3 Ncinzi Cipa Kuti Bantu Bali Kabotu Kabapenga?
Ikaambo Ncociyandika
Tacikkomanisyi kubona bantu bali kabotu kabapenga. Alimwi banji babona kuti tacigwasyi kuba muntu uuli kabotu ikuti naa kozyi kuti ulangilwa kupenga.
Ncomweelede Kuyeeya
Bamwi basyoma kuti bantu balafwa alimwi akuzyalululwa kwaziindi zili mbozibede. Baamba kuti aabo bakacita zintu zili kabotu balazyalululwa akupona buumi buli kabotu, pele aabo ibakacita zintu zibi balazyalululwa akupona buumi bwamapenzi. Kweelana anjiisyo eeyi, basyoma kuti naba muntu uuli kabotu ulakonzya kupenga ikuti naa wakacita zintu zibi “kaindi.” Nokuba boobo . . .
-
Ino kupenga ooko inga kwagwasya buti, mbwaanga muntu ooyo iwaambwa kuti wakazyalululwa taziyeeyi noziba zintu nzyaakacita kaindi?
-
Ikuti naa tuyoociswa naa kucitikilwa ntenda akaambo kazintu nzyotwakacita kaindi, nkaambo nzi ncotusolekesya kupona buumi buli kabotu alimwi akweeleba ntenda lino?
AMWIIYE ZINJI
Amweebelele kavidiyo kakuti Nkaambo Nzi Leza Ncazumizya Kupenga? ikali a jw.org.
Ncolyaamba Bbaibbele
Kupenga tacili cisubulo kuzwa kuli Leza.
Mukwiimpana, bunji bwamapenzi alacitika cakutayeeyela, kanji-kanji alacitika akaambo kakuti muntu uli abusena buteelede aciindi citeelede.
“Talili lyoonse basilubilo nobazunda mukusiyana, basinguzu talili lyoonse nobazunda munkondo, basongo talili lyoonse nobajana cakulya, bacenjede talili lyoonse nobajana lubono, abalo aabo bajisi luzyibo talili lyoonse nobazwidilila, nkaambo boonse buyo balasikilwa ziindi zyamapenzi akucitikilwa zintu zitalangilwi.”—MUKAMBAUSI 9:11.
Cibi ncotwakakona acalo cilapa kuti katupenga.
Kanji-kanji bantu babelesya bbala lyakuti “cibi” ikwaamba cintu cibyaabi ncacita muntu uumwi. Nokuba boobo, Bbaibbele alyalo lilalibelesya bbala eeli ikwaamba cintu ncobakakona bantu boonse, ibali kabotu alimwi ababi.
“Ndakazyalwa kandijisi mulandu, naa ndili sizibi kuzwa ciindi baama nobakandimita.”—INTEMBAUZYO 51:5, Bupanduluzi buyungizyidwe.
Cibi ncobakakona bantu cabaletela mapenzi aataambiki.
Tiicanyonganya buyo cilongwe ncotujisi a Mulengi wesu, pele alimwi catupa kutakamantana azilenge zya Leza zyoonse. Eeci caleta mapenzi aataambiki kuli umwi aumwi wesu alimwi akubantu boonse buyo.
“Ciindi nendiyanda kucita cibotu, icibi cilaandime.”—BAROMA 7:21.
“Zilenge zyoonse zilatongela lyoonse alimwi zilaamacise caantoomwe.”—BAROMA 8:22.
Andiza Inga Mwaakkomanina Ayaaya
NGAZI YAMULINDIZI
Nkaambo Nzi Zintu Zibyaabi Ncozibacitikila Bantu Bali Kabotu?
Ibbaibbele lilaamba zintu zyotatwe zipa kuti bantu kabapenga.
