Amutwaambile mbomwakakomena.

Ndakazyalwa mu 1966 alimwi ndakakomenena mu Taiwan. Bazyali bangu bakali kunjila cikombelo ca Tao alimwi acaci Buddha. Nokuba kuti twakali kukomba bamasyaanene alimwi akupaila kuzibumbwa, kunyina notwakali kusyoma kuti kuli Mulengi.

Nkaambo nzi ncomwakasalila lwiiyo lwazilenge zipona (biology)?

Kandicili mwana, ndakali kubabikkila maano banyama bavwubwa alimwi ndakali kuyanda kwiiya mbondikonzya kubasilika alimwi akusilika bantu. Kwaciindi cili mbocibede, ndakaiya busilisi bwabanyama mpoonya mukuya kwaciindi ndakaiya makani aajatikizya nsalalila—lwiiyo ndondakali kuyeeya kuti alwalo lulakonzya kundigwasya kuzyiba buumi mbobwakatalika.

Aciindi eeco mwakali kusyoma munjiisyo yakusanduka kwazintu. Amutwaambile, ino nkaambo nzi?

Basyaazibwene kucikolo caku yunivesiti bakali kutuyiisya njiisyo yakusanduka, bakali kutwaambila kuti kuli bumboni buliko businizya makani aaya. Aboobo ndakabasyoma.

Ncinzi cakapa kuti mutalike kubala Bbaibbele?

Kuli zintu zyobilo zyakandipa kucita boobo. Cakusaanguna, ndakayeeya kuti akati kabaleza banji mbobakomba bantu, kweelede kuti kuli omwe mupati kwiinda boonse. Pele ino nguuli? Cabili, ndakalizyi kuti Bbaibbele ndibbuku lilemekwa kapati. Aboobo ndakatalika kuunka kumakkilasi aakwiiya Bbaibbele

Ciindi nondakatalika kwiiya ku Belgium’s Catholic University of Leuven mu 1992, ndakaunka kucikombelo ca Katolika mpoonya ndakalomba mupaizi kuti andigwasye kumvwisya Bbaibbele, pele wakakaka.

Aboobo ino mwakabujana buti bwiinguzi kumibuzyo yanu?

Nokwakainda myaka yobilo, kandicili ku Belgium kucita buvwuntauzi bwasayaansi, ndakaswaanganya mukaintu uutegwa Ruth waku Poland, wakali umwi wa Bakamboni ba Jehova. Wakaiya mwaambo waci Chainizi kutegwa acikonzye kugwasya basicikolo baayunivesiti ibakali kuyanda kwiiya kujatikizya Leza. Ndakali kwaapailila makani aaya, aboobo ndakakkomana kapati kumuswaanganya.

Ba Ruth bakanditondezya kuti Bbaibbele lileendelana asayaansi nokuba kuti talili bbuku lyasayaansi. Mucikozyanyo, mulembi wa Bbaibbele Davida wakaamba boobu kuli Leza mumupailo: “Meso aako akandibona nindakacili nsalalila; zizo zyangu zyoonse zyakalilembedwe mubbuku lyako, amazuba nozyakabambwa, kakutanaba cizo nociba comwe akati kazyo.” (Intembauzyo 139:16) Nokuba kuti Davida wakabelesya mwaambo wakweema, mubwini wakaliluzi! Noliba leelyo zizo zyamubili nozitanaba, malailile aajatikizya mbozyeelede kuba inga nkwaali kale oonse. Mboliluzi Bbaibbele mumakani aaya cakandigwasya kusyoma kuti ndi Jwi lya Leza. Alimwi ndakatalika kusyoma kuti kuli buyo Leza wakasimpe omwe, Jehova. ¹

Ino ncinzi cakamupa kusyoma kuti Leza nguwakalenga buumi?

Makanze aakucita buvwuntauzi bwasayaansi ngakuyanda kuzyiba  masimpe kutali kuzumina mizeezo yakuyeeyela buyo. Buvwuntauzi bwangu bujatikizya mboitalika nsalalila bwakandipa kucinca mizeezo yangu, ndakazyiba kuti buumi bwakalengwa buya. Mucikozyanyo, basyaazibwene nobabamba muncini mupati balabamba zibeela ziindene-indene akubona masimpe kuti cibeela cimwi acimwi cabikkwa mpoceelede munzila iili kabotu. Eeci cilikozyenye amboikomena nsalalila pele yalo ilaabumpiyo-mpiyo bunji.

Buumi bulatalika aseelo lyomwe ilipangwa kwiinda mukuswaanganya seelo lizwa kumwaalumi amukaintu, tee kayi?

Inzya. Mpoonya kaseelo aaka kasyoonto kapati kalalyaandaanya akutalika kupanga tumaseelo tunji. Kwaciindi cili mbocibede, mweelwe wamaseelo ulayungizyika mumawoola aali 12 kusika ku 24. Mpoonya maseelo aaitwa kuti Stem cells alatalika kupangika. ² Maseelo aaya alakonzya kupanga misyobo yoonse yamaseelo aali akati kamaseelo aali 200 naa maseelo aaindene-indene aayandika mbuli maseelo aamubulowa, aamumafwuwa, aamunsinga (nerve), alimwi amaseelo aambi buyo kutegwa kupangwe mwana uuzulide.

Maseelo aali kabotu alapangwa aciindi ceelede alimwi munzila yeelede. Cakusaanguna alalibunga-bunga kutegwa abe manji, kwamana boobo apanga zizo zyamubili. Sena kuli syaazibwene uukonzya kulemba malailile aajatikizya mbocicitika eeci? Taakwe uukonzya kucita oobo, pele malailile aayeendelezya mboikomena nsalalila alilembedwe kabotu-kabotu mu DNA. Nondilanga-langa bubotu boonse oobu, cindipa kusyoma ncobeni kuti Leza nguwakalenga buumi.

Ino ncinzi cakapa kuti mube Bakamboni ba Jehova?

Mubufwaafwi, nduyando. Jesu Kristo wakaamba kuti: “Eeci nceciyoozyibya bantu boonse kuti muli basikwiiya bangu, ikuti kamujisi luyando akati kanu.” (Johane 13:35) Luyando oolu talusalululi. Talukwe makani amuntu nkwazwa, zilengwa, naa mubala wakwe. Ndakalubona luyando oolu aboobo ndakatalika kuyanzana a Bakamboni.