1. Ino Petro wakacita buti ciindi Jesu naakacita maleele kutegwa amugwasye kujaya nswi zinji?

 PETRO wakazela busiku boonse kakunyina kujaya nswi noiba yomwe. Cigambya ncakuti, Jesu wamwaambila kuti: “Katuya akati kazyiba, eelyo amuwaale nsabwe zyanu kutegwa mujaye nswi zinji.” (Lk. 5:4) Petro wakali kudooneka ikuti naa inga bajaya nswi ili yoonse, pele wakacita kweelana ambwaakamulailila Jesu. Petro alimwi abaalumi mbaakali kubeleka limwi bakajaya nswi zinji cakuti tunsabwe twakatalika kuyauka. Ciindi nobakazyiba kuti Jesu wacita maleele, “bakagambwa kapati.” Aboobo Petro wakaamba kuti: “Tantamuka kulindime O Mwami, nkaambo ndimuntu sizibi.” (Lk. 5:​6-9) Kweelede kuti Petro wakalimvwa kuti tanaakali kweelela kuba munsi-munsi a Jesu.   

2. Nkaambo nzi ncocigwasya kulindiswe kubikkila maano kucikozyanyo ca Petro?

² Petro wakaliluzi, nkaambo wakali ‘muntu sizibi.’ Magwalo atondezya kuti zimwi ziindi wakali kwaamba alimwi akucita zintu zyalo kumbele izyakali kumupa kuusa. Sena zimwi ziindi inga mulimvwa mbuli Petro? Sena kuli bube bumwi bubyaabi naa cilengwa camukatazya kuleka nokuba kuti mwasolekesya? Ikuti mboobo, mulakonzya kuumbulizyigwa acikozyanyo ca Petro. Mubuti? Amuyeeye kaambo aaka: Jehova naatakazumizya kuti kulubizya kwa Petro kulembwe mu Bbaibbele. Muciindi caboobo, kwakalembwa kwiinda mukusololelwa amuuya kutegwa twiiye. (2Tim. 3:​16, 17) Ciindi notwiiya kujatikizya kulezya kwa Petro alimwi ambwaakali kulimvwa, cilakonzya kutugwasya kubona kuti Jehova talangili kuti katucita zintu munzila  iilondokede. Aboobo uyanda kuti tutatyompwi pe, nokuba kuti tulalezya.

3. Nkaambo nzi ncotuteelede kutyompwa?

³ Nkaambo nzi ncotuteelede kutyompwa? Kuli kaambyo kakuti, “kalya uuzumanana.” Mucikozyanyo: Ikuti muntu umwi kayanda kwiiya kulizya kantimbwa cilakonzya kumutolela myaka minji. Muciindi eeco nali mukwiiya, ulakonzya kuti kalubizya ziindi zinji, pele ikuti taatyompwa inga wacikonzya. Nokuba kuti wacizyiba kulizya kantimbwa zimwi ziindi unoolubizya. Pele, takonzyi kutyompwa. Ulazumanana kukalizya kutegwa akazyibe kabotu. Mbubonya buyo, ikuti twalimvwa kuti twakuzunda kulezya kumwi, tulakonzya kulubizya alimwi. Pele tatuleki kubeleka canguzu kutegwa tusike ambaakani zyesu. Toonse tulaamba naa kucita zintu zikonzya kutupa kuusa; nokuba boobo, ikuti tiitwatyompwa Jehova ulakonzya kutugwasya kuyaambele. (1Pet. 5:10) Atubone Petro mbwaatakatyompwa. Luzyalo Jesu ndwaakamutondezya Petro nokuba kuti wakali kulubizya, lulakonzya kutukulwaizya andiswe kutegwa tuzumanane kubelekela Jehova.

4. Kweelana a Luka 5:​5-10, ino Petro wakalyaamba kuti wakali muntu uuli buti? Pele ino Jesu wakamwaambila nzi?

⁴ Magwalo taambi kaambo Petro ncaakalyaambila kuti ‘muntu sizibi’ naa kwaamba zibi nzyaakajisi mumizeezo. (Amubale Luka 5:​5-10.) Pele kweelede kuti wakacita zibi zipati. Jesu wakazyiba kuti Petro wakaliyoowede, andiza akaambo kakuti wakali kulimvwa kuti teeleli kujanika anguwe. Jesu alimwi wakalizyi kuti Petro wakali kukonzya kuzumanana kusyomeka. Aboobo Jesu caluzyalo wakaambila Petro kuti “utayoowi.” Akaambo kakuti Jesu wakali kumubikkila maano Petro cakapa kuti buumi bwakwe bucince. Petro alimwi amwanookwabo Andreya bakasiya mulimo wabo wakuzuba nswi akusangana Jesu mumulimo wakukambauka. Ncobakacita cakapa kuti Jehova abalongezye mumbazu zinji.—Mk. 1:​16-18.

5. Ino nzilongezyo nzi Petro nzyaakajana kwiinda mukuzunda buyoofwu alimwi akuzumina kutamba kwa Jesu?

⁵ Petro wakabona zintu zibotu zinji kali sikutobela Kristo. Wakabona Jesu kaponya bacisidwe, katanda madaimona, alimwi akubusya bafwide. b (Mt. 8:​14-17; Mk. 5:​37, 41, 42) Petro alimwi wakalibonena cilengaano ca Jesu kali Mwami wa Bwami bwa Leza. Kunyina Petro naakaciluba eeci cakacitika. (Mk. 9:​1-8; 2Pet. 1:​16-18) Inzya, Petro naatakazyibona  zintu eezyi ikuti naatakamutobela Jesu. Cakutadooneka wakalikkomene kuti tanaakazumizya mizeezo iitali kabotu kumulesya kulibonena zilongezyo eezyi.

6. Sena Petro wakakuzunda mukaindi kaniini kulezya kwakwe? Amupandulule.

⁶ Nokuba kuti wakalibonena zintu eezyi, Petro wakacili kupenga akaambo kakulezya kwakwe. Amulange-lange zikozyanyo eezyi zisyoonto buyo. Ciindi Jesu naakali kupandulula kujatikizya mbwaakali kuyoopenga alimwi akufwa kutegwa businsimi bwamu Bbaibbele buzuzikizyigwe, Petro wakaambila Jesu kuti eeci tiicakali kuyoomucitikila. (Mk. 8:​31-33) Cakwiinduluka-induluka, Petro alimwi abaapostolo bamwi bakali kukazyanya kujatikizya wakali mupati akati kabo. (Mk. 9:​33, 34) Busiku katanafwa Jesu, Petro cabukali wakakosola kutwi kwamwaalumi umwi. (Joh. 18:10) Busiku mbubonya oobo, Petro wakayoowa kapati kujatikizya zintu bantu nzyobakali kumuyeeyela cakuti wakamukaka Jesu ziindi zyotatwe. (Mk. 14:​66-72) Eeci cakapa kuti Petro alile kapati.—Mt. 26:75.

7. Ino ncoolwe nzi Petro ncaakapegwa ciindi Jesu naakabusyigwa?

⁷ Jesu kunyina naakamutantamuka mwaapostolo ooyu iwakatyompedwe kapati. Naakabusyigwa, Jesu wakapa Petro coolwe cakutondezya mbwaakali kumuyanda. Kuyungizya waawo, wakapa Petro mukuli wakweembela tubelele twakwe. (Joh. 21:​15-17) Petro wakalilibambilide kucita zyoonse Jesu nzyaakamwaambila. Aboobo wakali akati kabaabo bakasaanguna kunanikwa amuuya uusalala mu Jerusalemu mubuzuba bwa Pentekoste.

8. Ino nkulubizya nzi kupati Petro nkwaakacita naakali ku Antiokeya?

⁸ Nociba ciindi naakaba Munakristo munanike, Petro wakacili kulwana kulezya kwakwe. Mu 36 C.E., Leza wakatuma Petro kuli Korneliyo iwatakali mu Juda, okuya Leza wakananika Korneliyo amuuya uusalala, ibumboni bukkwene bwakuti “Leza tasalululi” alimwi aabo ibatakali ba Juda bakali kukonzya kuzulilwa mumbungano ya Bunakristo. (Mil. 10:​34, 44, 45) Kuzwa leelyo Petro wakatalika kulya antoomwe abamasi, cintu ncaatakali kukonzya kucita musyule. (Gal. 2:12) Nokuba boobo, Banakristo ba Juda bamwi bakali kulimvwa kuti tiibakeelede kulya a Banakristonyina Bamasi. Bamwi ibakali kubona zintu munzila eeyi nobakaboola ku Antiokeya, Petro wakaleka kulya a Banakristonyina Bamasi, kweelede kuti wakali kuyoowa kufwumpuzya Banakristo ba Juda. Mwaapostolo Paulo wakakubona kuupa-upa ameso ooku aboobo wakamululamika Petro aabuleya. (Gal. 2:​13, 14) Nokuba kuti wakalubizya, Petro tanaakatyompwa pe. Ino ncinzi cakamugwasya?

9. Mbuti lugwalo lwa Johane 6:​68, 69 mbolutondezya kusyomeka kwa Petro?

⁹ Petro wakali kusyomeka; tanaakalekela cintu cili coonse kumutyompya cakumaninina. Wakatondezya kuti ulasyomeka aciindi cimwi Jesu naakaamba cintu cimwi ncobatakamvwisya basikwiiya bakwe. (Amubale Johane 6:​68, 69.) Kakunyina kulindila naa kuyandaula bupanduluzi, banji bakacileka kutobela Jesu. Pele kutali Petro. Wakali kusyomeka alimwi wakaamba kuti Jesu alikke ngowakajisi “majwi aapa buumi butamani.”

10. Mbuti Jesu mbwaakatondezya kuti wakali kumusyoma Petro? (Amubone acifwanikiso.)

¹⁰ Jesu kunyina naakamulekelezya Petro. Mubusiku bwamamanino anyika, Jesu wakalizyi kuti Petro alimwi abaapostolo bamwi bakali kuyoomutija. Nokuba boobo, Jesu wakali aalusyomo lwakuti Petro wakali kuyoopiluka  akuzumanana kusyomeka. (Lk. 22:​31, 32) Jesu wakalizyi kuti “moyo . . . ulapya, pele mubili unyina nguzu.” (Mk. 14:38) Nokuba kuti Petro wakamukaka kuti tamuzyi, Jesu kunyina naakacileka kumukkomanina mwaapostolo ooyu. Ciindi Jesu naakabusyigwa wakalibonya kuli Petro, kweelede kuti aciindi eeci Petro wakali alikke. (Mk. 16:7; Lk. 24:34; 1Kor. 15:5) Amuciyeeyele buyo eeci mbocakamuyumya Petro iwakauside akaambo kancaakacita!

11. Mbuti Jesu mbwaakamusyomezya Petro kuti Jehova wakali kuyoomugwasya?

¹¹ Jesu wakasyomezya Petro kuti Jehova wakali kuyoomulanganya. Jesu iwakabusyigwa wakacitila Petro alimwi abaapostolo bakwe maleele aakujaya nswi. (Joh. 21:​4-6) Cakutadooneka maleele aaya akamupa kusyoma kuti Jehova wakali kuyoomupa zintu nzyaakali kuyandika kumubili. Kweelede kuti mwaapostolo wakaayeeya majwi aa Jesu aakuti Jehova wakali kuyoobalanganya aabo bazumanana “kusaanguna kuyandaula Bwami.” (Mt. 6:33) Zyoonse eezyi zyakagwasya Petro kubikka mulimo wakukambauka mubusena bwakusaanguna kutali mulimo wakuzela nswi. Wakakambauka cabusicamba mubuzuba bwa Pentekoste 33 C.E., kugwasya bantu banji kutambula makani mabotu. (Mil. 2:​14, 37-41) Mukuya kwaciindi wakagwasya ba Samariya alimwi abamasi kuzumina Kristo. (Mil. 8:​14-17; 10:​44-48) Cakutadooneka Jehova wakamubelesya kapati Petro mukuleta bantu bamisyobo yoonse mumbungano.

12. Mbuti cikozyanyo ca Petro mbocikonzya kutugwasya ikuti katulwana penzi limwi kwaciindi cilamfwu?

¹² Jehova ulakonzya kutugwasya kuti tutatyompwi. Talili lyoonse nocili cuuba-uba, kwaambisya ikuti twali kukatazyigwa apenzi lyomwe kwaciindi cili mbocibede. Zimwi ziindi, mapenzi eesu inga kaalibonya mbuli kuti alakatazya kwiinda yaayo ngaakajana Petro. Pele Jehova ulakonzya kutupa nguzu zyakuti tutatyompwi. (Int. 94:​17-19) Mucikozyanyo, mukwesu umwi katanaiya kasimpe wakali koonana abaaluminyina kwamyaka minji. Buumi bwakwe bwakacinca cakumanina akutalika kupona kweelana azyeelelo zyamu Bbaibbele. Nokuba boobo, zimwi ziindi wakacili kupenga akulombozya kutali kabotu. Ncinzi cakapa kuti atatyompwi? Wakaamba kuti: “Jehova wakandiyumya.” Wakayungizya kuti: “Kwiinda mumuuya wa Jehova . . . , ndakaiya kuti cilakonzyeka kuzumanana kupona  kweelana a Jehova mbwayanda kuti katupona . . . Jehova ulandibelesya, alimwi nokuba kuti tandilondokede wazumanana kundiyumya.”

13. Mbuli mbokulembedwe kulugwalo lwa Milimo 4:​13, 29, 31, mbuti mbotukonzya kwiiya cikozyanyo ca Petro? (Amubone acifwanikiso.)

¹³ Mbuli mbotwabona, Petro wakacita zibi zipati akaambo kakuti wakali kuyoowa bantu. Pele kwiinda mukupaila, Petro wakali kukonzya kucita zintu cabusicamba. (Amubale Milimo 4:​13, 29, 31.) Andiswe tulakonzya kubuzunda buyoofwu mbotujisi. Amubone cakacitikila mukwesu wazina lya Horst, iwakali kukkala ku Nazi Germany. Ziindi zinji, wakali kuzumina kuyungwa abeenzinyina kucikolo akwaamba kuti “Aatembaulwe Hitler!” Muciindi cakumunyemena, bazyali bakwe bakapaila anguwe kulomba Jehova kuti amupe busicamba. Kwiinda mulugwasyo lwabazyali bakwe alimwi akusyoma Jehova, mukuya kwaciindi mukwesu Horst wakayuma akwiima nji. Kumbele, wakaamba kuti: “Jehova tanaakandilekelezya pe.” c

14. Ino mbuti beembezi mbobakonzya kukulwaizya baabo batyompedwe?

¹⁴ Jehova alimwi a Jesu kunyina nobayootulekelezya pe. Kuzwa ciindi Petro naakamukaka Jesu, wakeelede kusala. Sena wakeelede kuleka, naa kuzumanana kuba sikwiiya wa Kristo? Jesu wakakombelezya Jehova kuti lusyomo lwa Petro lutamani. Aboobo wakamwaambila kujatikizya mupailo ooyo alimwi wakatondezya kuti wakali kumusyoma Petro akuti kumbele wakali kuyoobayumya-yumya ibanyina. (Lk. 22:​31, 32) Kweelede kuti Petro wakayumizyigwa amajwi aa Jesu! Ciindi notuyandika kusala mubuumi, Jehova ulakonzya kubelesya beembezi bakonzya kutuumbulizya kutegwa tuzumanane kusyomeka. (Ef. 4:​8, 11) Mwaalu  wabeleka kwamyaka minji wazina lya Paul ulasolekesya kupa luumbulizyo oolo. Ulabandika abaabo balimvwa kuti bayanda kuleka kubelekela Jehova akubayeezya mbwaakabakwela kukasimpe. Mpoonya ulabakulwaizya kuti luyando lutamani lwa Jehova talukamuzumizyi kuti abalekelezye. Wakamanizya amajwi aakuti, “Ndakabona kale bantu banji batyompedwe kabazumanana kumubelekela Jehova.”

15. Ino mbuti cikozyanyo ca Petro alimwi acamukwesu Horst mbocitondezya mbwaali aamasimpe majwi aali kulugwalo lwa Matayo 6:33?

¹⁵ Mbubonya Jehova mbwaakamupa zintu nzyaakali kuyandika Petro alimwi abaapostolo bamwi, andiswe uyootupa nzyotuyandika ikuti twasaanguna kuyandaula Bwami mubuumi bwesu. (Mt. 6:33) Noyakainda Nkondo Yabili Yanyika Yoonse, mukwesu Horst iwaambwa kale, wakayeeya kucita bupainiya. Wakali mucete, nokuba boobo, wakali kudooneka kuti naa inga wacikonzya kujana mali aakuligwasyilizya akuzumanana amulimo waciindi coonse. Ino wakacita buti? Wakasola kumusunka Jehova, aboobo wakali kuunka mubukambausi nsondo yoonse ciindi naakabaswaide mulangizi wabbazu. Kumamanino aansondo, wakagambwa ciindi mulangizi wabbazu naakamupa mvwulupu yakajisi mali, pele tanaakamwaambila nkwaakazwa mali aayo. Mali aayo akali kukonzya kumugwasyilizya mumulimo wakwe kwamyezi minji. Mukwesu Horst wakabona kuti eeci ncisinizyo cakuti Jehova ulakonzya kumulanganya. Mubuumi bwakwe boonse, wakazumanana kusaanguna kuyandaula Bwami.—Malk. 3:10.

16. Nkaambo nzi ncociyandika kapati kulindiswe kwiiya kujatikizya Petro alimwi anzyaakalemba mumagwalo aakwe?

¹⁶ Eelo kaka kweelede kuti Petro wakakkomana kapati kuti Jesu kunyina naakamutantamuka, kweelana ambwaakalombede kumatalikilo! Kristo wakazumanana kuyiisya Petro kuba mwaapostolo uusyomeka alimwi akuba cikozyanyo cibotu ku Banakristo. Kuli ziiyo zinji ziyandika kapati nzyotukonzya kwiiya toonse kulwiiyo oolu. Petro wakazyaamba ziiyo zimwi mumagwalo obilo ngaakatumina mbungano yamumwaanda wamyaka wakusaanguna. Mucibalo citobela tuyoobandika ziyeekezyo zimwi kuzwa mumagwalo aaya alimwi ambotukonzya kuzibelesya mazuba aano.