SENA MULIMVWA KUTI MULI BANTU BAKKOMENE? Kuti kacili boobo, ino ncinzi cimupa kukkomana? Sena mukwasyi wanu, mulimo wanu naa mbukombi bwanu? Ambweni mulangila cintu cimwi cikonzya kumupa kukkomana, mbuli kumanizya cikolo, kujana mulimo mubotu naa kuula mootokala mupya.

Bantu banji balakkomana ciindi nobazuzikizya mbaakani imwi naa kujana cintu ncobali kulombozya. Pele ino lukkomano oolo lutola ciindi cilamfwu buti? Kanji-kanji inga ndwaciindi cisyoonto buyo, calo cikonzya kusololela kukutyompwa.

Lukkomano caamba kubotelwa lyoonse, kukkutila alimwi akukondwa mubuumi, alimwi akulombozya kuti bukkale buli boobo buzumanane.

Mbwaanga lukkomano ncintu iceelede kuzumanana, lukkomano taluyeeme azintu nzyajana muntu mubuumi, pele luyeeme abuumi mbwapona. Ikuti muntu waamba kuti, “Ndiyookkomana ndaaku . . . ” mubwini muntu ooyo usumpya lukkomano.

Mucikozyanyo, amweezyanisye lukkomano akupona buumi buli kabotu. Ino mbuti mbotukonzya kupona buumi oobo buli kabotu? Tweelede kulya zyakulya zijisi busani, kunyanyaasya mubili alimwi akuba abukkale buli kabotu. Ncimwi buyo, lukkomano lulaboola kwiinda mukutobela nzila yeelede alimwi akupona kweelana anjiisyo zigwasya.

Ino ninjiisyo nzi naa mbube nzi ibukonzya kutupa kukkomana? Nokuba kuti njiisyo zimwi zilayandika kapati kwiinda zimwi, injiisyo eezyi zitobela zilagwasya kapati:

• KUKKUTILA AKUBA BAABI

• KUPONA BUUMI BULI KABOTU AKUZILANGA KABOTU ZINTU

• LUYANDO

• KULEKELELA

• KUZYIBA NCOTUPONENA

• BULANGIZI

Bbuku lilemekwa kapati lijisi busongo lyaamba kuti: “Balikkomene aabo batakwe kampenda mubuumi bwabo.” (Intembauzyo 119:1) Lino atulange-lange mbotukonzya kujana lukkomano mubuumi.