Amubone Bbaibbele mboliingula mibuzyo eeyi.

Milimo 24:15 itwaambila kuti “kuyooba bubuke bwabantu baluleme abataluleme.” Balulami, mbaabo ibakali kumumvwida Leza kabatanafwa, aboobo mazina aabo alilembedwe mubbuku lyabuumi. (Malk. 3:16) Bataluleme, babikkilizya baabo ibakafwa kakunyina kuba acoolwe cakwiiya kujatikizya Jehova, aboobo mazina aabo taalembedwe pe mubbuku lyabuumi.

Johane 5:28, 29 yaamba nkamu zyobilo izyaambidwe ku Milimo 24:15. Jesu wakaamba kuti “aabo ibakacita zintu zibotu kububuke bwabuumi, aabo ibakacita zintu zibyaabi kububuke bwalubeta.” Balulami bakacita zintu zibotu kabatanafwa. Aboobo, bayoobusyigwa akaambo kakuti mazina aabo anakulembedwe mubbuku lyabuumi. Nokuba boobo, bataluleme bakacita zintu zibyaabi kabatanafwa. Aaba bayoobusyigwa kububuke bwalubeta. Mazina aabo taalembedwe mubbuku lyabuumi alimwi bayoobetekwa, naa kulangililwa kwaciindi cili mbocibede. Aciindi eeco, bayooba acoolwe cakwiiya kujatikizya Jehova, mpoonya mazina aabo ayoolembwa mubbuku lyabuumi.

Ciyubunuzyo 20:12, 13 yaamba kuti boonse ibayoobusyigwa bayooyandika kutobela “zintu eezyo zilembedwe mumabbuku aakuvwunga,” nkokuti milawo mipya iiyoobikkwa munyika mpya. Aabo ibatakaitobeli milawo eeyo bayoonyonyoonwa.—Is. 65:20.

Daniele 12:2 isinsima kuti aabo boona mulufwu bayoobusyigwa “kubuumi butamani pele bambi kukusampaulwa akukusesemwa mane kukabe kutamani.” Kapango aaka kaamba lubeta lwamamanino kuli baabo ibayoobusyigwa. Bayootambula “buumi butamani’ naa “kusesemwa mane kukabe kutamani.” Aboobo kumamanino aamyaka iili 1,000, bamwi bayootambula buumi butamani mpoonya bamwi bayoonyonyweedwalimwi.—Ciy. 20:15; 21:3, 4.

Amubone cikozyanyo eeci. Nkamu zyobilo zyabantu ibayoobusyigwa balakonzya kukozyanisyigwa kuli bamuzwamasi ibayanda kukkala mucisi cimbi. Balulami bali mbuli baabo ibapegwa pepa kumfwulumende libazumizya kubeleka naa kukkala mucisi kabajisi lwaanguluko. Mukwiimpana, bataluleme bali mbuli bamuzwamasi ibapegwa pepa kumfwulumende libazumizya kukkala mucisi kwaciindi cisyoonto buyo. Bamuzwamasi aaba beelede kwiilemeka akwiitobela milawo yacisi kabatanazumizyigwa kukkalila limwi. Mbubwenya buyo, bataluleme ibayoobusyigwa bayooyandika kutobela milawo ya Jehova akutondezya kuti mbalulami kutegwa bazumanane kukkala mu Paradaiso. Alimwi kufwumbwa pepa ndyobapegwa amfwulumende bamuzwamasi ciindi nobanjila mucisi, mukuya kwaciindi bamwi bayoozumizyigwa kuba basicisi, pele bamwi ambweni bayootandwa. Kuzumizyigwa kukkala naa kutandwa kuyeeme abube bwabo naa mbobalilemeka mucisi cipya. Mbubwenya buyo, lubeta lwamamanino lwabaabo boonse ibayoobusyigwa lunooyeeme akusyomeka kwabo alimwi ambobayoolilemeka munyika mpya.

Jehova tali buyo Leza siluzyalo, pele alimwi ngu Leza sibululami. (Dt. 32:4; Int. 33:5) Uyoolutondezya luyando lwakwe kwiinda mukubusya baluleme abataluleme. Aciindi ncimunya uyoozumanana kuzilemeka zyeelelo zyakwe zyakulilemeka zisumpukide. Balikke aabo bamuyanda akupona kweelana azyeelelo zyakwe mbabayoozumizyigwa kukkala munyika mpya.