1. Ino inga twamuzyiba buti muntu uusyomeka?

 MUNTU uusyomeka ulasolekesya kuzuzikizya zisyomezyo akwaamba masimpe. (Int. 15:4) Bantu balizyi kuti balakonzya kumusyoma muntu ooyu. Tuyanda kuti bakwesu abacizyi andiswe kabatusyoma. Aboobo ncinzi cikonzya kupa kuti kabatusyoma?

2. Mbuti mbotukonzya kutondezya kuti tulasyomeka?

² Tatukonzyi kubasinikizya bamwi kutusyoma. Tweelede kubatondezya kuti tulasyomeka kwiinda muzintu nzyotucita. Kwaambwa kuti, kusyomwa kuli mbuli mali. Mali alakatazya kwaajana; pele ncuuba-uba kwaanyonyoona. Jehova tulamusyoma cakumaninina. Lyoonse tulakonzya kumusyoma nkaambo “ulasyomeka mumilimo yoonse njacita.” (Int. 33:4) Alimwi uyanda kuti andiswe tumwiiye. (Ef. 5:1) Lino atulange-lange cikozyanyo cababelesi ba Jehova basyomeka ibakamwiiya Usyi wabo wakujulu alimwi ambobakatondezya kuti bakali kusyomeka. Kunze lyaboobo, tulalanga-langa bube bosanwe bukonzya kutugwasya kusyomeka.

3-4. Mbuti musinsimi Daniele mbwaakatondezya kuti ulasyomeka, alimwi ino eeci ceelede kutupa kubuzya mibuzyo nzi?

³ Musinsimi Daniele ncikozyanyo cibotu camuntu iwakali kusyomeka. Nokuba kuti wakatolwa mubuzike abana Babuloni, tiilyakalampa wakaba ampuwo yakusyomeka. Mpuwo yakusyomeka yakasakana kapati, kwaambisya ciindi naakagwasyigwa a Jehova ikupandulula ziloto zya Mwami wabana Babuloni Nebukadinezara. Aciindi cimwi, Daniele wakeelede  kwaambila mwami kuti Jehova tanaakali kumukkomanina, imulumbe mwami ngwaatakali kuyanda kumvwa. Daniele wakali kuyandika busicamba kutegwa aambe mulumbe ooyu, nkaambo mwami Nebukadinezara wakali mukali kapati. (Dan. 2:12; 4:20-22, 25) Nikwakainda myaka minji, Daniele wakatondezya kuti wakali kusyomeka ciindi naakapandulula milumbe iiyoosya iyakalibonya abwaanda muŋanda yamwami mu Babuloni. (Dan. 5:5, 25-29) Mpoonya kumbele, Dariyo mu Medi abalupati-pati bakwe abalo bakabona kuti Daniele “wakajisi muuya uugambya.” Bakazyiba kuti Daniele “taakwe kampenda naa bubi buli boonse mbobakajana mulinguwe.” (Dan. 6:3, 4) Inzya, nobaba basololi babukombi bwakubeja abalo bakazyiba kuti ooyu mukombi wa Jehova ulasyomeka.

⁴ Notuzinzibala kuyeeya cikozyanyo ca Daniele, tweelede kulibuzya mibuzyo mbuli yakuti: ‘Nimpuwo iili buti njondijisi kubantu batali Bakamboni ba Jehova? Sena ndizyibidwe kuba muntu uuzuzikizya milimo alimwi uusyomeka?’ Nkaambo nzi mibuzyo eeyi ncoiyandika? Nkaambo ciindi notusyomeka tupa kuti Jehova atembaulwe.

5. Nkaambo nzi Hananiya ncaakazyibidwe kuti muntu uusyomeka?

⁵ Mu 455 B.C.E., Mweendelezi Nehemiya naakamana kuyakulula bwaanda bwa Jerusalemu, wakayandaula baalumi basyomeka ibakali kuyakuulanganya kabotu munzi. Akati kabaalumi mbaakasala Nehemiya, Hananiya silutwe wa Ngazi wakasalwa. Bbaibbele lipandulula Hananiya kuti “wakali mwaalumi  uusyomeka kapati alimwi uuyoowa Leza mwini-mwini kwiinda bamwi banji.” (Neh. 7:2) Kuyoowa Jehova alimwi akutayanda kumupa kuusa, nkokwakali kupa Hananiya kuubeleka cabunkutwe mulimo uuli woonse ngwaakali kupegwa. Bube oobu andiswe bulakonzya kutugwasya kuzumanana kusyomeka mumulimo wa Leza.

6. Mbuti Tukiko mbwaakatondezya kuti mulongwe uusyomeka kumwaapostolo Paulo?

⁶ Amubone cikozyanyo camulongwe wamwaapostolo Paulo iwakali kusyomeka Tukiko. Ciindi Paulo naakaangidwe muŋanda, wakali kusyoma Tukiko, walo ngwaakaamba kuti “mubelesi uusyomeka.” (Ef. 6:21, 22) Paulo wakali kumusyoma, kutali buyo akaambo kakutola magwalo kubakwesu ku Efeso aku Kolose, pele alimwi akuyoobaumbulizya. Tukiko utuyeezya baalumi basyomeka, ibalanganya zintu zyakumuuya mazuba aano.—Kol. 4:7-9.

7. Ncinzi ncomukonzya kwiiya kukusyomeka kwabaalu abakutausi mumbungano yanu?

⁷ Mazuba aano tulalumba kapati kuti baalu abakutausi balasyomeka. Mbuli Daniele, Hananiya, a Tukiko, balaibeleka cabunkutwe milimo yabo. Mucikozyanyo, ciindi notuunka kumuswaangano wamukati kansondo, inga tulizyi kuti kuli bakapegwa zibeela zyoonse zyapulogilamu. Baalu balalumba ciindi bakwesu abacizyi bajisi zibeela zyamuswaangano nobalibambila akuzuzikizya zibeela zyabo. Kunze lyaboobo, notutamba basikwiiya Bbaibbele kumuswaangano wakumamanino aamvwiki, inga tulisinizyide kuti kunooli mwaambi wamakani aabuleya. Tulasyoma kuti mabbuku aakubelesya mubukambausi anooliko. Eelo kaka tulamulumba Jehova akaambo kakutupa bakwesu basyomeka ibatulanganya! Nokuba boobo, muunzila nzi zimwi motukonzya kutondezya kuti tulasyomeka?

8. Mbuti mbotukonzya kutondezya kuti tulababikkila maano bamwi? (Tusimpi 11:13)

⁸ Tulabayanda bakwesu abacizyi, alimwi tulayanda kuzyiba mbobapona. Nokuba boobo, tweelede kucenjela kutanjililila mumakani aatatujatikizyi. Bamwi mumbungano ya Bunakristo mumwaanda wamyaka wakusaanguna bakali “basikuvwiya abasikunjililila twaambo tutabajatikizyi, kabaamba zintu nzyobateelede.” (1Tim. 5:13) Tatuyandi kuba mbuli mbabo pe. Pele atwaambe kuti, muntu umwi watwaambila makani amwi kasinizyide kuti kunyina ngotuyakwaambila. Mucikozyanyo, mucizyi ulakonzya kutwaambila makani amwi aajatikizya penzi lyakuciswa ndyajisi naa sunko limwi ndyalwana, mpoonya akutulomba kuti tutaambili muntu umwi. Tweelede kukulemeka kulombozya kwakwe. * (Amubale Tusimpi 11:13.) Lino atulange-lange bukkale bumbi mwalo mociyandika kubamba maseseke.

9. Mbuti banamukwasyi mbobakonzya kutondezya kuti balasyomeka?

⁹ Mumukwasyi. Munamukwasyi uuli woonse ulijisi mukuli wakubamba maseseke aamuŋanda. Mucikozyanyo, mukaintu Munakristo inga kajisi cilengwa cimwi cimusesya mulumaakwe. Sena mulumaakwe inga watalika kwaambila bamwi akumusampuzya? Peepe. Ulamuyanda mukaintu wakwe, alimwi inga taciti cintu cili coonse cikonzya kumucisa. (Ef. 5:33) Bakubusi balayanda kulemekwa abazyali babo. Bazyali beelede kwaayeeya makani aaya. Bazyali tabeelede kubasampuzya  bana babo kwiinda mukwaambila bamwi zintu nzyobalubizya bana. (Kol. 3:21) Bana beelede kwiiya kuba bapampu akutaambila bamwi makani aakonzya kusampuzya banamukwasyi bamwi. (Dt. 5:16) Ciindi munamukwasyi uuli woonse nabeleka canguzu kubamba maseseke aamukwasyi, cilongwe mumukwasyi cilayuma.

10. Ncinzi cijatikizyidwe mukuba mulongwe mwini-mwini? (Tusimpi 17:17)

¹⁰ Mucilongwe. Toonse buyo, kuli ziindi notulimvwa kuti tweelede kwaambila mulongwe wesu bwini mbotulimvwa. Zimwi ziindi eeci cilakonzya kukatazya. Ambweni tatuzyibide kwaambila muntu umwi zili mumoyo wesu, akuti tulakonzya kutyompwa kuti twamvwa kuti mulongwe wesu wakaambila muntu umwi nzyotwakamwaambila. Nokuba boobo, tulalumba kapati kuba amulongwe ngotukonzya kwaambila mbotulimvwa, uukonzya kubamba maseseke. Ooyu, “mulongwe mwini-mwini.”—Amubale Tusimpi 17:17.

11. (a) Mbuti baalu abamakaintu babo mbobatondezya kuti balasyomeka? (b) Nciiyo nzi ncotukonzya kwiiya kumwaalu iwalikulanganya makani aamaseseke, mpoonya lino uuli antoomwe amukwasyi wakwe? (Amubone cifwanikiso.)

¹¹ Mumbungano. Baalu ibabamba maseseke ‘mbusena bwakutijila muwo, busena bwakuyusila’ bwabakwesu abacizyi. (Is. 32:2) Tulakonzya kubaambila baalu cintu cili coonse katusinizyide kuti makani balaabamba kaali aamaseseke. Andiswe tatubasinikizyi kutwaambila makani aamaseseke ngobazyi. Kuyungizya waawo, tulabalumba bamakaintu babaalu akaambo kakuti tababoongelezyi balumi babo kuti kababaambila makani aamaseseke aajatikizya bantu bambi. Masimpe, ncilongezyo kuti mukaintu wamwaalu kataambilwi makani aamaseseke aajatikizya bakwesu abacizyi. Mukaintu wamwaalu umwi wakaamba kuti: “Ndilalumba kuti balumi bangu tabandaambili makani aamaseseke aajatikizya bantu mbobaswaya munyendo zyabweembezi, naa aabo ibayandika lugwasyo  lwakumuuya alimwi tabandaambili mazina aabo. Ndilalumba kuti balumi bangu tabandiminyi amakani aatandijatikizyi. Eeci cindipa kulikwaya kuyanzana abakwesu abacizyi boonse mumbungano. Alimwi ndilakonzya kubasyoma balumi bangu ciindi nindabaambila makani aamaseseke naa mapenzi aangu, kayi balaabamba kaali maseseke.” Masimpe kuti, toonse tulayanda kuba ampuwo yakusyomeka. Aboobo, mbube nzi bukonzya kutugwasya kucita boobo? Atubandike bube bosanwe.

12. Nkaambo nzi luyando ncoili ntalisyo yakusyomeka?

¹² Luyando nentalisyo yakusyomeka. Jesu wakaamba kuti milawo mipati yobilo nkuyanda Jehova asimukoboma. (Mt. 22:37-39) Kuyanda Jehova kweelede kutukulwaizya kwiiya cikozyanyo cakwe cakusyomeka, cilondokede. Mucikozyanyo, kuyanda bakwesu abacizyi kweelede kutukulwaizya kubamba maseseke aabo. Tatuyandi kuyubununa makani aakonzya kubacisizya moyo naa kubajazya nsoni.—Joh. 15:12.

13. Muunzila nzi kulicesya mokutugwasya kusyomeka?

¹³ Kulicesya kuyootugwasya kusyomeka. Munakristo uulicesya tayandi kukkomanisya bamwi kwiinda mukuyanda kuba wakusaanguna kubaambila makani amwi. (Flp. 2:3) Kunyina nalitondezya kuti ulayandika kapati akuti kuli makani ngazyi alo ngatazumizyidwe kuyubununa. Kulicesya kuyootugwasya kutamwaya makani aakuyeeyela buyo, alo aataambidwe mu Bbaibbele naa mumabbuku aamba zyamu Bbaibbele.

14. Mbuti bupampu mbobutugwasya kusyomeka?

¹⁴ Bupampu bulakonzya kumugwasya Munakristo kuzyiba “ciindi cakuumuna aciindi cakwaambaula.” (Muk. 3:7) Mumasena amwi kuli kaambyo kakuti: “Kuumuna nkubotu, muciindi cakwiile kubbwa-bbwa buyo.” Munzila imwi, zimwi ziindi kuumuna nkubotu kwiinda kwaambaula. Nkakaambo kaako Tusimpi 11:12 itulaya kuti: “Muntu musongo ncobeni uumuna buyo.” Amubone cikozyanyo. Mwaalu umwi uusimide kumuuya kanji-kanji balamulomba kutegwa agwasyilizye mbungano zimwi izili mumapenzi. Amubone ncaakaamba mwaalunyina, “Ooyu mwaalu kunyina naamba makani aamaseseke kujatikizya mbungano zimbi.” Bupampu mbwajisi bupa kuti baalu bamumbungano mwazulilwa kabamulemeka. Kayi bali masimpe kuti takonzyi kwaambila bamwi makani aamaseseke aajatikizya mbabo.

15. Amupe cikozyanyo citondezya muntu uusyomeka mbwakonzya kupa kuti bamwi kabamusyoma.

¹⁵ Kusyomeka mbube bumbi mbotuyandika kutegwa katusyomwa. Tulamusyoma muntu uusyomeka akaambo kakuti tulizyi kuti lyoonse inga waamba masimpe. (Ef. 4:25; Heb. 13:18) Mucikozyanyo, atwaambe kuti muyanda kusumpuka munzila mbomuyiisya. Mulakonzya kulomba muntu umwi kuti amuswiilile nomupa makani kutegwa amupe mizeezo iigwasya. Nguni ngomukonzya kulomba kuti amwaambile masimpe? Sena ngooyo uumwaambila makani ngomuyanda kumvwa naa uumwaambila masimpe? Bwiinguzi bulisalede. Kayi, Bbaibbele lyaamba kuti: “Kusinswa cakaanzambwene nkubotu kwiinda luyando lusisidwe. Zilonda zyakuumwa amweenzinyoko zilasyomeka.” (Tus. 27:5, 6) Nokuba kuti kumatalikilo alakatazya kwaatambula, majwi aamulongwe uusyomeka ayootugwasya kumbele aamazuba.

16. Mbuti majwi aali ku Tusimpi 10:19 mbwaatondezya mbociyandika kuba abube bwakulilesya?

¹⁶ Kulilesya kulayandika kapati kutegwa bamwi kabatusyoma. Bube oobu bulatugwasya  kuumuna ciindi notwasunkwa kwaamba makani aamaseseke. (Amubale Tusimpi 10:19.) Cilakonzya kutukatazya kulilesya ciindi notubelesya intaneti. Kuti naa tiitwacenjela, tulakonzya kumwaya makani aamaseseke kubuleya katutalimvwide. Alimwi kuti naa twaamwaya kale makani amwi aintaneti, kunyina ncotukonzya kucita kujatikizya mbwayoobelesyegwa naa mbwaakonzya kunyonganya munzila imwi. Kulilesya kuyootugwasya kuumuna ciindi basikutukazya baakutusinikizya kuyubununa makani aakonzya kubikka bakwesu abacizyi muntenda. Eeci cilakonzya kucitika ciindi notubuzyigwa-buzyigwa abakapokola mucisi oomo mulimo wesu moukasyidwe. Mubukkale buli boobu abumwi buyo, tulakonzya kubelesya njiisyo ‘yakulyaanga kazangala kuti tusinke mulomo wesu.’ (Int. 39:1) Cintu cili coonse ncotucita abanamukwasyi, abalongwe, bakwesu abacizyi, naa amuntu uuli woonse, tweelede kusyomeka. Alimwi kutegwa katusyomeka, tweelede kulilesya.

17. Mbuti mbotukonzya kutondezya kuti tulasyomeka?

¹⁷ Eelo kaka tulamulumba Jehova akaambo kakutukwelela kubakwesu abacizyi ibajisi luyando alimwi basyomeka! Tulijisi mukuli wakupa kuti bakwesu abacizyi kabatusyoma. Ciindi toonse notutondezya luyando, kulicesya, bupampu, kusyomeka akulilesya, tupa kuti kakuli muuya wakusyomana mumbungano. Kuyandika kuzumanana kubeleka canguzu kutegwa tube abube bwakusyomeka. Atumwiiye Leza wesu Jehova, akuzumanana kutondezya kuti tulasyomeka.