Lwiiyo iluyeeme anjiisyo zyamu Bbaibbele lulaanguzu zyakucinca maumi aabantu. Amubone zikozyanyo zyobilo eezyi: caba Ricardo alimwi acaba Andres.

BA RICARDO: Nondakajisi myaka yakuzyalwa iili 15, ndakanjila mukakamu kazigwebenga. Balongwe bangu bapya bakali kundiyunga citaambiki. Mane buya, ndakaba ambaakani yakupika ntolongo kwamyaka iili 10. Ambweni eeci inga calimvwisya mbuli kuti mbufwubafwuba. Pele mucilawo mondakali kukkala, aabo ibakapika ntolongo kwamyaka minji bakali kunyomenenwa kapati alimwi akulemekwa. Aboobo andime ndakali kuyanda kuba mbuli mbabo.

Ndakazicita zintu zyoonse nzyobacita bantu bapona buumi bwabugwebenga, mbuli kubelesya misamu iikola, kutalilemeka mumakani aakoonana alimwi akuba sinkondo. Busiku bumwi twakatalika kudubulana akakamu kamwi kazigwebenga. Ndakali kuyeeya kuti ndilajaigwa, pele ndakatija kakunyina akulicisa. Nocakacitika eeci, ndakatalika kuzinzibala kuyeeya kujatikizya buumi bwangu alimwi ambaakani zyangu, aboobo ndakabona kuti ndeelede kucinca. Pele munzila nzi? Ino nkookuli nkondakali kukonzya kujana lugwasyo?

Bunji bwababbululu bangu tiibakakkomene pe. Buumi bwabo bwakali bwamapenzi. Pele mukwasyi wabaayisya bamwi wakaliindene kapati. Ndakalizyi kuti mbantu bali kabotu alimwi ndakalizyi kuti bakali kupona kweelana anjiisyo zyamu Bbaibbele. Mane buya aciindi cimwi musyule bakalindiyiisyide kuti zina lya Leza ngu Jehova. Aboobo kalitanalampa kuzwa ciindi notwakali kudubulana, ndakapaila kuli Jehova kumwi kandilyaamba zina lyakwe ikumulomba kuti andigwasye. Icakandigambya ncakuti, buzuba bwakatobela, umwi wa Bakamboni ba Jehova wakandiswaya! Kamboni ooyu wakatalika kundiyiisya Bbaibbele.

Kalitanalampa, ndakasikilwa sunko lipati. Kanji-kanji, balongwe bangu bakaindi bakali kunditumina fooni, kundilomba kuti tukeendeende ambabo. Nokuba kuti cakali ciyumu, ndakali kukaka. Ndakalikanzide kuzumanana kwiiya Bbaibbele. Eelo kaka ndilikkomene kuti ndakazumanana! Buumi bwangu bwakacinca mukulaba kwaliso, alimwi ndakalujana lukkomano lwini-lwini.

Aciindi cimwi ndilayeeya kandaambila Leza mumupailo kuti ndakalilyaabide kupika ntolongo kwamyaka iili 10 kutegwa bantu kabandilemeka mbuli umwi wamukakamu kazigwebenga. Aboobo ndakamulomba kuti andizumizye kuti ndimubelekele kwamyaka iili 10 mbuli mukambausi waciindi coonse kutegwa ndigwasye bamwi mbubwenya mbondakagwasyigwa andime. Leza wakawiingula mupailo wangu, nkaambo lino ndakkwanya myaka iili 17 kandili mukambausi waciindi coonse. Alimwi buya, kunyina nondakakulyata kuntolongo.

Nokuba boobo, bunji bwabalongwe bangu bakaindi bali kupika ntolongo kwamyaka minji. Bamwi bakafwa. Ndalanga musyule, ndilabalumba kapati babbululu bangu Bakamboni. Balo bakaliindene kapati, nkaambo bakali kupona kweelana ancolyaamba Bbaibbele. Ndakatalika kubalemeka kapati kwiinda mbondakali kulemeka muntu uuli woonse  iwakali mukakamu kazibwebenga. Pele kwiinda zyoonse, ndilamulumba kapati Leza akaambo kakundiyiisya nzila mbotu yakupona.

BA ANDRES: Ndakakomenena mucilawo bantu mobakali bacete mwalo misamu iikola, bugwebenga, bujayi alimwi abuvwuule mozyakadumide kapati. Bataata bakali bacakolwa alimwi bakajisi cilengwa cakubelesya musamu uukola uutegwa cocaine. Bakali kuzwangana kapati abamaama lyoonse mane buya akulwana.

Kandicili mwana kapati, ndakatalika kunywa bukoko alimwi akubelesya misamu iikola. Bunji bwaziindi ndakali kujanika mumigwagwa, kandibba alimwi akusambala zintu nzyondakali kubba. Nondakali kuyaabukomena, bataata bakasola kundileta munsi-munsi ambabo, pele nzila njobakabelesya tiiyakali kabotu pe. Bakandiyiisya kuleta misamu iikola cakusisikizya alimwi azintu zimwi zitazumizidwe kuzwa mucisi cimbi mpoonya akuzisambala. Eeci cakandipa kupanga mali manji mukaindi kasyoonto. Kumane buzuba bumwi bakapokola bakaboola kuŋanda yangu akundijata. Bakandaanga kwamyaka iili 5 muntolongo nkaambo bakandijanina mulandu wakuyanda kujaya muntu.

Bumwi buzuba kuseeni kwakali cakwaambilizya, ikutamba basintolongo kumubandi wamu Bbaibbele iwakali kucitwa a Bakamboni ba Jehova. Ndakayeeya kuti ndijanike. Nzyondakamvwa zyakandikkomanisya, aboobo ndakatalika kwiiya Bbaibbele a Bakamboni. Tiibakali kucinca zintu nzyaamba Magwalo kutegwa bantu batanyemi, pele bakanditondezya zyeelelo zya Leza zisumpukide izyakulilemeka.

Tiilyakalampa, ndakabona kuti inga tiindacikonzya kucinca kakunyina kugwasyigwa, kwaambisya ciindi nobakatalika kundikonga basintolongoma aabo ibatakali kuzikkomanina nzyondakali kwiiya. Aboobo ndakapaila kulomba nguzu alimwi abusongo, mpoonya Jehova wakandigwasya. Muciindi cakuyoowa akaambo kakukonga kwabo, ndakaba abusicamba bwakwaambila basintolongoma bamwi kujatikizya makani aamu Bbaibbele.

Nocakasika ciindi cakuti ndizwe muntolongo, tiindakakkomana kapati nkaambo ndakalizyibide kukkala muntolongo, aboobo ndakali kuyanda kuti kandicikkede! Nondakali kuzwa, basintolongo bamwi bakali kundibbaibbisya. Mane buya bamwi bakali kwaamba kuti, “Weende kabotu omuntu wa Leza!”

Cilandiyoosya ndayeeya buumi bwangu mbobwakali kunooba ikuti nondatakamuzumizya Leza kuti andiyiisye. Eelo kaka ndilamulumba kapati Leza akaambo kaluyando ndwajisi kulindime, akuti tanaakandibona kuba muntu uutakonzyi kucinca. a