Mbuti Tekinoloji Mboikonzya Kujatikizya Kuyeeya Kwanu?
Bantu bayandika kwiiya zintu zinji, nkokuti zyakucikolo, zyakumulimo naa makani aambi buyo. Tekinoloji ilakonzya kubagwasya bantu kwiiya. Kuzwa kaindi kunyina nocakali cuuba-uba boobu kujana makani manji, kakunyina kuzwa aŋanda naa acuuno.
Nokuba boobo, bantu banji ibaibelesya kapati tekinoloji bajana kuti . . .
-
bajisi buyumuyumu bwakubikkila maano ciindi nobabala.
-
bajisi penzi lyakufwambaana kunyonganizyigwa.
-
balafwambaana kulendelelwa ciindi nobali balikke.
NCOMWEELEDE KUZYIBA
KUBALA
Bantu ibavwula kubelesya matabbuleti, mafooni amakkompyuta zimwi ziindi tabakkaziki moyo kubala cibalo coonse naa bbuku, aboobo balabala cakubinda kutegwa bajane buyo kaambo kapati.
Kubala cakubinda nkubotu ciindi nomuyanda kujana bwiinguzi cakufwambaana kumubuzyo. Nokuba boobo, eeyi taili nzila mbotu yakubala ciindi nomuyanda kwaamvwisya ncobeni makani aabandikwa.
NCOMWEELEDE KUYEEYA: Sena mulakukkomanina kubala zibalo zilamfwu? Nkaambo nzi ncomukonzya kwiiya kabotu ikuti kamubala cintu cimwi cakubikkila maano?—TUSIMPI 18:15.
KUBIKKILA MAANO
Bantu bamwi balasola kubelesya tekinoloji kucita zintu zinji aciindi comwe. Mucikozyanyo, balakonzya kutumina balongwe tugwalo twaafooni kumwi kabali mukwiiya. Pele balakonzya kunyonganizigwa, alimwi akutabikkila maano kuzintu zyoonse zyobilo.
Nokuba kuti cilakatazya kubikkila maano kucintu comwe, pele kucita boobo kulakonzya kumugwasya kwiiya. Mukubusi wazina lya Grace wakaamba kuti: “Kupa kuti kulubizya alimwi akutyompwa kuceye. Ndabona kuti ncibotu kubikkila maano kucintu comwe aciindi comwe, akweeleba zintu zinyonganya.”
NCOMWEELEDE KUYEEYA: Sena tekinoloji ipa kuti cimukatazye kumvwisya alimwi akuyeeya nzyomwaiya?—TUSIMPI 17:24.
KUBA NYOLIKKE
Bantu bamwi tabakukkomanini kuba balikke, aboobo babelesya tekinoloji kutegwa batalimvwi kulendelelwa. Mukaintu wazina lya Olivia wakaamba kuti: “Ndilimvwa kulendelelwa kwainda buyo maminiti aali 15 ikuti kanditalangi afooni, atabbuleti naa kuyasya TV.”
Nokuba boobo, ziindi zyakuba nyolikke zipa coolwe cakuzinzibala kuyeeya, icibeela ciyandika kapati cakwiiya, kutali buyo kubakubusi pele akubapati.
NCOMWEELEDE KUYEEYA: Ciindi nomuli nyolikke, sena mulacibelesya ciindi eeci kuzinzibala kuyeeya?—1 TIMOTEYO 4:15.
NCOMUKONZYA KUCITA
AMULILINGULE KUJATIKIZYA MBOMWIIBELESYA TEKINOLOJI
Muunzila nzi momukonzya kubelesya tekinoloji kutegwa imugwasye kwiiya? Mbuti mboikonzya kumusinkila kubikkila maano alimwi akwiiya?
NJIISYO YAMU BBAIBBELE: “Kobambilila busongo bugwasya alimwi akuyeeya kabotu.”—TUSIMPI 3:21.
Andiza Inga Mwaakkomanina Ayaaya
BAKUBUSI BALABUZYA
Mbuti Mbondikonzya Kwiiya Kubikkila Maano?
Amulange-lange bukkale botatwe tekinoloji mboikonzya kumunyonganya kutegwa mutabikkili maano alimwi ancomukonzya kucita kutegwa mubikkile maano.
SINSIMUKA!
Sena Mujisi Zintu Zinji Kapati Zyakucita?
Bantu banji bajisi buyumuyumu bwakuulanganya kabotu mulimo wabo alimwi akulanganya buumi bwamumukwasyi. Ino ncinzi cileta penzi eeli? Ino ncinzi cikonzya kucitwa kutegwa penzi eeli limane?
BAKUBUSI BALABUZYA
Sena Cili Kabotu Kucita Zintu Zinji Aciindi Comwe?
Sena inga mwacikonzya kucita zintu zinji aciindi comwe kakunyina kunyongana?
