Kuyeeka muya mubi kulakonzya kujaya zintu zipona anyika. Mbunga ya World Health Organization yaamba kuti mbasyoonto kapati bantu munyika bayeeka muya mubotu.

Kuyeeka muya uusofweede kulakonzya kupa muntu kuciswa bulwazi bwakufwundilila, kkansa yakumapunga alimwi abulwazi bwamoyo. Bantu babalilwa ku 7,000,000 balafwa mwaka amwaka akaambo kakuyeeka muya uusofweede.

Nyika yesu ibambidwe munzila yakuti kaipa muya mubotu uuyandika kuzintu zyoonse zipona. Pele eeci cilakonzyeka lilikke buyo kuti bantu kabatausofwaazyi muya. Atubone zikozyanyo zisyoonto buyo.

• Makani aakuti zisamu zibelesya muya wa carbon dioxide alizyibidwe kapati. Zisamu zya mangrove zilaubelesya kapati muya wa carbon dioxide akaambo kakuti zimena mumasena aatusensa twamaanzi. Zisamu zya eezyi zilagusya muya wa carbon dioxide munji kapati kwiinda zisamu zijanika muzisaka.

• Buvwuntauzi bwaino-ino butondezya kuti zisamu zipati mbuli cisamu citegwa kelp tazibelesyi buyo muya wa carbon dioxide pele alimwi zilauyobola. Matuvwu aacisamu ca Kelp ajisi muya mukati calo cipa kuti kaacikonzya kwiibauka mumaanzi. Kuti muya wa carbon dioxide wazwa mumatuvwu aaya cipa kuti akkalile aansi mulwaanje. Matuvwu aaya alakkala kunsi aalwaanje kwamyaka minji kapati.

• Ciindi bantu nobakajalilidwe lyabulwazi bwa COVID-19, kwakajanwa kuti muya wakali kabotu nkaambo kwakanyika bantu bausofwaazya. Mu 2020, ciindi makkampani aapanga zintu alimwi amamoota aamwi naakaleka kweenda, kwakaba muya mubotu cakufwambaana. Kweelana a “2020 World Air Quality Report,” masi manji akajisi muya mubotu ciindi bantu nobakajalilidwe akaambo kabulwazi bwa COVID-19.

Mfwulumende zyazumanana kwaambila basimakwebo kucesya kusofwaazya muya. Abalo  basayaansi, bajana nzila zipya zyakucesya penzi lyakusofwaazya muya. Mucikozyanyo, nzila imwi njakubelesya ma microbe kucinca musamu uukola kutegwa utajayi bantu. Kuyungizya waawo, basyaazibwene bakulwaizya bantu kweenda amaulu naa kuccovwa ncinga muciindi cakubelesya myoota alimwi akujana nzila zyakubelesya malaiti masyoonto aŋanda.

Kweelana ambozyakaamba mbunga zimwi mu 2022 kubikkilizya aya World Health Organization alimwi aya World Bank, kuli azimbi ziciyandika kucitwa kumana penzi eeli.

Lipooti yakapegwa mu 2020, itondezya kuti bantu banji munyika babelesya zintu zisofwaazya muya ciindi nobajika alimwi anobabelesya tekkinoloji. Mumasena manji mbasyoonto bantu bakonzya kuula masitoovwu mapya naa zintu zimwi buyo zibelesya mungwimba.

“Mboobu mbwaamba Leza mwini-mwini, Jehova, Mulengi wamajulu alimwi . . . ooyo wakayala nyika azintu zizwa mulinjiyo, ooyo uupa muya kubantu bakkala alinjiyo.”—Isaya 42:5.

Leza wakalenga muya ngotuyoya azintu zisalazya muya, alimwi ulijisi nguzu zitamani aluyando kubantu. Aboobo, ncabusongo kusyoma kuti Jehova uyakuusalazya muya uusofweede? Amubone cibalo cakuti: “Leza Usyomezya Kuti Nyika Inooliko Lyoonse.”