebula mpoonya-mpoonya. Nokuba boobo, kuti katuyanda kuti zisyango zyesu zikomene kabotu akuyootebula, tweelede kuzibikkila maano ciindi coonse, nkokuti kulimina nsaku alimwi akutilila. Mbubwenya buyo, awalo mulimo wakugwasya bantu kuba basikwiiya, uyanda kubeleka canguzu. Citola ciindi kugwasya basikwiiya Bbaibbele kuba aluyando alimwi akuleka kusalulula. Kukkazika moyo kuyootugwasya kutatyompwa ciindi bantu nobatatuswiilili. Nociba ciindi bantu nobatuswiilila, tweelede kukkazika moyo. Tatukonzyi kumusinikizya sikwiiya Bbaibbele kuba alusyomo. Zimwi ziindi, nobaba basikwiiya ba Jesu bakali kumuka kumvwisya nzyaakali kubayiisya. (Joh. 14:9) Aboobo katuyeeya kuti tulakonzya kusyanga akutilila, pele Leza nguukomezya.—1Kor. 3:6.

12. Mbuti mbotukonzya kukkazika moyo ciindi notukambaukila banamukwasyi ibatali Bakamboni?

¹² Cilakonzya kutukatazya kukkazika moyo ciindi notukambaukila banamukwasyi ibatali Bakamboni. Njiisyo iijanika kulugwalo lwa Mukambausi 3:1, 7 ilakonzya kutugwasya. Yaamba  kuti, kuli ‘ciindi cakuumuna aciindi cakwaambaula.’ Bukkale bwesu bubotu bulakonzya kupa kuti banamukwasyi bauswiilile mulumbe wesu, lyoonse tweelede kuti katulibambilide kubaambila kujatikizya Jehova. (1Pet. 3:1, 2) Tulabakkazikila moyo bantu boonse, kubikkilizya abanamukwasyi, ciindi notukambauka akuyiisya cabusungu.

13-14. Ino nzikozyanyo nzi zyabantu bakatondezya kukkazika moyo nzyotukonzya kwiiya?

¹³ Tulakonzya kwiiya kukkazika moyo kuzwa kuzikozyanyo zyabantu basyomeka ibalembedwe mu Bbaibbele alimwi abamazuba aano. Habakuku wakali kulangila mamanino aabubi, pele calusyomo wakaamba kuti: “Ndinakwiimvwi akatungu kangu kabulindizi.” (Hab. 2:1) Mwaapostolo Paulo wakaamba makanze aakwe ‘aakumanizya’ mulimo wakwe. Nokuba boobo, cakukkazika moyo wakazumanana “kupa bumboni cakulomya kujatikizya makani mabotu.”—Mil. 20:24.

¹⁴ Amubone cikozyanyo cabanabukwetene ibakamanizya cikolo ca Gileadi balo ibakatumwa kucisi ooko ikuli Bakamboni basyoonto alimwi ibunji bwabantu bakubusena ooko tabali Banakristo. Mbasyoonto buyo bantu ibakali kuyanda kwiiya Bbaibbele. Mukwiimpana, aabo mbobakali limwi mukkilasi ibabelekela kuzisi zimbi bakali kubatumina malipooti aatondezya ziiyo zya Bbaibbele zinji zyuunka ambele nzyobakali kusololela. Nokuba kuti bantu mucilawo cabo tiibakali kubikkila maano, cakukkazika moyo banabukwetene aaba bakazumanana kukambauka. Nobakakambauka kwamyaka iili lusele mucilawo bantu mobatabikkili maano kumulumbe, bakakkomana kubona sikwiiya Bbaibbele wabo omwe kabbapatizyigwa. Ino zikozyanyo eezyi zyabantu bakaindi alimwi abamazuba aano zituyiisya nzi? Babelesi ba Leza basyomeka aaba tiibakaleka kuba basungu naa kulekela maanza aabo kulyookezya, aboobo Jehova wakakulongezya kukkazika moyo kwabo. Atube amakanze aakwiiya “baabo kwiinda mulusyomo akukkazika moyo ibayookona zyakasyomezyegwa.”—Heb. 6:10-12.

15. Ninzila nzi imwi lusyomo moluyumya makanze eesu aakukambauka?

¹⁵ Tulausyoma mulumbe ngotukambauka, aboobo tulayanda kuwaambilizya bantu banji kapati. Tulazisyoma zisyomezyo zijanika mu Jwi lya Leza. (Int. 119:42; Is. 40:8) Twalibonena businsimi bwamu Bbaibbele kabuzuzikizyigwa mumazuba eesu. Twalibonena bantu mbobacinca bukkale bwabo ciindi nobatalika kutobela lulayo lwamu Bbaibbele. Bumboni oobu buyumya lusyomo lwesu lwakuti makani mabotu aa Bwami mulumbe ngobeelede kumvwa bantu boonse.

16. Kweelana alugwalo lwa Intembauzyo 46:1-3, mbuti kusyoma Jehova alimwi a Jesu mbokuyumya makanze eesu aakukambauka?

¹⁶ Tulamusyoma Jehova, Kasensa kamulumbe ngotukambauka, alimwi a Jesu ooyo ngwaakabikka kuba Mwami wa Bwami. (Joh. 14:1) Tacikwe makani abukkale motukonzya kulijana, lyoonse Jehova unooli mayubilo eesu alimwi anguzu zyesu. (Amubale Intembauzyo 46:1-3.) Kuyungizya waawo, tulijisi lusyomo lwakuti Jesu ulausololela mulimo wakukambauka kali kujulu, kubelesya nguzu nzyaamupa Jehova.—Mt. 28:18-20.

17. Amupe cikozyanyo icitondezya kaambo ncotweelede kuzumanana kukambauka.

¹⁷ Lusyomo lutupa kusinizya kuti Jehova unookulongezya kusolekesya kwesu, zimwi ziindi munzila nzyotutakonzyi kuyeeyela. (Muk. 11:6) Mucikozyanyo, buzuba abuzuba bantu banji inga balaboola kulanga mabbuku atutebulu twesu naa atwakubikkila mabbuku twakukuba. Sena nzila eeyi yakukambauka ilabeleka? Inzya! Mulimo Wesu wa Bwami wamu November 2014 wakaamba kujatikizya sicikolo umwi  wakuyunivesiti iwakali kuyanda kulemba mulaso uujatikizya Bakamboni ba Jehova. Wakaalilwa kujana Ŋanda ya Bwami, pele mpoonya ayunivesiti wakabona katebulu kesu kakubikkila mabbuku, akujana makani ngaakali kuyanda kulemba mumulaso wakwe. Mukuya kwaciindi, wakabbapatizyigwa alimwi lino ulabeleka kali mupainiya waciindi coonse. Zyakuluula zili boobu zilatukulwaizya kuzumanana kukambauka nkaambo zitondezya kuti nkobacili bantu ibayandika kumvwa mulumbe wa Bwami.

18. Nkaambo nzi ncotusinizyide kuti mulimo wakukambauka Bwami uyoomana kweelana ambwayanda Jehova?

¹⁸ Tulakonzya kuba alusyomo lwakuti mulimo wakukambauka Bwami uyoomana aciindi ceelede. Amubone cakacitika mumazuba aa Nowa. Jehova wakatondezya kuti lyoonse ulacita zintu aciindi ceelede. Kakucili myaka iili 120, Jehova wakabikka ciindi Zambangulwe nolyakali kuyootalika. Nokwakainda myaka minji, Jehova wakaambila Nowa kutalika kuyaka bwato. Ambweni kakucili myaka iili 40 naa 50 kalitanatalika Zambangulwe, Nowa wakazumanana kubeleka canguzu. Nokuba kuti bantu tiibakali kumuswiilila, Nowa wakazumanana kwaambilizya mulumbe wakucenjezya kusikila Jehova naakaamba kuti atalike kunjizya banyama mubwato. Mpoonya aciindi aceelede, “Jehova wakaujala mulyango.”—Matl. 6:3; 7:1, 2, 16.

19. Ncinzi ncotukonzya kulangila ikuti naa tiitwalekela maanza eesu kulyookezya?

¹⁹ Lino-lino Jehova uyakwaamba kuti mulimo wakukambauka Bwami wamana; ‘uyakuujala mulyango’ wabweende bwazintu bwa Saatani akuleta nyika mpya yabululami. Kusikila ciindi eeco, atwiiye cikozyanyo ca Nowa, Habakuku alimwi abamwi ibatakalekela maanza aabo kulyookezya. Aboobo atubikkile maano kukambauka, atukkazike moyo alimwi akuzumanana kuyumya lusyomo lwesu muli Jehova alimwi amuzisyomezyo zyakwe.