1. Ino ndubeta nzi luyoocitika ino-ino?

 TUPONA muciindi nokulangilwa kucitika kucinca kupati! Ino-ino, Jesu uyoobeteka muntu woonse uupona anyika. Jesu wakaamba ciyoosololela kulubeta oolu kwiinda mukwaambila basikwiiya bakwe “citondezyo” cabusinsimi bwakubako kwakwe alimwi “acamamanino aabweende bwazintu.” (Mt. 24:3) Businsimi oobu bujanika ku Matayo caandaano 24 alimwi a 25 mpoonya amuzibalo zili ku Marko caandaano 13 a Luka caandaano 21.

2. Ncinzi ncotutiibandike mucibalo eeci? Alimwi nkaambo nzi eeci cilatugwasya?

² Kutegwa tulibambile, Jesu wakabelesya zikozyanyo zyotatwe zyalo izili mbuli ncenjezyo kulindiswe. Zikozyanyo eezyi zyambelele ampongo, banakalindu bacenjede abafwubafwuba alimwi amatalenta. Cikozyanyo cimwi acimwi cilatugwasya kubona kuti Jesu uyoomubeteka muntu kweelana azintu zyacita. Mucibalo eeci, tulabandika zikozyanyo eezyi alimwi akubona ncotukonzya kwiiya kuli nzizyo. Cikozyanyo cakusaanguna ncotulaabandike ncambelele ampongo.

MBELELE AMPONGO

3. Ndilili Jesu nayoobeteka bantu?

³ Mucikozyanyo cambelele ampongo, Jesu wakaamba kuti bantu bayoobetekwa kweelana ambobakaatambula makani mabotu akuti naa bakabagwasyilizya banabokwabo ibananike. (Mt. 25:​31-46) ‘Lyamapenzi mapati,’ Jesu uyoobeteka bantu kuba mbelele naa mpongo kakusyeede ciindi cisyoonto kuti Amagedoni italike. (Mt. 24:21) Mbubwenya mweembezi mbwaandaanya mbelele ampongo, Jesu uyoobaandaanya  aabo bagwasyilizya basikumutobela bananike cakusyomeka kuzwa kuli baabo ibataciti oobo.

4. Kweelana alugwalo lwa Isaya 11:​3, 4, nkaambo nzi ncotukonzya kuba masimpe kuti Jesu uyoobabeteka cabululami bantu? (Amubone cili acivwumbyo.)

⁴ Businsimi bwamu Bbaibbele butondezya kuti Jehova wakasala Jesu kuba Mubetesi, aboobo uyoobabeteka cabululami bantu. (Amubale Isaya 11:​3, 4.) Ulabikkila maano kujatikizya zintu nzyobacita bantu, nzyobayeeya, nzyobaamba alimwi ambobabeendelezya banabokwabo Kristo bananike. (Mt. 12:​36, 37; 25:40) Jesu uyoobazyiba aabo ibakabagwasyilizya banabokwabo bananike alimwi amulimo wabo. a Nzila imwi iiyandika kapati aabo ibali mbuli mbelele mbobakonzya kubagwasyilizya banabokwabo Kristo nkwiinda mumulimo wakukambauka. Aabo babagwasyilizya bayoobetekwa kuba ‘balulami’ alimwi bayooba acoolwe cakutambula “buumi butamani” anyika. (Mt. 25:46; Ciy. 7:​16, 17) Eelo kaka oobu mbulumbu butaliboteli kuli baabo ibazumanana kusyomeka! Kwiinda mukuzumanana kusyomeka lyamapenzi mapati alimwi aakwiinda, bayoopa kuti mazina aabo akazumanane kuba “mubbuku lyabuumi.”—Ciy. 20:15.

5. Ino cikozyanyo cambelele ampongo citukulwaizya kucita nzi? Alimwi ino mbaani bajatikizyidwe?

⁵ Amutondezye kuti mulasyomeka. Cikozyanyo ca Jesu cijatikizya mbelele ampongo caamba kapati aabo ibajisi bulangizi bwakuyoopona anyika. Balatondezya kuti balijisi lusyomo kwiinda mukugwasyilizya banabokwabo Kristo mumulimo wakukambauka alimwi akubutobela cakusyomeka busolozi buzwa kumuzike uusyomeka alimwi uucenjede. (Mt. 24:45) Pele abalo aabo ibajisi bulangizi bwakujulu balakonzya kugwasyigwa akucenjezya ooku kuli mucikozyanyo eeci. Nkaambo nzi? Nkaambo kakuti Jesu ulabikkila maano kujatikizya bukkale bwabo, nzyobacita alimwi anzyobaamba. Abalo beelede kutondezya kuti balasyomeka. Amana buya, Jesu wakaamba zikozyanyo zimbi zyobilo zyakucenjezya izyaamba buyo bananike. Alimwi tulazijana zikozyanyo eezyi kulugwalo lwa Matayo caandaano 25. Lino atubandike cikozyanyo cabanakalindu bacenjede alimwi abafwubafwuba.

BANAKALINDU BACENJEDE ALIMWI ABAFWUBAFWUBA

6. Mbuti banakalindu bosanwe mbobakatondezya kuti bakalicenjede? (Matayo 25:​6-10)

⁶ Mucikozyanyo cabanakalindu, Jesu wakaamba banakalindu bali kkumi ibakaunka kuyoocinga sibwiinga. (Mt. 25:​1-4) Boonse bakali kulangila kumusangana sibwiinga kupobwe lyakwe lyabwiinga. Jesu wakaamba bakusaanguna bosanwe kuti “bakalicenjede” alimwi abamwi bosanwe kuti bakali “bafwubafwuba.” Banakalindu bacenjede bakalilibambilide alimwi bakalipakamene. Bakalilibambilide kumulindila sibwiinga nokuba kuti wakali kuyoosika ciindi camasiku. Aboobo, bakabweza mafwuta aamalambe kutegwa babelesye mumudima. Alimwi bakabwezelezya amafwuta aambi kutegwa babelesye kuti naa sibwiinga wamuka. Aboobo bakalilibambilide kutegwa malambe aabo azumanane kuyaka. (Amubale Matayo 25:​6-10.) Ciindi sibwiinga naakasika, banakalindu bacenjede bakamusangana kupobwe lyakwe lyabwiinga. Mbubwenya buyo, Banakristo bananike ibayoojanika balipakamene alimwi balasyomeka ciindi Kristo aakuboola, bayoomusangana Sibwiinga, Jesu, mu Bwami bwakwe  bwakujulu. b (Ciy. 7:​1-3) Mbuti kujatikizya banakalindu bosanwe bafwubafwuba?

7. Ncinzi cakabacitikila banakalindu bafwubafwuba? Alimwi ncinzi cakapa kuti cicitike boobo?

⁷ Mukwiimpana abanakalindu bacenjede, banakalindu bafwubafwuba tiibakalibambilide ciindi sibwiinga naakasika. Malambe aabo akali aafwaafwi kuzima alimwi kunyina nobakanyamwide mafwuta aambi. Ciindi nobakazyiba kuti sibwiinga wakali aafwaafwi kusika, bakaunka kuyakuula mafwuta. Ciindi sibwiinga naakasika balo tiibakalinapiluka. Aciindi eeco, “banakalindu ibakalibambilide bakanjila anguwe muŋanda yapobwe lyabwiinga, mpoonya mulyango wakajalwa.” (Mt. 25:10) Kumane ciindi banakalindu bafwubafwuba nobakapiluka akuyanda kunjila, sibwiinga wakabaambila kuti: “Mebo tandimuzyi pe.” (Mt. 25:​11, 12) Banakalindu aaba kunyina nobakalibambilide kuboola kwasibwiinga. Ino nciiyo nzi ncobaiya bananike?

8-9. Ino nziiyo nzi nzyobakonzya kwiiya bananike kuzwa kuli banakalindu? (Amubone acifwanikiso.)

⁸ Amutondezye kuti mulilibambilide alimwi akupakamana. Jesu tanaakali kwaamba kuti kwakali kuyooba nkamu zyobilo zyabananike, nkokuti inkamu yakalibambilide kulindila kusikila aciindi cakuboola kwa Jesu lyamapenzi mapati alimwi ayatakalibambilide. Muciindi caboobo, wakali kupandulula cakali kukonzya kubacitikila bananike ikuti kabatalibambilide kuliyumya cakusyomeka kusikila kumamanino. Mubukkale oobu, kunyina nobakali kuyootambula bulumbu. (Joh. 14:​3, 4) Eelo kaka aaya makani mapati! Tacikwe makani tujisi bulangizi bwakuyoopona kujulu naa anyika, toonse buyo tweelede kukubikkila maano kucenjezya ikuli mucikozyanyo cabanakalindu. Umwi aumwi wesu weelede kuzumanana kulangila alimwi akulibambila kuliyumya kusikila kumamanino.—Mt. 24:13.

⁹ Naakamana kwaamba cikozyanyo cabanakalindu kutondezya mbociyandika kuba bantu balibambilide alimwi bapakamene, Jesu waakaamba cikozyanyo camatalenta. Cikozyanyo  eeci citondezya mbociyandika kapati kubeleka canguzu.

MATALENTA

10. Mbuti bazike bobilo mbobakatondezya kuti balasyomeka? (Matayo 25:​19-23)

¹⁰ Mucikozyanyo camatalenta, Jesu wakaamba kujatikizya bazike bobilo ibakali kusyomeka kuli simalelaabo alimwi aumwi iwatakali kusyomeka. (Mt. 25:​14-18) Bazike bobilo bakatondezya kusyomeka kwiinda mukubeleka canguzu kutegwa bayungizye mali ali yaayo ngaakabapede simalelaabo. Katanaunka kucisi cimbi, wakabapa matalenta, nkokuti mali manji. Bazike bobilo basyomeka bakali bankutwe alimwi bakaabelesya kabotu mali. Ncinzi cakazwa mpawo? Ciindi simalelaabo naakapiluka, wakajana kuti bakayungizya aambi ziindi zyobilo atala ayaayo ngaakabapede. Simalelo wakabalumbaizya alimwi bakanjila kutegwa ‘bakondwe antoomwe asimalelaabo.’ (Amubale Matayo 25:​19-23.) Pele ino mbuti kujatikizya muzike watatu? Ino wakaabelesya buti mali ngaakamupa simalelaakwe?

11. Ncinzi cakamucitikila muzike “mutolo”? Alimwi nkaambo nzi?

¹¹ Muzike watatu wakatambula talenta lyomwe pele wakali “mutolo.” Simalelaakwe wakali kulangila kuti ulaibelesya kabotu talenta ndyaakamupa. Pele walo wakalizikka talenta eelyo. Ciindi simalelo naakapiluka, muzike ooyu wakapilusya buyo talenta ndilyonya lyomwe. Kunyina naakali kuzilanga kabotu zintu pe. Muciindi cakulilekelela akaambo kakwaalilwa kuyungizya mali aambi, muzike ooyu wakaamba simalelaakwe kuti wakali “muntu muyumu moyo.” Simalelo kunyina naakamukkomanina muzike ooyu. Kuyungizya waawo, wakanyangwa talenta ndyaakapedwe alimwi akutandwa muŋanda yasimalelaakwe.—Mt. 25:​24, 26-30.

12. Ino bazike bobilo basyomeka baiminina bani mazuba aano?

¹² Bazike bobilo basyomeka baiminina Banakristo bananike ibasyomeka. Simalelo, Jesu ubatamba kuti ‘banjile akukondwa antoomwe asimalelaabo.’ Balatambula bulumbu bwabo bwakujulu, nkokuti bubuke  bwakusaanguna. (Mt. 25:​21, 23; Ciy. 20:5b) Kulubazu lumwi, cikozyanyo cibyaabi camuzike mutolo cipa kucenjezya kubananike. Mubuti?

13-14. Ino nciiyo nzi ncobaiya bananike kuzwa kucikozyanyo camatalenta? (Amubone acifwanikiso.)

¹³ Amutondezye kuti muli bankutwe. Mucikozyanyo camatalenta, mbubwenya mbuli mucikozyanyo cabanakalindu, Jesu tanaakali kwaamba kuti bananike bakali kuyooba batolo. Muciindi caboobo, wakali kupandulula cakali kuyoobacitikila kuti naa baleka kuba basungu. Bakali kukonzya kwaalilwa kusinizya “bwiite akusalwa [kwabo]” alimwi tiibakali kuyoozumizyigwa kunjila mu Bwami bwakujulu.—2Pet. 1:10.

¹⁴ Zikozyanyo zya Jesu zijatikizya banakalindu alimwi amatalenta, zilatondezya caantangalala kuti Banakristo bananike boonse beelede kuba bantu balibambilide, bapakamene alimwi bankutwe. Pele sena kuli acimbi Jesu ncaakaamba ikucenjezya bananike? Inzya, nkocili! Majwi aa Jesu aajanika ku Matayo 24:​40, 41 aalo aamba zyalubeta lwamamanino lwabananike.

NGUNI “UYOOTOLWA”?

15-16. Mbuti lugwalo lwa Matayo 24:​40, 41 mbolutondezya kaambo bananike ncobeelede kuzumanana kulangila?

¹⁵ Katanaamba zikozyanyo zyotatwe, Jesu wakapandulula mbolunoobede lubeta lwamamanino kubananike lwalo ilwakali kuyooyubununa baabo mbaakakkomanina. Wakaamba kujatikizya baalumi bobilo babeleka mumuunda alimwi abamakaintu bobilo baziya aziyo. Mubukkale bumwi abumwi, boonse balibonya kuti babeleka mulimo uukonzyenye, pele Jesu wakaamba kuti omwe “uyootolwa mpoonya umwi uyoosiigwa.” (Amubale Matayo 24:​40, 41.) Mpoonya wakaambila basikumutobela kuti: “Aboobo amulangile, nkaambo tamuzyi buzuba Mwami wanu nayooboola.” (Mt. 24:42) Jesu wakaamba majwi aakonzyenye ayaaya naakamana kwaamba cikozyanyo cabanakalindu. (Mt. 25:13) Sena majwi aaya kuli mbwaaswaangene? Mbokuboneka. Balikke bananike basyomeka ‘mbabayootolwa,’ akutambulwa a Jesu mu Bwami bwakujulu.—Joh. 14:3.

¹⁶ Amutondezye kuti mulalangila. Munanike uli woonse uutazumanani kupakamana kumuuya takabunganizyigwi antoomwe ‘abasale.’ (Mt. 24:31) Alimwi buya, bantu ba Leza boonse, tacikwe makani abulangizi mbobajisi, beelede kubona majwi aa Jesu kuba ncenjezyo yakuzumanana kulangila alimwi akuzumanana kusyomeka.

17. Nkaambo nzi tatweelede kunyema ikuti Jehova wasala kunanika bamwi amuuya wakwe mazuba aano?

¹⁷ Tulimuzyi kabotu Jehova, aboobo tulasyoma kuti zintu zyoonse zyacita zililuzi. Kunyina notunyema ciindi Jehova nasala kunanika bantu basyomeka mazuba aano. c Tulayeeya Jesu ncaakaamba kujatikizya babelesi ibakatalika kubeleka aciindi cawoola lya 11 mucikozyanyo cakwe camuunda wamisaansa. (Mt. 20:​1-16) Aabo bakamuka kutalika kubeleka mumuunda wamisaansa bakatambula cakuvwola ceelene acabaabo bakasaanguna. Ncimwi buyo, tacikwe makani aciindi bananike nobasalwa, bayootambula bulumbu bwakujulu ikuti bazumanana kusyomeka.

AMUKUBIKKILE MAANO KUCENJEZYA

18-19. Ino ncinzi ncotwaiya kuzikozyanyo eezyi?

¹⁸ Ino ncinzi ncotwaiya? Kuli baabo bajisi bulangizi bwakuyoopona kukabe kutamani anyika, cikozyanyo cambelele ampongo citondezya mbociyandika kapati kuzumanana kusyomeka kuli Jehova lino alimwi aciindi camapenzi  mapati. Kakusyeede ciindi cisyoonto kuti Amagedoni italike, Jesu uyoobeteka baabo basyomeka kuti baleelela kutambula “buumi butamani.”—Mt. 25:46.

¹⁹ Alimwi twalanga-langa zikozyanyo zyobilo izicenjezya bananike. Mucikozyanyo ca Jesu cabanakalindu bacenjede alimwi abafwubafwuba, bosanwe bakatondezya kuti bakali basongo. Bakalilibambilide alimwi akupakamana, kusikila mane sibwiinga wasika. Pele banakalindu bafwubafwuba tiibakalibambilide pe. Aboobo sibwiinga tanaakabazumizya kujanika kupobwe lyakwe lyabwiinga. Ncimwi buyo andiswe tweelede kuti katulibambilide kulindila kusikila mane Jesu akanyonyoone bweende bwazintu oobu. Kuyungizya waawo, mucikozyanyo ca Jesu camatalenta, twabona bazike bobilo basyomeka ibakali bankutwe. Bakabeleka canguzu, aboobo simalelaabo wakabakkomanina. Pele muzike mutolo tanaakakkomaninwa asimalelaakwe pe. Ncinzi ncotwiiya? Tweelede kujata bubi mumulimo wa Jehova kusikila kumamanino. Mpoonya mucikozyanyo camamanino, twalanga-langa bananike mbobeelede kuzumanana kulangila kutegwa ‘bakatolwe’ a Jesu kubulumbu bwabo bwakujulu. Baliyandide kapati ‘kuyooyobololwa antoomwe’ akuba a Jesu kujulu. Yaakwiinda nkondo ya Amagedoni, bayooba banabwiinga ba Jesu mubwiinga bwa Mwanaambelele.—2Tes. 2:1; Ciy. 19:​7, 9.

20. Ncinzi Jehova ncayoocita kuli baabo batobela kucenjezya kwakwe?

²⁰ Ciindi calubeta lwa Jesu cili afwaafwi kusika, pele tatweelede kuyoowa pe. Kuti twazumanana kusyomeka, Taateesu wakujulu siluyando uyootupa “nguzu zigambya iziinda zyabantu” kutegwa ‘tukakonzye . . . kwiima kumbele lya Mwanaamuntu.’ (2Kor. 4:7; Lk. 21:36) Kufwumbwa naa tujisi bulangizi bwakujulu naa bwaanyika, tuyoomukkomanisya Taateesu ikuti naa twatobela kucenjezya ikuli muzikozyanyo zya Jesu. Kwiinda muluzyalo lwa Jehova, mazina eesu ‘ayoojanika kaalembedwe mubbuku’ lyabuumi.—Dan. 12:1; Ciy. 3:5.