1. Ino muubukkale buli buti mwaakalijana Jehoasi, Uziya, alimwi a Josiya?

 AMWEEZYEEZYE buyo kuba mwami wabantu ba Leza kamuli mwana naa mukubusi! Ino inga mwazibelesya buti nguzu zyanu? Bbaibbele lilatwaambila kujatikizya bana bali mbobabede ibakaba bami ba Juda. Mucikozyanyo, Jehoasi wajisi myaka iili 7, Uziya wakajisi myaka iili 16, mpoonya Josiya wakajisi myaka iili 8. Amuyeeye buyo mbobakayoowede! Nokuba kuti tiicakali cuuba-uba, Jehova alimwi abamwi bakabagwasya kucita zintu zinji mubuumi bwabo.

2. Nkaambo nzi ncotweelede kucibikkila maano cikozyanyo ca Jehoasi, Uziya, alimwi a Josiya?

² Nokuba kuti tatuli bami naa banamalelo, tulakonzya kwiiya ziiyo zinji kuzwa kuli Jehoasi, Uziya alimwi a Josiya. Bakasala cabusongo, pele kulubazu lumwi tiibakasala kabotu. Kuzikozyanyo zyabo, tulabona kaambo mbociyandika kusala kabotu balongwe, kulicesya, alimwi akulomba busolozi bwa Jehova.

3. Mbuti Jehoyada mbwaakagwasya Mwami Jehoasi kusala camaano?

³ Amwiiye kusala camaano nkwaakacita Jehoasi. Ciindi Jehoasi naakali mwana, bausyi bakafwa, kumane Mupaizi Mupati Jehoyada wakamulela akumuyiisya kujatikizya Jehova. Aboobo Jehoasi wakasala camaano akaambo kakuti wakali kuswiilila kululayo ndwaakali kupegwa a Jehoyada. Akaambo kacikozyanyo cibotu ca Jehoyada, Jehoasi wakasala kubelekela Jehova alimwi akugwasya bantu kuti abalo babelekele Jehova. Mane buya wakabikka bubambe bwakuti tempele lya Jehova liyakululwe.—2Mak. 24:​1, 2, 4, 13, 14.

4. Ino tugwasyigwa buti kuti katwiiyanda alimwi akwiitobela milawo ya Jehova? (Tusimpi 2:​1, 10-12)

⁴ Nobana, kuti bazyali naa aabo ibamulela kabamuyiisya kuyanda Jehova alimwi akupona kweelana azyeelelo zyakwe, nkokuti bamupa cipego ciyandika kapati. (Amubale Tusimpi 2:​1,  10-12.) Bazyali naa aabo ibamulela balakonzya kumuyiisya munzila zinji. Amubone bausyi bamucizyi Katya mbobakamugwasya kusala camaano mubuumi. Abuzuba nobakali kumutola kucikolo, bakali kubandika lugwalo lwabuzuba oobo anguwe. Wakaamba kuti: “Mibandi iili boobu, yakali kundigwasya kucita cintu ciluzi ciindi nokwaba mapenzi buzuba oobo.” Aboobo, ino mbuti kuti ilulayo luyeeme aa Bbaibbele ndobamupa bazyali banu naa aabo ibamulela kalulibonya mbuli kuti lumumanina lwaanguluko? Ncinzi cikonzya kumugwasya kulutambula lulayo lwabo? Mucizyi Anastasia utwaambila kuti, bazyali bakwe bakali kumupandulwida ncobakali kubikkila milawo imwi. Wakaamba kuti: “Bazyali bakali kundigwasya kubona kuti tiibakali kubikka milawo eeyi kuti indimanine lwaanguluko, pele bakali kundikwabilila buya akaambo kakuti balandiyanda.”

5. Ino micito yanu inga yabajatikizya buti bazyali banu alimwi a Jehova? (Tusimpi 22:6; 23:​15, 24, 25)

⁵ Ciindi nomulubelesya lulayo lwamu Magwalo, muyoopa kuti bazyali banu bakkomane. Kwiinda zyoonse, muyookkomanisya Leza alimwi muyooba acilongwe ciyumu anguwe. (Amubale Tusimpi 22:6; 23:​15, 24, 25.) Eelo kaka ootu ntwaambo itweelede kumupa kwiiya cikozyanyo ca Jehoasi ciindi naakali mwana!   

6. Ino ndulayo lwabani Jehoasi ndwaakatalika kuswiilila, alimwi ncinzi cakatobela? (2 Makani 24:​17, 18)

⁶ Amwiiye kukulubizya kwa Jehoasi. Naakafwa Jehoyada, Jehoasi wakasala balongwe batali kabotu. (Amubale 2 Makani 24:​17,18.) Wakasala kuswiilila basilutwe ba Juda, balo ibatakali kumuyanda Jehova. Mubwini Jehoasi wakeelede kubatantamuka balongwe bali boobu, kayi bakali kucita zintu zibyaabi. (Tus. 1:10) Pele muciindi caboobo, walo wakasala kutobela lulayo lwabo lubyaabi. Aboobo, ciindi Zekariya imweeninyina Jehoasi naakasola kumululamika, Jehoasi wakapa kuti ajaigwe. (2Mak. 24:​20, 21; Mt. 23:35) Eelo kaka wakafwubaala! Jehoasi wakali kupona buumi buli kabotu kumatalikilo, pele kumamanino wakaba siluleyo alimwi mujayi, calo cakapa kuti ajaigwe ababelesi bakwe. (2Mak. 24:​22-25) Ikuti naakazumanana kuswiilila Jehova alimwi abaabo ibamuyanda, naakapona buumi buli kabotu. Ino nciiyo nzi ncomuyanda kwiiya kucikozyanyo eeci?

7. Mbaani mbomukonzya kusala kuba balongwe banu? (Amubone acifwanikiso)

⁷ Ciiyo cimwi ncotukonzya kwiiya kuzwa kukusala kutali kabotu nkwaakacita Jehoasi ncakuti, tweelede kusala balongwe ibamuyanda Jehova alimwi ibayanda kumukkomanisya. Tulakonzya kusala balongwe bapati naa bana kulindiswe. Kamuyeeya kuti, Jehoasi  wakali musyoonto kapati kumulongwe wakwe Jehoyada. Kujatikizya balongwe mbomusala, amulibuzye kuti: ‘Sena balandigwasya kuyumya cilongwe cangu a Jehova? Sena balandikulwaizya kupona kweelana azyeelelo zya Leza? Sena balabandika kujatikizya Jehova alimwi akasimpe? Sena balazilemeka zyeelelo zya Leza? Sena inga bandaambila buyo nzyondiyanda kumvwa naa balijisi busicamba bwakundilulamika ikuti naa ndaleya?’ (Tus. 27:​5, 6, 17) Kwaamba masimpe, kuti naa balongwe banu kabatamuyandi Jehova, tamweelede kumvwana ambabo. Pele kuti kamujisi balongwe ibamuyanda Jehova, amukakatile kubalongwe aabo, nkaambo bayoomugwasya.—Tus. 13:20.

8. Kuti katubelesya social media, ncinzi ncotweelede kulanga-langa?

⁸ Kubelesya social media kulakonzya kugwasya kapati kukwabana abanamukwasyi alimwi abalongwe. Nokuba boobo, bantu banji balaibelesya social media kuyanda kukkomanisya bantu, balabikka mafwoto alimwi amavidiyo aatondezya zintu nzyobacita naa nzyobakaula. Kuti kamwiibelesya social media, amulibuzye kuti: ‘Sena makanze aangu ngakukkomanisya bantu? Sena mbaakani yangu njakukulwaizya bamwi naa ndiyanda buyo kuti kabanditembaula? Sena ndizumizya bantu babelesya cibelesyo eeci kweendelezya mbondiyeeya, mbondaambaula, alimwi ambondicita zintu ?’ Mukwesu Nathan Knorr, iwakali umwi wabamu Kabunga Keendelezya, wakapa lulayo oolu lwakuti: “Mutasoli kuyanda kukkomanisya bantu. Buyo-buyo kunyina ngomuyookkamanisya pe. Amukkomanisye Jehova, mpoonya muyoobakkomanisya boonse bamuyanda Jehova.”

9. Ncinzi Jehova ncaakagwasya Uziya kuti acite? (2 Makani 26:​1-5)

⁹ Amwiiye kusala camaano nkwaakacita Uziya. Mwami Uziya wakali kulicesya ciindi naakali mwana. Wakaiya ‘kuyoowa Leza mwini-mwini.’ Mpoonya Jehova wakamulongezya kapati mumyaka iili 68 njaakapona. (Amubale 2 Makani 26:​1-5.) Uziya wakazunda masi aabasinkondonyina manji alimwi akubona masimpe kuti Jerusalemu ulikwabilidwe kabotu-kabotu. (2Mak. 26:​6-15) Eelo kaka Uziya wakalikkomene azintu zyoonse Leza nzyaakamugwasya kucita.—Muk. 3:​12, 13.

10. Ino zintu zyakamweendela buti Uziya?

¹⁰ Amwiiye kukulubizya kwa Uziya. Mwami Uziya wakalizyibide kupa bantu bambi malailile. Sena eeci cakali kumupa kulimvwa kuti ulakonzya kucita kufwumbwa ncaakali kuyanda? Bumwi buzuba, Uziya wakasala kunjila mutempele lya Jehova akulicenjezya kuumpa tununkilizyo acipaililo, calo bami ncobatakazumizyidwe kucita. (2Mak. 26:​16-18) Mupaizi Mupati Azariya wakasola kumululamika, pele Uziya wakanyema kapati. Cuusisya ncakuti, Uziya kunyina naakazumanana kusyomeka mpoonya Jehova wakamusubula acinsenda. (2Mak. 26:​19-21) Eelo kaka naakapona buumi buli kabotu kuti naakazumanana kulicesya!

11. Micito nzi iikonzya kutondezya kuti tulalicesya naa pe? (Amubone acifwanikiso.)

¹¹ Ciindi Uziya naakaba anguzu, wakaluba kuti Jehova nguwakali kasensa kanguzu zyakwe alimwi akuzwidilila kuli koonse nkwaakacita. Twiiya nzi? Lyoonse tweelede kunooyeeya kuti Jehova nguutupa zintu zyoonse zibotu nzyotukkomanina mubuumi alimwi amumulimo wakwe. Muciindi cakulisumpula akaambo kakuzwidilila kwesu, tweelede kupa bulemu boonse kuli Jehova walo uutugwasya kuzuzikizya zintu zyoonse. b (1Kor. 4:7) Cakulicesya tweelede kuzumina kuti tatulondokede akuti tuyandika kululamikwa. Mukwesu umwi uuli amyaka  yakuma 60 wakalemba boobu, wakati: “Ndakaiya kutanyema naa kutyompwa ciindi bamwi nobabona mumbazu mondilezya. Ciindi nindapegwa lulayo akaambo kakucita cintu cimwi cabufwubafwuba, ndilasolekesya kubambulula alimwi akuzumanana kubelekela Jehova kusikila mpondigolela.” Masimpe ngakuti, kuti twazumanana kuyoowa Jehova alimwi akulibona munzila yeelede, buumi bwesu buyoobota.—Tus. 22:4.

12. Ciindi naakali mwana, mbuti Josiya mbwaakamuyandaula Jehova? (2 Makani 34:​1-3)

¹² Amwiiye kusala camaano nkwaakacita Josiya. Josiya wakali amyaka iili 16 naakatalika kuyandaula Jehova. Wakali kuyanda kwiiya kujatikizya Jehova alimwi akucita kuyanda kwakwe. Nokuba boobo, buumi tiibwakali buuba-uba kumwami musyoonto ooyu. Wakakatila kubukombi bwakasimpe ciindi bukombi bwakubeja nobwakadumide kapati. Amana buya wakacita oobo cabusicamba! Kataningakkwanya myaka iili 20, Josiya wakatalika kugwisya bukombi bwakubeja mucisi.—Amubale 2 Makani 34:​1-3.

13. Ino kulyaaba kwanu kuli Jehova kwaamba nzi?

¹³ Nokuba kuti muli bana, mulakonzya kumwiiya Josiya kwiinda mukwiiya zinji kujatikizya Jehova alimwi abube bwakwe bubotu. Kuti mwacita oobu, muyooyanda kulyaaba kulinguwe. Ino kulyaaba kulinguwe kuyoobujatikizya buti buumi bwanu? Mukwesu Luke, iwakabbapatizyigwa naakali amyaka iili 14 wakaamba kuti, “Kuzwa lino ndilikanzide kubikka bukombi bwa Jehova mubusena bwakusaanguna mubuumi bwangu alimwi akusolekesya kumukkomanisya.” (Mk. 12:30) Eelo kaka muyoolongezyegwa kapati kuti andinywe mwakanza kucita mbubwenya oobu!

14. Amupe zikozyanyo zitondezyo bakubusi mbobakonzya kumwiiya Mwami Josiya.

¹⁴ Mbuyumuyumu nzi mbomukonzya kujana mbomuli mubelesi wa Jehova uucili mwana-mwana? Mukwesu Johan, iwakabbapatizyigwa naakali amyaka iili 12, wakaamba kuti basicikolonyina bakali kumoongelezya kufweba misanga yaatuncini njobaita kuti vaping. Kutegwa acikonzye kukaka kuyungwa ooku, Johan inga ulaliyeezya kuti kufweba kunyonganya buumi bwakwe alimwi acilongwe cakwe a Jehova. Mucizyi Rachel, iwakabbapatizyigwa naakali  amyaka iili 14, ulapandulula cimugwasya kuzunda buyumuyumu mbwajana kucikolo. Waamba kuti: “Ndilasolekesya kubona zintu zindiyeezya makani aamu Bbaibbele alimwi a Jehova. Mucikozyanyo, ciiyo ca history inga cindiyeezya cibalo camu Bbaibbele naa businsimi. Naa ciindi nondibandika amuntu umwi kucikolo, inga ndiyeeya lugwalo ndondikonzya kumubalila.” Buyumuyumu mbomukonzya kujana bulakonzya kwiindana aboobo mbwaakajana Mwami Josiya, pele mulakonzya kucita cabusongo alimwi akuzumanana kusyomeka mbuli nguwe. Kulwana masunko nomucili bana kuyoomugwasya kulibambila kulwana masunko ayooboola kumbele.

15. Ncinzi cakagwasya Josiya kuti amubelekele Jehova cakusyomeka? (2 Makani 34:​14, 18-21)

¹⁵ Ciindi naali amyaka iili 26, Mwami Josiya wakatalika kubambulula tempele. Nowakali kucitwa mulimo ooyu, ”‏bbuku lya Mulawo wa Jehova lyakapegwa kwiinda muli Musa” lyakajanwa. Mwami mbwaakamvwida buyo ncolyaamba, mpoonya-mpoonya wakabweza ntaamu akutobela cakalembedwe mumo. (Amubale 2 Makani 34:​14, 18-21.) Sena inga mwayanda kubala Bbaibbele abuzuba? Ambweni mwakatalika kale kucita oobo, sena mulakukkomanina? Sena inga mulatubona tupango tukonzya kumugwasya cacigaminina? Mukwesu Luke, iwaambwa kale, walo inga ulalemba twaambo tubotu ntwajana. Sena kucita boobu inga kwamugwasya kuyeeya tupango naa twaambo twamukkomanisya? Nomuzumanana kulizyiba alimwi akuliyanda Bbaibbele, ciyoomupa kuyanda kumubelekela Jehova. Alimwi mbubwenya Jwi lya Leza mbolyakagwasya Mwami Josiya, andinywe liyoomugwasya.

16. Nkaambo nzi Josiya ncaakalubizya, alimwi ino nciiyo nzi ncotwiiya?

¹⁶ Amwiiye kukulubizya kwa Josiya. Ciindi Josiya naakali amyaka yakuma 39, wakalubizya calo cakasololela kulufwu lwakwe. Wakalisyoma muciindi cakusyoma Jehova. (2Mak. 35:​20-25) Aawa mpaali ciiyo. Tacikwe makani amyaka njotujisi naa bulamfwu bwaciindi ncotwali kwiiya Bbaibbele, tweelede kuzumanana kuyandaula  Jehova. Eeci cibikkilizya kupaila lyoonse kulomba busolozi bwakwe, kwiiya Jwi lyakwe, alimwi akugwasyigwa alulayo luzwa ku Banakristo basimide. Kuti twacita oobo, tuyakweeleba penzi lyakwaalilwa kusala camaano alimwi tulalangilwa kuyookkomana kapati.—Jak. 1:25.

17. Ncinzi ncotukonzya kwaamba kuzwa kuzibalo zyabami ba Juda botatwe?

¹⁷ Kuli zintu zinji nzyomukonzya kucita nomucili bana naa bakubusi. Makani aajatikizya Jehoasi, Uziya, alimwi a Josiya atondezya kuti bana naa bakubusi balakonzya kusala camaano alimwi akuzumanana kukkomanisya Jehova mubuumi bwabo. Nokuba boobo, mbubwenya mbotwabona, talili lyoonse nobakonzya kuzumanana kucita kabotu. Pele, tulakonzya kwiiya zintu zibotu nzyobakacita bami aaba alimwi akweeleba kulubizya nkobakacita. Ikuti twacita oobo tuyooba abuumi bukkomanisya.

18. Nzikozyanyo nzi zyamu Magwalo zitondezya kuti buumi bwanu bulakonzya kubota? (Amubone acifwanikiso)

¹⁸ Mu Magwalo kuli zibalo zinji zyabakubusi bamwi ibakaba acilongwe ciyumu a Jehova, ibakakkomaninwa anguwe alimwi ibakazwidilila kapati. Davida ngumwi wabakubusi aaba. Ciindi naakali mukubusi, Davida wakasala kubelekela Leza, mpoonya kumbele wakazooba mwami. Masimpe kuti, aciindi cimwi wakalubizya, pele Leza wakali kumubona kuti ulasyomeka. (1Bam. 3:6; 9:​4, 5; 14:8) Kuti mwaiya kujatikizya Davida, cikozyanyo cakwe ciyoomukulwaizya kubelekela Jehova alimwi akuzumanana kusyomeka. Naa mulakonzya kulibikkila mbaakani yakulanga-langa cikozyanyo ca Marko naa Timoteyo. Muyoobona kuti bakatalika kubelekela Jehova nobakali bana, amana bakazumanana kumubelekela cakusyomeka. Kusala kumubelekela nkobakacita, kwakamukkomanisya Jehova alimwi abalo bakakkomana kapati.

19. Ino mbuumi buli mbomunga mwayanda kuba ambubo?

¹⁹ Zintu nzyomusala kucita mubuumi bwanu lino, zilakonzya kubujatikizya buumi bwanu bwakumbele. Kuti mwamusyoma Jehova, kutali maano aanu, uyoomugwasya kusala camaano. (Tus. 20:24) Mulakonzya kuba abuumi bukkomanisya lino alimwi ibulaampindu. Kamuyeeya kuti, Jehova ulalumba milimo iili yoonse njomumubelekela. Kunyina nzila iinda kubota njomukonzya kubelesya buumi bwanu, kwiinda kubelekela Taateesu wakujulu, Jehova.