CAKULUULA CABA DAMI

Kumatalikilo cakali kulibonya mbuli kuti mutwe buyo uucisa kwakaindi kasyoonto. Pele bulwazi bwabataata nobwakaindila, bamaama bakaita ambulansi. Ndiciyeeyede basilisi nobakababweza. Tiindakazyiba kuti cakali ciindi camamanino kubonana abataata kabali baumi. Nokwakainda mazuba otatwe, bataata bakafwa abulwazi bwakuzimba nsinga. Ndakajisi buyo myaka iili cisambomwe.

Kwamyaka minji ndakali kulipa mulandu akaambo kalufwu lwabataata. Mumizeezo ndakali kuyeeya mbocakacitika ciindi basilisi nobakababweza, alimwi ndakali kulibuzya kuti: ‘Ino nkaambo nzi ncondakali kwiile kulangilila? Nkaambo nzi ncondatakacita cintu cimwi?’ Ndakali kulanga bantu bamwi bapati baciswa alimwi akulibuzya kuti, ‘Nkaambo nzi balo bacipona kakuli bataata bakafwa?’ Mukuya kwaciindi, bamaama bakandigwasya kwaamba mbondakali kulimvwa. Alimwi mbuli Bakamboni ba Jehova, mbungano yakali kutugwasyilizya kapati.

Bantu bamwi bayeeya kuti, ulakonzya kulila ciindi mapenzi naacitika mpoonya akuluba, pele kulindime tiicakali boobo pe. Mubwini tiindakalila kusikila nondakakkwanya myaka iili kuma 13 a 14.

Kukulwaizya kwangu kubana bakafwidwa muzyali nkwakuti, “Amubandike amuntu umwi kujatikizya mapenzi ngomujisi. Cicitika ncakuti, ikuti mwafwambaana kwaambila muntu umwi mbomulimvwa, mulakonzya kuba abuumi buli kabotu.”

Mubwini, nciyumu kucita zintu zipati mubuumi bwangu kumwi kandizyi kuti bataata tabako. Pele ndilaumbulizyigwa acisyomezyo camu Bbaibbele cijanika kulugwalo lwa Ciyubunuzyo 21:4, lwalo lwaamba kuti ino-ino Leza “uyoosindula misozi yoonse kumeso [eesu], alimwi lufwu talukabi limbi, akwalo koomoka, kulila nokuba kucisa takukabi limbi pe.”

CAKULUULA CABA DERRICK

Ziindi zibotu kapati zimwi nzyondiyeeya nzyotwakajisi abataata nkuloba nswi alimwi akukkala mumalundu kwaciindi cisyoonto ambabo. Bakali kwaayanda kapati malundu.

Bataata bakajisi bulwazi bwamoyo kwaciindi cili mbocibede; ndilayeeya ciindi comwe naa zyobilo nondakaunka kubabona kucibbadela kandicili muniini. Pele tiindakali kumvwisya mbobwakali bupati bulwazi bwabo. Bataata bakafwa abulwazi bwamoyo nondakajisi myaka iili fwuka.

Nobakafwa, ndakalila kapati. Ndakalimvwa mbuli kuti ndafwundilila, alimwi tiindakali kuyanda kubandika amuntu uuli woonse. Kunyina nondakalimvwide bobuya mubuumi bwangu, alimwi tiindakali kuyanda kucita cintu cili coonse. Kumatalikilo kabunga kakucikombelo mondakali kuzulilwa, kakatondezya kubikkila  maano, pele muciindi buyo cisyoonto kakacileka. Bantu bakali kwaamba majwi mbuli aakuti, “Cakali ciindi cabauso” naa “Leza wakabaita” naa “Lino bali kujulu.” Majwi aayo kunyina naakali kundipa kukkutila pe, pele tiindakajisi luzyibo lwacini Bbaibbele ncoliyiisya kujatikizya zintu eezi.

Mpoonya bamaama bakatalika kwiiya Bbaibbele a Bakamboni ba Jehova, kumane mebo amupati wangu musankwa twakabasangana. Twakaiya kujatikizya ciimo cabantu bafwide alimwi acisyomezyo ca Leza icuumbulizya cabubuke. (Johane 5:28, 29) Pele lugwalo ilwakandigwasya kapati ndugwalo lwa Isaya 41:10, alo Leza mpaamba kuti: “Utayoowi pe, nkaambo ndilaanduwe. Utalibiliki pe, nkaambo ndime Leza wako. Ndilakuyumya, inzya ndilakugwasya.” Ikuzyiba kuti Jehova wakali andime cakanduumbulizya kapati ciindi nondakali mubuumba, alimwi cicinduumbulizya.

CAKULUULA CABA JEANNIE

Nondakajisi myaka iili ciloba, bamaama bakafwa abulwazi bwakkansa. Buzuba boonse ndakalimvwide mbuli kuti ndilota buya. Ndilayeeya kuti bakafwida aŋanda alimwi bamakaapa bakaliko. Ndilayeeya kuti boonse tiibakakopene. Ndilayeeya kuti buzuba oobo kumangolezya twakalalila mai aakukanga. Ndakalimvwa mbuli kuti buumi bwangu bwakali kuyaabupindamuka kabotu-kabotu.

Aciindi eeco—alimwi anokwakainda myaka eeco nocakacitika—ndakali kuyeeya kuti ndakeelede kuliyumya akaambo kamusyoonto wangu musimbi, aboobo, tiindakalila. Kusikila lino, ndilakufwundilizya kucisa nkondimvwa mumoyo, pele eeco tacili kabotu.

Ndilayeeya luyando alimwi alugwasyo ndotwakajana kuzwa kumbungano ya Bakamboni ba Jehova yakali mucilawo eeco. Nokuba kuti nceciindi notwakali kutalika kujanika kumiswaangano ku Ŋanda ya Bwami, basyomima bakali kutuzunguluka mbuli kuti twakali bamukwasyi wabo kwamyaka minji. Kwamwaka woonse tandiyeeyi ikuti naa bataata bakali kujika lyoonse cakulya cakumangolezya nkaambo lyoonse twakali kucijana amulyango.

Lugwalo lundikulwaizya kapati ndugwalo lwa Intembauzyo 25:16, 17. Mulugwalo oolu, sintembauzyo wakakombelezya Leza kuti: “Kondicebuka akundifwida luzyalo, nkaambo ndili endikke alimwi ndinyina mugwasyi. Mause aali mumoyo wangu avwulisya; kondigusya mumapenzi aangu.” Cilanduumbulizya kuzyiba kuti mubwini inga toli olikke ciindi nouside. Leza inga ulaanduwe. Kwiinda mukugwasyigwa a Bbaibbele, ndacikonzya kuzumanana mubuumi alimwi akubikkila maano kuzintu zibotu, mbuli cisyomezyo cuumbulizya camu Bbaibbele cabubuke. Ndilaabulangizi bwakubabona bamaama alimwi akubazyiba kabotu kabalondokede muparadaiso anyika.—2 Petro 3:13.

Sena inga tiimwayanda kwiiya zinji kujatikizya mulumbe uumbulizya wamu Bbaibbele kuli baabo balila? Amukkope kakunyina kubbadela broshuwa yakuti “Iciindi Muntu Ngomuyanda Nafwa.” Amuunke a www.pr418.com/toi, akulanga aalembedwe kuti MABBUKU > MABBUKU AMABROSHUWA.