INO NZIINDI ZYONGAYE NOMWAKAMVWA KUTI LUKKOMANO ALIMWI AKUZWIDILILA ZILABOOLA AKAAMBO KAKUVWULA KWAZINTU NZYOMUJISI NAA LUBONO? Akaambo kakuba amuzeezo ooyu, mamiliyoni aabantu balabeleka mawoola manji kapati kutegwa bajane mali manji. Pele sena mali alimwi azintu zilakonzya kuleta lukkomano lutamani? Ino bumboni butondezya nzi?

Kweelana ancoyaamba magazini iitegwa Journal of Happiness Studies, kufwumbwa kuti katujisi nzyotuyandika mubuumi, kuba amali manji takukonzyi kutupa kukkomana kapati naa kuba abuumi buli kabotu. Mali kwaagama taali mabi pe. Cibalo cimwi camumagazini iitegwa Monitor on Psychology cakaamba kuti “kwaayandisya kapati [mali] nkokupa kutakkomana. Majwi aaya aleendelana alulayo lwamu Bbaibbele ilwakalembwa myaka iitandila ku 2,000 yainda ilwakuti: “Kuyandisya mali ngomuyanda wamisyobo yoonse yazintu zibyaabi, eelyo kwiinda mukuba aluyandisisyo luli boobu bantu bamwi . . . baliyasaula koonse-koonse amacise manji.” (1 Timoteyo 6:9, 10) Ino macise aayo abikkilizya nzi?

KULIBILIKA AKUBULA ŊONZI AKAAMBO KAKUYANDA KUKWABILILA LUBONO. “Ŋonzi zyamubelesi zilalweela, kunyina makani naa cakulya ncalya ncisyoonto naa ncinji, pele zintu zinji zyamuvwubi tazimupi koona pe.”—Mukambausi 5:12.

KUTYOMPWA AKAAMBO KAKUTI LUKKOMANO NDOMWALI KULANGILA TIILWAJANIKA. Mubufwaafwi, kutyompwa ooku kulaboola akaambo kakuti mali taakkutwi. “Muntu uuyandisya nsiliva takakkutili ansiliva pe, awalo muntu uuyandisya buvwubi takakkutili azyeezyo nzyajana.” (Mukambausi 5:10) Alimwi kuyandisya lubono kulakonzya kupa muntu kuleka kubikkila maano kuzintu ziyandika kapati izileta lukkomano, mbuli kuba aciindi cakuba antoomwe amukwasyi alimwi abalongwe naa kucita zintu zyabukombi.

KUUSA ALIMWI AKUNYEMA CIINDI MALI NAABULA NGUZU NAA MAKWEBO NAAYAANSI. “Utalijayi buya kuyandaula lubono. Koleka, utondezye busongo. Walanzya meso aako kulindulo, taluko pe, nkaambo ncobeni lulamena mababa mbuli aasikwaze akuuluka.”—Tusimpi 23:4, 5.

KUKKUTILA. “Kunyina ncotwakaletelezya munyika eeyi, alimwi kunyina ncotukonzya kubwezelezya kuzwa mulinjiyo. Aboobo twanoojisi cakulya azisani, tunookkutila azintu eezyi.” (1 Timoteyo 6:7, 8) Bantu ibajisi bube bwakukkutila tabajisi cilengwa cakutongooka, alimwi bube oobu bulabakwabilila kukuba amunyono. Akaambo kakuti tabayandi zintu zinji zyakumubili kwiinda zeezyo nzyobakonzya kuba anzizyo, balalikwabilila kukulibilika alimwi akukutyompwa.

BWAABI. “Kupa kulakkomanisya kapati kwiinda kupegwa.” (Milimo 20:35) Bantu baabi balakkomana kapati nkaambo balayanda kukkomanisya bamwi, nokuba kuti ncobakonzya buyo kupa nciindi cabo cisyoonto alimwi anguzu zyabo. Kanji-kanji balajana zintu zinji zitakonzyi kuulwa amali, mbuli luyando, kulemekwa alimwi abalongwe beni-beni, ibabaabila camoyo woonse abalo.—Luka 6:38.

KUBABIKKILA MAANO BANTU KWIINDA ZINTU ZYAKUMUBILI. “Ncibotu kulya buyo cisyumani kakuli luyando kwiinda kulya nyama yaŋombe iineneede kumwi kakuli lusulo.” (Tusimpi 15:17) Nkaambo nzi kapati ikali mukapango aaka? Kumvwana abantu kulayandika kapati kwiinda zintu zyakumubili. Alimwi luyando lulayandika kapati kutegwa muntu akkomane, mbubwenya mbotutiibone kumbele.

Ba Sabina, imukaintu uukkala ku South America, bakaiya bubotu bwanjiisyo zyamu Bbaibbele. Nobakasiigwa abalumi babo, ba Sabina bakali kupenga kujana zintu nzyobakali kuyandika mubuumi alimwi azyabana babo basimbi bobilo. Bakajisi milimo yobilo calo icakali kupa kuti lyoonse kababuka kuma 04:00hrs. Nokuba kuti bakajisi bubi, ba Sabina bakayeeya kwiiya Bbaibbele. Ncinzi cakatobela?

Mali ngobakali kujana kunyina naakavwula mpoonya-mpoonya. Pele bakacinca kapati mbobakali kuzilanga zintu mubuumi. Mucikozyanyo, bakajana lukkomano luboola akaambo kakuyanda kusololelwa a Leza. (Matayo 5:3) Bakajana balongwe beni-beni akati kabasyominyina. Alimwi bakajana lukkomano luboola akaambo kakwaambila bamwi zintu nzyobakaiya.

Bbaibbele lyaamba kuti: “Busongo bulabonwa kuti buliluleme kwiinda mumilimo yambubo.” (Matayo 11:19) Kweelana alugwalo oolu, kukkutila, kuba baabi alimwi akubabikkila maano bantu kwiinda zintu zyakumubili, kuyoolibonya kuti nzezintu zyeelede kucitwa.