1-2. Ncinzi cipa kuti bakombi ba Jehova kabakkomene? (Jakobo 1:​22-25)

 JEHOVA alimwi a Mwanaakwe bayanda kuti katukkomene. Mulembi wa Intembauzyo 119:2 wakaamba kuti: “Balikkomene aabo batobela ziyeekezyo zyakwe, ibamuyandaula camoyo woonse.” Jesu wakasyomezya kuti: “Ibakkomene mbaabo baswiilila jwi lya Leza akucita ncolyaamba!”—Lk. 11:28.

² Mbotuli bakombi ba Jehova, tulikkomene. Nkaambo nzi? Tulijisi twaambo tunji, pele kaambo kamwi kapati ncotubalila Jwi lya Leza nkakuti katuzibelesya nzyotwiiya mulindilyo.—Amubale Jakobo 1:​22-25.

3. Ino tugwasyigwa buti kwiinda mukubelesya nzyotubala mu Jwi lya Leza?

³ Kuli nzila zinji motugwasyigwa ciindi ‘notuba basikucita caamba jwi.’ Nzila imwi, tulizyi kuti aaka nkekaambo kapa kuti katumukkomanisya Jehova. Ikukayeeya kaambo aaka kutupa kukkomana. (Muk. 12:13) Ciindi notubelesya nzyotubala mu Jwi lya Leza, cipa kuti tube acilongwe ciyumu abanamukwasyi alimwi abakombima. Ambweni cili boobu cakamucitikila mubuumi bwanu. Amana buya, tulaayeleba mapenzi aabacitikila aabo ibatatobeli nzila zya Jehova. Masimpe, tulazuminana ancaakaamba Mwami Davida. Naakamana kwaamba mulawo, malailile alimwi ambeta zya Jehova munyimbo, wakamanizya kwiinda mukwaamba kuti: “Ikuzibamba kuletela bulumbu bupati.”—Int. 19:​7-11.

4. Ino nkaambo nzi ncocikatazya kucita ncolyaamba Jwi lya Leza?

⁴ Kwaamba masimpe, talili lyoonse nocili cuuba-uba kubala  Jwi lya Leza alimwi akubelesya nzyotubala. Nokuba kuti tujisi bubi, tweelede kujana ciindi cakubala Bbaibbele kutegwa tumvwisye Jehova ncayanda kuti katucita. Atulange-lange mizeezo imwi iikonzya kutugwasya kutegwa katujana ciindi cakubala. Alimwi tulalanga-langa cikonzya kutugwasya kuzinzibala kuyeeya nzyotubala akubona mbotukonzya kuzibelesya mubuumi bwesu.

AMUJANE CIINDI CAKUBALA JWI LYA LEZA

5. Ino zintu nzi zimwi izitupa kujata bubi?

⁵ Bunji bwabantu ba Jehova bajisi bubi kapati. Tulabelesya ciindi cinji kulanganya mikuli yakumuuya. Mucikozyanyo, bunji bwesu tulabeleka milimo yakumubili kutegwa tulilanganye alimwi akulanganya mikwasyi yesu. (1Tim. 5:8) Bunji bwa Banakristo balanganya bacibbululu baciswa naa bacembeede. Alimwi toonse tuyandika kulilanganya kujatikizya buumi bwesu, calo ciyandika ciindi. Kuyungizya amikuli eeyi, tulijisi zyakucita mumbungano. Mukuli uuyandika kapati ngwakuba basungu mumulimo wakukambauka. Nokuba kuti mujisi mikuli yoonse eeyi, mbuti mbomukonzya kujana ciindi cakubala Bbaibbele, kuzinzibala kuyeeya nzyomubala alimwi akuzibelesya?

6. Mbuti mbotukonzya kubikka kubala Bbaibbele mubusena bwakusaanguna? (Amubone acifwanikiso.)

⁶ Kubala Bbaibbele ncimwi ‘cazintu ziyandika kapati’ kulindiswe, aboobo tweelede kukubikka mubusena bwakusaanguna. (Flp. 1:10) Kujatikizya muntu uukkomene, lugwalo lwa Intembauzyo lwaamba kuti: “Ukkomanina mulawo wa Jehova, alimwi ulabala mulawo wakwe caansaansi syikati amasiku.” (Int. 1:​1, 2) Masimpe eeci citondezya kuti tweelede kujana ciindi cakubala Bbaibbele. Ino nciindi nzi cibotu cakubala Bbaibbele? Aumwi ulakonzya kusala ciindi cibotu kulinguwe. Pele cintu ciyandika kapati ncakuti katusala ciindi cibotu cikonzya kutugwasya kubala Bbaibbele abuzuba. Mukwesu wazina lya Victor wakaamba kuti: “Ndilakukkomanina kubala Bbaibbele mafwumofwumo. Nokuba kuti tandikukkomanini kufwambaana kubuka, eeci  nceciindi cibotu nkaambo kunyina zintu zinyonganya. Aciindi eeci inga ndilazimvwisya nzyondibala.” Ambweni oobo mbocibede akulindinywe. Amulibuzye kuti, ‘Ino nciindi nzi cibotu ncondikonzya kubala Bbaibbele?’

AMUZINZIBALE KUYEEYA NZYOMUBALA

7-8. Ino ncinzi cikonzya kupa kuti tutagwasyigwi kapati anzyotubala? Amupe cikozyanyo.

⁷ Kwaamba masimpe, tulakonzya kubala makani manji pele kakunyina kwaamvwisya. Sena kuli ciindi nomwakabalide makani aamwi mpoonya twaambo tumwi mwatuluba? Toonse cili boobu cakatucitikila kale. Eeci cilakonzya kutucitikila nociba ciindi notubala Bbaibbele. Ambweni tulakonzya kulibikkila mbaakani yakubala zyaandaano zimwi zyamu Bbaibbele abuzuba. Eelo kaka eeco inga cabota! Tweelede kulibikkila mbaakani akukakatila kulinzizyo. (1Kor. 9:26) Pele kutegwa tugwasyigwe andilyo, tweelede kucita zinji kunze buyo lyakulibala.

⁸ Amubone cikozyanyo eeci: Zisyango ziyandika maanzi kutegwa zizumanane kupona. Pele kuti mvwula yaindila kuwa, nyika ilakonzya kulobelwa. Kuti eeci cacitika inga takuciyandiki mvwula iimbi. Nyika inga iyandika kuyuminizya maanzi kutegwa abelesyegwe azisyango. Mbubwenya buyo, tweelede kweeleba kubala Bbaibbele cakubinda, cakuti twaalilwa kumvwisya nzyotwabala akwaalilwa kuzibelesya.—Jak. 1:24.

9. Ino ncinzi ncotweelede kucita kuti katujisi cilengwa cakubala Bbaibbele cakubinda?

⁹ Sena zimwi ziindi mulabinda kubala Bbaibbele? Ino ncinzi ncomweelede kucita? Amubale cakutabinda kutegwa mujane ciindi cakuzinzibala kuyeeya nzyomwabala naa kuba aciindi cakuzinzibala kuyeeya nomwamana kubala. Eeci taceelede kuba cintu cikatazya. Mulakonzya kulansya ciindi cakubala kutegwa mujane ciindi cakuzinzibala kuyeeya. Kulubazu lumwi, mulakonzya kusala kubala tupango tusyoonto buyo akubelesya ciindi casyaala kutegwa muzinzibale kuyeeya nzyomwabala. Mukwesu Victor iwaambwa kale wakaamba kuti: “Ndilacifwiinsya ciindi ncondibala Bbaibbele, ambweni caandaano comwe  buyo. Akaambo kakuti ndibala mafwumofwumo, buzuba boonse ndilakonzya kuziyeeya zyoonse nzyondabala.” Kufwumbwa nzila njomukonzya kubelesya, cilayandika kapati kuti kamugwasyigwa anzyomubala.—Int. 119:97; amubone akabbokesi kakuti “ Mibuzyo Yakuzinzibala Kuyeeya.”

10. Amupe cikozyanyo icitondezya mbomukonzya kuzibelesya nzyomwiiya. (1 Batesalonika 5:​17, 18)

¹⁰ Tacikwe makani aciindi ncomubala Bbaibbele naa ciindi ncomutola kulibala, amube masimpe kuti mulazibelesya zyomubala. Ciindi nomubala cibeela cimwi ca Jwi lya Leza, amulibuzye kuti, ‘Mbuti mbondikonzya kwaabelesya makani aaya lino naa kumbele?’ Mucikozyanyo, atwaambe kuti kubala Bbaibbele kwanu kubikkilizya lugwalo lwa 1 Batesalonika 5:​17, 18. (Amubale.) Mwamana kubala tupango ootu tobilo, mulakonzya kuyeeya bunji bwaziindi zyomupaila akuti naa mulapaila kuzwa aansi aamoyo. Alimwi mulakonzya kuzinzibala kuyeeya zintu zyeelede kumupa kulumba. Ambweni mulakonzya kusala kumulumba Jehova kuzintu zyotatwe zigaminide. Nokuba kuti mwatola buyo ciindi cisyoonto kuzinzibala kuyeeya nzyomwiiya mu Bbaibbele, kucita boobo kuyoomugwasya kumvwisya Jwi lya Leza alimwi akubelesya nzyolyaamba. Alimwi kuti abuzuba kamuzibelesya nzyomubala mu Bbaibbele, muyooba mubelesi wa Jehova uuli kabotu. Pele ino ncinzi ncomweelede kucita kuti kakuli zintu zinji nzyomuyandika kucita?

AMULIBIKKILE MBAAKANI ZIGWASYA

11. Nkaambo nzi zimwi ziindi ncomukonzya kulimvwa kutyompwa? Amupe cikozyanyo.

¹¹ Ciindi nomubala Bbaibbele, zimwi ziindi mulakonzya kutyompwa mwabona kuti muyandika kubambulula mumbazu zinji. Mucikozyanyo, amweezeezye kuti buzuba bwakusaanguna nomwabala Bbaibbele mwajana lulayo lujatikizya kusalulula. (Jak. 2:​1-8) Mwabona kuti muyandika kubambulula caboola mumakani aambomubeendelezya bamwi, aboobo mwapanga kucinca kumwi. Inga mwacita kabotu kaka! Mpoonya buzuba bwabili, mwabala tupango tumwi itutondezya mbociyandika kapati kuubelesya kabotu mulaka wanu. (Jak. 3:​1-12) Mwayeeya kuti zimwi ziindi inga mwaamba zintu zitali kabotu naa zityompya. Aboobo mwasala kuti kamwaamba zintu zikulwaizya bamwi. Buzuba bwatatu mwabala makani aacenjezya kujatikizya kuba mulongwe wanyika. (Jak. 4:​4-12) Mwabona kuti muyandika kusala caboola kumakani aazyakulikondelezya. Kumane buzuba bwane, mulakonzya kulimvwa kuti nciyumu kapati kupanga kucinca koonse ooku.

12. Nkaambo nzi ncomuteelede kutyompwa kuti kubala Bbaibbele kwayubununa kuti mweelede kupanga kucinca kumwi? (Amubone abupanduluzi buyungizyidwe.)

 ¹² Ikuti naa muyandika kubambulula naa kuyaambele mumbazu zili mbozibede, tamweelede kutyompwa pe. Kuyeeya kuti muyandika kuyaambele ncitondezyo cakuti mulalicesya alimwi akuti muzilanga kabotu zintu. Ciindi notulicesya, tuyoobala Magwalo katujisi makanze aakuyaambele. a Alimwi amuyeeye kuti kusama “buntu bupya” ncintu iceelede kuzumanana kucitwa. (Kol. 3:10) Ino ncinzi ciyoomugwasya kuzumanana kuba sikucita caamba Jwi lya Leza?

13. Ino ninzila nzi mbotu yakubelesya nzyomwaiya? (Amubone acifwanikiso.)

¹³ Muciindi cakuzibelesya aciindi comwe zyoonse zyomwabala, amulibikkile mbaakani yakubelesya comwe naa zyobilo. (Tus. 11:2) Amusole nzila eeyi: amube amulongo wazintu nzyomuyanda kucita, mpoonya akusala comwe naa zyobilo zyomuyanda kubelekela mpawo, kumane eezyi zimbi zyasyaala inga mwaakuzicita aciindi cimbi. Ino mweelede kutalikila aali?

14. Ino mweelede kutalikila ambaakani zili?

¹⁴ Mulakonzya kutalikila ambaakani ngubauba njomukonzya kuzuzikizya. Naa mulakonzya kusala kubelekela ambazu njomulimvwa kuti njeiyandika kapati kutegwa muyaambele. Mwamana kwiizyiba mbaakani eeyo, amuvwuntauzye muzyakumwaya zyesu, ambweni kubelesya Laibbulali yaa Intaneti ya Watchtower naa Bbuku Ligwasya Kuvwuntauzya lya Bakamboni ba Jehova. Amwiipailile mbaakani eeyo, kumulomba Jehova kuti amupe ‘kukanza alimwi anguzu zyakucita zintu.’ (Flp. 2:13) Mpoonya amuzibelesye  nzyomwaiya. Mwamana kuzuzikizya mbaakani yakusaanguna ciyoomukulwaizya kuzuzikizya aimbi. Ciindi nomwabona kuti mwapanga kucinca naa kuyaambele kubube bumwi bwa Bunakristo, ciyoomukulwaizya kuzumanana kupanga kucinca. Alimwi ambweni ciyoopa kuti mupange kucinca akumbi.

AMULEKELE JWI LYA LEZA KUTI ‘LIBELEKE MULINDINYWE’

15. Mbuti bantu ba Jehova mbobaindene abantu banji ibabala Bbaibbele? (1 Batesalonika 2:13)

¹⁵ Bantu bamwi balitaminina kuti bakalibala kale Bbaibbele kwaziindi zinji. Pele sena masimpe balazisyoma nzyoliyiisya? Sena balasolekesya kuzibelesya nzyoliyiisya alimwi akucinca bukkale bwabo? Cuusisya ncakuti, kanji-kanji bwiinguzi mbwakuti peepe. Eelo kaka eeci ciliimpene kapati kujatikizya bantu ba Jehova! Mbubwenya mbuli Banakristo bamumwaanda wamyaka wakusaanguna, tulalizumina Bbaibbele ‘mbubonya mbolibede ncobeni, kalili Jwi lya Leza.’ Kuyungizya waawo, tulacita kufwumbwa ncotukonzya kubelesya lulayo lwamu Bbaibbele mubuumi bwesu.—Amubale 1 Batesalonika 2:13.

16. Ino ncinzi cikonzya kutugwasya kuba basikucita caamba Jwi?

¹⁶ Talili lyoonse nocili cuuba-uba kubala Jwi lya Leza alimwi akuzibelesya nzyotubala. Cilakonzya kutukatazya kujana ciindi cakubala Bbaibbele. Naa ambweni tulakonzya kubala cakubinda cakuti twaalilwa kuzinzibala kuyeeya nzyotwabala. Ambweni tulakonzya kutyompwa twabona mbozili zinji mbazu motweelede kubambulula. Kufwumbwa buyumuyumu mbomukonzya kujana, mutayeeyi kuti inga mwaalilwa. Kwiinda mukugwasyigwa a Jehova, mulakonzya kubuzunda buyumuyumu. Atube amakanze aakuzumina lugwasyo lwakwe, kutali kuba basikumvwa buyo baluba, pele basikucita caamba Jwi. Tacidoonekwi kuti ciindi notubala Jwi lya Leza alimwi akuzibelesya nzyotubala, tunookkomene ncobeni mubuumi.—Jak. 1:25.