1. Mbuti muntu mbwakonzya kulimvwa ciindi umwi mumukwasyi naagusyigwa mumbungano?

SENA kuli muyandwa wanu umwi uugusyidwe mumbungano? Eeco cilacisizya moyo! Mucizyi Hilda wakaamba kuti, “Ciindi balumi bangu mbotwakakkala limwi mucikwati kwamyaka iili 41 nobakafwa, ndakalimvwa kuti kunyina cintu cicisa mbuli ceeci icakandicitikilide kale mubuumi. * Pele ciindi mwanaangu musankwa, mukaintu wakwe alimwi abana bakwe bobilo nobakazwa mumbungano, cakandicisa kapati.”

2-3. Kweelana a Intembauzyo 78:40, 41, mbuti Jehova mbwalimvwa ciindi babelesi bakwe nobamusiya?

² Amuyeeye buyo mbocakamucisa kapati Jehova ciindi bangelo bamwi ibakali cibeela camukwasyi wakwe nobakamuzangila! (Jud. 6) Alimwi amweezeezye buyo mbocakamucisa kapati ciindi bana Israyeli, bantu mbaakali kuyanda, nobakali kumuzangila ziindi zinji. (Amubale Intembauzyo 78:40, 41.) Amusyome kuti Taateesu wakujulu siluyando awalo cilamucisa kapati ciindi muntu umwi naamusiya. Ulakumvwisya kuusa kwanu. Caluzyalo, uyoomukulwaizya akumupa lugwasyo ndomuyandika.

³ Mucibalo eeci, tulabandika ncotukonzya kucita kutegwa Jehova atugwasye kuti naa muyandwa wesu wacileka kumubelekela. Alimwi tulabona mbotukonzya kugwasya bamwi mumbungano ibajisi penzi eeli. Pele cakusaanguna, atubandike kujatikizya kuyeeya kumwi ikutali kabotu nkotweelede kweeleba.

4. Ino bazyali balimvwa buti ciindi mwanaabo naacileka kubelekela Jehova?

⁴ Ciindi mwana musimbi naa musankwa naamusiya Jehova, kanji-kanji bazyali inga bayeeya kuti kuli zintu zinji nzyobekeelede  kucita kugwasya mwanaabo kuti azumanane kubelekela Jehova. Ciindi mwanaabo naakagusyigwa mumbungano, mukwesu Luke wakaamba kuti: “Ndakalipa mulandu. Mane ndakalota zintu zibyaabi kujatikizya ceeci icakacitika. Zimwi ziindi ndakali kulila alimwi moyo wangu wakali kucisa kapati.” Mucizyi Elizabeth, awalo uuli aamwana wakagusyigwa, kanji-kanji wakali kulibuzya kuti: “Ino ncinzi mebo ndebanyina ncondakalubizya? Ndakali kulimvwa kuti mwanaangu tiindakamuyiisya bweelede ikuyanda Jehova.”

5. Nguni uupegwa mulandu ciindi umwi naacileka kubelekela Jehova?

⁵ Tweelede kuyeeya kuti aumwi Jehova wakamupa coolwe cakulisalila. Eeci caamba kuti tulakonzya kusala kumumvwida naa pe. Bana bamwi tiibakajisi bazyali ibakali cikozyanyo cibotu, pele basala kubelekela Jehova alimwi akuzumanana kusyomeka kulinguwe. Bamwi ibajisi bazyali ibakabeleka canguzu kubayiisya kuyanda Jehova, pele kumbele bakacileka kumubelekela. Aboobo umwi aumwi wesu weelede kulisalila kumubelekela Jehova. (Jos. 24:15) Aboobo, nobazyali nomuuside akaambo kakuti mwanaanu wakacileka kubelekela Jehova, mutanikulipi mulandu pe.

6. Mbuti mwana mbwakonzya kulimvwa ciindi muzyali naacileka kubelekela Leza?

⁶ Zimwi ziindi, muzyali ulakonzya kukasiya kasimpe nouba mukwasyi wakwe buya. (Int. 27:10) Eeci cilakonzya kubatyompya bana kuti naa bali kubona bazyali babo kuba cikozyanyo cibotu. Esther, uli aabausyi bagusyidwe mumbungano wakaamba kuti: “Kanji-kanji ndakali kulila nkaambo ndakabona kuti bataata tiibakali kuleya buyo mukasimpe. Pele bakasala buya acaali kuti bacileke kubelekela Jehova. Ndilabayanda bataata, aboobo ciindi nobakagusyigwa mumbungano, lyoonse ndakali kulibilika kujatikizya mbobanoopona. Mane buya ndakali kuziluka mumizeezo.”

7. Ino Jehova ulimvwa buti kujatikizya bana ibali aabazyali bagusyidwe mumbungano?

⁷ Nobana, ikuti bazyali banu bagusyigwa mumbungano, tulausa kapati! Amusyome kuti awalo Jehova ulizyi nywebo mbocimucisa eeci. Ulamuyanda akumulumba akaambo kakusyomeka kwanu, alimwi andiswe tobakwesu abacizyi tulamuyanda akumulumba. Alimwi amuyeeye kuti tamujisi mulandu akaambo kakusala kwabo. Kweelana ambokwaambwa kale, Jehova wakapa muntu uuli woonse coolwe cakulisalila. Aboobo aumwi uulyaabide akubbapatizyigwa weelede “kunyamuna mukuli wakwe uumugeme.”—Gal. 6:5.

8. Ncinzi banamukwasyi basyomeka ncobakonzya kucita ciindi nobalindila muyandwa wabo kuti apilukile kuli Jehova? (Amubone kabbokesi kakuti “ Amupilukile Kuli Jehova.”)

⁸ Ciindi muyandwa naacileka kubelekela Jehova, ncamaano kulombozya kuti bumwi buzuba uyakupiluka kulinguwe. Pele ino ncinzi ncomukonzya kucita calino? Amucite kufwumbwa nzyomukonzya kutegwa muzumanane kuyumya lusyomo lwanu. Kwiinda mukucita boobo, muyooba citondezyo cibotu kubanamukwasyi bamwi alimwi ambweni buya akuli yooyo uugusyidwe. Alimwi muyooba anguzu nzyomuyandika kutegwa muliyumye kubuumba bwanu. Lino atubandike kujatikizya zintu nzyomukonzya kucita.

9. Muunzila nzi motukonzya kujana nguzu kuli Jehova? (Amubone kabbokesi kuti “ Magwalo Aawumbulizya Ikuti Muyandwa Wanu Wacileka Kubelekela Jehova.”)

⁹ Amucite kufwumbwa nzyomukonzya kutegwa muzumanane kuyumya lusyomo lwanu. Cilayandika kapati kuti muzumanane kuliyumya alimwi akuyumya banamukwasyi bamwi. Mbuti mbomukonzya kucita boobo? Amujane nguzu kuzwa kuli Jehova kwiinda mukuzinzibala kuyeeya Jwi lya Leza abuzuba alimwi akujanika kumiswaangano ya Bunakristo. Joanna, uuli aabausyi alimwi amwanookwabo musimbi ibakazwa mukasimpe wakaamba kuti: “Ndilakkalwa moyo ciindi nondibala kujatikizya bantu bamu Bbaibbele mbuli Abigayeli, Esita, Jobu, Josefa alimwi a Jesu. Zikozyanyo zyabo zilandikulwaizya alimwi akundigwasya kuzibona munzila yeelede zintu. Azyalo nyimbo zimbi izizwa mu Broadcasting zilandiyumya kapati.”

10. Mbuti lugwalo lwa Intembauzyo 32:6-8 mbolukonzya kumugwasya kuliyumya ciindi nomuuside?

¹⁰ Amumwaambile Jehova zintu zyoonse izimupa kulibilika. Ciindi nomwausa, mutaleki kupaila kulinguwe. Amumulombe Leza wesu siluyando kuti amugwasye kubona zintu mbuli mbwazibona alimwi ‘akumupa kuba amaano akumuyiisya nzila njomweelede kutobela.’ (Amubale Intembauzyo 32:6-8.) Nokuba boobo, cilakonzya kucisa kapati kumwaambila Jehova bwini mbomulimvwa. Pele ulakumvwisya kapati kucisa kwamoyo wanu. Ulamuyanda kapati alimwi umukulwaizya kwaamba zyoonse izili kumoyo wanu.—Kul. 34:6; Int. 62:7, 8.

11. Kweelana alugwalo lwa Bahebrayo 12:11, nkaambo nzi ncotweelede kulusyoma lulayo lwa Jehova lwaluyando? (Amubone kabbokesi kakuti, “ Kugusya Muntu Mumbungano Kutondezya Luyando lwa Jehova Kulindiswe.”)

¹¹ Amukutambule kusala kwabaalu. Kugusya muntu mumbungano mbubambe bwa Jehova. Kululamika kwakwe kwaluyando kugwasya bantu  boonse, kubikkilizya ayooyo wakacita cibi. (Amubale Bahebrayo 12:11.) Umwi mumbungano ulakonzya kwaamba kuti baalu tiibasala kabotu kumugusya muntu umwi. Pele amuyeeye kuti muntu uuli boobo kanji-kanji tayandi kwaamba zintu zitali kabotu kujatikizya muntu ooyo wakacita cibi. Swebo tatutuzyi twaambo toonse tujatikizyidwe. Aboobo, ncabusongo kusyoma kuti baalu ibakalanganya makani aamuntu ooyo bakabeleka canguzu kutobela njiisyo zyamu Magwalo alimwi akubetekela “Jehova.”—2Mak. 19:6.

12. Mbubotu nzi mbobakajana bamwi akaambo kakugwasyilizya bubambe bwa Jehova bwalulayo?

¹² Kwiinda mukuzumina kusala kwabaalu kujatikizya kugusya muyandwa wanu mumbungano, mulakonzya kumugwasya muyandwa wanu kupilukila kuli Jehova. Ba Elizabeth ibaambwa kale bakati, “Cakali kukatazya kapati kutabonana munzila iili yoonse amwaneesu musankwa mupati. Pele naakapiluka kuli Jehova, wakaamba kuti wakaleelede kugusyigwa mumbungano. Mukuya kwaciindi, wakaamba kuti wakaiya ziiyo zinji kapati. Mebo ndakabona kuti lulayo lwa Jehova lyoonse lulagwasya.” Balumi babo ba Mark bakayungizya kwaamba kuti: “Nokwakainda ciindi, mwaneesu wakandaambila kuti cimwi icakali kumupa kuyanda kupilukila kuli Jehova ncakuti, kunyina notwakali kuyanzana anguwe naaceya. Ndilikkomene kuti Jehova wakatugwasya kuba bantu bamvwida.”

13. Ncinzi cikonzya kumugwasya kulwana penzi lyamumizeezo?

¹³ Amubandike abalongwe ibamvwisya mbomulimvwa. Amuyanzane a Banakristo basimide ibakonzya kumugwasya kuzumanana kuzilanga munzila iili kabotu zintu. (Tus. 12:25; 17:17) Ba Joanna, ibaambwa kale bakati: “Ndakali kulendelelwa. Pele kubandika abalongwe basyomeka kwakandigwasya kuliyumya.” Pele ino mbuti kuti bamwi mumbungano kabamwaambila zintu izimupa kwiindila buya kulimvwa bubi?

14. Nkaambo nzi ncotweelede ‘kuzumanana kweengelelana akulekelelana camoyo woonse’?

¹⁴ Amubakkazikile moyo bakwesu alimwi abacizyi. Mubwini, tatukonzyi kulangila kuti boonse buyo lyoonse banikwaamba zintu zili kabotu. (Jak. 3:2) Toonse tatulondokede, aboobo tamweelede kugambwa kuti bamwi kabatazyi cakwaamba naa buya cakutazyiba baamba cintu cimwi cikonzya kumucisa. Amuyeeye lulayo lwamwaapostolo Paulo lwakuti: “Amuzumanane kweengelelana akulekelelana camoyo woonse nokuba kuti umwi kajisi kaambo kakutongooka mweenzinyina.” (Kol. 3:13) Mucizyi umwi uuli aamunamukwasyi wakagusyigwa mumbungano wakaamba kuti: “Jehova wakandigwasya kulekelela bakwesu ibakali kusola kundikulwaizya, pele muciindi caboobo bakali kwaamba zintu zindicisizya moyo.” Ncinzi mbungano ncoikonzya kucita kugwasya banamukwasyi basyomeka?

15. Ncinzi ncotukonzya kucita kutegwa tugwasye banamukwasyi ibali aamuyandwa iwakagusyigwa caino-ino mumbungano?

¹⁵ Kamubatambula amaanza obilo banamukwasyi basyomeka. Mucizyi Miriam wakaamba kuti wakalilibilikide kuunka kumiswaangano  ciindi mwanookwabo naakagusyigwa mumbungano. Wakati, “Ndakalilibilikide kujatikizya nzyobakali kuyakwaamba bantu. Pele kwakali bakwesu abacizyi banji ibakauside acakacitika alimwi kunyina nobakaamba cili coonse cibyaabi kujatikizya mwanookwesu wakagusyigwa. Ndilabalumba kapati, nkaambo bakandikulwaizya mumapenzi aangu.” Aumwi mucizyi wakaamba kuti: “Naakagusyigwa mwaneesu, bakwesu abacizyi bakaboola kutuumbulizya. Bamwi bakatwaambila kuti tiibakazyi cakwaamba. Bamwi bakali kulila antoomwe andime alimwi bamwi bakali kunditumina magwalo aakulwaizya. Nzyobakacita zyakandigwasya kapati!”

16. Mbuti mbungano mboikonzya kuzumanana kugwasyilizya baabo ibali aamuyandwa wakagusyigwa mumbungano?

¹⁶ Amuzumanane kubagwasyilizya banamukwasyi basyomeka. Bayandika luyando alimwi akukulwaizyigwa kapati kwiinda lyoonse. (Heb. 10:24, 25) Zimwi ziindi, banamukwasyi bamuntu wakagusyigwa babona kuti bamwi mumbungano tabacibaambauzyi, mbuli kuti abalo bakagusyigwa. Tatuyandi kuti kabalimvwa boobo. Kwaambisya bana ibali aabazyali bakazwa mukasimpe bayandika kulumbaizyigwa alimwi akukulwaizyigwa. Ba Maria, ibali aamulumi wakagusyigwa mumbungano alimwi iwakasiya mukwasyi, bakaamba kuti: “Bamwi akati kabalongwe bangu bakali kuboola kuŋanda kujika cakulya alimwi akundigwasyilizya kuyiisya bana bangu. Bakali kundimvwisya akulila antoomwe andime. Bakali kundiiminina ciindi bantu nobakali kwaamba zintu zyakubeja kujatikizya ndime. Eelo kaka bakandiyumya kapati!”—Rom. 12:13, 15.

17. Ncinzi baalu ncobakonzya kucita kutegwa baumbulizye baabo batyompedwe?

¹⁷ Nobaalu, amuzibelesye zyoolwe zyoonse nzyomujisi kuyumya banamukwasyi basyomeka. Mujisi mukuli uulibedelede wakuumbulizya bakombinyoko ibali aamuyandwa iwakacileka kubelekela Jehova. (1Tes. 5:14) Amujane ciindi cakubakulwaizya kaitanatalika miswaangano ya Bunakristo alimwi anoyamana. Kamubaswaya akupaila ambabo. Kamubeleka ambabo mumulimo wamumuunda naa zimwi ziindi kubatamba kumusangana lyakukomba kwanu mumukwasyi. Baalu beelede kubalanganya  aabo batyompedwe akubatondezya luzyalo alimwi aluyando ndobayandika.—1Tes. 2:7, 8.

18. Kweelana alugwalo lwa 2 Petro 3:9, ncinzi Leza ncayanda kuli basizibi?

¹⁸ Jehova “tayandi kuti muntu uuli woonse anyonyoonwe, pele uyanda kuti boonse bakonzye kweempwa.” (Amubale 2 Petro 3:9.) Nokuba kuti muntu ulakonzya kucita cibi cipati, buumi bwakwe bulayandika kapati kuli Leza. Amuyeeye kuti Jehova wakabbadela muulo mupati, nkokuti buumi bwa Mwanaakwe uuyandwa, akaambo kaumwi aumwi wesu. Caluyando Jehova ulasoleka kugwasya baabo ibakacileka kumubelekela kupilukila kulinguwe. Ulangila kuti bayoosala kucita boobo, kweelana ambotubona mucikozyanyo ca Jesu camwana mutaka. (Lk. 15:11-32) Banji ibakazwide mukasimpe mukuya kwaciindi bakapilukila kuli Taateesu wakujulu siluyando. Alimwi mbungano yakabatambula amaanza obilo. Ba Elizabeth, ibaambwa kale, bakakkomana ciindi mwanaabo musankwa naakapilusyigwa mumbungano. Balanga musyule baamba kuti, “Ndakabalumba kapati aabo ibakali kutukulwaizya kuzumanana kuba abulangizi.”

19. Nkaambo nzi ncotukonzya kuzumanana kumusyoma Jehova?

¹⁹ Lyoonse tulakonzya kumusyoma Jehova. Kunyina nakonzya kutupa busolozi bukonzya kutuletela mapenzi. Mwaabi alimwi ngu Taata siluzyalo uubayanda kapati boonse aabo bamuyanda alimwi akumukomba. Amusyome kuti Jehova kunyina nayoomulekelezya muziindi zyamapenzi. (Heb. 13:5, 6) Ba Mark ibaambwa kale bakati, “Jehova takonzyi kutulekelezya pe. Unootugwasya lyoonse ciindi notwajana mapenzi.” Jehova uyoozumanana kumupa “nguzu zigambya iziinda zyabantu.” (2Kor. 4:7) Masimpe, mulakonzya kuzumanana kusyomeka alimwi akuba abulangizi nociba ciindi muyandwa wanu naacileka kubelekela Jehova.