Nkaambo nzi Bantu Ncobatacibulemeki Buumi Bwabo?

AMULIZYE

MBUTI BAKAMBONI BA JEHOVA MBOBAKULWAIZYA KULEMEKA BUUMI?

Bukkale alimwi amicito iitondenzya kutalemeka buumi zilakonzya kunyonganya zilawo alimwi abuumi bwabanamaleya.

Kufweba takuleteli buyo bulwazi bwakkansa pele alimwi kunyonganya nguzu zyamubili zilwana malwazi. Bunji bwabantu balafwa abulwazi bwakkansa yakumapunga akaambo kakuti balafweba naa muntu uuli munsi lyabo ulafweba.
Bantu banji balanyongana mumizeezo akaambo kamicito yakudubula bantu yacijaye-jaye. Lipooti imwi itondezya kuti, aabo ibakafwutuka kukudubulwa ntobolo kucikolo, inga balazumanana kupenga mumizeezo nokuba kuti kwainda myaka minji.
Banamutekenya ibeenzya myootokala kumwi kabakoledwe bukoko naa misamu imwi iikola, babikka buumi bwabasimweendanzila muntenda. Ciindi bantu nobatabulemeki buumi naaceya, kanji-kanji banamaleya mbobajatikizyigwa.

MBUTI MBOMUKONZYA KUTONDEZYA KUTI MULABULEMEKA BUUMI?

Amubukwabilile buumi bwanu. Tamumukide naaceya ikuleka micito imwi mbuli kufweba tombwe, misanga yatuncini, kuciindizya kunywa bukoko naa kulikondelezya kwiinda mukubelesya misamu iikola. Micito iili boobu ilakonzya kunyonganya buumi bwanu alimwi itondezya kuti tamubulemeki buumi bwabayandwa banu abwabanamukwasyi.

“Atulisalazye kuzintu zyoonse zisofwaazya mubili.”—2 Bakorinto 7:1.

Amuyeeye mbomukonzya kulikwabilila nywebo lwanu Abamwi. Kutegwa mulikwabilile kuntenda, amwiibambulule ŋanda yanu alimwi akuzibamba kabotu zintu zili mumo. Kamweenzya kabotu mootokala alimwi akuubamba kabotu. Mutazumizyi bantu kumuyunga kucita zintu zikonzya kuleta ntenda naa lufwu.

“Ikuti naa wayaka ŋanda mpya, ciluli weelede kuciyakila citabililo kutegwa ŋanda yako itabi amulandu wabulowa nkaambo muntu ulakonzya kuloka kuzwa alinjiyo.”—Deuteronomo 22:8. a

Amube aluzyalo kubantu. Kulemeka buumi caamba kuba aluzyalo kubantu mbotwiindene limwi mubala, bazwa kumasi aambi, bavwubi naa bacete. Amana buya, kusalaulana alimwi alusulo izivwulide kapati munyika, zilaletwa akaambo kankondo.

“Amuzisowe zintu zyoonse eezyi, kulutila, bukali, kunyema, kubwenta alimwi amajwi aakusampaula antoomwe abubi buli boonse. Pele amufwidilane luzyalo.”—Baefeso 4:31, 32.

MBUTI BAKAMBONI BA JEHOVA MBOBAKULWAIZYA BANTU KULEMEKA BUUMI?

Bakamboni ba Jehova bakulwaizya bantu kupona buumi buli kabotu. Bubambe bwesu bwakuyiisya bantu Bbaibbele alimwi akujanika kumiswaangano, bulabagwasya kuleka zilengwa zibyaabi zikonzya kunyonganya buumi bwabo.

Tulaatobela cakulomya malailile aajatikizya bukwabilizi mumasena eesu aamayake. Basikulisungula ibayaka masena eesu aakukombela alimwi ayaayo ngotubelesya kucitila zikolo zisumpula lwiiyo lwamu Bbaibbele balalikwabilila kutenda. Amana buya, aalo mayake eesu alalingulwa ciindi aciindi ikutobela malailile aabukwabilizi aakubusena ooko.

Tulapa lugwasyo kubantu bacitikilwa ntenda. Mu 2022, twakagwasyilizya muntenda zipati-pati zibalilwa ku 200 munyika yoonse alimwi akubelesya mali aakasangwa aatandila ku 12 miliyoni dolaazi ikupa lugwasyo kuli baabo bakajatikizyidwe.

Ciindi nokwakabbuka bulwazi bwa Ebola Kumasi aaku West Africa mu 2014 alimwi aku Democratic Republic of Congo mu 2018, twakali kuyiisya bantu mbobakonzya kulikwabilila akutayambukizya bamwi bulwazi oobu ibujaya. Twakali kutuma baiminizi besu kuyoobandika abantu mutwe wamakani wakuti “Kumvwida kulafwutula.” Kunze lyaboobo, twakali kubikka twakusambila kumaanza kumanjililo aabusena buli boonse bwakukombela alimwi akukulwaizya bantu mbociyandika kusamba kumaanza akutobela nzila zimbi zyakulikwabilila.

Mucisi ca Sierra Leone, bakaambilizya awailesi ikulumbaizya Bakamboni ba Jehova akaambo kakugwasya Bakamboninyina alimwi abantu bambi buyo ikulikwabilila kukazunda ka Ebola.

Busena bwakusambila kumaanza a Ŋanda ya Bwami lyabulwazi bwa Ebola ku Liberia mu 2014

a Mulawo ooyu, wakali kutondezya mbocakali kuyandika kapati kukwabilila banamukwasyi alimwi abamwi buyo muŋanda.

SINSIMUKA!