1. Makani aali buti aabuzyigwa kucikolo naa kumulimo?

 INO mulimvwa buti ciindi mubelesinyoko naa sicikolonyoko naamubuzya kujatikizya nzyomusyoma? Sena inga mulalibilika? Tobanabunji mbotulimvwa oobo. Pele mubuzyo uuli boobo inga watugwasya kuzyiba muntu nzyayeeya naa nzyasyoma, calo cikonzya kutupa coolwe cakumwaambila makani mabotu. Nokuba boobo, zimwi ziindi muntu inga wabuzya mubuzyo munzila iinyemya. Eeci taceelede kutugambya pe. Kayi, bamwi bakacengwa kujatikizya nzyotusyoma. (Mil. 28:22) Kuyungizya waawo, tupona “kumazuba aamamanino,” ciindi bantu banji ‘nobatanyoneki’ alimwi anobali “bakali.”—2 Tim. 3:​1, 3.

2. Nkaambo nzi kubomba moyo ncobuli bube buyandika kapati?

² Mulakonzya kulibuzya kuti, ‘Mbuti mbondikonzya kukkazika moyo alimwi akuba mupampu ciindi muntu nayanda kukazya makani ngondisyoma?’ Ncinzi cikonzya kumugwasya? Kubomba moyo kulakonzya kumugwasya. Kayi muntu mubombe moyo tafwambaani kukalala, pele ulakonzya kulijata ciindi naanyemezyegwa naa eelyo natazyi cakwiingula. (Tus. 16:32) Nokuba boobo, talili lyoonse nocili cuuba-uba kubomba moyo. Mbuti mbomukonzya kwiiya kubomba moyo? Mbuti mbomukonzya kwiingula cabubombe ciindi muntu naabuzya kujatikizya nzyomusyoma? Alimwi ikuti naa muli bazyali, mbuti mbomukonzya kuyiisya bana banu kucizyiba kwiiminina lusyomo lwabo cabubombe? Atubone.

3. Nkaambo nzi ncotukonzya kwaamba kuti kubomba moyo nkuba sicamba, kutali mukandu? (2 Timoteyo 2:​24, 25)

³ Kubomba moyo, takuli kubula nguzu pe. Kuyandika nguzu  kutegwa muntu acikonzye kubatama ciindi nali muyumuyumu. Kubomba moyo “mucelo wamuuya.” (Gal. 5:​22, 23) Bbala lya Chigiriki ilyakabelesyegwa kupandulula “kubomba moyo” zimwi ziindi lyakali kubelesyegwa kupandulula bbiza lyamusyokwe eelyo lyakatambisyigwa naa kuyiisyigwa. Amweezyeezye bbiza lyamusyokwe ilyakayiisyigwa kubomba. Nokuba kuti bbiza eelyo lyakabomba, pele licili liyumu. Mbotuli bantu, mbuti mbotukonzya kwiiya kubomba moyo kumwi katuli bayumu? Tatukonzyi kucita oobu munguzu zyesu tobeni. Pele tweelede kupaila, kulomba Leza kutegwa atugwasye kuba abube oobu bubotu. Kuli zikozyanyo zyabantu banji ibakaiya kubomba moyo. Mucikozyanyo, bakwesu abacizyi banji balatondezya kubomba moyo ciindi nobakazyigwa. Eeci cagwasya kuti bamwi babazyibe kabotu Bakamboni ba Jehova. (Amubale 2 Timoteyo 2:​24, 25.) Mbuti mbotukonzya kutondezya kubomba moyo kapati mubuumi bwesu?     

4. Ncinzi ncotukonzya kwiiya kujatikizya kubomba moyo kucikozyanyo ca Izaka?

⁴ Zibalo zyamu Bbaibbele zinji zitondezya kuti kubomba moyo mbube buyandika kapati. Mucikozyanyo, ciindi Izaka naakali kukkala mu Gerari, nyika yaba Filisti, basimukobonyina basimunyono bakavwikkila migoti yamaanzi njobakasyide babelesi babausyi. Aboobo muciindi cakulwana ambabo, Izaka wakalonzya mukwasyi wakwe alimwi akusya migoti iimbi. (Matl. 26:​12-18) Pele ayalo migoti yamaanzi iyakali mubusena oobo, ba Filisiti bakaitaminina kuti yakali yabo. Nokuba boobo, Izaka wakacita zintu caluumuno. (Matl. 26:​19-25) Ncinzi cakamugwasya kuzumanana kubomba moyo noliba leelyo bamwi nobakakanzide kumunyemya? Tacidoonekwi buya kuti wakaiya cikozyanyo cabazyali bakwe, wakabona mbwaakali kucita zintu caluumuno Abrahamu, ‘kukkazika moyo alimwi akubomba’ kwa Sara.—1Pet. 3:​4-6; Matl. 21:​22-34.

5. Ncikozyanyo nzi citondezya kuti bazyali Banakristo inga bacikonzya kuyiisya bana babo bube bwakubomba moyo?

⁵ Nobazyali Banakristo, amuzyibe kuti andinywe mulakonzya kubayiisya bana banu bubotu bwakubomba moyo. Amubone cikozyanyo ca Maxence, uujisi myaka iili 17. Basicikolonyina alimwi abantu mbaakali kukambaukila bakali kukalala kapati. Bazyali bakwe cakukkazika moyo bakamuyiisya kubomba moyo. Bakaamba kuti: “Maxence lino ulizyi kuti ncuuba-uba kunyema naa kulwana buya, pele muntu muyumu ncobeni ulalijata.” Cikkomanisya ncakuti, Maxence wakaiya kuba muntu mubombe moyo.

6. Mbuti mupailo mboukonzya kutugwasya kutondezya bube bwakubomba moyo?

⁶ Ncinzi ncotukonzya kucita ciindi muntu umwi naatunyemya, ambweni kwiinda mukusampaula zina lya Leza naa Bbaibbele? Tweelede kumulomba Jehova kuti atupe muuya wakwe alimwi abusongo bwakucikonzya kwiingula cabubombe. Ino mbuti kuti twayeeya kuti tiitwaingula mbuli mbotweelede? Tulakonzya kupaila alimwi kutegwa twaayeeyesye makani aayo akubona mbotukonzya kuyoocita oobo ciindi ciboola. Mpoonya, Jehova uyootupa muuya wakwe uusalala kutegwa tucikonzye kulijata alimwi akubomba moyo.

7. Mbuti kuswata magwalo amwi mbokukonzya kutugwasya mubukkale bukatazya? (Tusimpi 15:​1, 18)

⁷ Tupango twamu Bbaibbele tumwi tulakonzya kutugwasya kulijata kutegwa tutaambi zintu zitali kabotu ciindi nocikatazya kucita boobo. Muuya wa Leza ulakonzya kutuyeezya tupango ooto. (Joh. 14:26) Mucikozyanyo, njiisyo zijanika mubbuku lya Tusimpi zilakonzya kutugwasya kubomba moyo. (Amubale Tusimpi 15:​1, 18.) Bbuku lyamu Bbaibbele eeli  lilakonzya kututondezya bubotu bwakulijata kunyema ciindi notuli mubukkale bukatazya.—Tus. 10:19; 17:27; 21:23; 25:15.

8. Nkaambo nzi ncociyandika kulanga-langa capa kuti muntu umwi abuzye mubuzyo kujatikizya nzyotusyoma?

⁸ Bupampu abwalo bulakonzya kutugwasya. (Tus. 19:11) Muntu uujisi bupampu ulalilesya kunyema ciindi nakazyigwa kujatikizya nzyasyoma. Mucikozyanyo, mizeezo yamuntu ili mbuli maanzi malamfwu. Muntu ulakonzya kubuzya mubuzyo, pele kanji-kanji inga katutakazyi kaambo keni kamupa kubuzya. Aboobo katutanamwiingula, inga cabota kusaanguna kuzyiba kaambo kamupa kubuzya mubuzyo ooyo.—Tus. 16:23.

9. Mbuti Gideoni mbwaakatondezya bupampu akubomba moyo twabona mbwaakabeendelezya baalumi bana Efraimu?

⁹ Amubone Gideoni mbwaakabaingula baalumi bana Efraimu. Cabukali bakamubuzya kaambo ncaatakabaitila kuti bamusangane mukulwana basinkondonyina bana Israyeli. Pele mubwini, sena aaka nkakaambo keni ikakabapa kuti banyeme boobo? Ambweni bakanyema akaambo kakuti bakali kulisumpula citaambiki. Kufwumbwa mbocakabede, Gideoni wakatondezya bupampu. Wakasolekesya kumvwisya cakabapa kuti banyeme akubaingula  cabubombe. Ncinzi cakazwa mpawo? Bbaibbele litwaambila kuti, “naakaamba boobu, bakatontomana.”—Bab. 8:​1-3.

10. Mbuti mbotukonzya kubaingula bantu babuzya kujatikizya nzyotusyoma? (1 Petro 3:15)

¹⁰ Ambweni mubelesima naa sicikoloma ulakonzya kubuzya kaambo ncotuponena kweelana azyeelelo zyamu Bbaibbele. Tuyoosolekesya kulwiiminina lusyomo lwesu kumwi katulemeka mbwazibona zintu imuntu wabuzya. (Amubale 1 Petro 3:15.) Aboobo, muciindi cakuyeeya kuti muntu wabuzyila kutufwubaazya naa kutunyemya, amuyeeye mubuzyo ooyo mboukonzya kumugwasya nywebo kuzyiba zintu nzyakkomanina muntu ooyo. Kufwumbwa naa nkaambo nzi ikamupa kubuzya mubuzyo muntu, inga cabota kwiingula cabubombe alimwi acaluzyalo. Bwiinguzi bwesu bulakonzya kumugwasya kuyeeyesya mbwazibona zintu. Nokuba kuti watubbodweda naa kutufwubaazya, makanze eesu ngakwiingula caluzyalo.—Rom. 12:17.

11-12. (a) Ntwaambo nzi ntotweelede kulanga-langa katutanaingula mubuzyo uukatazya? (Amubone acifwanikiso.) (b) Amupe cikozyanyo citondezya kuti kubuzya mubuzyo kulakonzya kutalisya mubandi.

¹¹ Mucikozyanyo, kuti mubelesima wabuzya kaambo ncotutasekeleli mazuba aakuzyalwa, amulibuzye kuti: Sena muntu ooyu uyeeya kuti tatuzumizyidwe kuba aciindi cakulikkomanisya? Naa sena ulimvwa kuti mbwaanga tatusekeleli mazuba aakuzyalwa, inga twanyonganya muuya wabulongwe kumulimo? Tulakonzya kumugwasya mubelesima, kwiinda mukusaanguna kumulumba akaambo kakuti ulababikkila maano bantu alimwi akumwaambila kuti andiswe tulakkomana ciindi nokuli muuya wabulongwe kumulimo. Kucita boobu, kulakonzya kutupa coolwe cakubandika Bbaibbele ncolyaamba kujatikizya mazuba aakuzyalwa.   

¹² Tulakonzya kwiibelesya nzila njimunya eeyi ciindi twaakubuzyigwa makani aakatazya kumbele. Sicikoloma ulakonzya kwaamba kuti Bakamboni ba Jehova beelede kucinca mbobaabona makani aajatikizya koonana kwabantu bajisi zizo zikozyenye. Sena waamba boobo, akaambo kakuti tamvwisyi ncobasyoma Bakamboni ba Jehova kujatikizya koonana kwabantu bajisi zizo zikozyenye? Naa ambweni ujisi mulongwe naa munamukwasyi woonana abantu mbakozyenye limwi zizo? Sena uyeeya kuti tatubayandi bantu bali boobu? Tweelede kumwaambila kuti, tulababikkila maano bantu boonse alimwi tulamvwisya kuti muntu uuli woonse ulijisi lwaanguluko lwakulisalila cakucita. b (1Pet. 2:17) Mpoonya tulakonzya kumwaambila mbocigwasya kutobela zyeelelo zyakulilemeka zyamu Bbaibbele.

13. Mbuti mbomukonzya kugwasya muntu uumufwubaazya akaambo kakusyoma muli Leza?

¹³ Ciindi notwajana muntu uukazya kapati, tatweelede kufwambaana kuyeeya kuti tulizizyi nzyasyoma muntu ooyo. (Tit. 3:2) Mucikozyanyo, ino kuti sicikolonyoko waamba kuti kusyoma muli Leza mbufwubafwuba? Sena inga mwamuyeeyela kuti ulaisyoma kapati njiisyo yakusanduka kwazintu alimwi akuti uzyi makani manji kujatikizya njiisyo eeyo? Amana buya, ambweni wiile kwaamba buyo makani ngaakamvwa. Muciindi cakutalika kukazyanya amakani aasayaansi, mulakonzya kujana nzila yakumwaambila kaambo kakonzya kuyoomugwasya kuyeeya. Ambweni mulakonzya kumutondezya makani aajatikizya kulenga aali a jw.org. Kumbele ambweni inga waakuzumina kuba amubandi uuyeeme acibalo naa vidiyo iijanika mpawo. Masimpe, kuti twamupa bulemu, inga camugwasya kuyanda kwiiya makani manji aajatikizya Bbaibbele.

14. Mbuti Niall mbwaakaibelesya kabotu webbusaiti yesu kugwasya sicikolonyina kubazyiba kabotu Bakamboni ba Jehova?

 ¹⁴ Mukubusi wazina lya Niall wakali kubelesya webbusaiti yesu kutondezya kuti makani ngobaamba bantu kujatikizya Bakamboni ba Jehova ngakubeja. Wakaamba kuti: “Sicikoloma umwi wakali kuvwula kundaambila kuti, tandisyomi musayaansi mwalo muli twaambo twamasimpe nkaambo ndisyoma bbuku lyakalembwa abantu.” Ciindi sicikolonyina Niall naatakamuzumizya kumupandulwida nzyasyoma, wakaambila sicikolonyina ooyu kuti akabone cibeela cakuti: “Sayaansi Alimwi a Bbaibbele” cili a jw.org. Kumbele, Niall wakazyiba kuti sicikolonyina wakaabala makani aali awebbusaiti alimwi wakalilibambilide kwiiya zinji kujatikizya matalikilo aabuumi. Eeci cili boobu andinywe inga camucitikila.

15. Mbuti bazyali mbobakonzya kugwasya bana babo kwiingula cabubombe ciindi basicikolonyina nobababuzya nzyobasyoma?

¹⁵ Bazyali balakonzya kuyiisya bana babo mbobakonzya kwiingula cabubombe ciindi nobabuzyigwa kujatikizya nzyobasyoma. (Jak. 3:13) Bazyali bamwi inga balacita zitondezyo abana babo ciindi nobakomba mumukwasyi. Balalanga-langa makani bana ngobalangilwa kubuzyigwa kucikolo, balaabandika, balacita zitondezyo mbobakonzya kwiingula, alimwi akuyiisya bana mbokwiingulwa cabubombe, munzila iikwelelezya.—Amubone kabbokesi kakuti “ Kucita Zitondezyo Zikonzya Kugwasya Mukwasyi Wanu.”

16-17. Mbuti kucita zitondezyo mbokukonzya kugwasya bana?

¹⁶ Kucita zitondezyo kulakonzya kubagwasya Banakristo kucizyiba kwaamba twaambo tulimvwisya alimwi akucikonzya kupandulwida bamwi nzyobasyoma. Mulongo wazibalo zyakuti “Bakubusi balabuzya” uuli a jw.org ulabikkilizya  amapepa aakulembela aabakubusi. Mapepa aaya akabambilwa kubagwasya bakubusi kuba alusyomo muzintu nzyobasyoma alimwi akubagwasya kulibambila mbobakonzya kwiingula mumajwi aabo. Kwiinda mukubala mulongo wazibalo eezyi antoomwe amukwasyi, toonse tulakonzya kwiiya kulwiiminina lusyomo lwesu cabubombe, munzila iikweelelezya.

¹⁷ Mukubusi wazina lya Matthew ulapandulula mbokwakamugwasya kucita zitondezyo. Kacili cibeela cakukomba mumukwasyi, Matthew abazyali bakwe bakali kuvwuntauzya twaambo itwakali kulangilwa kubbuka mukkilasi. Wakaamba kuti: “Tulalanga-langa mibuzyo iikonzya kubuzyigwa mukkilasi, mpoonya tulailanga-langa kweelana abuvwuntauzi mbotwakacita. Ciindi nondituyeeya kabotu-kabotu twaambo ntondisyoma, cindipa kuba sicamba alimwi cilanduubila kuba mubombe ciindi nondicita zintu abamwi.

18. Ino lugwalo lwa Bakolose 4:6 lutondezya nzi?

¹⁸ Nokuba kuti tulakonzya kupandulula munzila iilimvwisya, kumwi katusinizyide, tabali boonse bakonzya kumvwa nzyotwaamba. Aboobo cikonzya kugwasya nkwaamba twaambo cabupampu alimwi cabubombe. (Amubale Bakolose 4:6.) Kwaambila muntu umwi nzyotusyoma inga kwakozyanisyigwa kukumufwusila bbola. Tulakonzya kumufwusila kabotu-kabotu naa canguzu buya. Ikuti twalifwusa kabotu-kabotu, ngotusobana limwi ulalangilwa kwiikwaba akuzumanana kusobana. Mbubwenya buyo, kuti katwaambaula cabupampu alimwi acabubombe, bantu inga kabalibambilide kutuswiilila alimwi akuzumanana amubandi. Mubwini, kuti muntu kayanda buyo kukazyanya, tatweelede kuzumanana amubandi. (Tus. 26:4) Pele bantu bamwi inga tabusyi mbobabede oobo. Mubwini, banabunji inga balayanda kwiiya.

19. Ncinzi ceelede kutukulwaizya kubomba moyo ciindi notwiiminina lusyomo lwesu?

¹⁹ Masimpe, tulagwasyigwa kapati ciindi notwiiya kutondezya kubomba moyo. Amupaile kuli Jehova kutegwa amupe nguzu zyakuzumanana kubomba moyo ciindi nomwiingula mibuzyo yamuntu uukazya naa uusampaula. Kamuyeeya kuti, kwiingula cabubombe kulakonzya kupa kuti mibandi mibotu itabi yakukazyanya buya. Amana buya, kwiingula cabubombe, alimwi acabulemu kulakonzya kupa bantu bamwi kucinca mbobatubona alimwi ambobakabona kasimpe. Kamulibambilide lyoonse kuliiminina kumuntu uuli woonse uukonzya kumubuzya kaambo kajatikizya” nzyomusyoma, “amucite boobo amoyo mubombe alimwi abulemu kapati.” (1Pet. 3:15) Inzya, amube amakanze aakutondezya kubomba moyo!