Tatweelede kuyeeya kuti akaambo buyo kakuti tiibakaliko ciindi Jesu naakatalisya Mulalilo wa Mwami, basikwiiya bali 70 tiibakakkomaninwa anguwe naa kuti bakamusiya. Aciindi aawa, Jesu wakali kuyanda buyo kuba abaapostolo bakwe.

Boonse bali 12 alimwi abali 70 bakali basikwiiya ba Jesu. Akati kabasikwiiya bakwe banji, Jesu wakasaanguna kusala baalumi bali 12, balo mbaakaita kuti baapostolo. (Lk. 6:​12-16) Wakali mu Galilaya ciindi ‘naakaita ibali Kkumi Ababili’ mpoonya ‘akubatuma kuyookambauka Bwami bwa Leza akuponya.’ (Lk. 9:​1-6) Nokwakainda ciindi, kali mu Judaya, Jesu “wakasala abamwi bali 70 akubatuma bobilo-bobilo.” (Lk. 9:51; 10:1) Aboobo, Jesu wakalijisi basikwiiya mumasena aayindene-indene ibakali kukambauka kujatikizya nguwe.

Ba Juda ibakaba basikwiiya ba Jesu bakacili kucita Pobwe Lyakwiindilila amwaka, ambweni antoomwe amikwasyi yabo. (Kul. 12:​6-11, 17-20) Kali afwaafwi kufwa, Jesu abaapostolo bakwe bakaunka ku Jerusalemu. Pele tanaakaambila basikwiiya bakwe boonse ibakali kuzwa mu Judaya, Galilaya alimwi a Pereya kuti bamusangane kucita Pobwe Lyakwiindilila. Eeci citondezya kuti Jesu wakali kuyanda buyo kuba abaapostolo bakwe aciindi eeci. Wakabaambila kuti: “Ndali kuyandisya kapati kulya Pobwe Lyakwiindilila eeli andinywe nenditanapenga.”—Lk. 22:15.

Kuli kaambo kabotu kakapa kuti acite boobo. Jesu wakali afwaafwi kufwa kali “Mwanaambelele wa Leza ooyo uugusya cibi canyika.” (Joh. 1:29) Wakali kuyoofwida ku Jerusalemu, kwalo nkozyakali kupedwa zipaizyo kuli Leza kwaciindi cili mbocibede. Mwanaambelele wa Pobwe Lyakwiindilila wakali kuyeezya bana Israyeli kuti Jehova wakabagusya kuzwa mu Egepita. Pele kwiinda mucipaizyo cakwe, Jesu wakali kuyoocita zinji. Mucikozyanyo, bantu boonse wakali kuyoobaangununa kucibi alufwu. (1Kor. 5:​7, 8) Akaambo kacipaizyo ca Jesu, baapostolo bali kkumi ababili bakali kuyooba cibeela cantalisyo yambungano ya Bunakristo. (Ef. 2:​20-22) Amana buya, munzi uusalala Jerusalemu ujisi “mabwe aantalisyo aali 12” aalembedwe “mazina aali 12 aabaapostolo bali 12 ba Mwanaambelele.” (Ciy. 21:​10-14) Masimpe, baapostolo basyomeka bakali kuyooba amukuli mupati mukuzuzikizya makanze aa Leza. Aboobo, kalalimvwisya kaambo Jesu ncaakali kuyanda kuba ambabo ciindi naakali kucita Pobwe Lyakwiindilila lyamamanino alimwi a Mulalilo wa Mwami.

Ibali 70 alimwi abasikwiiya bamwi tiibakaliko acilalilo eeco a Jesu. Nokuba boobo, basikwiiya boonse ibakali kusyomeka bakali kuyoogwasyigwa a Mulalilo wa Mwami ngwaakatalisya Jesu. Boonse kumbele ibakazyi kuba Banakristo bananike bakali kuyoonjila mucizuminano cabwami eeco Jesu ncaakaambila baapostolo bakwe busiku oobo.—Lk. 22:​29, 30.