Kucinca kwambobuca kupa kuti zilenge zyamumaanzi mbuli ma coral reef, njili alimwi azilenge zimwi buyo zyamumaanzi zijatikizyigwe. Basayaansi baamba kuti ma coral reefs oonse alo aagwasilizya zilenge zimwi zyamumaanzi kuti zizumanane kupona ali muntenda yakuti inga afwa mumyaka buyo iili 30 iitobela.

Basyaazibwene bayeeyela kuti bayuni bamulwaanje batandila ku 90% bakalya kale zipepa alimwi akuti banyama banji bakkala mulwaanje balafwa mwaka amwaka akaambo kakulya zipepa zijanika mumaanzi.

 Mboobu mbwaakaamba UN Secretary-General António Guterres mu 2022: “Tatulubambi kabotu lwaanje.” Alimwi wakayungizya kuti: “Eeci mazuba aano inga twaciita kuti ‘Ocean Emergency.’”

Lwaanje alimwi azintu zipona mulindulo zibambidwe munzila yakuti kazilibambulula kuti naa tiizyanyonganizyigwa azintu nzyobacita bantu. Bbuku lyakuti Regeneration: Ending the Climate Crisis in One Generation lipandulula kuti, ikuti bantu kabatasowi dooti mulwaanje, nkokuti “lulakonzya kuzumanana kulisalazya.” Atubone zikozyanyo zisyoonto buyo:

• Tuuka tusyoonto tutegwa phytoplankton tulayobola muuya wa carbon dioxide, walo uyeeyelwa kuti nguupa kuti kakuli kukasaala kwanyika kwiindilide. Kunze lyaboobo, tuuka ootu tulikke tulakonzya kuyobola carbon dioxide weelene ayooyo uukonzya kuyobolwa azisamu zyoonse, bwizu alimwi azisyango zimwi buyo kuti twazibikka antoomwe.

• Tuuka tusyoonto kapati tulya nswi zifwide alimwi amafuwa aanswi eezyi, calo cikonzya kupa kuti maanzi abe aadooti mulwaanje kuti naa tiizyagusyigwa. Mpoonya tuuka ootu atwalo tulaligwa kuzilenge zimwi zyamumaanzi. Kweelana a Smithsonian Institution Ocean Portal, bubambe oobu “bupa kuti lwaanje kalusalala.”

• Nzila inswi zinji mbozigaya cakulya cipa kuti kube kucesyegwa kwa asidi walo uukonzya kujaya ma corals, njili azilenge zimwi zyamumaanzi.

Ikuti dooti tiilyazumizyigwa kunjila mulwaanje inga tiikwayandika kusalazya. Basyaazibwene bakulwaizya bantu kunoobelesya tubbeeke alimwi azibelesyo zimwi buyo muciindi cakunoobelesya mapulasitiki akwiile kwaasowaila buyo.

Kuli azimbi zyeelede kucitwa. Caino-ino mumwaka buyo omwe ibambunga imwi iilanganya makani aabulondo bakabwezelela dooti lyakasowedwe kunkomwe aalwaanje lisika kuma taani aali 9,200 muzisi zili 112 buyo. Pele ooyu mweelwe musyoonto kapati wadooti linjila mulwaanje amwaka.

Ba National Geographic bakaamba kuti: “Bantu babelesya kapati oyilo, gaasi alimwi akkoo, calo cipa kuti zilenge zyamumaanzi kazyaalilwa kusalazya lwaanje.”

“Nyika izwide zintu nzyookalenga. Ndoluya lwizi, eelo kaka ndulamfwu alimwi ndupati kapati! Mulindulo muli zilenge zyuumi zyeendeenda zitakonzyi kubalwa, ziniini alimwi azipati.”—Intembauzyo 104:​24, 25.

Mulengi wesu wakalenga lwaanje kuti kalucikonzya kulisalazya. Amubone kaambo aaka: Kuti mulengi kaluzyi kabotu lwaanje alimwi azilenge zipona mulindulo, tulakonzya kuba masimpe kuti uyoozibambulula zintu zyoonse izyanyonyoona lwaanje. Amubone cibalo cakuti: “Leza Usyomezya Kuti Nyika Inooliko Lyoonse,” icili apeeji 15.