1-2. Mbuti mbotugwasyigwa munzila Jehova njaakatulenga ciindi notupa bamwi naa notupegwa?

 CIINDI Jehova naakalenga bantu, wakabalenga munzila yakuti kabajana lukkomano mukupa kwiinda kupegwa. (Mil. 20:35) Sena eeci caamba kuti tatukonzyi kujana lukkomano ciindi muntu umwi naatupa cipego? Peepe. Toonse tulakkomana ciindi notwatambula cipego. Pele tulakkomana kapati ciindi notupa bamwi. Alimwi cilakkomanisya kuti Jehova wakatulenga munzila eeyi. Nkaambo nzi?

² Akaambo kakuti Jehova wakatulenga munzila eeyi, eeci cilakonzya kutupa kukkomana kapati. Tulakonzya kuba bantu bakkomene ciindi notujana nzila zyakupa bamwi alimwi ambotukonzya kucita boobo. Cilakkomanisya kapati kuti Jehova wakatulenga munzila eeyi.—Int. 139:14.

3. Nkaambo nzi Jehova ncakonzya kwaambwa kuti ngu “Leza uukkomene”?

³ Mbwaanga Bbaibbele litwaambila kuti aabo ibapa bamwi balajana lukkomano, cilakonzya kutuubila kumvwisya kaambo Jehova ncali “Leza uukkomene.” (1Tim. 1:11) Ngonguwe wakasaanguna kupa bamwi alimwi kunyina uumwiinda kupa. Mwaapostolo Paulo wakaamba kuti Jehova “nguutupa buumi, kweenda akupona.” (Mil. 17:28) Masimpe, “cipego cibotu cili coonse alimwi acipego cilondokede cili coonse” cizwa kuli Jehova.—Jak. 1:17.

4. Ino ncinzi ciyootugwasya kuba alukkomano lunji?

⁴ Toonse kweelede kuti inga twayanda kujana lukkomano luboola kwiinda mukupa bamwi. Tulakonzya kucita oobo kwiinda mukwiiya bwaabi bwa Jehova. (Ef. 5:1) Mucibalo eeci, tulalanga-langa cikozyanyo ca Jehova cibotu alimwi tulaiya ncotukonzya kucita kuti twalimvwa kuti aabo mbotwapa cintu cimwi tiibatondezya kulumba. Eeci ciyootugwasya kuzumanana kupa bamwi alimwi ciyoopa kuti katuli bantu bakkomene.

 AMWIIYE JEHOVA KWIINDA MUKUBA BAABI

5. Nzintu nzi zyakumubili nzyatupa Jehova?

⁵ Ino muunzila nzi zimwi Jehova mwatondezya kuti mwaabi? Atulange-lange zikozyanyo zisyoonto buyo. Jehova ulatupa zintu zyakumubili. Inga katutabukkede lyoonse, pele tulamulumba Jehova nkaambo bunji bwesu tulijisi zintu nzyotuyandika. Mucikozyanyo, ulatugwasya kujana cakulya, zyakusama alimwi abusena bwakukkala. (Int. 4:8; Mt. 6:​31-33; 1Tim. 6:​6-8) Sena Jehova ulatupa zintu nzyotuyandika kumubili cakwiinzya buyo mulawo? Peepe! Ino nkaambo nzi ncatacitili boobo?

6. Ncinzi ncotwiiya kulugwalo lwa Matayo 6:​25, 26?

⁶ Jehova ulatupa zintu nzyotuyandika kumubili akaambo kakuti ulatuyanda. Amubone majwi aa Jesu aajanika kulugwalo lwa Matayo 6:​25, 26. (Amubale.) Jesu wakabelesya zikozyanyo zyazilenge. Kaamba kujatikizya bayuni, Jesu wakati: “Tabasyangi mbuto naa kutebula nokuba kuyobola mumatala.” Nokuba boobo, amubone ncaakaamba kuzwa waawo, wakati: “Uso wakujulu ulabasanina.” Kumane Jesu wakabuzya kuti: “Sena tamuyandiki kwiinda mbabo?” Ino twiiya nzi? Jehova ubona bakombi bakwe kuti balayandika kapati kwiinda banyama mbaakalenga. Aboobo kuti Jehova kakonzya kulanganya banyama, tulakonzya kuba masimpe kuti andiswe uyootupa nzyotuyandika! Mbubwenya mbuli usyi muntunsi uubikkila maano, Jehova ulabapa nzyobayandika bamukwasyi wakwe akaambo kaluyando ndwajisi kulimbabo.—Int. 145:16; Mt. 6:32.

7. Muunzila nzi motukonzya kwiiya bwaabi bwa Jehova? (Amubone acifwanikiso.)

⁷ Mbubwenya mbuli Jehova, andiswe tulakonzya kupa bamwi zintu nzyobayandika kumubili akaambo kakuti tulabayanda. Mucikozyanyo, sena kuli mukwesu naa mucizyi ngomuzyi uuyandika zyakulya naa zyakusama? Jehova ulakonzya kumubelesya kumupa nzyayandika muntu ooyo. Bantu ba Jehova bazyibidwe kuti mbaabi akaambo kakuti balafwambaana kugwasya ciindi nokwacitika ntenda. Mucikozyanyo, lyabulwazi bwa COVID-19, bakwesu abacizyi bakali kwaabana zyakulya, zyakusama alimwi azintu zimwi ziyandika abaabo ibakabulide. Banji bakasanga cakulisungula kumulimo wanyika yoonse. Akaambo kaceeci, cakali kukonzyeka kugwasya bakwesu munyika yoonse ibakajatikizyigwa antenda. Bakwesu alimwi abacizyi aaba baabi, bakaatobela majwi aali kulugwalo lwa Bahebrayo 13:16 aakuti: “Mutalubi kucita zibotu akwaabana zintu  nzyomujisi abamwi, nkaambo Leza ulabotelwa azipaizyo zili boobo.”

8. Muunzila nzi motugwasyigwa anguzu nzyatupa Jehova? (Bafilipi 2:13)

⁸ Jehova ulapa nguzu. Jehova ulijisi nguzu zitakonzyi kweezyanisyigwa alimwi calukkomano ulabapa nguzu babelesi bakwe basyomeka. (Amubale Bafilipi 2:13.) Sena kuli ciindi nomwakapailide kutegwa mucikonzye kuliyumya kusunko naa kulomba nguzu zyakuti muzunde sunko limwi? Alimwi ambweni kuli ciindi nomwakapailide kulomba nguzu zyakuti mucikonzye kucita cintu cimwi. Ciindi mupailo wanu wakulomba nguzu nowakaingulwa, kweelede kuti mwakacizumina ncaakalemba mwaapostolo Paulo naakati: “Muzintu zyoonse ndilijisi nguzu kwiinda muli yooyo uundipa nguzu.”—Flp. 4:13.

9. Mbuti mbotukonzya kumwiiya Jehova kwiinda mukubelesya nguzu zyesu kugwasya bamwi? (Amubone acifwanikiso.)

⁹ Tatujisi nguzu mbuli nzyajisi Jehova alimwi tatukonzyi kupa bamwi nguzu mbuli mbwacita walo. Pele tulakonzya kumwiiya kwiinda mukubelesya nguzu zyesu kugwasya bamwi. Mucikozyanyo, tulakonzya kugwasya bakwesu abacizyi bacembeede naa baciswa-ciswa kwiinda mukusalazya maanda aabo naa kubaulila nzyobayandika. Kuti bukkale kabuzumizya, tulakonzya kugwasyilizya kusalazya Ŋanda ya Bwami alimwi akwiibamba kabotu. Kuti twabelesya nguzu zyesu kucita zintu eezyi, tulakonzya kubacitila zintu zinji zibotu bakwesu alimwi abacizyi.

10. Mbuti mbotukonzya kubelesya majwi eesu kugwasya bamwi?

¹⁰ Mutalubi kuti, zintu zyomwaamba zilakonzya kubayumyayumya bamwi. Sena kuli muntu ngomuzyi uukonzya kugwasyigwa kuti mwamulumbaizya kuzwa aansi aamoyo? Sena kuli muntu ngomuzyi uuyandika luumbulizyo? Kuti kacili boobo, amumwaambile muntu ooyo kuti mulamubikkila maano. Mulakonzya kumuswaya muntu cacigaminina, kumutumina fooni, kakkaadi, Email naa kumutumina kagwalo. Mutalibiliki kapati kujatikizya nzyomukonzya kwaamba. Majwi buyo masyoonto aaluyando ambweni ngaakonzya kuyandika kumukwesu naa mucizyi kutegwa azumanane kusyomeka naa kuzilanga munzila yeelede zintu.—Tus. 12:25; Ef. 4:29.

11. Mbuti Jehova mbwapa busongo bwakwe?

¹¹ Jehova ulapa busongo. Sikwiiya Jakobo wakalemba kuti: “Ikuti muntu umwi akati kanu kabulizyide busongo, azumanane kumulomba Leza nkaambo boonse ulabapa cabuuya alimwi kakunyina kubasampaula.” (Jak. 1:5; bupanduluzi buyungizyidwe.) Eeci citondezya kuti Jehova kunyina nabaima busongo  babelesi bakwe. Ulabapa cabuuya. Jakobo alimwi wakaamba kuti, ciindi Jehova nabapa busongo babelesi bakwe, ulacita oobo “kakunyina kubasampaula,” naa “kubajanina kaambo.” Kunyina nayanda kuti katulimvwa bubi ciindi notumulomba busolozi. Muciindi caboobo, utukulwaizya kuti katumulomba.—Tus. 2:​1-6.

12. Nzyoolwe nzi nzyotujisi zyakupa bamwi luzyibo ndotujisi?

¹² Mbuti kujatikizya ndiswe? Sena inga twamwiiya Jehova kwiinda mukupa bamwi busongo? (Int. 32:8) Bantu ba Jehova balijisi zyoolwe zinji zyakwaambila bamwi zintu nzyobakaiya. Kanji-kanji tulabayiisya bapya ciindi notuli mumulimo wamumuunda. Cakukkazika moyo, baalu balabagwasya bakutausi alimwi abakwesu babbapatizyidwe kuzuzikizya mikuli yabo mumbungano. Alimwi bakwesu abacizyi ibajisi luzyibo mumulimo wamayake alimwi akwaabamba kabotu masena eesu aakukombela, balabayiisya aabo ibatakwe luzyibo.

13. Mbuti mbotukonzya kumwiiya Jehova, caboola kukupa bamwi busongo mbotujisi?

¹³ Aabo bayiisya bamwi beelede kumwiiya Jehova ciindi nobapa bamwi luzyibo. Mutalubi kuti Jehova ulabapa busongo babelesi bakwe cabuuya. Mbubwenya buyo, andiswe tuyanda kupa baabo mbotuyiisya luzyibo ndotujisi. Tatweelede kulibilika kuti, ikuti twabayiisya kabotu mukuya kwaciindi bayootunjilila busena. Alimwi tatweelede kuba amuuya wakutalika kwaamba kuti: ‘Mebo kunyina wakandiyiisya! Kaliisya mwini.’ Muuya uli boobu tauyandiki akati kabantu ba Jehova. Muciindi caboobo, tulakkomana kwaambila bamwi nzyotuzyi alimwi akubayiisya. (1Tes. 2:8) Tuyanda kuti mukuya kwaciindi, ‘abalo bakeelele ncobeni ikuyiisya bamwi.’ (2Tim. 2:​1, 2) Ikuti toonse katupa bamwi busongo mbotujisi, tunooli bantu bakkomene.

CIINDI BANTU NOBATATULUMBI

14. Ino bantu banji bacita buti ciindi notwabacitila cintu cimwi?

¹⁴ Ciindi notubapa naa kubacitila cintu cimwi bamwi, kwaambisya bakwesu abacizyi kanji-kanji balatulumba. Balakonzya kutulembela kakkaadi kakutulumba naa kubelesya nzila zimbi buyo. (Kol. 3:15) Ciindi nobatulumba tulakkomana kapati akaambo kacintu eeco ncotwabacitila.

15. Ncinzi ncotweelede kuyeeya ciindi bamwi nobatatondezyi kulumba?

¹⁵ Kwaamba masimpe, talili lyoonse bantu nobakonzya kutulumba akaambo kacintu ncotwabacitila. Zimwi ziindi bamwi tababikkili maano kulugwasyo ndotwabapa naa ciindi ncotwakabelesya, nguzu alimwi amali kubacitila cintu cimwi. Kuti eeci cacitika, ino mbuti mbotukonzya kuzumanana kukkomana alimwi akutatyompwa? Atuyeeye majwi aali kulugwalo lwa Milimo 20:35 aayeeme cibalo cesu. Lukkomano luboola akaambo kakupa bamwi taluyeeme aambobakonzya kutulumba. Tulakonzya kuzumanana kupa bamwi calukkomano nokuba kuti tabalumbi. Ncinzi cikonzya kutugwasya? Atubone nzila zimwi zisyoonto buyo.

16. Ncinzi ncotweelede kubikkila maano ciindi notupa bamwi?

¹⁶ Amuyeeye kuti ciindi nomupa bamwi mwiiya Jehova. Ulabapa zintu zibotu bantu tacikwe makani balalumba naa tabalumbi. (Mt. 5:​43-48) Jehova utusyomezya kuti, ikuti katupa bamwi ‘kakunyina kulangila kujolelwa cili coonse, bulumbu bwesu buyooba bupati.’ (Lk. 6:35) Mabala aakuti “cili coonse” alakonzya kubikkilizya kutondezya kulumba. Tacikwe makani batulumba naa pe, Jehova uyootulumbula akaambo kazintu zibotu nzyotucita kugwasya bamwi, nkaambo tulapa kumwi katukkomene.—Tus. 19:17; 2Kor. 9:7.

17. Ninzila nzi aimwi njotukonzya kumwiiya Jehova ciindi notupa bamwi? (Lk. 14:​12-14)

 ¹⁷ Cintu cimwi ncotweelede kucita kutegwa tumwiiye Jehova ciindi notwapa bamwi cintu, cijanika kulugwalo lwa Luka 14:​12-14. (Amubale.) Masimpe kuti tacilubide kutamba bamwi kucakulya naa kutondezya luzyalo kuli baabo ibakonzya kucita mbubwenya oobo akulindiswe. Pele mbuti kuti twayeeya kuti bunji bwaziindi inga ndiswe tupa bamwi katujisi makanze aakuti abalo bakatupe? Kuti kacili boobo, amusole kucita ncaakaamba Jesu. Tulakonzya kuba baabi kumuntu ngotuzyi kuti kunyina ncakonzya kutupilusizya. Mpoonya tuyooba bantu bakkomene akaambo kakuti twiiya Jehova. Kuzilanga munzila eeyi zintu, kuyootugwasya kuzumanana kuba bantu bakkomene nokuba kuti ibamwi tiibatondezya kulumba.

18. Ncinzi ncotuteelede kucita? Alimwi nkaambo nzi ncotuteelede kucicita?

¹⁸ Mutayeeyeli bamwi kuba bantu batalumbi. (1Kor. 13:7) Kuti bamwi tiibatulumba, tulakonzya kulibuzya kuti: ‘Sena masimpe mbantu batalumbi naa baluba buyo kundilumba?’ Ambweni kuli twaambo itwapa kuti batatulumbi kweelana ambotwali kulangila. Ibamwi inga balalumba kapati mumoyo lino cilabayumina kupozya. Balimvwa kusampuka kugwasyigwa, kwaambisya kuti musyule mbobakali kugwasya bamwi. Pele kuti katubayanda ncobeni bakwesu alimwi abacizyi, kunyina notuyoobayeeyela kuti mbantu batalumbi alimwi buya tuyoozumanana kupa bamwi kumwi katukkomene.—Ef. 4:2.

19-20. Nkaambo nzi kukkazika moyo ncokugwasya kapati ciindi notwapa muntu umwi cintu? (Amubone acifwanikiso.)

¹⁹ Amukkazike moyo. Kujatikizya makani aabwaabi, Mwami musongo Solomoni wakalemba kuti: “Kowaala cinkwa cako atala aamaanzi, nkaambo kwaakwiinda mazuba manji uyoocijana alimwi.” (Muk. 11:1) Majwi aaya atuyiisya kuti zimwi ziindi bantu balakonzya kutondezya kulumba, ‘kwayinda mazuba manji.’ Amumvwe cakuluula icitondezya mbwaali aamasimpe makani aaya.

 ²⁰ Myaka minji yainda, mukaintu wamulangizi wabbazu, wakalemba lugwalo luzwa aansi aamoyo kumucizyi umwi iwakazwide aakubbapatizyigwa, kumukulwaizya kuzumanana kusyomeka. Nokwakainda myaka iibalilwa ku 8, mboobu mbwaakaingula mucizyi mulugwalo lwakwe: “Ndalimvwa kuti ndeelede kumulembela lugwalo oolu kumwaambila lugwasyo ndomwakandipa myaka yoonse eeyi, nywebo kamutazyi mbondakagwasyigwa.” Wakayungizya kuti: “Mwakandilembela majwi aaluzyalo alimwi kunyina nondiyooluluba lugwalo lwamu Bbaibbele ndomwakabikkilizya.” a Naakamana kwaamba mapenzi ngaakajana mubuumi, mucizyi ooyu wakaamba kuti: “Zimwi ziindi ndakali kulimvwa kutyompwa kapati alimwi akuyanda kucileka kuba umwi wa Bakamboni ba Jehova. Pele lugwalo ooluya lwamu Bbaibbele ndomwakabikkilizya, lyoonse ndakali kuluyeeya alimwi lwakandigwasya kuzumanana kusyomeka. Mumyaka yoonse eeyi iili 8, kunyina cintu candigwasya kapati kwiinda majwi aali mulugwalo ndomwakandilembela alimwi alugwalo lwamu Bbaibbele ndomwakabikkilizya.” Amweezeezye buyo mukaintu wamulangizi wabbazu mbwaakakkomana kapati naakatambula lugwalo oolu ‘nokwakainda mazuba manji’! Mbubwenya buyo andiswe tulakonzya kulumbwa kwainda ciindi cili mbocibede notwamana kugwasya muntu umwi.

21. Nkaambo nzi ncomukanzide kuzumanana kwiiya bwaabi bwa Jehova?

²¹ Mbubwenya mbokwaambidwe kale, Jehova wakatulenga munzila yaalubazu. Nokuba kuti tulakukkomanina kupegwa, tulakonzya kujana lukkomano lunji kapati ciindi notupa bamwi. Tulimvwa kabotu kapati ciindi notucikonzya kugwasya basyomima. Alimwi tulakkomana nobatondezya kulumba. Aboobo, tacikwe makani kuti sikupegwa watondezya kulumba naa pe, tulakonzya kukkomana akaambo kakuti twacita cintu cibotu. Mutalubi kuti kufwumbwa cintu ncomupa, ‘Jehova ulakonzya kumupa kunji.’ (2Mak. 25:9) Kunyina notukonzya kumwiinda Jehova kuba baabi! Alimwi kulumbulwa a Jehova mbobulumbu bwiinda kubota. Aboobo atuzumanane kumwiiya Taateesu wakujulu, imwaabi.