1-2. Nkaambo nzi ncociyandika kwaaiya makani aajatikizya Samusoni?

 NCINZI ciboola mumizeezo yanu mwamvwa zina lyakuti Samusoni? Ambweni muyeeya muntu wakajisi nguzu zinji kapati. Aayo masimpe. Nokuba boobo, Samusoni tanaakasala kabotu calo cakapa kuti anjile mumapenzi mapati. Pele Jehova wakabikkila maano kuzintu zibotu nzyaakacita Samusoni ciindi naakali kumubelekela cakusyomeka akuzibikkilizya mu Bbaibbele kutegwa tugwasyigwe.

² Jehova wakamubelesya Samusoni kwiinda mukumupa kucita zintu zigambya kutegwa agwasye bantu bakwe, bana Israyeli. Naakafwa Samusoni, Jehova wakasololela mwaapostolo Paulo kubikkilizya Samusoni mumulongo wamazina aabantu bakajisi lusyomo luyumu kapati. (Heb. 11:​32-34) Cikozyanyo ca Samusoni cilakonzya kutukulwaizya. Wakamusyoma Jehova nociba ciindi naakali mubukkale bukatazya. Mucibalo eeci, tulalanga-langa ncotukonzya kwiiya kuli Samusoni akubona cikozyanyo cakwe mbocikonzya kutugwasya.

3. Ino Samusoni wakapegwa mulimo nzi?

³ Naakazyalwa Samusoni, bana Israyeli bakali kweendelezyegwa aba Filisiti balo ibakali kubadyaaminina. (Bab. 13:1) Bana Israyeli bakapenga citaambiki akaambo kalunya lwaba Filisiti. Jehova wakasala Samusoni kuti abe “kumbele mukuvwuna bana Israyeli kuzwa kumaanza aaba Filisiti.” (Bab. 13:5) Eelo kaka ooyu wakali mukuli mulemu! Kutegwa auzuzikizye, Samusoni wakeelede kusyoma Jehova.

4. Mbuti Jehova mbwaakamugwasya Samusoni kulivwuna kuba Filisiti? (Babetesi 15:​14-16)

 ⁴ Amubone cikozyanyo citondezya kuti Samusoni wakali kumusyoma Jehova kutegwa amugwasye. Aciindi cimwi, basikalumamba ba Filisiti bakaboola mu Juda, ku Lehi kutegwa bamujate Samusoni. Baalumi ba Juda bakayoowa, aboobo bakamwaaba Samusoni mumaanza aabasinkondonyina. Bantu bamumunzi mwaakali kukkala Samusoni bakamwaanga antambo zyobilo zipya akumuleta kuba Filisiti. (Bab. 15:​9-13) Nokuba boobo, “muuya wa Jehova wakamupa nguzu” Samusoni zyakucikonzya kulivwuna kuntambo nzyobakamwaangide. Kumane “wakajana mweebo wambongolo uutanayuma,” wakaubweza akuubelesya kujaya baalumi ba Filisiti bali 1,000!—Amubale Babetesi 15:​14-16.

5. Ino kubelesya mweebo wambongolo nkwaakacita Samusoni kuyubununa nzi kujatikizya mbwaakali kumusyoma Jehova?

⁵ Nkaambo nzi Samusoni ncaakabelesya mweebo wambongolo, cintu icatakali kubelesyegwa munkondo? Kweelede kuti Samusoni wakalizyi kuti kuzwidilila kwakwe kwakayeeme aakusyoma Jehova, ikutali cilwanyo ncaakali kukonzya kubelesya. Masimpe, ooyu mubelesi wa Jehova uusyomeka wakabelesya cintu ncaakajana kutegwa azuzikizye makanze aa Jehova. Akaambo kakumusyoma Jehova, Samusoni wakacikonzya kubazunda baalumi ibakali banji kapati!

6. Ciindi notuzuzikizya mikuli njotupedwe ambunga, nciiyo nzi ncotwiiya kuli Samusoni?

⁶ Jehova uyootupa nguzu andiswe zyakucikonzya kucita mulimo umwi ngwayanda, nokuba kuti ulibonya kuti taukonzyeki. Leza ulakonzya kucita oobu munzila nzyotutayeeyeli naaceya. Amusyome kuti Jehova, iwakamupa nguzu Samusoni, uyoomugwasya andinywe kutegwa mucikonzye kucita kuyanda kwakwe lilikke buyo kuti mwamusyoma.—Tus. 16:3.

7. Ncikozyanyo nzi icitondezya kaambo ncociyandika kapati kulindiswe kulanga kuli Jehova?

⁷ Bakwesu abacizyi banji ibali mumulimo wamayake, batondezya kuti balamusyoma Jehova. Kaindi, bakwesu bakali kuyaka Maanda aa Bwami alimwi amayake amwi buyo kwiinda  mukulitalikila buya. Pele akaambo kakuti bantu banji bali mukubbapatizyigwa, mbunga yakabona kuti kuyandika kucinca. Bakwesu ibasololela bakapaila kulomba lugwasyo lwa Jehova akutalika kusola nzila zipya mbuli kuula masena aakayakwa kale akwaabambulula. Ba Robert ibakabeleka mumulimo wamayake mumasena aaindene-indene munyika, bakaamba kuti: “Kumatalikilo, tiicakali cuubauba kuli bamwi kukutambula kucinca ooku.” Bakazumanana kwaamba kuti: “Kucinca ooku kwakaliindene kapati twakweezyanisya ambotwakali kubeleka kwamyaka minji. Pele bakwesu bakalilibambilide kukutambula, eeci ncitondezyo cakuti Jehova uli mukukulongezya kucinca ooku.” Eeci ncikozyanyo buyo comwe citondezya kuti Jehova uli mukubasololela bantu bakwe kutegwa bacikonzye kuzuzikizya makanze aakwe. Ciindi aciindi, toonse tweelede kulibuzya kuti, ‘Sena ndilanga kuli Jehova kutegwa andisololele? Sena ndililibambilide kucinca kutegwa ndimubelekele munzila njayanda?’

8. Ino Samusoni wakacita buti aciindi cimwi naakafwide nyota?

⁸ Mulakonzya kuyeeya ziindi azimwi Samusoni naakacita zintu zigambya. Kanyina cilwanyo cili coonse, wakajaya syuumbwa kumane aciindi cimwi wakajaya ba Filisiti bali 30 alikke mumunzi wabo wa Asikeloni. (Bab. 14:​5, 6, 19) Samusoni wakalizyi kuti tanaakali kukonzya kuzicita zintu eezyi alikke kakunyina kugwasyigwa a Jehova. Eeci cakalibonya naakafwa nyota aciindi cimwi naakamana kujaya ba Filisiti bali 1,000. Ino wakacita buti? Muciindi cakulisyoma kuti ulakonzya kwaajana maanzi aakunywa, wakalomba Jehova kuti amugwasye.—Bab. 15:18.

9. Ino Jehova wakacita buti ciindi Samusoni naakapaila? (Babetesi 15:19)

⁹ Jehova wakakumvwa kulomba kwa Samusoni kwiinda mukumupa maanzi camaleele. Naakanywa maanzi Samusoni, “nguzu zyakwe zyakapiluka alimwi wakabukuluka.” (Amubale Babetesi 15:19.) Kulibonya kuti cilindi eeci mwakazwa maanzi cakacili kubeleka nomuba mumyaka yakatobela ciindi musinsimi Samuele naakasololelwa kulemba bbuku lya Babetesi. Kweelede kuti bana Israyeli ibakali kucibona cilindi eeco imwakali maanzi bakali kuyeezyegwa kuti, ikuti bamusyoma Jehova, wakali kuyoobagwasya ciindi camapenzi.

10. Ncinzi ncotweelede kucita kutegwa Jehova atugwasye? (Amubone acifwanikiso.)

¹⁰ Andiswe mbubwenya buyo, tweelede kulanga kuli Jehova kutegwa atugwasye tacikwe makani aluzyibo ndotujisi naa zintu nzyotwakazuzikizya mumulimo wakwe. Tweelede kulibombya akuzumina kuti tulakonzya kucita zintu nzyayanda, lilikke kuti katumusyoma Jehova. Mbubwenya mbuli Samusoni mbwaakaba anguzu ciindi naakanywa maanzi ngaakamupa Jehova, andiswe tulakonzya kuyumizyigwa kumuuya ikuti twazumina kugwasyigwa a Jehova kutegwa tuzumanane kusyomeka kulinguwe—Mt. 11:28.

11. Mbuti mbotukonzya kusyoma lugwasyo lwa Jehova? Amupe cikozyanyo.

¹¹ Amubone cikozyanyo caba Aleksey, imukwesu waku Russia uuli mukupenzyegwa kapati. Ino ncinzi camugwasya kuliyumya nomuba mubukkale bukatazya? Walo amukaintu wakwe bajisi bubambe bubotu bwakucita zintu zyakumuuya. Wakaamba kuti: “Ndilasolekesya kuzuzikizya bubambe bwakucita zintu zyakumuuya mbuli kuba aciiyo cangu ndemwini alimwi akubala Bbaibbele aabuzuba. Abuzuba kuseeni, mebo abakaintu bangu tulabandika nzyotwajana mukulingaula magwalo  abuzuba aantoomwe.” Ino eeci cituyiisya nzi? Muciindi cakulisyoma, tweelede kusyoma Jehova. Munzila nzi? Kwiinda mukucita zintu zikonzya kuyumya lusyomo lwesu, mbuli kubala akwiiya Bbaibbele, kupaila, kuswaangana alimwi akukambauka. Mpoonya Jehova uyootupa lugwasyo ndotuyandika kutegwa tuzumanane kumubelekela. Jehova wakamugwasya Samusoni, andinywe ulakonzya kumugwasya.

12. Ino kuyanda Delila nkwaakacita Samusoni kwakaindene buti akuyanda bamakaintu ba Filisiti nkwaakacitide musyule?

¹² Samusoni wakali muntu uutalondokede mbubwenya mbuli ndiswe, aboobo zimwi ziindi tanaakali kusala kabotu. Kusala kumwi nkwaakacita kwakamuletela mapenzi aataambiki. Nakamana kubeleka kali mubetesi kwaciindi cili mbocibede, Samusoni “wakayanda mukaintu ku Kkuti lya Soreki, izina lyakwe wakali Delila.” (Bab. 16:4) Katanamuyanda mukaintu ooyu, Samusoni wakayandide mukaintu mu Filisiti, aaya makani ‘akazwide kuli Jehova’ walo iwakali “kuyandaula nzila yakulwana ba Filisiti.” Kumbele, Samusoni wakatalika kukkala muŋanda yamukaintu muvwuule mumunzi waba Filisiti ku Gaza. Okuya, Leza wakapa Samusoni nguzu zyakucikonzya kuzyula zijazyo zyamunzi calo cakapa kuti munzi ubule lukwabililo. (Bab. 14:​1-4; 16:​1-3) Nokuba boobo, kweelede kuti Delila wakali muna Israyeli ikutali mu Filisiti, aboobo kumuyanda tiikwakali kumupa coolwe Samusoni cakulwana ba Filisiti kweelana ambwaakali kuyanda Jehova.

13. Ino Delila wakacita nzi kuli Samusoni?

¹³ Delila wakazumina kupegwa mali manji kuba Filisiti kutegwa amwaabe Samusoni kulimbabo. Ambweni akaambo kakuti wakali kumuyanda kapati, Samusoni wakaalilwa kuzyiba  cini ncaakali kuyanda kucita Delila. Mukaintu ooyu wakazumanana kumoongelezya Samusoni kuti aambe nkozyakali kuzwa nguzu zyakwe, kumamanino Samusoni wakamwaambila. Cuusisya ncakuti kulubizya kwa Samusoni kwakapa kuti asweekelwe nguzu zyakwe alimwi akucileka kukkomaninwa a Jehova kwaciindi cili mbocibede.—Bab. 16:​16-20.

14. Ino ncinzi cakamucitikila Samusoni akaambo kakusyoma Delila?

¹⁴ Samusoni wakajana mapenzi manji akaambo kakusyoma Delila muciindi cakusyoma Jehova. Ba Filisiti bakamujata akumoofwaazya Samusoni. Bakamubikka muntolongo ku Gaza, kwalo musyule nkwaakazyulide milyango yamunzi. Okuya wakaba muzike iwakali kuziya maila. Kumane ba Filisiti bakaleta Samusoni kupobwe ndyobakajisi kutegwa bamusampaule. Bakatuula zipaizyo zinji kuli leza wabo Dagoni nkaambo bakali kusyoma kuti ngonguwe wakabagwasya kujata Samusoni. Bakamuleta Samusoni kupobwe eeli kuzwa muntolongo kutegwa ‘abacitile zintu zisesya.’—Bab. 16:​21-25.

15. Mbuti Samusoni mbwaakatondezya kuti alimwi wakamusyoma Jehova? (Babetesi 16:​28-30) (Amubone cifwanikiso icili aacivwumbyo.)

¹⁵ Nokuba kuti Samusoni wakalubizya kapati, wakazumanana kumubelekela Jehova. Wakalangaula nzila mwaakali kukonzya kuzuzikizya mukuli ngwaakapegwa a Leza wakulwana ba Filisiti. (Amubale Babetesi 16:​28-30.) Samusoni wakalomba Jehova kuti: ‘Andipilusizye ba Filisiti cibi.’ Leza mwini-mwini wakawiingula mupailo wa Samusoni akumupa nguzu zilibedelede nzyaakajisi kaindi. Akaambo kaceeci, Samusoni wakajaya ba Filisiti banji aciindi aawa kwiinda mbaakajaya musyule.

16. Ino ncinzi ncotukonzya kwiiya kukulubizya kwa Samusoni?

¹⁶ Nokuba kuti Samusoni wakapenga kapati akaambo kakulubizya kwakwe, kunyina naakacileka kumubelekela Jehova. Andiswe tatweelede kucileka kumubelekela Jehova nokuba kuti twalubizya naa kusweekelwa mukuli buya. Amuyeeye kuti Jehova ulilibambilide kulekelela. (Int. 103:​8-10) Nokuba kuti tulalezya, Jehova ulakonzya kutupa nguzu zyakucikonzya kucita kuyanda kwakwe mbubwenya mbuli mbwaakacita kuli Samusoni.

17-18. Nkaambo nzi cikozyanyo camukwesu Michael ncocimukulwaizya? (Amubone acifwanikiso.)

¹⁷ Amubone cikozyanyo camukwesu ucili mwana-mwana wazina lya Michael. Wakajisi bubi mumulimo wa Jehova, kali mukutausi alimwi amupainiya waciindi coonse. Nokuba  boobo, cuusisya ncakuti, wakacita cintu cimwi cakapa kuti asweekelwe mikuli mumbungano. Wakaamba kuti: “Ciindi zintu eezyi nozyakacitika, ndakajisi bubi kapati mumulimo wa Jehova. Zyakacitika cakutayeeyela cakuti ndakalimvwa kuti kunyina ncondakali kukonzya kucita mumulimo wa Jehova. Kunyina nondakayeeya kuti Jehova wandilekelezya, pele ndakali kulibuzya naa cilongwe cangu anguwe kuli nociyooba mbuli mbocakabede kaindi, akuti naa kuli nondiyoomubelekela kabotu mumbungano mbuli mbondakali kucita kaindi.”   

¹⁸ Cikkomanisya ncakuti mukwesu Michael kunyina naakatyompwa pe. Wakayungizya kwaamba kuti: “Ndakabeleka canguzu kapati kubambulula cilongwe cangu a Jehova kwiinda mukupaila lyoonse, kubala alimwi akuzinzibala kuyeeya.” Mukuya kwaciindi, mukwesu Michael wakapilusyigwa alimwi mumikuli. Lino ulabeleka kali mwaalu alimwi amupainiya waciindi coonse. Wakaamba kuti: “Lugwasyo ndondakapegwa kwaambisya kuzwa kubaalu, lwakandigwasya kubona kuti Jehova ucindiyanda. Lino alimwi ndilabeleka mumbungano kandijisi manjezyeezya aasalala. Eeci cakandicitikila cakandiyiisya kuti, Jehova ulakonzya kumulekelela muntu uuli woonse weempwa kuzwa ansi aamoyo.” Tulakonzya kuba alusyomo lwakuti andiswe Jehova unootubelesya alimwi akutulongezya nokuba kuti twalubizya, lilikke buyo kuti twabambulula nzila zyesu alimwi akuzumanana kumusyoma.—Int. 86:5; Tus. 28:13.

19. Ino mwayumizyigwa buti acikozyanyo ca Samusoni?

¹⁹ Mucibalo eeci twalanga-langa zintu zimwi zikkomanisya izyakacitika mubuumi bwa Samusoni. Tanaakalondokede, pele kunyina naakacileka kubelekela Jehova nociba ciindi naakalubizya mumakani aajatikizya Delila. Awalo Jehova kunyina naakacileka kumubelesya Samusoni. Wakamubelesya alimwi Samusoni kunyonyoona basinkondonyina banji kapati. Jehova wakacili kumubona kuti muntu uusyomeka kapati, cakuti wakamubikkilizya mumulongo wamazina aabantu bakali kusyomeka aalembedwe ku Bahebrayo caandaano 11. Eelo kaka cilakulwaizya kuzyiba kuti tubelekela Taatesu wakujulu uujisi luyando walo uuyanda kutuyumya akutugwasya, kwaambisya ciindi notujisi mapenzi! Aboobo mbubwenya mbuli Samusoni, atumulombe Jehova kuti: “Kondiyeeya kaka akundiyumya.”—Bab. 16:28.