Kweelana a 1 Bakorinto 15:8, Paulo wakaamba kuti: “Ciindi camamanino wakalibonya akulindime mbuli kumwana wakazyalwa ciindi kacitanakkwana.” Kaindi twakali kwaamba kuti, kulibonya kuti Paulo wakali kupandulula icakacitika ciindi naakabona cilengaano ca Jesu mubulemu bwakujulu. Cakali mbuli kuti wapegwa coolwe cakuzyalwa alimwi naa kubusyigwa, kali cilenge camuuya icintu cakali kuyoocitika kumbele, kakucili myaanda yamyaka kuti bubuke bwamusyobo ooyu butalike kucitika. Nokuba boobo, nobakamana kukavwuntauzya cakulomya kapango aaka, cakalibonya kuti kuyandika kucinca mbotukamvwisya.

Masimpe kuti Paulo wakali kwaamba icakacitika ciindi naakasanduka. Pele ino wakali kwaamba nzi ciindi naakati, “wakazyalwa ciindi kacitanakkwana?” Kuli twaambo tunji tuyeeyelwa.

Kusanduka kwakwe kwakacitika mukulaba kwaliso alimwi kwakali kuyoosya. Kutumbuka kacitanakkwana ciindi kanji-kanji kulacitika cakutayeeyela. Ciindi Saulo (kumbele iwakazyikwiitwa kuti Paulo) naakali kuya ku Damasiko kuyoopenzya Banakristo, kunyina naakali kulangila kubona cilengaano ca Jesu iwakabusyigwa. Kusanduka kwa Paulo kwakali kugambya kutali buyo kulinguwe alikke, pele aku Banakristo balo mbaakakanzide kupenzya mumunzi ooyo. Kuyungizya waawo, eeci icakacitika cakali kuyoosya cakuti wakabaya kwaciindi cili mbocibede.—Mil. 9:1-9, 17-19.

Wakasanduka ‘aciindi citeelede.’ Bbala lya Chigiriki ilyakasandululwa kuti “wakazyalwa ciindi kacitanakkwana” lilakonzya alimwi kwaamba kuti ‘wakazyalwa aciindi citeelede.’ Bbaibbele lya The Bible in Tonga lyaamba kuti: “Wakabonwa akulindime mbuli mwana uubelulwa.” Ciindi Paulo naakasanduka, Jesu wakalipilukide kale kujulu. Kwiindana abaabo Paulo mbaakaamba mutupango twakusaanguna, kunyina naakamubona Jesu iwakabusyigwa katanaunka kujulu. (1Kor. 15:4-8) Jesu naakalibonya kuli Paulo cakutayeeyela, cakamupa coolwe Paulo cakumubona Jesu iwakabusyigwa nokuba kuti eeci cakacitika ‘aciindi citeelede.’

Wakali kulibona kuti teeleli. Kweelana abasyaazibwene bamwi, majwi ngaakabelesya Paulo apa muzeezo wakuti wakali kulibeteka. Kuti naa eeci ncencico Paulo ncaakali kuyeeya, nkokuti wakali kulibona kuti teeleli kupegwa coolwe cakuba mwaapostolo. Mubwini, wakaamba kuti: “Ndendime muniini akati kabaapostolo boonse, alimwi tandeeleli kwiitwa kuti ndimwaapostolo, nkaambo ndakapenzya mbungano ya Leza. Pele kwiinda muluzyalo lwa Leza ndili boobu mbondibede lino.”—1Kor. 15:9, 10.

Aboobo, kuboneka kuti Paulo wakali kwaamba mbwaakalibonya Jesu kulinguwe cakutayeeyela alimwi mukulaba kwaliso, kusanduka cakutayeeyela, alimwi akuti tanaakali kweelela kubona cilengaano ca Jesu eeci cigambya. Kufwumbwa mbocakabede, cilisalede kuti Paulo wakalumba kapati kuli ceeci icakamucitikila. Kunze buyo lyakulumba, wakasinizya kuti Jesu wakabusyigwa ncobeni kuzwa kubafwu. Nkakaambo kaako, wakali kucaamba eeci icakamucitikila ciindi naakali kukambaukila bamwi kujatikizya Jesu iwakabusyigwa.—Mil. 22:6-11; 26:13-18.