CIBALO CAKWIIYA 40
“Ibapa Bantu Banji Kululama”
“Aabo ibapa bantu banji kululama, bayoomweka mbuli nyenyeezi, lyoonse alyoonse mane kukabe kutamani.”—DAN. 12:3.
LWIIMBO 151 Leza Uyakwiita
IZILI MUCIBALO *
1. Nzintu nzi zikkomanisya nzyotulangila lya Bulelo bwa Myaka Iili 1,000?
EELO kaka bunooli buzuba bukkomanisya citaambiki ciindi bubuke bwaakutalika aano anyika lya Bulelo bwa Kristo bwa Myaka Iili 1,000! Boonse bakafwidwa bayandwa babo baliyandide kubabona alimwi. Awalo Jehova mbwalimvwa oobo. (Job. 14:15) Amweezyeezye buyo bantu boonse mbobayookkomana anyika ciindi bayandwa babo baakubusyigwa. Mbubwenya mbotwakaiya mucibalo cakusaanguna, “baluleme,” aabo ibali aamazina aalembedwe mubbuku lyabuumi, ‘bayoobusyilwa kubuumi.’ (Mil. 24:15; Joh. 5:29) Ambweni bunji bwabayandwa besu banooli akati kabaabo bayoosaanguna kubusyigwa mububuke bwaanyika. * Kuyungizya waawo, “bataluleme,” nkokuti aabo ibatakajisi coolwe cakumuzyiba Jehova naa kumubelekela cakusyomeka kabatanafwa, bayoobusyilwa “kububuke bwalubeta.”
2-3. (a) Kweelana a Isaya 11:9, 10, mulimo nzi mupati kapati uyoocitwa? (b) Ncinzi ncotutiilange-lange mucibalo eeci?
2 Boonse aabo ibayoobusyigwa bayooyandika kuyiisyigwa. (Is. 26:9; 61:11) Aboobo kuyoocitwa mulimo mupati kapati uutanacitidwe mubuumi bwabantu. (Amubale Isaya 11:9, 10.) Nkaambo nzi? Nkaambo bataluleme ibayoobusyigwa bayooyandika kwiiya kujatikizya Jesu Kristo, bubambe bwa Bwami, cinunuzyo, alimwi amakani aajatikizya zina lya Jehova abweendelezi bwakwe. Abalo baluleme bayooyandika kwiiya zintu Jehova nzyaali kuyubunwida bantu bakwe asyoonto-syoonto, izyaamba makanze aakwe kujatikizya nyika. Babelesi bakwe basyomeka aaba bamwi bakafwa kaindi mabbuku aamu Bbaibbele kaatanamana kubikkwa antoomwe. Boonse bataluleme abaluleme banoojisi zintu zinji zyakwiiya.
3 Mucibalo eeci, tulalanga-langa mibuzyo eeyi: Mbuti mulimo wakuyiisya ooyu mupati kapati mbouyoocitwa? Ino mulimo ooyu uyoobajatikizya buti bantu, tacikwe makani naa mazina aabo alilembedwe kale mubbuku lyabuumi naa pe? Bwiinguzi kumibuzyo eeyi bulayandika kapati kulindiswe mazuba aano. Mbubwenya mbotutiibone, businsimi bumwi buyandika kapati ibulembedwe kubbuku lya Daniele a Ciyubunuzyo, bulatugwasya kusalazya kumvwisya kwesu kujatikizya ciyoocitika ciindi bafwide baakubusyigwa. Cakusaanguna, atulange-lange zintu zikkomanisya izyakaambwa mubusinsimi ibuli kubbuku lya Daniele 12:1, 2.
‘AABO BALEDE MUBULONGO BAYOOBUKA’
4-5. Ino bbuku lya Daniele 12:1 lyaamba nzi kujatikizya ciindi camamanino?
4 Amubale Daniele 12:1. Bbuku lya Daniele lyaamba mulongo wazintu zikkomanisya iziyoocitika muciindi camamanino. Mucikozyanyo, Daniele 12:1 yaamba Mikayeli, nkokuti Jesu Kristo, kuti ‘uliimvwi kutegwa agwasye bantu ba Leza.’ Cibeela cabusinsimi oobu cakatalika kuzuzikizyigwa mu 1914, ciindi Jesu naakabikkwa kuba Mwami wa Bwami bwa Leza bwakujulu.
5 Nokuba boobo, Daniele awalo wakaambilwa kuti Jesu “uyakwiimikila” “ciindi camapenzi aayo aatanacitikide kuzwa ciindi nokwakaba cisi mane kusikila kuciindi eeco.” “Ciindi camapenzi aayo” caamba “mapenzi mapati” aambidwe ku Matayo 24:21. Jesu uyakwiimikila, naa kubweza ntaamu kukwabilila bantu ba Leza kumamanino aamapenzi aayo, nkokuti, lya Amagedoni. Bbuku lya Ciyubunuzyo lyaamba bantu aaba kuti ‘ninkamu mpati iyazwa mumapenzi mapati.’—Ciy. 7:9, 14.
6. Ncinzi ciyoocitika ciindi nkamu mpati yaakufwutuka mapenzi mapati? Amupandulule. (Amubone acibalo cakuti “Mibuzyo Yabasikubala” kujatikizya bubuke bwabuumi bwaanyika.)
6 Amubale Daniele 12:2. Ncinzi ciyoocitika ciindi nkamu mpati yaakufwutuka lyamapenzi aaya? Businsimi oobu tabwaambi bubuke bwacikozyanyo, nkokuti kubukulusyigwa kumuuya kwababelesi ba Leza ikucitika mumazuba aamamanino, kweelana ambotwakali kumvwisya. * Muciindi caboobo, majwi aaya aamba bubuke bwabafwu ibuyoocitika munyika mpya iboola. Nkaambo nzi ncotwaambila boobo? Bbala lyakuti ‘bulongo’ lilaambidwe akuli Jobu 17:16 alimwi lilikozyenye abbala lyakuti “Cuumbwe.” Kaambo aaka katondezya kuti Daniele 12:2 yaamba bubuke bwacigaminina ibuyoocitwa aakwiinda mazuba aamamanino alimwi ayaakwiinda nkondo ya Amagedoni.
7. (a) Mbuti bamwi mbobayoobusyilwa “kubuumi butamani”? (b) Nkaambo nzi oobu ncobunooli “bubuke bwiinda kubota”?
7 Ino lugwalo lwa Daniele 12:2 lupandulula nzi ciindi nolwaamba kuti bamwi bayoobusyilwa “kubuumi butamani”? Lwaamba kuti aabo bayoobusyigwa akumuzyiba naa kuzumanana kumuzyiba, alimwi akumumvwida Jehova a Jesu lyamyaka iili 1,000, bayoopegwa buumi butamani. (Joh. 17:3) Oobu bunooli “bubuke bwiinda kubota” kwiinda boobo bwakacitika kaindi. (Heb. 11:35) Nkaambo nzi? Akaambo kakuti bantu aabo ibatakalondokede bakafwa alimwi.
8. Mbuti bamwi mbobayoobusyilwa “kukusampaulwa akukusesemwa mane kukabe kutamani”?
8 Akati kabaabo bayoobusyigwa, bamwi bayookaka kuyiisyigwa a Jehova. Businsimi bwa Daniele bwaamba kuti bambi bayoobusyilwa “kukusampaulwa akukusesemwa mane kukabe kutamani.” Akaambo kakuti bayootondezya muuya wabuzangi, mazina aabo taakalembwi pe mubbuku lyabuumi alimwi tabakapegwi coolwe cakupona kukabe kutamani. Muciindi caboobo, ‘bayoosesemwa mane kukabe kutamani,’ naa kunyonyoonwa. Aboobo lugwalo lwa Daniele 12:2 lwaamba iciyoocitika kuli baabo boonse bayoobusyigwa kweelana ambobayoocita bwaakwiinda bubuke bwabo. * (Ciy. 20:12) Bamwi bayoopegwa buumi butamani; bamwi taaku.
“KUPA BANTU BANJI KULULAMA”
9-10. Ncinzi cimbi ciyoocitika aakwiinda mapenzi mapati, alimwi ino mbaani “bayoomweka mbuli kumweka kwajulu”?
9 Amubale Daniele 12:3. Ncinzi cimbi iciyoocitika caakwiinda “ciindi camapenzi”? Kuyungizya alugwalo lwa Daniele 12:2, kapango 3 kaamba cintu cimwi iciyoocitika aakwiinda mapenzi mapati.
10 Ino mbaani “bayoomweka mbuli kumweka kwajulu”? Majwi aa Jesu aali ku Matayo 13:43 alatugwasya kujana bwiinguzi: “Kuciindi eeco balulami bayoobala mbubonya mbuli zuba mu Bwami bwa Usyi.” Kwiinda mumajwi aaya, Jesu wakali kwaamba kujatikizya ‘bana ba Bwami,’ nkokuti banabokwabo bananike, mbayakulela limwi mu Bwami bwakujulu. (Mt. 13:38) Aboobo lugwalo lwa Daniele 12:3, kweelede kuti lwaamba bananike alimwi amulimo ngobayoocita lya Bulelo bwa Myaka Iili 1,000.
Iba 144,000 bayoobeleka calukamantano a Jesu Kristo kusololela mulimo wakuyiisya uyoocitwa mumyaka Iili 1,000 (Amubone muncali 11)
11-12. Mulimo nzi iba 144,000 ngobayoocita lyamyaka iili 1,000?
11 Mbuti bananike mbobayoopa “bantu banji kululama”? Bayoobeleka calukamantano a Jesu Kristo kusololela mulimo wakuyiisya uyoocitwa aano anyika lyamyaka iili 1,000. Iba 144,000 bayoolela kabali bami alimwi bayooba bapaizi. (Ciy. 1:6; 5:10; 20:6) Aboobo bananike bayoogwasyilizya “mukuponya masi,” nkokuti kugwasya bantu kuyaabulondoka asyoonto-syoonto. (Ciy. 22:1, 2; Ezk. 47:12) Eelo kaka eeci ciyoobakkomanisya bananike!
12 Ino mbaani ibanooli akati ‘kabantu banji’ bayoolulama? Aaba bayoobikkilizya baabo ibayoobusyigwa alimwi abaabo bayoofwutuka lya Amagedoni antoomwe abana bali boonse ibayoozyalwa munyika mpya. Kumamanino aamyaka iili 1,000, bantu boonse ibanoopona anyika banoolondokede. Aboobo ndilili mazina aabo naayoolembwa ainki ikutali apenso mubbuku lyabuumi?
MUSUNKO WAMAMANINO
13-14. Ncinzi bantu boonse banoolondokede anyika ncobayooyandika kutondezya kabatanapegwa buumi butamani?
13 Tweelede kuyeeya kuti kulondoka kulikke takukonzyi kupa muntu kujana buumi butamani. Amuyeeye ba Adamu a Eva. Bakalilondokede, pele bakeelede kutondezya kuti balamumvwida Jehova Leza kabatanapegwa buumi butamani. Pele cuusisya ncakuti, bakaalilwa kumumvwida.—Rom. 5:12.
14 Ino ciyooba buti kuli baabo ibanooli anyika kusikila kumamanino aamyaka iili 1,000? Boonse banoolondokede. Pele sena boonse bayoobugwasyilizya bweendelezi bwa Jehova cakumaninina mane kukabe kutamani? Sena bamwi bayooba mbuli ba Adamu a Eva, balo nokuba kuti bakalilondokede, bakaleka kusyomeka? Mibuzyo eeyi iyandika bwiinguzi, pele mubuti?
15-16. (a) Ndilili bantu boonse nobayoopegwa coolwe cakutondezya kuti balasyomeka kuli Jehova? (b) Ino ncinzi ciyoocitika waakwiinda musunko ooyo?
15 Saatani uyakwaangwa myaka iili 1,000. Aciindi eeco, takacikonzyi kweena muntu uuli woonse. Pele kumamanino aamyaka iili 1,000, Saatani uyakwaangununwa. Mpoonya uyoosola kweena bantu balondokede. Lyamusunko ooyo, bantu boonse anyika banoojisi coolwe cakutondezya caantangalala kulubazu nkobanoobede mumakani aajatikizya zina lya Leza abweendelezi bwakwe. (Ciy. 20:7-10) Ncobayoocita aciindi eeco, ciyootondezya naa mazina aabo aleelede kulembwa mubbuku lyabuumi mane kukabe kutamani.
16 Bbaibbele lyaamba kuti bantu bamwi bayooleka kusyomeka mbubwenya mbuli Adamu a Eva, alimwi bayoobukaka bweendelezi bwa Jehova. Ino ncinzi ciyoobacitikila? Mubbuku lya Ciyubunuzyo 20:15 tubala kuti: “Kufwumbwa ooyo watakajanwa kalembedwe mubbuku lyabuumi wakawaalwa muzyiba lyamulilo.” Inzya, bazangi aabo bayoonyonyoonwa mane kukabe kutamani. Pele bunji bwabantu balondokede bayoozwidilila mumusunko wamamanino. Mpoonya mazina aabo ayoolembwa mubbuku lyabuumi mane kukabe kutamani.
“CIINDI CAKUMAMANINO”
17. Ncinzi mungelo ncaakaambila Daniele kuti ciyoocitika muciindi cesu? (Daniele 12:4, 8-10)
17 Eelo kaka cilakkomanisya kuyeeya zintu eezyi iziyoocitika kumbele! Nokuba boobo, mungelo alimwi wakaambila Daniele makani aamwi aayandika kapati kujatikizya ciindi cesu, nkokuti “ciindi camamanino.” (Amubale Daniele 12:4, 8-10; 2Tim. 3:1-5) Mungelo wakaambila Daniele kuti: “Luzyibo lwini-lwini luyoovwula kapati.” Inzya, bantu ba Leza bayakwaamvwisya majwi aabusinsimi aali mubbuku lyakwe. Mungelo wakayungizya kuti aciindi eeci, “aabo babi bayoocita bubi, alimwi kunyina muntu mubi naba omwe uuyoomvwisya.”
18. Ncinzi ciyoobacitikila bantu babi ino-ino?
18 Mazuba aano cilakonzya kulibonya kuti babi tabasubulwi akaambo kazintu zibyaabi nzyobacita. (Malk. 3:14, 15) Pele lino-lino, Jesu uyoobabeteka bantu ibali mbuli mpongo alimwi uyoobaandaanya kuli baabo ibali mbuli mbelele. (Mt. 25:31-33) Bantu babi aaba tabakafwutuki lyamapenzi mapati, alimwi tabakabusyigwi kuti bapone munyika mpya. Mazina aabo taanooliko ‘mubbuku lyakwiibalusya’ ilyaambidwe kuli Malaki 3:16.
19. Ino ncinzi ncotweelede kucita lino, alimwi nkaambo nzi? (Malaki 3:16-18)
19 Ecino nceciindi cakutondezya kwiinda mumilimo yesu kuti tatuli kulubazu lwabantu babi. (Amubale Malaki 3:16-18.) Jehova ulimukubunganya baabo mbabona kuti ‘ndubono luyandisi,’ nkokuti aabo bayandika kapati kulinguwe. Masimpe tulayanda kuba akati kabo.
Eelo kaka ciyookkomanisya kubona Daniele, bayandwa besu alimwi abamwi banji ‘ibayakwiimikila’ kuti bakapegwe caabilo cabo munyika mpya! (Amubone muncali 20)
20. Ncisyomezyo nzi camamanino ncaakapegwa Daniele, alimwi nkaambo nzi ncomulangila kuzuzikizyigwa kwacisyomezyo eeco?
20 Mubwini, tupona muziindi zikkomanisya. Pele kuli zintu zikkomanisya kapati izili afwaafwi kucitika. Lino-lino tuyoobona kunyonyoonwa kwabasizibi boonse. Kuzwa waawo, tuyoobona kuzuzikizyigwa kwacisyomezyo ca Jehova kuli Daniele cakuti: “Uyakwiimikila kutegwa ukabweze caabilo cako kumamanino aamazuba.” (Dan. 12:13) Sena mulabulangila buzuba oobo ciindi Daniele, antoomwe abayandwa banu, ‘nobayakwiimikila’ alimwi? Ikuti kacili boobo, amusolekesye kusyomeka lino, mpoonya mulakonzya kuba masimpe kuti zina lyanu liyoozumanana kalilembedwe mubbuku lyabuumi lya Jehova.
LWIIMBO 80 “Amulabile Mubone Kuti Jehova Mubotu”
^ Mucibalo eeci, tulabandika kucinca mukumvwisya kwesu kujatikizya mulimo mupati kapati wakuyiisya uyoocitwa, iwaambidwe kubbuku lya Daniele 12:2, 3. Mpoonya tulalanga-langa ciindi mulimo ooyu nouyakucitwa alimwi abayootola lubazu. Kuyungizya waawo, tulabona mulimo ooyu mbouyoobagwasya aabo ibanooli anyika kulibambila musunko wamamanino, kumamanino aa Bulelo bwa Kristo bwa Myaka lili 1,000.
^ Ambweni ibayoosaanguna kubusyigwa mbaabo ibakafwa kabasyomeka mumazuba aamamanino, mpoonya nokuyootobela baabo ibakafwa musyule, nkokuti mumazyalani azyalani. Ikuti naa oobu mbociyooba, nkokuti bamuzyalani limwi alimwi bayooba acoolwe cakutambula baabo mbobakazyi. Kufwumbwa mbociyooba, Magwalo alaamba ‘ciindi ceelede’ kujatikizya bubuke bwakujulu, aboobo tulakonzya kuyeeyela kuti abwalo bubuke bwaanyika buyoocitwa munzila iili kabotu.—1Kor. 14:33; 15:23.
^ Bupanduluzi oobu nkucinca mukumvwisya kwesu kujanika mubbuku lyakuti Amububikkile Maanu Businsimi bwa Daniele! cibalo 17, alimwi a Ngazi Yamulindizi yamu Chikuwa yamu July 1, 1987, peeji 21-25.
^ Mukwiimpana, mabala aakuti “baluleme” “abataluleme” aajanika ku Milimo 24:15, alimwi amabala aakuti “aabo ibakacita zintu zibotu” ‘abaabo ibakacita zintu zibyaabi,’ aajanika ku Johane 5:29 aamba buumi mbobakali kupona aabo ibayoobusyigwa.
