1. Ino ncinzi Jehova ncaakamupa kucita Petro kumamanino aabuumi bwakwe?

 MWAAPOSTOLO Petro wakamubelekela Jehova cakusyomeka kwamyaka minji. Wakabeleka a Jesu mumulimo wakukambauka, wakatalisya nzila zipya zyabukambausi nkokuti kukambaukila bamasi alimwi kumbele wakabeleka mukabunga keendelezya. Kumamanino aabuumi bwakwe, Jehova wakamupa mulimo mupati wakucita. Kuma 62-64 C.E., Jehova wakamubelesya kulemba magwalo obilo aamu Bbaibbele, nkokuti lugwalo lwa Petro lwakusaanguna alimwi alwabili. Petro wakali kulangila kuti magwalo aayo akali kuyoobagwasya Banakristo aakufwa.—2Pet. 1:​12-15.

2. Nkaambo nzi magwalo ngaakalemba Petro ncaakali kuyandika?

² Petro wakalemba magwalo aayo ciindi Banakristonyina nobakali ‘kupenzyegwa amasunko aaindene-indene.’ (1Pet. 1:6) Baalumi babyaabi bakali kusola kuleta njiisyo zyakubeja alimwi abukkale busofweede mumbungano ya Bunakristo. (2Pet. 2:​1, 2, 14) Banakristo ibakali kukkala mu Jerusalemu muciindi cisyoonto buyo bakali kuyakwaabona “mamanino aazintu zyoonse,” nkokuti kunyonyoonwa kwabweende bwazintu bwaci Roma. (1Pet. 4:7) Tacidoonekwi buya kuti magwalo aa Petro akabagwasya Banakristo kuzyiba ncobakeelede kucita kutegwa baliyumye kumapenzi ngobakajisi alimwi akulibambila yaayo aakali kulangilwa kumbele. b

3. Nkaambo nzi ncotweelede kwaalanga-langa magwalo aa Petro?

 ³ Nokuba kuti Petro wakalembela Banakristo bakuciindi ncaakali kupona, Jehova wakasala kuti nzyaakalemba zibikkilizyigwe mu Jwi Lyakwe. Akaambo kaceeci, andiswe tulakonzya kugwasyigwa amagwalo aaya mazuba aano. (Rom. 15:4) Mbubwenya mbuli Banakristo bakaindi, andiswe tupona munyika iizwide micito iitasalali calo cikonzya kutupa kuti cituyumine kubelekela Jehova. Kuyungizya waawo, lino-lino tuyoobona mapenzi mapati aatakonzyi kweezyanisyigwa aayaayo aakasololela kulunyonyooko lwaba Juda. Mumagwalo obilo aa Petro tujana ziyeekezyo ziyandika kapati kulindiswe. Ziyeekezyo eezyi zilatugwasya kulibambila kusika kwabuzuba bwa Jehova, kucileka kuyoowa bantu alimwi ambotukonzya kubayanda kapati bakwesu abacizyi. Ziyeekezyo zili boobu alimwi zilakonzya kubagwasya baalu kubona mbobakonzya kubagwasya bakwesu abacizyi mumbungano kutegwa bayume kumuuya.   

4. Kweelana ambokutondezyedwe kulugwalo lwa 2 Petro 3:​3, 4, ncinzi cikonzya kunyonganya lusyomo lwesu?

⁴ Tupona munyika iizwide bantu batasyomi ncolyaamba Bbaibbele kujatikizya ziyoocitika kumbele. Basikukazya balakonzya kutufwubaazya akaambo kakuti kwamyaka minji twali kwaamba kuti mamanino alaboola. Bantu bamwi mane baamba kuti mamanino kunyina naayooboola. (Amubale 2 Petro 3:​3, 4.) Ikuti majwi aayo twaamvwa kumuntu ngotukambaukila, mubelesima naa munamukwasyi, lusyomo lwesu inga lwasunkwa. Nokuba boobo, Petro wakacaamba cikonzya kutugwasya.

5. Ncinzi cikonzya kutugwasya kulindila mamanino aabweende bwazintu obuno cakukkazika moyo? (2 Petro 3:​8, 9)

⁵ Kuli bamwi, cilakonzya kulibonya kuti Jehova wamuka kuleta mamanino aanyika eeyi mbyaabi. Pele majwi aa Petro alakonzya kutugwasya kuzibona kabotu zintu nkaambo atuyeezya kuti Jehova uliindeene kapati abantu caboola kuli mbwacibona ciindi. (Amubale 2 Petro 3:​8, 9.) Myaka iili 1,000 ili mbuli buzuba bomwe kulinguwe. Jehova ulakkazika moyo akaambo kakuti tayandi kuti muntu uli woonse akanyonyoonwe. Pele buzuba bwakwe bwaakusika, nyika eeyi iyoomana. Eelo kaka tulijisi coolwe cakubelesya ciindi eeci cisyeede kukambaukila bantu bazisi zyoonse!

6. Mbuti mbotukonzya ‘kunoobuyeeyesya’ buzuba bwa Jehova? (2 Petro 3:​11, 12)

⁶ Petro utukulwaizya ‘kubuyeeyesya’ buzuba bwa Jehova. (Amubale 2 Petro 3:​11, 12.) Mbuti mbotukonzya kucita oobo? Abuzuba tulakonzya kuzinzibala kuyeeya buumi mbobunookkomanisya munyika mpya. Amweezyeezye kuti muyoya muuya mubotu, mulya zyakulya zijisi busani, mutambula bayandwa banu bakafwa kababusyigwa kuzwa kubafwu alimwi muyiisya bantu bakali kupona kaindi kujatikizya kuzuzikizyigwa kwabusinsimi bwamu Bbaibbele. Kucita boobo kulakonzya kumugwasya kulindila caluyandisisyo kusika kwabuzuba oobo alimwi akusinizya kuti tupona mumazuba aamamanino. Kuba ‘aluzyibo oolu’ kujatikizya zyakumbele, alimwi kulakonzya kutugwasya kutegwa ‘tutaleyi’ akaambo kakuyungwa abamayi bakubeja.—2Pet. 3:17.

7. Mbuti sunko lyakuyoowa bantu mbolikonzya kutujatikizya?

⁷ Tulakulwaizyigwa kwaambilizya makani mabotu kuli bamwi akaambo kakuti tulizyi kuti buzuba bwa Jehova bwaswena afwaafwi. Pele zimwi ziindi tulakonzya kuyoowa kukambauka. Nkaambo nzi? Akaambo kakuyoowa bantu. Eeci ncecakamucitikila Petro. Busiku naakali kubetekwa Jesu, Petro wakaalilwa kulizyibya  kuti wakali umwi wabasikwiiya ba Jesu mane buya akusika antaamu yakumukaka! (Mt. 26:​69-75) Pele Petro wakalizunda penzi eeli lyakuyoowa bantu akulemba kuti: “Mutayoowi ncobayoowa balo, nokuba kunyongana.” (1Pet. 3:14) Majwi aa Petro atupa kuba alusyomo lwakuti tulakonzya kulizunda sunko lyakuyoowa bantu.

8. Ncinzi cikonzya kutugwasya kucileka kuyoowa bantu? (1 Petro 3:15)

⁸ Ncinzi cikonzya kutugwasya kuzunda sunko lyakuyoowa bantu? Petro utwaambila kuti: “Mumyoyo yanu amubone Kristo kuti Mwami.” (Amubale 1 Petro 3:15.) Tweelede kuliyeezya kuti Kristo Jesu Mwami wesu akuti ulijisi nguzu zinji. Ikuti mwajana coolwe cakukambauka pele kamuyoowa, amuyeeye Mwami wesu. Amweezyeezye kuti mulimubwene kalela kujulu kumwi kazungulukidwe amamiliyoni aabangelo. Amuyeeye kuti ulijisi “nguzu zyoonse kujulu alimwi aanyika” akuti ‘unooli aandiswe mazuba oonse mane kusikila kumamanino aabweende bwazintu.’ (Mt. 28:​18-20) Petro utukulwaizya kuti ‘katulibambilide lyoonse’ kwiiminina nzyotusyoma. Tulakonzya kukambauka kumulimo, kucikolo naa kumbi buyo. Amuyeeyele limwi ciindi nomukonzya kucita boobo mpoonya akulibambila ncomukonzya kwaamba. Amupaile kulomba lugwasyo alimwi akuba alusyomo lwakuti Jehova uyoomugwasya kuzunda sunko lyakuyoowa bantu.—Mil. 4:29.

9. Mbuti Petro aciindi cimwi mbwaakaalilwa kutondezya luyando? (Amubone acifwanikiso.)

⁹ Petro wakazwidilila kapati mumakani aakutondezya luyando. Wakaliko ciindi Jesu naakamba kuti: “Ndimupa mulawo mupya, wakuti muyandane; mbubonya mbondali kumuyanda, amuyandane mbubonya anywebo.” (Joh. 13:34) Nokuba boobo, kumbele Petro wakakaka kulya a Banakristonyina Bamasi akaambo kakuyoowa Banakristonyina ba Juda. Mwaapostolo Paulo wakaamba ncaakacita Petro kuti ‘nkulicengeezya’ naa kuupaupa ameso. (Gal. 2:​11-14) Petro wakakutambula kululamika kwa Paulo alimwi wakacinca. Mumagwalo aakwe obilo wakalemba kuti tweelede kulitondezya ncobeni kuti tulabayanda kapati bakwesu abacizyi.

10. Ncinzi citugwasya kutondezya “luyando lwabunyina ilutali lwakuupaupa ameso”?

¹⁰ Petro wakalemba kuti tweelede kuba “aluyando lwabunyina ilutali lwakuupaupa ameso” kubakwesu abacizyi mumbungano. (Amubale 1 Petro 1:22.) Tuyooba aluyando oolu ikuti twabikkila maano ‘kuswiilila kasimpe’ nkotwiiya. Kasimpe aaka kabikkilizya njiisyo yakuti “Leza tasalululi.” (Mil. 10:​34, 35) Tatukonzyi kutondezya kuti tulamvwida kumulawo wa Jesu uujatikizya luyando ikuti katutondezya buyo luyando kuli bamwi mumbungano mpoonya bamwi katutababikkili maano. Masimpe kuti inga katumvwana kapati abamwi mbuli mbwaakali kucita Jesu. (Joh. 13:23; 20:2) Pele Petro utuyeezya kuti tweelede kubayanda boonse bakwesu abacizyi nkaambo ncibeela camukwasyi wesu.—1Pet. 2:17.

11. Ino caamba nzi kuyanda bamwi “kapati”?

¹¹ Petro wakatukulwaizya kuti ‘katuyandana kapati kuzwa ansi aamoyo.’ Mukapango aaka, kuyandana “kapati” caamba kuyanda muntu umwi nokuba kuti inga kacili ciyumu kucita boobo. Mucikozyanyo, ino mbuti kuti mukwesu watulubizyila naa kutunyemya? Cintu cakusaanguna ncotukonzya kuyeeya kucita akaambo kakutalondoka nkupilusizya cibi muciindi cakumulekelela. Pele Petro wakaiya kuli Jesu kuti kupilusya cibi takumukkomanisyi Leza. (Joh. 18:​10, 11) Wakalemba kuti: “Mutapilusyi cibi kucibi naa matusi kumatusi. Muciindi caboobo, amuleleke.”(1Pet. 3:9) Ikuti kamubayanda kapati bakwesu abacizyi, muyoocikonzya kutondezya luzyalo kuli baabo bamulubizyila.

12. (a) Ino kubayanda kapati bamwi kuyootukulwaizya kucita nzi cimbi? (b) Ino ncinzi ncomukanzide kucita kweelana amboitondezya vidiyo yakuti Amucikwabilile Cipego Citaliboteli Calukamantano?

¹² Mulugwalo lwakwe lwakusaanguna, Petro wakabelesya bbala lyakuti “amuyandane kapati.” Luyando lwamusyobo ooyu taluvwumbi buyo zibi zisyoonto pe, pele “lulavwumba zibi zinji kapati.” (1Pet. 4:8) Kweelede kuti Petro wakacili kuciyeeya ciiyo ncaakamuyiisya Jesu cakulekelela. Aciindi cimwi Petro wakali kuyeeya kuti wakali muntu uuli kabotu naakaamba kuti wakali kukonzya kumulekelela munyina “ziindi zili ciloba.” Pele Jesu wakamuyiisya walo alimwi andiswe toonse kuti tweelede kulekelela “kusikila kuziindi zili 77,” icaamba kuti tatweelede kubala buya. (Mt. 18:​21, 22) Ikuti kacimukatazya kulubelesya lulayo oolu, mutatyompwi pe! Toonse tobabelesi ba Jehova zimwi ziindi tulajana buyumuyumu bwakulekelela bamwi. Ciyandika kapati kulindiswe nkucita kufwumbwa ncotukonzya lino kutegwa tumulekelele mukwesu naa mucizyi alimwi akubamba luumuno anguwe. c

13. Nkaambo nzi ncocikonzya kukatazya kubaalu kujana ciindi cakukulwaizya Banakristonyina?

¹³ Petro kunyina naakaaluba majwi ngaakaamba Jesu ciindi naakabusyigwa aakuti:  “Koembela tubelele twangu.” (Joh. 21:16) Ikuti kamuli mwaalu, nkokuti mulizyi kuti malailile aayo alabeleka akulindinywe. Nokuba boobo, cilakonzya kukatazya kumwaalu kujana ciindi cakuzuzikizya mukuli ooyu uuyandika kapati. Baalu beelede kusaanguna kulanganya ziyandika zyakumuuya akumubili zyamikwasyi yabo. Alimwi inga bajisi bubi kutola lubazu mumulimo wakukambauka; kulibambila akutola lubazu mumiswaangano yambungano, yabbazu alimwi ayacooko. Bamwi balagwasyilizya kubeleka muma Kkomiti aa Hospital Liaison naa kubeleka aba LDC. Masimpe baalu mbantu bajisi bubi kapati!

14. Ino ncinzi cikonzya kukulwaizya baalu kweembela butanga? (1 Petro 5:​1-4)

¹⁴ Petro wakakulwaizya baalunyina kuti: “Amweembele butanga bwa Leza.” (Amubale 1 Petro 5:​1-4.) Ikuti kamuli mwaalu, tulizyi kuti mulabayanda kapati Banakristonyoko akuti muyanda kubagwasya. Nokuba boobo, zimwi ziindi mulakonzya kulimvwa kuti mujisi bubi kapati naa mulikatede cakuti tamukonzyi kuuzuzikizya mukuli wanu. Ino ncinzi ncomukonzya kucita mubukkale buli oobu? Amwaapailile makani aaya aamulibilisya kuli Jehova. Petro wakalemba kuti: “Ikuti naa kuli uukanana, aakanane mbuli yooyo waamba majwi aazwa kuli Leza; ikuti naa kuli uubeleka, abeleke kasyomede nguzu nzyapa Leza.” (1Pet. 4:11) Banakristonyoko inga kabajisi mapenzi aatalangilwi kumana mubweende bwazintu obuno. Pele kamuyeeya kuti Jesu Kristo ‘imweembezi silutwe’ ulakonzya kubagwasya kapati kwiinda mbomukonzya kucita. Ulakonzya kubagwasya lino alimwi amunyika mpya. Jehova uyanda buyo kuti baalu kababayanda Banakristonyina, kababalanganya kabotu alimwi akuba “zikozyanyo kubutanga.”

15. Ino mwaalu umwi ubalanganya buti bakwesu abacizyi? (Amubone acifwanikiso)

¹⁵ Ba William, mukwesu iwabeleka kali mwaalu kwamyaka minji wakakabona kaambo bweembezi ncobuyandika kapati. Bulwazi bwa COVID-19 nobwakatalika, walo alimwi abaalunyina bakabikka bubambe bwakunootumina fooni sikumwaya umwi aumwi mvwiki iili yoonse. Wakaamba kuti: “Bakwesu banji bakali kukkala buyo balikke aŋanda, aboobo cakali cuubauba kulimbabo kutalika kuba amizeezo iitali kabotu.” Ikuti mukwesu naa mucizyi kajisi penzi, mukwesu William wakali kuswiilila cakubikkila maano kutegwa acikonzye kuzyiba zimulibilisya  alimwi acikonzya kumugwasya. Kumane ulalangaula zyakumwaya naa mavidiyo kuzwa awebbusaiti yesu ngakonzya kubelesya kumugwasyilizya mukwesu naa mucizyi. Wakaamba kuti: “Bweembezi bulayandika kapati lino kwiinda lyoonse. Inga tulabeleka canguzu kugwasya bantu kutegwa bamuzyibe Jehova; oobo mbotweelede kubeleka caboola kukugwasya bakwesu abacizyi kuti bazumanane kuba mukasimpe.”

16. Muunzila nzi motukonzya kubelesya nzyotwaiya kuzwa mumagwalo aa Petro?

¹⁶ Twabandika buyo ziiyo zisyoonto kuzwa mumabbuku obilo ngaakalemba Petro. Ambweni kuli mumbazu imwi motwabona kuti tuyandika kubambulula. Mucikozyanyo, sena mulakonzya kuyungizya ziindi nzyomuzinzibala kuyeeya kujatikizya zilongezyo nzyotuyootambula munyika mpya? Sena mulijisi mbaakani yakukambauka kumulimo, kucikolo naa mubukkale bumwi? Sena kuli mbazu nzyomubona kuti mulakonzya kuyungizya caboola kumakani aakutondezya luyando kubakwesu abacizyi? Nobaalu, sena mulikanzide kweembela butanga bwa Jehova caluyandisisyo? Kulilingula kwamusyobo ooyo kulakonzya kuyubununa kulezya kumwi mulindiswe, pele mutatyompwi pe. “Mwami ngusiluzyalo,” alimwi ulakonzya kumugwasya mumbazu momutaciti kabotu. (1Pet. 2:3) Petro utusyomezya kuti: “Leza . . . walo mwini uyoomanizya lwiiyo lwanu. Uyoomuzyatika, uyoomuyumya akumwiimika nji.”—1Pet. 5:10.

17. Ino ncinzi ciyoocitika ikuti twaliyumya akuzumizya Jehova kutuyiisya?

¹⁷ Petro kumatalikilo wakali kulibona kuti tanaakali kweelela kuba munsi-munsi a Mwana wa Leza. (Lk. 5:8) Pele kwiinda mukugwasyigwa a Jehova alimwi a Jesu, Petro wakacikonzya kuba sikutobela Jesu uusyomeka. Aboobo Petro wakazumizyigwa ‘kunjila mu Bwami butamani bwa Mwami a Mufwutuli wesu Jesu Kristo.’ (2Pet. 1:11) Eelo kaka kubota bulumbu oobu! Ikuti mwazumanana andinywe kuliyumya mbuli mbwaakacita Petro, muyootambula bulumbu bwabuumi butamani. Inzya muyoosika “ambaakani yalusyomo lwanu, nkokuti lufwutuko lwanu.”—1Pet. 1:9.