“Amuzumanane . . . kulekelelana camoyo woonse nokuba kuti umwi kajisi kaambo kakutongooka mweenzinyina.”—BAKOLOSE 3:13.

Toonse tulalubizya. Aboobo tulakonzya kulubizyila bamwi naa balo balakonzya kutulubizyila. Eeci caamba kuti, toonse tuyandika kulekelela alimwi akulekelelwa. Ciindi notwalekelela, tulaleka kulimvwa bubi kujatikizya muntu ooyo iwakatulubizyila. ‘Tatupilusizyi muntu bubi,’ alimwi tatuzumanani kuyeezya muntu ooyo kujatikizya cibi ncaakatucitila. (Baroma 12:17) Pele ino mbuti kuti catucisa kapati cakuti twaalilwa kuleka kuyeeya ceeco icakacitika? Nkokuti tweelede kubandika cabulemu amuntu ooyo katuli tobilo. Mbaakani yesu yeelede kuba yakupanga luumuno, ikutali kutondezya kuti muntu ooyo nguwakalubizya.—Baroma 12:18.

‘Cakulicesya amubone bamwi kuti balamwiinda.’—BAFILIPI 2:3.

Ikuti katulicesya alimwi akutondezya bulemu, bantu banookkomana kuyanzana andiswe. Balizyi kuti tulakonzya kubeendelezya caluzyalo, kubabikkila maano alimwi akuti tatukonzyi kuyanda kubanyemya acaali. Pele kuti katuyeeya kuti tulabainda  bamwi naa kuti lyoonse katuyanda buyo kucita zintu mbuli mbotuyanda swebo, tuyooleta manyongwe alimwi akuzwangana. Bantu banootutantamuka, alimwi buya, ciyootukatazya kujana balongwe.

“Leza tasalululi, pele muzisi zyoonse kufwumbwa muntu uumuyoowa akucita ziluleme ulatambulwa kulinguwe.”—MILIMO 10:34, 35.

Mulengi wesu tasalululi bantu akaambo kacisi nkobazwa, mwaambo wabo, bukkale bwabo naa mubala. Bbaibbele lyaamba kuti: “Kuzwa kumuntu omwe wakalenga bantu ibali muzisi zyoonse.” (Milimo 17:26) Eeci caamba kuti, bantu boonse mbanabokwabo. Aboobo ikuti bantu boonse katubeendelezya cabulemu acaluzyalo, tunoobapa kukkomana, andiswe lwesu tunookkomene alimwi tunookkomanisya Mulengi wesu.

“Amulisamike . . . kubomba moyo.” —BAKOLOSE 3:12.

Ikuti katuli babombe moyo, tupa kuti bamwi balimvwe kwaanguluka. Balaanguluka kubandika andiswe alimwi akutululamika nkaambo balizyi kuti tulazumanana kukkazika moyo. Alimwi ciindi uumwi notwamunyemya, kwiingula kwesu kwabubombe kulakonzya kupa kuti aleke kunyema kapati. Lugwalo lwa Tusimpi 15:1 lwaamba kuti: “Kuvwiila kabotu kulalesya bukali, pele majwi mabi alanyemya.”

“Kupa kulakkomanisya kapati kwiinda kupegwa.”—MILIMO 20:35.

Bunji bwabantu mazuba aano mbaasyaacivwulemwangu alimwi balibikkila buyo maano lwabo beni. Pele tulakonzya kuba alukkomano lwini-lwini ikuti katuli baabi. (Luka 6:38) Bantu baabi balikkomene nkaambo balabayanda bantu kwiinda zintu zyakumubili. Luyando ndulwenya oolu lubapa kuba bantu balumba alimwi akutondezya kulumba kwabo ciindi umwi naabagwasya. (Bakolose 3:15) Amulibuzye kuti, ‘Mbantu bali buti mbondiyanda kuba aambabo, ibaunyu alimwi batalumbi naa bantu baabi alimwi balumba?’ Ncinzi ncotwiiya kuli ceeci? Amube muntu uuli mbuli bantu mbomuyanda kuba aambabo.—Matayo 7:12.