1. Kweelana a Malaki 3:16, ino Jehova walikulemba bbuku nzi, alimwi lijisi nzi?

 KWAMYAKA minji, Jehova walikulemba bbuku lilibedelede. Bbuku eeli lijisi mulongo wamazina, kutalikila ali Abelo kamboni wakusaanguna iwakali kusyomeka. * (Lk. 11:50, 51) Kuzwa ciindi eeco, Jehova wayungizya mazina aambi mubbuku eeli, aboobo mazuba aano kuli mamiliyoni aamazina mulindilyo. Mu Bbaibbele, bbuku eeli liitwa kuti “bbuku lyakwiibalusya” naa “bbuku lyabuumi.” Mucibalo eeci, tunoolyaamba kuti “bbuku lyabuumi.”—Amubale Malaki 3:16; Ciy. 3:5; 17:8.

2. Mazina aabani aalembedwe mubbuku lyabuumi alimwi ncinzi ncotukonzya kucita kutegwa mazina eesu abikkilizyigwe mubbuku eeli?

² Bbuku eeli lilibedelede lijisi mazina abaabo boonse ibamukomba Jehova akumulemeka kapati alimwi ibaliyandisya zina lyakwe. Balijisi bulangizi bwakuyootambula buumi butamani. Mazuba aano, zina lyesu lilakonzya kulembwa mubbuku eeli ikuti twaba acilongwe ciyumu a Jehova iciyeeme acipaizyo cacinunuzyo ca Mwanaakwe, Jesu Kristo. (Joh. 3:16, 36) Toonse tuyanda kuti mazina eesu akajanike mubbuku eeli, tacikwe makani naa tujisi bulangizi bwakuyoopona kujulu naa anyika.

3-4. (a) Sena tuyoopona kukabe kutamani ikuti naa zina lyesu kalilembedwe aciindi ecino mubbuku lyabuumi? Amupandulule. (b) Ncinzi ncotutiibandike mucibalo eeci alimwi acitobela?

³ Sena eeci caamba kuti boonse ibalembedwe mubbuku eeli, olo cibe buti, bayooba abuumi butamani? Bwiinguzi kumubuzyo ooyu tulabujana kumajwi Jehova ngaakaambila Musa mubbuku  lya Kulonga 32:33. Jehova wakati: “Kufwumbwa ooyo wandibisizya, ngonguwe ngonditiimwaye mubbuku lyangu.” Aboobo mazina aaliko aciindi ecino mubbuku eeli alakonzya kumwaigwa. Eeci cili mbuli kuti kumatalikilo Jehova wakaalemba kubelesya penso. (Ciy. 3:5) Tweelede kuba masimpe kuti zina lyesu nkolili mubbuku eeli kusikila likalembwe muinki, munzila yacikozyanyo.

⁴ Pele tulakonzya kuba amibuzyo. Mucikozyanyo, ino Bbaibbele lyaamba nzi kujatikizya mazina aayo aalembedwe mubbuku lyabuumi alimwi ayaayo aatalembedwe? Ndilili bantu balembedwe mubbuku eeli nobayootambula buumi butamani? Ino mbuti kujatikizya baabo ibakafwa kakunyina kuba acoolwe cakumuzyiba Jehova? Sena cilakonzyeka kuti mazina aabo alakonzya kulembwa mubbuku eeli? Mibuzyo eeyi ilaingulwa mucibalo eeci alimwi acitobela.

MAZINA AABANI AALEMBEDWE MUBBUKU?

5-6. (a) Kweelana a Bafilipi 4:3, mazina aabani aalembedwe mubbuku lyabuumi? (b) Ndilili mazina aabo naayoolembwa kukabe kutamani mubbuku lyabuumi?

⁵ Mazina aabani aalembedwe mubbuku eeli lyacikozyanyo? Kutegwa twiingule mubuzyo ooyu, tulalanga-langa nkamu zyabantu zyosanwe ziindene-indene. Akati kabaaba, ibamwi mazina aabo alilembedwe mubbuku lyabuumi, pele bambi taalembedwe pe.

⁶ Nkamu yakusaanguna ibikkilizya baabo ibakasalwa kuyoolela a Jesu kujulu. Sena mazina aabo nkwaali aciindi ecino mubbuku lyabuumi? Inzya. Kweelana amajwi amwaapostolo Paulo kuli ‘basimilimonyina’ ku Filipi, mazina aabananike, ibakatambwa kuyoolela a Jesu, nkwaali lino mubbuku lyabuumi. (Amubale Bafilipi 4:3.) Pele kutegwa mazina aabo kaaliko mubbuku lyacikozyanyo, beelede  kuzumanana kusyomeka. Mpoonya baakubikkwa ciganto camamanino, kufwumbwa naa ndileelyo kabatafwa naa kaatanatalika mapenzi mapati, mazina aabo anoolembedwe kukabe kutamani mubbuku eeli.—Ciy. 7:3.

7. Kweelana a Ciyubunuzyo 7:16, 17, ino ndiilili bankamu mpati yambelele zimbi nobayoolembwa mazina kukabe kutamani mubbuku lyabuumi?

⁷ Nkamu yabili ijatikizya nkamu mpati yambelele zimbi. Sena mazina aabo lino alilembedwe mubbuku lyabuumi? Inzya. Sena mazina aabo anooliko mubbuku lyabuumi baakufwutuka lya Amagedoni? Inzya. (Ciy. 7:14) Jesu wakaamba kuti bantu aaba ibali mbuli mbelele “bayootambula buumi butamani.” (Mt. 25:46) Pele basikufwutuka lya Amagedoni aaba tabakatambuli buumi butamani mpoonya-mpoonya. Mazina aabo ayoozumanana kaalembedwe mubbuku lyabuumi kubelesya penso, munzila yamaambila mbali. Lya Bulelo bwa Myaka Iili 1,000, Jesu “uyoobeembela alimwi uyoobasololela kutusensa twamaanzi aabuumi.” Aabo ibayoomvwida akutobela busolozi bwa Kristo alimwi akujanika kuti balasyomeka kuli Jehova, mazina aabo ayoolembwa kukabe kutamani mubbuku lyabuumi.—Amubale Ciyubunuzyo 7:16, 17.

8. Mbaani ibatalembedwe mazina mubbuku lyabuumi, alimwi ncinzi ciyoobacitikila?

⁸ Nkamu yatatu ibikkilizya mpongo, aabo ibayoonyonyoonwa lya Amagedoni. Mazina aabo taako mubbuku lyabuumi. Jesu wakaamba kuti “bayoonyonyoonwa kukabe kutamani.” (Mt. 25:46) Kwiinda mukusololelwa amuuya, Paulo utwaambila kuti “aaba mbambabo ibayoopegwa cisubulo calubeta lwakunyonyweedwa limwi kukabe kutamani.” (2Tes. 1:9; 2Pet. 2:9) Ncimwi buyo abaabo boonse kusikila sunu, ibali kubisizya muuya uusalala acaali. Abalo bayoonyonyoonwa kukabe kutamani, nkokuti tabakabi abuumi butamani. Cilisalede kuti, tabakabusyigwi pe. (Mt. 12:32; Mk. 3:28, 29; Heb. 6:4-6) Lino atulange-lange nkamu zyobilo zyabaabo ibayoobusyigwa anyika.

AABO IBAYOOBUSYIGWA

9. Kweelana a Milimo 24:15, ninkamu nzi zyobilo iziyoobusyigwa anyika alimwi nkwiindana nzi kuliko akati kankamu eezyi?

⁹ Bbaibbele lyaamba nkamu zyobilo zyabantu ibayoobusyigwa kabajisi bulangizi bwakupona kukabe kutamani anyika, nkokuti “baluleme” alimwi “abataluleme.” (Amubale Milimo 24:15.) “Baluleme” mbabaabo ibakamubelekela Jehova cakusyomeka nobakacili kupona. Mpoonya “bataluleme” tiibakamubelekela Jehova cakusyomeka. Alimwi buya, kanji-kanji bukkale bwabo tiibwakaluleme. Mbwaanga nkamu zyobilo eezyi ziyoobusyigwa, sena inga twaamba kuti mazina aabo alilembedwe mubbuku lyabuumi? Kutegwa twiingule mubuzyo ooyu, atulange-lange nkamu imwi aimwi.

10. Ncinzi ciyoopa kuti “baluleme” babusyigwe, alimwi ncoolwe nzi bamwi babo ncobanoojisi? (Amubone mu Ngazi Yamulindizi eeyi “Mibuzyo Yabasikubala” kujatikizya bubuke anyika.)

¹⁰ Nkamu yane ijatikizya “baluleme.” Kabatanafwa, mazina aabo akalembwa mubbuku lyabuumi. Sena mazina aabo akagwisyigwa mubbuku ciindi nobakafwa? Peepe, nkaambo bacili “baumi” mumizeezo ya Jehova. Jehova “tali Leza wabafwu, pele ngwabaumi, nkaambo boonse mbaumi kulinguwe.” (Lk. 20:38) Eeci caamba kuti ciindi baluleme baakubusyigwa anyika, mazina aabo ayoojanika alilembedwe mubbuku lyabuumi, nokuba kuti kumatalikilo anoolembedwe “apenso.” (Lk. 14:14) Cakutadooneka, bamwi akati kabantu aaba ibayoobusyigwa bayoopegwa coolwe cakubeleka kabali “basilutwe munyika yoonse.”—Int. 45:16.

11. Ncinzi “bataluleme” ncobayooyandika kwiiya mazina aabo kaatanalembwa mubbuku lyabuumi?

 ¹¹ Camamanino, atulange-lange nkamu yasanu, “bataluleme.” Ambweni akaambo kakuti tiibakazizyi zyeelelo zya Jehova, tiibakapona buumi bululeme kabatanafwa. Aboobo mazina aabo tanaakalembwa mubbuku lyabuumi. Pele kwiinda mukubabusya, Leza uyoobapa coolwe cakuti mazina aabo akalembwe mubbuku eeli. Bantu aaba “bataluleme” bayooyandika lugwasyo lunji kapati. Mubuumi bwabo bwakaindi, ibamwi bakali kucita zintu zibyaabi kapati. Aboobo bayooyandika kuyiisyigwa mbokuponwa kweelana zyeelelo zya Jehova ziluleme. Kutegwa bayiisyigwe kucita boobo, Bwami bwa Leza buyoosololela mumulimo mupati wakuyiisya uutanabwenwe mubukkale bwabantu boonse.

12. (a) Ino mbaani bayakuyiisya bataluleme? (b) Ncinzi ciyoobacitikila aabo ibayookaka kutobela nzyobayooyiisyigwa?

¹² Ino mbaani bayakuyiisya bataluleme? Ninkamu mpati alimwi abantu baluleme ibayoobusyigwa. Kutegwa mazina aabataluleme akalembwe mubbuku lyabuumi, bayooyandika kuba acilongwe a Jehova akulyaaba kulinguwe. Jesu Kristo alimwi ababetesinyina bayoobikkila maano kapati kubona mbobayaambele bantu aaba boonse ibataluleme. (Ciy. 20:4) Kufwumbwa uuyookaka kutobela lugwasyo luli boobo takazumizyigwi kuzumanana kupona, nokuba kuti ujisi myaka iili 100. (Is. 65:20) Jehova a Jesu balakonzya kubona zili mumoyo, aboobo tabakazumizyi muntu uuli woonse kuleta manyongwe munyika mpya.—Is. 11:9; 60:18; 65:25; Joh. 2:25.

BUBUKE KUBUUMI ALIMWI ALUBETA

13-14. (a) Ino kaindi twakazyi kuti aamba nzi majwi aa Jesu aali ku Johane 5:29? (b) Ncinzi ncotweelede kubikkila maano kujatikizya majwi aayo?

¹³ Jesu wakaamba kujatikizya baabo ibayoobusyigwa kubuumi aano anyika. Mucikozyanyo, wakati: “Ciyoosika ciindi eelyo aabo boonse ibali muzyuumbwe nobayoomvwa ijwi lyakwe akuzwa mulinzizyo, aabo ibakacita  zintu zibotu kububuke bwabuumi, aabo ibakacita zintu zibyaabi kububuke bwalubeta.” (Joh. 5:28, 29) Ino Jesu wakali kupandulula nzi?

¹⁴ Kaindi, twakazyi kuti majwi aa Jesu aamba zintu aabo ibayoobusyigwa nzyobayoocita baakumana kubusyigwa; nkokuti, bamwi bayoobusyigwa akucita zintu zibotu kakuli bambi bayoobusyigwa akucita zintu zibyaabi. Nokuba boobo, amubone kuti Jesu taambi kuti aabo ibazwa akubusyigwa muzyuumbwe zyaciibalusyo bayoocita zintu zibotu naa kucita zintu zibyaabi. Wakaamba munzila iitondezya kuti zyakacitika kale. Wakaamba kujatikizya baabo “ibakacita zintu zibotu” alimwi abaabo “ibakacita zintu zibyaabi.” Eeci citondezya kuti zintu eezyi zyakacitika kabatanafwa. Eeci cilalimvwisya, tee kayi? Alimwi buya, kunyina uyoozumizyigwa kucita zintu zibyaabi munyika mpya. Bantu bataluleme kweelede kuti bakali kucita zintu zibyaabi eezyi kabatanafwa. Aboobo ino apandulula nzi majwi aa Jesu aajatikizya “bubuke bwabuumi” alimwi ‘abubuke bwalubeta’?

15. Ino mbaani ibayookkomana ‘abubuke bwabuumi’ alimwi nkaambo nzi?

¹⁵ Balulami ibakacita zintu zibotu kabatanafwa, bayootambula “bubuke bwabuumi” nkaambo mazina aabo anoolembedwe kale mubbuku lyabuumi. Eeci caamba kuti bubuke bwabaabo “ibakacita zintu zibotu” ibwaambidwe ku Johane 5:29 bulikozyenye abubuke ‘bwabaluleme’ ibwaambidwe ku Milimo 24:15. Bupanduluzi oobu buleendelana amajwi aali ku Baroma 6:7, aamba kuti: “Muntu ooyo iwafwa waangununwa kucibi cakwe.” Zibi nzyobakacita bantu aaba ibaluleme zyakamwaigwa nobakafwa, pele milimo yabo yalusyomo ilazumanana kuyeeyegwa. (Heb. 6:10) Pele masimpe ngakuti, baluleme aaba ibayoobusyigwa bayooyandika kuzumanana kusyomeka kutegwa mazina aabo kaaliko mubbuku lyabuumi.

16. Ino “bubuke bwalubeta” caamba nzi?

¹⁶ Ino mbuti kujatikizya baabo ibakacita zintu zibyaabi kabatanafwa? Nokuba kuti zibi zyabo zyakamwaigwa nobakafwa, tiibakamubelekela Jehova cakusyomeka ciindi nobakali kupona. Mazina aabo taalembedwe mubbuku lyabuumi. Aboobo, bubuke bwabaabo “ibakacita zintu zibyaabi” bulikozyenye abubuke ‘bwabataluleme’ ibwaambidwe ku Milimo 24:15. Aaba bayoobusyilwa “kububuke bwalubeta.” * Bantu aaba bataluleme bayoobetekwa, nkokuti bayoolangwa-langwa naa kusunkwa. (Lk. 22:30) Ciyootola ciindi cili mbocibede kutegwa kuzyibwe naa cileelela kuti mazina aabo alembwe mubbuku lyabuumi. Lilikke buyo bataluleme aaba baakubuleka bukkale bwabo bwakaindi alimwi akulyaaba kuli Jehova, ndendilyo mazina aabo naayoolembwa mubbuku lyabuumi.

17-18. Ncinzi bantu boonse ibayoobusyigwa kubuumi anyika ncobayooyandika kucita, alimwi ino “milimo” nzi iyaambidwe ku Ciyubunuzyo 20:12, 13?

¹⁷ Kufwumbwa naa musyule bakaliluleme naa tiibakaluleme, basikubusyigwa bayooyandika kutobela milawo iinooli mumabbuku aakuvwunga mapya aayoojalulwa mumyaka iili 1,000. Mwaapostolo Johane wakapandulula ncaakabona mucilengaano naakati: “Ndakabona bafwu, ibapati abaniini, kabaimvwi kumbele lyacuuno cabwami, eelyo mabbuku aakuvwunga akavwungululwa. Pele ibbuku lyakuvwunga limbi lyakavwungululwa;  eeli ndibbuku lyabuumi. Mpoonya bafwu bakabetekwa kweelana azintu eezyo zilembedwe mumabbuku aakuvwunga aayo, kweelana amilimo yabo.”—Ciy. 20:12, 13.

¹⁸ Ino basikubusyigwa bayoobetekwa kweelana “amilimo” iili? Sena milimo eeyo njobakacita kabatanafwa? Peepe! Amuyeeye kuti, bakaangununwa kuzibi nzyobakacita ciindi nobakafwa. Aboobo “milimo yabo” tiikonzyi kwaamba milimo njobakacita mubukkale bwabo bwakaindi. Muciindi caboobo, yeelede kuti yaamba milimo yabo kweelana alwiiyo ndobayootambula munyika mpya. Nobaba bantu basyomeka mbuli Nowa, Samuele, Davida a Daniele bayooyandika kwiiya kujatikizya Jesu Kristo alimwi akutondezya lusyomo mucipaizyo cakwe. Ikuti naa baalumi aaba banoojisi zinji zyakwiiya, nkokuti aabo ibataluleme banoojisi zinji kapati zyakwiiya.

19. Ncinzi ciyoobacitikila aabo ibayoocikaka coolwe eeci?

¹⁹ Ncinzi ciyoobacitikila aabo ibayoocikaka coolwe eeci? Lugwalo lwa Ciyubunuzyo 20:15 lutwaambila kuti: “Kufwumbwa ooyo watakajanwa kalembedwe mubbuku lyabuumi wakawaalwa muzyiba lyamulilo eelyo.” Inzya, bayoonyonyoonwa cakumaninina mane kukabe kutamani. Eelo kaka cilayandika kapati kuba masimpe kuti zina lyesu lililembedwe mubbuku lyabuumi alimwi akuti kaliliko lyoonse!

20. Mulimo nzi uukkomanisya uuyakucitwa lya Bulelo bwa Myaka Iili 1, 000? (Amubone cifwanikiso icili aacivwumbyo.)

²⁰ Eelo kaka ciyakuba ciindi cikkomanisya lya Bulelo bwa Myaka Iili 1, 000! Ciyoobikkilizya mulimo mupati wakuyiisya uutanabwenwe aano anyika. Pele alimwi ciyakuba ciindi bukkale bwabaluleme alimwi abataluleme nobuyoolangwa-langwa. (Is. 26:9; Mil. 17:31) Mbuti mulimo wakuyiisya ooyu mbouyakucitwa? Cibalo citobela ciyootugwasya kumvwisya alimwi akutondezya kulumba kububambe oobu bubotu kapati.