Nkaambo nzi Bantu Ncobatacilemekani?

AMULIZYE

NKAAMBO NZI NCOCIYANDIKA KAPATI KULEMEKA BAMWI?

Kulemeka bamwi kulalesya mazwanga alimwi kulakonzya kupa kuti zintu zitaindili kubija.

Kasimpi kamu Bbaibbele kamwi kaamba kuti: “Kuvwiila kabotu kulalesya bukali, pele majwi mabi alanyemya.” (Tusimpi 15:1) Kutabalemeka bamwi mumajwi alimwi amumicito kulakonzya kupa kuti bukkale bwiindile kubija, amana kanji-kanji zizwa mpawo ziletela mapenzi.
Jesu wakaamba kuti: “Mulomo waamba zizwide mumoyo.” (Matayo 12:34) Kuti katutabalemeki bamwi, cilakonzya kutondezya kuti tatubaboni munzila iili kabotu bantu bamusyobo uumbi, mwaambo, cisi naa ibakakomezyegwa munzila yiindene ambotwakakomezyegwa.

Mubuvwuntauzi bwakacita caino-ino bantu bainda ku 32,000 bakabuzyigwa-buzyigwa mumasi aali 28, ibainda kucisela bakaamba kuti tabanabwene kuvwula kwabantu batajisi bulemu mbuli mazuba aano (2023 Edelman Trust Barometer).

MBUTI MBOMUKONZYA KUTONDEZYA KUTI MULABALEMEKA BAMWI?

Tweelede kubalemeka bantu boonse nokuba kuti inga katwiindene mbotuzibona zintu. Amuzizyibe zintu nzyomuzuminana ambabo. Eeci ciyoomugwasya kutayuminina mutwaambo naa kutabeteka bamwi.

“Amuleke kubeteka kutegwa mutabetekwi.”—Matayo 7:1.

Amweendelezye bamwi munzila njomuyanda kuti abalo kabamweendelezya. Kuti kamubeendelezya caluzyalo bamwi abalo bayoocita mbubwenya.

“Mbubonya mbomuyanda kuti bantu bamucitile, andinywe amubacitile mbubonya.”—Luka 6:31.

Kamulekelela. Kuzyiba kuti muntu tanaajisi makanze aakumulubizyila, kuyoomugwasya kwaalanga buyo majwi aatali kabotu ngakonzya kumwaambila naa cintu citali kabotu ncakonzya kumucitila.

“Bupampu bwamuntu bulamulesya kufwambaana kunyema, alimwi cilamubotela kujatila milandu.”—Tusimpi 19:11.

MBUTI BAKAMBONI BA JEHOVA MBOBAKULWAIZYA MUUYA WAKULEMEKANA?

Swebo Tobakamboni ba Jehova tukulwaizya muuya wakulemekana mucilawo motukkala alimwi ankotubelekela.

Tulabayiisya Bbaibbele bantu boonse, pele tatubasinikizyi kusyoma nzyotusyoma naa kutobela mizeezo yesu. Muciindi caboobo, tulasolekesya kutobela lulayo lwamu Bbaibbele notwaambila bamwi mulumbe wesu “amoyo mubombe alimwi abulemu kapati.”—1 Petro 3:15; 2 Timoteyo 2:24.

Kunyina notubeteka bantu alimwi tulabatamba kumiswaangano yesu yambungano bantu ibakakomezyegwa mubukkale bwiindene-indene ibayanda kwiiya ncolyaamba Bbaibbele. Tulasolekesya ‘kulemeka bantu bamisyobo yoonse.’—1 Petro 2:17.

Tulazilemeka mfwulumende zyamumasena motukkala. (Baroma 13:1) Tulaitobela milawo alimwi akutela mitelo. Alimwi nokuba kuti tatutoli lubazu mutwaambo twacisi, tulakulemeka kusala kwabamwi mumakani aaya.

SINSIMUKA!